Saturday, November 17, 2012

كلنا هانموت


بكا وحسرة وألم على شباب وأطفال بيموتوا.. بيموتوا كل يوم.. وعلى الرغم إن تشكيلة الأسباب مختلفة لكن الحاجة المشتركة إن ناس بتموت.. سواء واحد نازل مظاهرة أو رايح يتفرج على ماتش كورة.. داخل مستشفى يتعالج  أو بيعدي الشارع أو بياكل أكل ملوث أو بيقضي عقوبة في السجن أو راكب قطر أو راجع من مدرسته.. أو.. أو.. التشكيلة متنوعة..

لكن المؤلم مش بس إحساس الأهل في مصيبة فقدان حد بيحبوه لكن المصيبة في التمن.. المقابل اللي الحكومة ممكن تكون بتدفعه لأسرة واحد مات..ال4000 ولّا ال 200000 جنيه مش بس بيورّونا تمن الموت لكن أعتقد إنهم بيكشفوا عن قيمة الحياة...

والسؤال ياترى هو الموت سنة الحياة؟ ولّا سنة الحياة هي الحياة؟ ياترى لما صلاح جاهين سأل "الأصل هو الموت ولّا الحياة؟" ماكانش عارف الإجابة؟

عمرنا ماهانقدر نفهم الموت غير لما نعرف يعني إيه حياة.. يعني إيه عيشة.. يعني إيه بني آدم اتخلق على أحسن صورة من إله قرر يدّي عمر وحياة لمخلوق ضعيف.. قرر يدّي روح تعيش للأبد عايشة مؤقتا في جسم ضعيف.. يمكن وقتها نقدر نعرف لو ال4000 جنيه كفاية!

هي إيه العيشة؟ ويعني إيه واحد عايش؟ آكل وأتجوز وأخلف عشان عيالي ياكلوا ويتعلموا ويتجوزوا ويخلفوا.. (ولو واحد منهم مات آخد ال4000 جنيه وأأكل الباقيين عشان يكبروا ويخلفوا و..و..و)

لما نفهم يعني إيه حياة ويعني إيه إن خالق الكون كله اختار إنه يوهب روح للإنسان وإنه سبحانه يسمح للإنسان ده إنه يكلّم الخالق ويفهمه ويكوّن عيلة واحدة فيها حب وود مع الخالق سبحانه.. ممكن وقتها بس نفهم الموت.. ويمكن وقتها نعرف لو الموضوع يستاهل نطوّر المستشفيات والسكة الحديد والأكل والمدارس ولّا عادي بما إن "كلنا هنموت"؟

هو طبعا كلنا هنموت..بس مش معنى كده إن كلنا لسّة عايشين..

8 comments:

  1. مش معنى ان كلنا هنموت ، يبقى كلنا عايشين .. ممكن عايشين مع ايقاف التنفيذ .. عايش انهارده ميت على امل اعيش بكره عايش :-)

    ReplyDelete
  2. Very , very deep.Ringing one more bell before it is too late.Thanks for these awaking posts. N

    ReplyDelete
  3. انتا اختصرتها ف كلمتين يا ماجد ...

    لما نفهم

    ReplyDelete
  4. المواجع كترت اوي يا ماجد :-(

    ReplyDelete
  5. المواجع كترت اوي يا ماجد :-(

    ReplyDelete
  6. Very deep issue you touched here. We need to understand what life is about!
    Most of the time, I ...live for ..My ... Yet expect others to live life fixing my things. Thanks Maged.

    ReplyDelete
  7. مش كلنا هانفهم واحنا عايشين كلنا هانفهم لما نموت ونعرف قيمة الحياة

    ReplyDelete