مشهد جميل بس محير شوية:
مترو أنفاق القاهرة..محطة من المحطات الزحمة (السادات أو
الشهداء)..اتنين رجالة جايين ناحية باب المترو عشان يركبوا..واحد فيهم ماسك إيد
التاني..ركبوا المترو..واحد فيهم ماسك عصاية بيضا.. أكتر من تلات ركاب في أماكن
مختلفة قاموا عشان يقعدوا الراجل الضرير..
مافيش مشكلة في المشهد..مشهد هايل..جميل..بس محير..ليه
محير؟
هو الناس قامت ليه؟ <يابني باقوللك ضرير>.. مانا
فاهم..هو مش يقدر يفضل واقف؟ <آه طبعا..بس حرام..>...حرام إيه؟..هو تعبان من
حاجة تاني..<أيوة صح..بس يعني برضه يصعب عليك>
أنا شايف في المناقشة دي: عَظَمة..ومصيبة..
عظَمة لأني شايف شعب جميل مضحي عنده مبادئ..شعب على
استعداد إنه يتعب..على استعداد إنه يدّي من وقته ومجهوده وفلوسه عشان حد تاني..
مصيبة لأني شايف نظرة غريبة للمختلف..نظرة فيها "يا
حرام" و"ده غلبان" بما تحمله التعبيرات دي من إني شايف في الشخص
اللي احتياجه مختلف عن احتياجي شخص "ناقص"..بني آدم "مش كامل يا
حرام"..واحد "يستاهل الشفقة"!
العالم بيتفنن في المسميات اللي ماتجرحش حد وماتسيئش
لحقوق الإنسان..وبنسمع تعبيرات تطورت وتغيرت من "ذوي احتياجات خاصة"
مرورا بـ"متحدي الإعاقة" و"معاق" و..و..و..
لكن بالرغم من المحاولات دي إلا إننا لسه شايفين نفسنا
"كاملين" وهو "يا عيني ناقص"!
الله سبحانه لما خلقني وخلقك خلقنا في أحسن صورة..صح؟
وأحسن صورة هي صورة عظيمة وجليلة جدا مش بمقياسي ومقياسك لكن بهذا المقياس الإلهي
العظيم اللي فيه الله سبحانه –إذا جاز ليّ إني أعبر بالطريقة دي- أُعجب بعمل إيديه..
وكلنا عندنا محدودية في حاجة معينة..في سرعة الجري أو في
الطول أو في عدم القدرة على هضم أكل معين..عدم القدرة على الطيران..عقل محدود وهكذا..ولبعضنا
محدوديات مختلفة..
اللي فاقد البصر أو السمع..اللي مش بِتخَلِّف..اللي عنده إيد
أو رجل مقطوعين..هو شخص كامل بحسب صورة الله سبحانه..انت حر في رأيك لو شايفه "ناقص"
لكن الله حاطط فيه قدرة وإمكانية رهيبة..الله شايف فيه إنسان كامل جميل على أحسن
صورة..
طبعا ممكن نقول: احنا "بنساعد" مش "بنشفق"
أو نحس إنه "ناقص"..أحب أسألك: لما بتساعد طفل صغير..هل بيكون عندك نفس
الإحساس بتاع "يا حرام"؟ هل بتكشر وتحس بالذنب؟ وللا بتقبل فكرة
المحدودية اللي موجودة فينا كلنا؟
سمعنا عن عصابات كتير بتشغّل أطفال في الشحاتة..وسيلتهم
المبتكرة؟ عاهة للطفل..هيجيب عائد أكبر..ليه؟ "هيصعب" على الناس!
أنا عايز إيه؟
أنا بس بأفكر نفسي إني اتخلقت على أحسن صورة (سواء عندي
حاجة "ناقصة" أو لأ) وبافكر نفسي إن الله حنّان ورحيم جدا..عايز أشوف
الناس بالصورة اللي اتخلقوا عليها: جُمال مميزين محدودين!
ساعد الناس من غير ماتحس إنهم
"ناقصين"..اتعامل برحمة مع الكل مش بس مع الناس اللي تبقى حاسس إنهم
"يستاهلوا" رحمة أكتر.. أصلهم "يا حرام" "مش بني آدمين
للآخر"
اعلا بتوقعاتك عن الناس اللي كنت فاكرهم قبل كده
"أضعف" أو"قلالات الحيلة"..اللي ناقصه حاجة في جسمه هيتبسط
قوي لما تعامله عادي وتتوقع منه التزام وذكاء ومشاركة وعطاء كمان..هيفهمك..هيحب يهزر معاك..هيتبسط أكتر من
انبساطه لو الصورة اللي في ذهنك عنه هي إنه "مصدر شفقة" أو طول الوقت
"محتاج يتخدم"..
المرّة الجاية في المترو..قوم له "عشان نازل اللي
جايّة" مش عشان "راجل يا عيني ضرير"..
قدّم رحمة وانت مبسوط..مبسوط
بإنك قادر تساعد ومبسوط بخليقة الله الكاملة..
wowowoowowwwwwww, bs msh 3rfa a2ol aktar mn keda estmaaaaaaaaaaaaaar ya dr bnt3lm mn klamk bgd
ReplyDeleteجميلة جدا ..ورائعة ولو قابلتها فى الترام عندنا .. كنا دايما بنعمل نايميين وتعبانيين .. التغيير من جوانا .. عندك حق
ReplyDeleteya rait ner7am el nas kolaha men ghair tamyeez:)
ReplyDeleteBeautiful :)
ReplyDeleteجميلة جدا ياماجد..بس عايز أعرف رأيك في من يتعمد ان يغير ويغيب نعم خلقنا الله بها..مثل نعمة السمع والبصر عندما يغلقوا الفضائيات وتزيد السرية..ونعمة الاحساس مع الضمير عندما تغيب الحقيقة بقصد..ونعمة العقل زينة الانسان عندما يغيب بالجهل والذل والفقر..!!!
ReplyDeleteI did realize that long ago when you treated us as your young brothers "thanks"
ReplyDeleteGamdaaa :)
ReplyDeleteI’m so happy with this post Maged,because finally,I disagree with you!I think people must leave their seats for those who need them,you see,in Canada where I live,and in many other countries where people with differences are really respected,there are certain seats in front of public transportations that are mainly for elderly,pregnant women,people with wheelchairs, the blind,people with strollers,..etc.,and people outside those groups must leave their seats immediately to have them seated…that is because those people are highly appreciated and giving them the priorities to be seated will make their trips or rides easier,no way that’s because they are less than others,I find this already a very helpful way,but,well!I still agree with you that if someone will help another,it shouldn’t ever never because of a petty!
ReplyDelete