Thursday, December 1, 2011

بلاش الجملة الأخيرة

من وقت للتاني بنقابل أحاديث أو جمل أو تعبيرات مأثورة قالها حد مشهور في آخر خطبة ليه.. أو آخر حاجة كتبها حد على تويتر أو فيسبوك.. أو آخر كارت بعته حد مهم.. وبنقضي وقت ندرس ونفكر ونحلل أخر حاجة اتقالت..

وفي حياتنا اليومية عندنا جمل أخيرة كتير..من ضمن الحاجات الجميلة اللي كان جدي دايماً يقولها "بلاش الجملة الأخيرة".. وكان يقصد الجمل اللي مالهاش معنى.. الجمل اللي مش بتعمل حاجة غير إنها تهيج الناس وتخليهم يتخانقوا..

لو فكرنا كده في معظم الخناقات هنلاقيها كلاسيكية إلي حد بعيد.. مفتقدة لأي إبداع.. ونقدر بسهولة نتوقعها.. فلو مثلا في المترو.. تلاقي الحوار ده..
بس يا بابا سيب الباب.. إيه قلة الأدب دي؟
ولزومه إيه الغلط بس؟ ما خلاص سيبنا الباب أهو.. ثم انت مالك؟
مالي؟ مالي إزاي؟ مانتا مأخر المترو كله.. وبعدين اتكلم بأدب!
وهكذا تستمر الخناقة.. وفي الغالب ممكن تسمع أسماء حيوانات وأوصاف.. خناقة كلاسيكية.. مافيهاش جديد.. مشكلتها الجمل الأخيرة في كل مرة..

ولو نلاحظ دايما الجملة الأخيرة هي اللي فيها "الدسم"! هي اللي فيها ال catchy phrase اللي تحرق الدم.. التلات أربع كلمات اللي لو اتشالوا الخناقة كلها هتنزل على مافيش.. لكن إزاي؟ ليه نوقف الخناقة.. دي السكة طويلة!! البديل هيبقى ممل قوي:
بس يا بابا سيب الباب..
حاضر..لامؤاخدة..
مملة قوي.. مش كده؟ :)

معظم البرامج الحوارية أو اللقاءات المختلفة اللي بيحصل فيها مشادات بتبقى بس حد "مش قادر" مايقولش آخر كام كلمة.. وعلى الرغم إنه بيبقى عبر عن رأيه بالكامل قبل كده إلا إن الإغراء بتاع "جملة حرق الدم" بيطارده لغاية مايقول الجملة دي..

التويتس اللي بتضايق والستاتسز على فيسبوك اللي بتغيظ  وكلامنا اللي بيضايق أهالينا غالبا بيبدأ كويس.. لكن بينتهي بجمل زي".. واللي يقول غير كده يبقى حمار" أو ".. وأتحدى أي حد عامل نفسه بيفهم إنه يثبت غير كده" أو "... واللي متضايق يتفلق" أو ".. ناس ماعندهاش مخ" أو "...إمتى بقى يا رب تتوب علينا" أو "...بلا قرف"

مهارة رهيبة إني أحاول أقول اللي أنا عايزه "وأختصر" آخر جملة.. صعبة لكن تستاهل المجهود..

إيه في جُملي محتاج أشيله؟ إيه في حواراتك ممكن تستغنى عنه؟ بدل ما تبقى نَطع وبتهبّل والناس تتحاشاك؟ (معلش!.. آسف.. من غير آخر جملة!) :)

10 comments:

  1. بوست لذيذ جدا يا ماجد :) وحقيقي فعلا ... دايما الجملة الأخيرة هيا اللي بتعمل مشاكل سواء في الحياة عموما او الشماحنات ع الفيس بوك او تويتر :)

    ReplyDelete
  2. HaHaHaaaa Funny post and its totally true , its like who will say the last word :D amazing

    ReplyDelete
  3. Maged.. I have to admit that I learned that lately.. is not easy.... yet more effective.
    keep up the good work

    ReplyDelete
  4. A really nice one..I have learned a new thing today :)

    ReplyDelete
  5. انا اخلفك الرأى يا استاذ ماجد لان الكلمه الاخيره تصدر من الفرد منا بعد ما يفيض به الكيل ..يفضل كابت ...كابت ..وبعدين بينفجر يعنى ننفجر ولا نطلع الكلمه اللى وقفه فى زورنا وممكن تخنقنا ,,,والله لو اللى قدمنا يستاهل ..من رايى اننا نطلعها ..واللى يحصل يحصل
    شايفه من البوست ده كثير من التحفظ فى الكلام وكأن فى حد بيرقبك او حيمسك عليك كلمه
    نصيحه من مدونه قديمه فى المهنه
    عبر عن مايدور بداخلك بحريه بدون ان تتخطى الخطوط الحمراء
    فهذه مدونتك
    اتكلم بحرييييييييييييييه
    سلام

    ReplyDelete
  6. atkaleem b 7oorya mn 3'eer ma a7'bat fl 2odame,,aw momkn awasalo e7saase b 2sloob koais,,
    ymkn ene 22ol 2aa7'er gomla da 7yfaara3' shoo7na makboota gowaaya,,lakn mod3faatha momkn m2darsh 2st7melha w t2zeene b shakl kbeer,, :)

    ReplyDelete
  7. YA MAGED EL POOOOOOOOOOOST 3agaaaabny geeedan,,gedan,,niceeeeeeeeeeee ;)

    ReplyDelete
  8. she2 ya7tag al kaseeeeeeeeer men al 2eteda3 , w mokawamet shahwet gazb al 2e3gab bel zaka2 al faten al sherer.

    ReplyDelete
  9. True , true , true ,though very hard , but worth the trying to achieve so many good things . You are indeed marvellous and so is your post . Thanks for reminding us of these good ways of dealing with others to make us and the others happier.N

    ReplyDelete
  10. كلامك حقيقي فعلاً،وفي رأيي سبب مهم لانتهاء الحوار بشكل غير حضاري هو إعتقاد الكثير من الناس بوجوب إقناع الآخر بوجهة نظرهم والافقد فشلوا شخصياً،لذلك فكثير من الحوارات والمناقشات تفقد جمالها وأهميتها في تبادل الأفكار والثراء الانساني والوجداني اللي بيحصل في وجود التنوع والاختلاف في الرأي و الفكر ،طبعاً ده لو لم تنتهي بالشجارو الخصام!!تدوينة تحفة زي عادتك،علي فكرة في يوم من الأيام جملك وكلماتك أنت كمان هتبقي مشهورة تلهم وتفيد وتمتع ناس كتيرفي كل مكان:)أشكرك وتحياتي

    ReplyDelete