Saturday, October 24, 2015

جيت على بالي

إحساس حلو لما حد يقولك "جيت على بالي إمبارح" أو "حلمت بيك" أو "كنا بنتفرج على فيلم وافتكرتك" أو "شفت باقي أصحابنا وكنا جايبين في سيرتك".. إحساس إنك "على بال حد" أو إن ممكن مواقف معينة تفكر أصحابك بيك إحساس جميل، وجزء من جماله إنه في معظم الأوقات بيكون تلقائي.. اللي بيقولك كده (في معظم الأوقات برضه) مش مضطر إنه يقولك كلام كويس.. مش بيجاوب على سؤال إيه رأيك في فلان، ولا بيحاول إنه يجاملك وخلاص..

في المقابل هانلاقي ناس بتلومنا إننا مش فاكرينهم.. بيعاتبونا (من عشمهم) إننا مش "بنيجي في بالهم".. مش بنسأل عليهم.. مش فاكرينهم.. وردودنا غالبًا ردود حزينة في نفسها ولا ليها معنى.. "كنت مشغول قوي الوقت اللي فات".. "إزاي بس يا راجل، ده أنا كنت لسة هاكلمك" وغيرها من الردود المفقوسة!

لو بييجي على بالي سؤال هو ليه الناس مش بتفتكرني أو مش "بآجي على بالهم ليه" فده مش سؤال غريب ولا حاجة.. ولا اللي بيسأله عنده "نقص" ولا "عقدة" ولا حاجة.. حلو إننا نتمنى نكون متواجدين في ذاكرة حبايبنا.. متاحين في فكرهم.. بنيجي على بالهم من وقت للتاني من غير ما نضطر نلوم ونعاتب ونحسب مين آخر واحد فينا اتصل.. السؤال نفسه عادي.. لكن بعضنا بيقرر إنه عشان الناس تفتكره محتاج يسمم عيشتهم ويحسسهم بالذنب! وفيه نوع تاني بيقرر إنه "يستثمر" في العلاقات القريبة.. يدفع وقت ومجهود واهتمام.. يبذل شوية جهد علشان ابنه أو بنته أو مراته أو جوزها أو أصحابه أو الناس اللي معاه في الشغل يفتكروه وييجي على بالهم بالخير..


لما بأستثمر في الصداقة وباسافر مع أصحابي أو بنخرج أو بنتفرج على مسرحية أو ماتش إحنا بنبني سياق مشترك.. حاجة متبادلة ممكن في المستقبل تفكرنا ببعض.. لما بأستغل الفرصة اللي فيها ممكن "أكوِّن ذكريات" أنا بأستثمر للمستقبل اللي فيه الذكريات دي غالبًا هاتكون بتقرب الناس من بعض وبتخليهم ييجوا على بال بعض لو حد فيهم افتكر حاجة أو مر بموقف ليه علاقة بالذكريات دي..

المزيكا اللي عملتها مع أصحابي بتفكَّرني بيهم.. والمسرحيات اللي حافظينها، والشغل اللي عملته مع زمايلي، والأماكن اللي رحتها، والصور اللي أخدناها، كلها فرص مش بس للاستمتاع بالحاجة وقتها، لكنها كمان فرصة لبُنا أرشيف ذكريات يقرَّبني من ناس بأحبهم.. ويخلينا نيجي على بال بعض..

2 comments:

  1. الوحدة ...
    غالبا الوحدة سببها هذا الشعور يا ماجد
    الوحدة حتى لو حواليك ناس كتير وبيفتكروك هما
    لكن انتا من جواك بتدور على وجودك ف قلب وعقل حد معين
    هوه دا اللى بتتمنى تكون على باله
    ولو كنت انتا على بال عشرات .. غيره
    انا بحس الاحساس دا كتير مع الأنسان للى بحبه
    دايما اعاتبه انه مش فاكرنى زى ما بحب وبتمنى ..
    وهوه لأن طباعه مختلفة وغريبة يفضل يقولى والله كنتى على بالى
    بس انا مبعرفش اعمل زى الباقيين
    وكنت هكلمك
    الخ
    فكرة الذكريات اللى حكيت عنها حلوة جداااا وصح
    بس للأسف محبش اعملها مع كل الناس
    عاوزة اعملها مع الناس اللى بينى وبينهم حدود ومسافات وغلاوة ما
    لكن عارفة انى مش هفضل ف حياتهم كفاية او كتير
    لكن مع ناس عاوزهم ف حياتى دايما وعلطول ..
    لأ
    انا مش عاوزة بس الذكريات
    انا عاوزة أكون معاهم وهما ف قلبى وحواليا
    ومن هنا تأتى المشكلة
    أو اللخبطة ..

    تحياتى ليك
    وخالص ودى

    ReplyDelete
  2. Great post ya Maged.Thanks. N



    ReplyDelete