Saturday, September 17, 2011

أنا جَي أتفرّج

"الإجابة النموذجية" هي مشكلة المشاكل في لجان التصحيح للسنين الدراسية المختلفة..الطالب ممكن يكون كاتب إجابة صح لكن ماتتحسبش صح..والسبب طبعا إن الإجابة مش موجودة في النموذج!... والألطف من كده إن مرّات المصحح (وده بيكون مُدَرّس لنفس المادة) بيبقى عارف إن إجابة الطالب صح لكن مايقدرش يخالف النموذج..وإلا المُراجع يعملله مشكلة!

وللأسف ده بيخللي بعض المدرسين يحاولوا يساعدوا الطلبة وهم بيشرحولهم فبيقولولهم شوية حاجات كده زي tips:
أول مايقوللك "قارن" لازم الإجابة تتكتب في جدول!...
أول ماتلاقي كلمة "today" يبقى تستخدم المضارع! وطبعا لو الطالب حب "يتفلسف" على المدرس ويقول له: "بس إحنا ممكن نقول النهاردة أنا تعبان..أو النهاردة أنا هسافر..أو النهاردة أنا صحيت متأخر (يعني ممكن أزمنة مختلفة)" يبقى الطالب ده "عامل فيها بيفهم" وأقل حاجة ممكن تتقال له هي: "اقعد"! :)

وأنا 7 سنين سؤال العربي كان: هات كلمة فيها حرف مد "ياء"..أنا جاوبت "تلاميذ"..{غلط! غلط!}..ليه بس؟{لأن الإجابة: "نشيد"}..يعني تلاميذ غلط ليه؟..{عشان احنا خدنا "نشيد" كمثال..مش أي كلمة تاني!}...
طبعا ده بيربي فينا المهارة "العظيمة" بتاعة إزاي نقول الإجابة اللي هتتحسب صح.. المهم اللي هيصحح يبقى مقتنع بيها! مش مهم احنا نبقى مقتنعين! (وطبعا "مقتنعين" مش مَد بالياء!)...:)

حياتنا مليانة بإجابات نموذجية..إجابات عارفين إنها أكيد صح..إجابات عارفين إن الناس "تحب تسمعها"..والنهاردة أنا بادعوك ترمي نموذج الإجابة..وسيبني أشوفك بتتصرف إزاي..(و"إزاي" مش مَد بالياء..بجد!)

أكتر مهنة كل الناس عارفة تعملها هي "الوعظ"..كل الناس عارفة الصح!..جمل زي "أنا ماباخافش غير من اللي خلقني".."كل واحد لازم يضحي عشان وطنه".."كلهم أولادي ..مش بافرق بينهم".."أهم حاجة مصلحة الفقرا".."الستات ليهم نفس حقوق الرجالة".."لازم نحترم حقوق ذوي الاحتياجات الخاصة".."إحنا ضد تعذيب أي حد".."ربنا هو اللي ضامن المستقبل"..
  
إيه ده؟ هي الجمل دي غلط؟ ..بالعكس! الجمل دي جميلة..لكن وأنا باقولها هل أنا مصدقها؟ هل أنا عايشها؟
كام مرة شفت نفس الناس اللي قالت الجمل دي لكن تصرفاتها العكس تماما؟ مرعوبين من رؤساءهم..هيموتوا على الفلوس..بيحتقروا الأطفال أو الكبار..بيفرقوا في التعامل مع الناس المختلفة أو.أو..أو

المقولة المشهورة اللي بتقول: "الأفعال صوتها أعلى من الكلمات" حقيقية ومتهيألي كتير مننا بنشوفها..مافيش فاسد هيطلع في التليفزيون ويقول: "الناس ولا تفرق معايا.. أهم حاجة عندي الفلوس وعيلتي تاخد أعلى المناصب"..لكن بعض الشعوب شافت في تصرفات وزرا ورؤسا ومسئولين على مدار التاريخ "أفعال" بتقول مصايب!

