Monday, September 12, 2011

ده انت اللي مجنون

بعد يوم طويل ممتع ومثمر كنت مروح..وفي طريقي للبيت شفت يافطة كبيرة في أحد الميادين المهمة في القاهرة مكتوب عليها: "تحية لرجال المنطقة الذين تصدوا للمخطط الأجنبي".المنطقة دي لما بتيجي سيرتها ناس كتير بتفتكر أحداث مؤسفة مميتة مات واتعور فيها مصريين.. لما عديت جنب اليافطة فوجئت إني مش عارف أضحك وللا أستغرب وللا أستنكر وللا إيه..ولما فكرت شوية لقيت إن اللي كتب اليافطة –من المفترض- شخص أمين ومصدق جدا في محتواها.. ووقتها تذكرت فكرة إن كل آراءنا وأفكارنا وتوجهاتنا مش بيحركها المنطق أو الحق المطلق بقدر مابتحركها "وجهة نظر"..وده مش قاصر على مجتمع معين لكن ما أَعقَد التفكير البشري اللي ممكن يشوف في نفس الحاجة –نفس الحاجة- حلاوة ووحاشة!

الكلام ده من زمان مش بتاع النهاردة..وعلى الرغم إن فيه حاجات ساعات بنفتكرها محسومة وعادة بنسبقها بكلمات "طبعا" و"أكيد كلنا عارفين" و"مافيش حد يقدر ينكر" ...إلا إننا هنستغرب لما نشوف كمية الآراء اللي عكس بعض تماما في حاجات تكاد تكون محسومة..

بص معايا..

معركة قادش كانت بين رمسيس التاني والحيثيين بقيادة الملك مواتللي التاني وحصلت تقريبا سنة 1274 قبل الميلاد وهي أول معركة في التاريخ المسجل يكون معروف تفاصيل تكتيكاتها. شوف معايا نتيجة المعركة:

"وقد ذكر الملك مواتللي من ناحيته في وثائق بوغازكوي بان المعركة كانت انتصارا له وان أمور قد وقعت في أيدي الحيثيين ،بينما ذكر الملك رمسيس الثاني انتصاره في المعركة كذلك، والتي قام بنقش تفاصيلها بالكامل علي جدران معبد الرمسيوم وكذلك معبد الأقصر, بالإضافة إلى معبده بأبوسمبل لكن الحيثيبن اكدوا ان الانتصار كان من نصيبهم."

معقول؟ وجهات نظر في مين انتصر في الحرب؟

أنا وانت بنبص على نفس الحاجة من منظور مختلف..وغالبا بنستخدم "أوصاف" مختلفة حسب توجهاتنا..بيفيدنا في ده فكرة "الدلالة اللفظية" اللي موجودة في كل لغة وبتنقل مع المعنى حتة أعمق من المعنى المجرد..

فمثلا "شوية عيال" ممكن يكونوا "مجموعة شباب".. "نجحوا في دخول" ممكن تكون "تمكنوا من اقتحام"..
اللي انت شايفه "دكتاتور" أنا شايفه "حازم"..واللي انا شايفه "متراخي وبطيء" انت شايفه "حكيم"
باستخدم "مصرع" أو"مقتل" عن الناس اللي مش باحبهم..وباستخدم "استشهاد" أو "وفاة" أو "انتقال للأمجاد" للناس "الكويسين"

لما باتكلم معاك هل كفاية إني أعلن "الحق"؟ اللي هو غالبا برضه مختلف عن "الحق" من وجهة نظرك؟ وللا محتاج أحط نفسي مكانك وأحاول أتخيل انت بتفكر إزاي؟ وليه بتفكر كده؟
هل أحاول ألاقي أرض مشتركة نقف فيها أنا وانت؟ ...مش يمكن نكتشف إن احنا الاتنين خسرنا الحرب؟ مش يمكن نوصل لفكرة إن بلدك مش محتاجة لا ديكتاتورية ولا حزم؟.. ونبقى بكده وصلنا لطريق شبه مشترك بغض النظر عن التسميات؟

أفتكر إن أي مرّة هحاول أقنع "مجنون" بجنانه..هيكون رده: أنا أعقل واحد.. ده انت المجنون! :)

9 comments:

  1. برنس قوي ,
    الفكرة دي أنا فكرت فيها كتير . أعتقد باب قبول الاخر إنك تفهم إنه ينفع يكون صح

    ReplyDelete
  2. i like it so much this is true

    ReplyDelete
  3. ايوة كدة
    ما احلى الرجوع الى بلوجات ماجد
    " :)بس كترها بيسببلى عسر فهم معلش حرية بقى"
    الفكرة ممتازة و انا درست حاجة عن الأدراك Perception و ازاى انة النظاره اللى بنشوف بيهافممكن نشوف نفس الحاجة أكبر اصغر اغمق افتح و هكذا و دا بيعتمد على ثقافة و تربية و خبرات و حالة و موود و و و و و المتلقى و هناك و سائل يمكن بها تحسين الأدراك و الوصول الى قدر اكبر من الحقيقة و هى
    دوروا انتو بقى انا تعبت من الكلام اصدى الكتابة
    شكرا ماجد

    ReplyDelete
  4. بيقولو فى الأمثال الشعبية "لو جابو للمجنون ميت عقل على عقله مش هيعجبه الإ عقله"
    المشكلة الكبرى بتتمثل فى إزاى نلاقى الارض المشتركة دى إذا كنت أنا مقتنعه إنى صح وهو كمان على يقين إنه صح يبقى إزاى هنقرب ولا مين هيبتدى ويحاول يقرب ويفترض إن رأيه صواب وممكن يكون خطأ
    ورأيى الأخر خطأ وقابل إنه يكون صواب

    أنا فعلا بعانى من المشكلة دى يوماً فى البيت مع ماما وقد إيه المجهود النفسى والذهنى اللى ببذله علشان أحاول اتقبل اللى هى بتقوله علشان هى ماما وبلاقى إنى اصعب حاجة فى الدنيا إنى اقنعها بأى حاجة ولو إنها ساعات بتصعب على لانها بتقولى طب معلش حقك على أنا غلطانة ودا طبعا بيحصل فى حلات قليله جدا ولما بتلاقينى فعلا منها من التصرف نفسه.

    ياترى أقدر ابذل المجهود دا علشان كل اللى بتعامل معاهم ولا دا بس علشان خاطر ماما؟؟؟

    ReplyDelete
  5. اعتقد اننا لازم نذكر اينشتاين بكل خير علي نظرية النسبية ... انا شايف ان النسبيه لا تبتعد كثيرا عن الموضوع اللي فوق. وطبعا مش محتاج اقول ان الموضوع مبهر وممتاز

    ReplyDelete
  6. المجانين في نعيم بس وفقا لكلامك اننا شايفين بعض مجانين وفي نفس الوقت مش في نعيم

    ReplyDelete
  7. ياريت كلنا نكون مجانين ونتقبل الآخر ونحاول نفهم ونتفهم بدون اصدار أي أحكام أو الرفض لمجرد الاختلاف!!!كانت الدنيا بقت حلوة جداً..ماجد شوف مصدر الهامك اللي بيخلينا نستمتع بابداعك بصفة مستمرة واتمسك بيه أوي

    ReplyDelete
  8. اينشتاين في نص النظرية النسبية قال كل شيء نسبي ما عدا الله مطلق
    لكن انا أظن ان كل شيء نسبي لكن الله مطلق في ذاته نسبي كما نراه
    كل شيء نسبي

    ReplyDelete