Sunday, September 18, 2011

العبد لله

الرغبة في إن العدل يسود وإن الحق ينتشر رغبة رائعة وتوجُّه جميل مافيش حد ينكر سموه..

سهل قوي إن الواحد يقعد ساكت ومايطالبش بحقه..
أصعب شوية إن الواحد يطالب بحقه..وأصعب وأصعب إن الواحد يطالب بحق غيره لو متفق معاه في الميول أو الأصول العرقية أو الديانة أو الدراسة أو مجال العمل...
لكن اللي بيبقى صعب قوي قوي هو إني أطالب بحق غيري على الرغم إن حصوله على حقه مش في مصلحتي أو مش هيفيدني في حاجة..
ويكاد يكون مستحيل إني أطالب بحقك لو ده هيعود عليّ بضرر سواء بشكل مباشر أو غير مباشر..

لكن الغريب إنه على مدى السنين شفنا ناس دافعت عن حقوق غيرها مش لغرض غير إن الحق والعدل يسود..إن الحرية وممارسة الحقوق تبقى مكفولة للكل..

كنت قاعد أقرا شوية عن تاريخ تجارة العبيد ولقيت بعض الحاجات المؤلمة والغريبة والجميلة..إزاي كانوا بيفكروا في الموضوع ده وإزاي لغوا تجارة العبيد..حاجات تستحق القراية..

تجارة العبيد في أميريكا بدأت رسميا في فيرجينيا لما راجل أقنع المحكمة إن الخادم اللي عنده (وكان أسود البشرة) يُعتبر ملكه للأبد. المحكمة حكمت فعلا لصالحه وبكده بقى الخادم ده أول عبد بحُكم رسمي من ولاية فيرجينيا..

اللي استغربته في القصة إن اللي رفع القضية ده شخصيا كان أسود البشرة! ومش بس كده..ده كان جَي فيرجينيا كــindentured servant  يعني خادم بيشتغل مقابل الديون اللي كانت عليه أو بعقد لسنين طويلة جدا مقابل الإقامة والأكل! لكنه بطريقة ما حوّش فلوس كتير ودفع مقابل السنين اللي باقية له هو ومراته وأخد حريته..

ولما اغتنى جدا بدأ يستورد عبيد سود ليه هو شخصيا من أفريقيا..وبكده خد منحة 250 فدان لأن أي حد كان يستورد عبيد كان يحصل على 50 فدان مقابل كل عبد!..القصة مش بتخلص على كده لكن في النهاية بيتم مصادرة الأرض بتاعته لصالح راجل أبيض وفي أسباب المصادرة إنه "أسود وبالتالي غريب الجنس"!!

مين بقى اللي دافع عن حق العبيد؟ مين اللي سعى عشان تجارة العبيد تتلغي؟
ناس كتير منهم راجل مشهور قوي اسمه ويليام ويلبيرفورس..عنده كل حاجة يتمناها.. درس في كيمبردج.. عضو في البرلمان الإنجليزي..يعني ببساطة ممكن أي حد مكانه ولا يعبّر "الناس السود" دي!

الراجل ده سعى بكل طريقة ممكنة سواء في البرلمان أو في جمعيات كونها هو وأصحابه وناس أقنعهم بالقضية وفضل أكتر من 40 سنة يناضل عشان الهدف اللي بيه كان شايف إن الله سبحانه خلق كل البشر متساويين.

لاحظ إن  إلغاء تجارة العبيد في امبراطورية زي إنجلترا بالتأكيد اتسببت في خساير اقتصادية كتير وتغييرات مش في الحسبان ولخبطة عند ناس مختلفة..لكن الحق حلو..العدل رائع..وعشان كده مكلف!

لو عندك فرصة اتفرّج على فيلم Amazing Grace اللي بيحكي القصة بالتفصيل.. وشوف قد إيه ممكن حد يدافع عن حقوق غيره حتى لو مختلفين عنه..

وتعالى أنا وانت نتمنى ونحلم باليوم اللي يكون فيه راجل بيدافع عن حقوق الستات..وشاب بيتكلم عن الظلم الواقع على كبار السن..وناس متجوزين بيدافعوا عن حرية اختيار سن الجواز..عزّاب بيتكلموا عن حقوق المطلقات..معتنقي ديانات بيدافعوا عن حق معتنقي الديانات التانية في حرية العبادة...

باحلم باليوم اللي فيه أقدر أقف ضد ظلم موجَّه لناس مش من نفس عيلتي أو بلدي أو ديانتي أو ميولي أو مجال شغلي..
وأطالب بحقوق ناس ممكن يكونوا مختلفين معايا في كل حاجة ماعدا إنهم بني آدمين.
وأدافع عن ناس بيُعاملوا النهاردة زي العبيد..وأشوف فيهم إخواتي وقرايبي وناس زيي بالظبط....زي العبد لله!

10 comments:

  1. حقيقي مش عارف أقول ايه أكثر من رائع يا ماجد

    ReplyDelete
  2. Keep going :) I like it!

    ReplyDelete
  3. رائعة .. بزياده
    يسلم قلمك الجميل

    ReplyDelete
  4. بسم الله الرحمن الرحيم : يَا أَيُّهَا الَّذِينَ آمَنُوا كُونُوا قَوَّامِينَ بِالْقِسْطِ شُهَدَاءَ لِلَّـهِ وَلَوْ عَلَىٰ أَنفُسِكُمْ أَوِ الْوَالِدَيْنِ وَالْأَقْرَبِينَ إِن يَكُنْ غَنِيًّا أَوْ فَقِيرًا فَاللَّـهُ أَوْلَىٰ بِهِمَا فَلَا تَتَّبِعُوا الْهَوَىٰ أَن تَعْدِلُوا وَإِن تَلْوُوا أَوْ تُعْرِضُوا فَإِنَّ اللَّـهَ كَانَ بِمَا تَعْمَلُونَ خَبِيرًا ﴿النساء: ١٣٥﴾ـ
    رائع البوست يا ماجد .. نفسي مسمعش كلمة يا عم ما يولعوا واحنا مالنا .. للأسف بتتقال لكل واحد مصلحته او حقه مش جاي علي مزاجي او مش حيفيدني

    ReplyDelete
  5. Very touching and very noble ideas!

    ReplyDelete
  6. اسجل اعجابى الشديد بنوعية وطريقة تناولك لمواضيع مختلفه باسلوب خلاق وراقى ودائما ما تقدم معلومه وفكره ورأى جديد فى كل بلوج . لك كل تقديرى

    ReplyDelete
  7. اختيارك للموضوعات رائع ومحدد
    -على الرغم من إنى نفسى أعرف الحاجات اللى بتقراها دى بتجيبها منين- بس بجد بستفيد جدا من المقالات السهلة البسيطة دى.

    ميرسى يا ماجد

    ReplyDelete
  8. أعتقد ان حضرتك كنت ممكن تاخد مثال مصرى وهو المهندس المصرى حسن فتحى الذى تربى تربية مرفهه جدا ودرس فى مدارس اللغات وتعلم أحسن تعليم ومع ذلك أصر على اتباع اسلوب ف العمارة وهو عمارة الفقراء ودافع عن ذلك بكل قوة بل وضحى ف حياته كثيرا من أجل هذا الهدف ..

    ReplyDelete