Sunday, December 25, 2011

عبد الهادي

 أشجار كريسماس في كل مكان.. أغاني مشهورة.. ألوان وزينة.. تماثيل بابا نويل في كل حتة.. أخضر وأحمر وفضي.. أجراس واحتفالات خاصة.. مزيكا.. لبس جديد.. ديك رومي.. فيلم Home Alone!

مش بس كدة.. لكن مع اختلاف الطقوس من بلد للتانية ومن عيلة للتانية غالبا بيجمع الكل استقبالهم للهدايا..

الهدايا!
عنصر مهم قوي في معظم إن ماكانش كل المناسبات.. بغض النظر عن إذا كانت المناسبة دينية أو لأ.. وكل المجتمعات تقريبا ليها توجه في الهدايا.. هدايا يعتبروها مناسبة.. هدايا أحسن من غيرها..

إيه اللي بيخلي الهدية مميزة؟ إيه اللي يخلليني أحب هدية أكتر من هدية تانية؟ إيه اللي يفرق معايا؟ إيه اللي يخليني "أحتفظ" بالهدية أو "أفتكرها" لوقت طويل؟

إجاباتنا "النموذجية" تقول إن تمن الهدية مايفرقش معانا! تلاقي مثلا قبل عيد الأم: ماما نِفسِك في إيه على عيد الأم؟ <إني أشوفكم مبسوطين يا حبيبي> ماما.. اللي بعده.. نجيبلك إيه هدية يا ماما؟ <ولا حاجة يا حبيبي.. ماتتعبش نفسك>.. لأ لازم يا ماما.. <أي حاجة بسيطة.. كارت صغير.. خاتم دهب.. أي حاجة!!>

طبعا اللي يفرق معانا قوي هو "مين" اللي بيهدي.. هدية من خطيبتي غير هدية من مصطفى ابن عمك!

يفرق معايا ساعات المجهود المبذول في الهدية.. ملفوفة حلو.. الكارت ملزوق كويس.. كمان "الإبداع" أو "الفكرة" اللي في الهدية.. لو الهدية فيها خيال و فن بتفرق جدا.. وياريت بقى لو حاجة كان نفسي فيها أو محتاجها يبقى هايل..

ممكن الحاجات دي كلها تبقى موجودة لكن عنصر تاني يغيب عن الهدية ويعمل فرق رهيب.. ياترى الهدية وصلتلي إزاي؟ في البريد؟ لقيتها تحت شجرة الكريسماس؟ اتبعتتلي من محل الورد على مكتبي؟ وللا اللي بيحبني جابلي الهدية بنفسه؟ وأعتقد إنه ده اللي ساعات بيحسسنا بفرح مش كامل قوي لما في الشغل مثلا "يلمّوا" من بعض ويجيبوا "أي" هدية!..

النهاردة وأنا بأفكر في احتفالات الكريسماس اللي فيها بيحتفل العالم كله بميلاد السيد المسيح فكرت شوية كتير في حكاية الهدية... مش بس عشان تبادلنا هدايا كعيلة.. لكن فكرت في ربنا سبحانه كمصدر للهدية..

هديته: غالية.. مبذول فيها إبداع وفن وتضحية.. مليانة رحمة ونعمة وبركة..أنا في احتياج ملح جدا ليها..

مش بس كده.. ده مش بس بيقدم بنفسه الهدية.. ده بيقدم نفسه هدية!..

الله بنفسه بيدعوني لرحمة وبركة من عنده.. لخير وجود وإحسان من إيديه..لسعادة حقيقية في القرب منه.. مش هو الهادي؟ مش بس بيقدم الهداية.. لكن بيقدم الهدايا..

هفضل طول عمري..عبد الهادي...

11 comments:

  1. رائع رائع رااااااااااائع .. كل سنة و انت طيب و اسرتك سعيده و بصحه و خير

    ReplyDelete
  2. للأسف في هدايا كتير اوي ف حياتنا مش بنحس بيها غير لما تروح مننا . ممكن تكون الهدية دي صديق معين او حد ف حياتنا وقت لما يروح مننا وقتها بنحس بقيمتة فعلا . ورأيي ان افضل هدية ممكن ربنا يديها لإنسان انة يعطية حب الناس .. دي افضل هدية ف الدنيا وما اظنش في هدية اجمل منها .. وكالعادة كتاباتك رائعة يا ماجد

    ReplyDelete
  3. i'll always B Abd-L hady =)
    The best present.. someone makes you feel that you are a gift !
    Perfect mged =)

    ReplyDelete
  4. رائعة يا ماجد ...كل سنة و انت طيب ...و كما قال الرسول عليه الصلاة و السلام : تهادوا تحابوا :) :)

    ReplyDelete
  5. معاك حق اجمل هديه هيه الهدايه من الله سبحانه وتعالى
    بوست جميل وكل سنه وانت طيب

    ReplyDelete
  6. دي بجد من غير مبالغة أحلي حاجة قريتها في 2011.أشكرك وأتمني لك كل التوفيق والسكينةوالأمان

    ReplyDelete
  7. حفضل دايما عبد الهادي
    اسم مختصر لكل ما تريد ان تقول من الامتنان والعرفان لربنا العاطي الوهاب .. صاحب الفضل والعطايا والهدايا
    ياااااااااه
    معاني حلوة قوي ان الواحد يفتكرها مع الكريسماس وف كل وقت
    بجد كل مرة بيزيد اعجابي بتدويناتك
    ميري كريسماس :)
    كل سنة وانت ومصر والعالم كله بخير وسلام

    ReplyDelete
  8. حلوه جدا
    بس سؤال هو مصطفى ابن عمي حيجيبلك هديه ليه :D

    ReplyDelete