ربنا سبحانه يقدر يوميا يقول بوضوح قد إيه هو عظيم وجميل..بص حواليك هتلاقيه بيقول كده..بيقولها في الطبيعة الرائعة..بيقولها في كل وردة وشجرة وجبل ونهر بنشوفهم..كل مرة الشمس تطلع..كل مرة طفل يتولد..كل مرة السما تنور بنجوم..في كل حاجة رائعة في الطبيعة بنشوف جمال وعظمة وروعة هذا الإله..هل أقدر أقول "تصرفات" الله سبحانه هي تعبير في منتهى القوة عن صفاته؟..

سيبني أشوف احترامك للناس من غير ماتحكيلي عنه..خلليني أكتشف السماحة والمحبة والاحترام اللي فيك من غير ماتتباهى قد إيه انت محب وعندك قبول للآخر..مش عايزك تشرحلي مفهومك عن رحمة الحيوان أو عن آراءك في عمل المرأة..وريني إنك مش بخيل أو إن الفلوس مش نمرة واحد في حياتك..ماتقولليش..سيبني أشوف!

علّي صوتك: ماتتكلمش! اتصرف..وريني مبادءك..خلليني أشوف أخلاقك..فرّجني اعتقاداتك العظيمة..من غير ماتوعظني..

أنا عايز أعرفك..وبصراحة أنا مش جَي أسمع! أنا جَي أتفرّج..

7 comments:

  1. أنا أتذكر يا ماجد انى قومت سألت سؤال .. المدرسة اقعد يا ابنى انتى هتتفلسف ...

    بقت أسألتى جوايا ..
    و دلوقتى لما بسأل برده نفس الاجابات من الناس .. بطلوا فلسلفة .. انتوا بتحاربوا ربنا .. انتوا هتكفروا ..

    مش من حقنا نسأل و نفكر و لا ايه !!!

    ReplyDelete
  2. استشهد بأبيات شعر وآيات قرآنية ... ههههه

    ReplyDelete
  3. مش من حقنا نسأل و نفكر و لا ايه
    ===
    yes
    http://en.wikipedia.org/wiki/Cogito_ergo_sum
    Cogito ergo sum (French: "Je pense donc je suis"; English: "I think, therefore I am")
    Al-Imran [3:191]
    الَّذِينَ يَذْكُرُونَ اللّهَ قِيَامًا وَقُعُودًا وَعَلَىَ جُنُوبِهِمْ وَيَتَفَكَّرُونَ فِي خَلْقِ السَّمَاوَاتِ وَالأَرْضِ رَبَّنَا مَا خَلَقْتَ هَذا بَاطِلاً سُبْحَانَكَ فَقِنَا عَذَابَ النَّارِ
    Ar-Ra'd [13:3]
    وَهُوَ الَّذِي مَدَّ الأَرْضَ وَجَعَلَ فِيهَا رَوَاسِيَ وَأَنْهَارًا وَمِن كُلِّ الثَّمَرَاتِ جَعَلَ فِيهَا زَوْجَيْنِ اثْنَيْنِ يُغْشِي اللَّيْلَ النَّهَارَ إِنَّ فِي ذَلِكَ لَآيَاتٍ لِّقَوْمٍ يَتَفَكَّرُونَ
    We have to think. we must use our brains.
    Actually we are/were ordered to think.
    Al-Hashr [59:21]
    لَوْ أَنزَلْنَا هَذَا الْقُرْآنَ عَلَى جَبَلٍ لَّرَأَيْتَهُ خَاشِعًا مُّتَصَدِّعًا مِّنْ خَشْيَةِ اللَّهِ وَتِلْكَ الْأَمْثَالُ نَضْرِبُهَا لِلنَّاسِ لَعَلَّهُمْ يَتَفَكَّرُونَ
    So please do not stop asking questions.

    ReplyDelete
  4. Hi ya Fanan,, I think these post is important shift in the direction of your writing, So ;) keep it up, Blessings.

    ReplyDelete
  5. Maged,

    I'm speechless! It touched something really deep in my heart, it touched something that I'm suffering from a lot. That what makes me feel that there are a lot of fake people in this world. I wish that could help Me and them to be real.

    Love you,
    Misho

    ReplyDelete