Tuesday, February 14, 2012

باموت فيك



كل سنة في نفس المعاد بتبدأ دعوات لمقاطعة الـ Valentine's Day سواء بجد لفكرة إنه "عادة مُقحَمة من الغرب" أو "مش متماشي مع التقاليد" أو بهزار لفكرة المصاريف والهدايا والدباديب (سواء من النوع المحلي أو الدبدوب الدولي المحرض والممول!) والورد والكروت والتيليفونات..

والسنة دي ما حدش قطع العادة الحقيقة.. معظمنا إن ماكانش كلنا هيكون شاف على الأقل هاشتاج أو صورة أو ستاتس أو تعليق بيتريق على اليوم من زاوية معينة..

الظروف السنادي مختلفة شويتين لناس كتير.. البعض شايف إن المناسبة وقتها غريب وسط الألم والحزن اللي بتمر بيه أسر كتير.. وسط اللخبطة والحيرة اللي عائلات كتير حاسّاها سواء لأنهم مش عارفين أولادهم-أجوازهم فين.. أو بسبب إنها عارفين إنهم مش هيقدروا يشوفوهم تاني!

ناس ربطت بين الورد اللي بيتقدم في عيد الحب والورد اللي بيتحط على قبور شباب برئ رحل بدري.. لون أحمر في شرايط لف هدايا ..ودم في إيدين مسئولين كتير لسّة مش بيتحاسبوا لحد دلوقت..

ناس كتير شايفين إن "الحب" و"الموت" مايجوش مع بعض.. مايتحطوش في جملة واحدة.. مايعبروش عن حاجة واحدة..

طب ليه بنقول: أنا بموت فيك (يعني باحبك قوي)؟.. ليه بنقول: باحبك موت (يعني برضه بحبك قوي)؟

أسطورة كانت بتحكي عن اتنين بيحبوا بعض ولأن البنت كانت عايزة تتأكد من محبة الولد سألته لو مستعد إنه يموت عشانها.. الولد أعلن استعداده.. وطلعوا مع بعض فوق جبل عالي .. ولما وصلوا للقمة الولد قالها : ياللا زُقيني!

مين حواليك مستعد إنه يموت عشانك؟ إنت ممكن تموت عشان مين؟

يمكن لو إنت أو إنتي زوج أو زوجة أو أب أو أم تكون الإجابة عن السؤال سهلة... بنسمع أمهاتنا وهم بيقولوا من قلبهم قد إيه مستعدين يدّونا عينيهم – بجد- المهم يشوفونا سعدا.. والغريب إنهم عارفين إنهم لو إدونا عينيهم مش هيعرفوا "يشوفونا" أصلا

في حياتي وحياتك فيه حد مات عشانا.. فيه ناس مستعدة تموت عشانا.. وشفناهم حوالينا في أماكن كتيرة.. بيموتوا وغيرهم بيعيشوا.. بيضحوا بحياتهم عشان "بيحبوا" البلد..

لو مش كده.. اتمنالك تلاقي الشخص ده.. اللي يكون مستعد يموت عشانك.. وتكون مستعد تموت عشانه..

عيد الحب مش كله أغاني وشوكولاتة ودباديب وورد..

مافيش حب أعظم من إن حد يضحي بحياته عشان حد بيحبه..
Happy Valentine's

14 comments:

  1. I am the first to comment... you hit the nail on the head... Fantastic again and again.

    ReplyDelete
  2. Don't know what to say coz my tears are coming down.
    Very powerful post . Love never fails . Thanks ya
    Maged .
    N

    ReplyDelete
  3. مافيش حب أعظم من إن حد يضحي بحياته عشان حد بيحبه
    انت لخصت كل اللي ممكن يتقال في آخر سطر بجد ..... وفالنتاين السنة دي مليان لون احمر .. مش شرط يكون دباديب ولا فيونكات ولا فساتين ولا ورد .. في دم في كل ميدان وشارع فيكي يا مصر لناس ماتت في حب البلد دي ... كل سنة وهوما طيبين واحنا قادرين نكمل المشوار من بعدهم

    ReplyDelete
  4. دايما بتشوف الأمور من منظور مختلف الحب مش مقصور عالحب الرومانسي بين واحد وواحده بموت فيك ياماجد :‏)‏

    ReplyDelete
  5. I'm blessed to have that amazing one who already did it for me, my sweet J.C and also by all the precious martyrs who gave themselves for my freedom.... I'm really blessed....it's all about Love. Thnk u Maged

    Joanna

    ReplyDelete
  6. الحقيقة كمان محدش يستاهل أني أعيش عشانه بجد و أموت عشان احقق أمنياته اللا اللي مات عشاني...وغالباً مش هايعمل كده غير حد عظيم ويستاهل

    ReplyDelete
  7. you have reached greatness in that post.
    رائع مبهج ومؤلم في نفس الوقت

    ReplyDelete
  8. ليس لأحد حب اعظم من هذا ...

    على فكرة القصة بتاعت الولد اللى رمى نفسه قدام البنت دى أنا سمعتها مرة على موضوع تانى ، اللى هو جملة
    ladies first
    بيقول أن الولد كان من طبقة سفلى والبنت كانت من مستوى أعلى وفشلت كل محاولات زواجهم .. اتفقوا أنهم ينتحروا سوا .. طلعوا فوق جبل ورفض الولد أن البنت ترمى نفسها الأول علشان مش هايستحمل يشوفها جثة .. فرمى نفسه الأول .. البنت لما شفته جثة خافت جدا ، وراجعت نفسها ولقت أن الحياة ممكن تستمر .. فرجعت بيتها وأتجوزت وخلفت عادى :))
    من يومها الرجالة بيقولوا ليدز فيرست علشان عارفين أنهم لو سابوا الستات وراهم هايرجعوا فى كلامهم :)

    ReplyDelete
  9. for those who died 4 the sake of love: LOVE NEVER FAILS.They didn't loose but they gained their lives,as 4 u dear maged yr talent is shinning in each post u write,GOD bless u.
    Hala Helmy

    ReplyDelete
  10. بموت فيك على فكرة :)

    ReplyDelete
  11. Happy Valentine Maged

    ReplyDelete