Monday, February 13, 2012

يا خسارة

إحساس "الفقد" من أسخف الأحاسيس اللي ممكن نمر بيها.. بقالي أكتر من أسبوع مش لاقي النضارة بتاعتي.. وبجد عمري ماكنت أتخيل إن الموضوع ممكن يبقى بالسخافة دي..

نظري مش ضعيف قوي.. لكن بأبقى طبعا محتاج النضارة.. آه قادر أمشّي حالي وأقرا وكل حاجة.. لكن كل ما أحس إني مش لاقي النضارة أتغاظ قوي..

اللي يغيظ قوي إني عارف إن النضارة هنا في البيت.. قلبت عليها الدنيا.. كلمت المطعم اللي اتعشينا فيه (يوم ما اكتشفت إن النضارة ضاعت) وقالوا مالاقوش حاجة.. (الظريف إني كلمت المطعم يومين ورا بعض.. نظام "معلش كده بص كويس يمكن تلاقيها"!)

طبعا ولأني بدأت الماجستير قريب بقيت أروح المحاضرات أقعد قدام!.. بالعافية باقاوم إغراء إني ألزق في التيليفزيون عشان أشوف كويس.. ولغاية ما أعمل نضارة جديدة كل ما أروح في حتة في البيت أفضل كده أدوّر يمكن ألاقيها!

والفقد والحرمان على الرغم من إنهم قريبين من بعض لكن إحساسنا بالفقد في معظم المرات بيبقى أشد ومؤلم أكتر.. الزوجة اللي ماخلفتش ماعندهاش نفس مرارة وألم الأم اللي ابنها مات أو اتخطف.. واللي فقد عين من عينيه غير اللي اتولد نظره ضعيف أو بعين واحدة..

فقداننا لأحد الاختيارات في حياتنا بيسببلنا توتر وألم.. حتى لو الاختيار ده مش مستخدم أو مش أهم اختيار..

ولو فيه فرق شوية بين الرجالة والستات في الموضوع ده تلاقي إن الرجالة مهم عندنا يكون فيه اختيارات options في حين إن الستات أشطر شوية في فكرة استغلال المتاح واستخدام الموجود.. المتجوزين جديد تلاقي الراجل عايز يجيب أوضة للعيال بحيث إنها تكفي 8 عيال (احتياطي! أو لو أليط بقى وبيستخدم إنجليش لانجويدج: Just in case!) في حين إن الزوجة ممكن تكون مبسوطة وهي بتحاول تفكر إزاي نستغل المساحة الصغيرة دي في إننا نقفلها دولاب أو نحط كومودينو (أو nightstand بقى بما إن الأليط لازم ياخد واحدة أليطة!)

سفر الأصحاب.. أو وفاة القرايب.. أو انشغال الناس القريبين عنا بيحسسنا بالفقد أو بالخسارة.. بنحس إنه: ياااه.. مش هنقرا تاني تعليقات كوميدية من جلال عامر!.. يا خسارة.. مش هنسمع ويتني هيوستين بتغني تاني!.. مش هشوف صاحبي اللي هاجر! مش هسمع كتير صوت بنتي اللي اتجوزت وسافرت!

الحياة بتستمر.. وبنفضل في القطر ده اللي فيه ناس بتنزل قبلنا.. حاجات بتضيع.. ناس بتمشي.. والحياة بتكمل بينا.. مش دايما ده معناه إننا أحسن أو أوحش..

الاختيار عندي..
الاختيار إني أسترجع ذكريات حلوة مع صديق.. أو أفتكر مواقف جميلة مع حد مات.. أو إني أعيش باقي العمر حزين ورافض التعزية..

زي مافيه ناس "رفضت" أخبار موت مطربها أو مطربتها المفضلين فيه ناس بدأت تجمع كل أغانيهم وترجع تسمعهم كلهم..

مش طول الوقت هيبقى عندي كل الاختيارات.. لكن معظم الوقت أنا عندي اختيار أساسي في توجهي ناحية اللي فاقده أو مفتقده..


لسّة طبعا مالاقيتش النضارة.. (متغاظ قوي!)
لكن متأكد إني هلاقيها طبعا.....أول ما أعمل واحدة جديدة!

15 comments:

  1. هو ال عظيم بيكون عارف انه عظيم !
    انت يا ماجد بجد عظيم!
    Stunning post ! As usual
    I was waiting for it :D
    PS , ba2ra l posts bta3tak 7atta l adema
    KOLAHA! when I need positive power
    It really works :)

    ReplyDelete
  2. Fantastic Article. before you make a new glasses I suggest to bribe a youngester... they usually find it. They have the energy.
    I would like to say Enjoy what you got, Appreciate it, thank God for the blessings

    ReplyDelete
  3. مش عارف الاقي كلام حلو اقوله عن اعجابى بكل مره اقرا لك فيها و نظرالأن كلامي مكرر او انطباعي عن كتاباتك و دايما بقول انك رائع زي اللي بتكتبه بس انت بتعلو كل مره عن كلمه رائع

    ReplyDelete
  4. We miss U ... and that's y I'm listening As7ab project this days ... And Bakeer of course

    ReplyDelete
  5. As much as it hurts losing something or someone, it's such a great joy to have them back... "Hope deferred maketh the heart sick: but when the desire cometh, it is a tree of life." (Proverbs 13:12) Hope you find your eye glasses soon. I understand how irritating it can be! Thank you for the great post :)

    ReplyDelete
  6. أول ماتشترى الجديده هتلاقى القديه فى حته دورت فيها كتير.
    البوست حلوه مع انى كنت متوقع طريقتك هتتغير لما تسافر مش عارف ااى بس كنت متوقع كده

    ReplyDelete
  7. أشكر ربناإن عندى الاختياروالقدرةإنى أسمع كل أغانى ويتنى وأقرا كل كتابات جلال عامر وأتفرج على كل تسجيلات د.ابراهيم الفقى...واسترجع أحلى ذكريات عمرى بالصوروالحكايات..وتستمر الحياة..وكمان لازم أشكر ربنا إن عندى فى حياتى أجمل ناس ولازم أقولهم وأعرفهم أد ايه أنا محظوظةبوجودهم.لازم كمان أقولك يا ماجد إنك هايل وجميل وأنا سعيدة بكتاباتك اللى دايما بتنور أمل وتشع تفاؤل...أشكرك وأتمنى لك كل التوفيق.

    ReplyDelete
  8. your words always have power;Power of hope and love.They convey positive attitude 2 your reader. GOD bless you.Hala helmy

    ReplyDelete
  9. دورت تحت التلاجة ؟؟!!

    ReplyDelete
  10. كنت لسه هاقول ازاي ماجد لسه ماكتبش حاجة , فكرتك حلوة زي اللي بيحاول يبص للجانب المشرق من الموضوع على ارغم من مرارة الفقد

    ReplyDelete
  11. فوق الرائعة وجت فى وقتها علشان بنت عمتى كان فرحها امبارح :((
    كانت ساكنة تحتى واكتر من أختى .. فرحانة جدا علشانها بس احساس أنها بقت بعيدة بيوجع رغم الفرحة.

    موضوع النضارة دا بالنسبة لى حياة وموت ، واليوم اللى بدور على النضارة - وغالبا بنام بيها هى أو اللينسز - ومش بلاقيها بطفى النور وبنام تانى وأعلن اليوم اجازة رسمية لحد ما الاقيها.

    الأفكار الدينية بتفع فى المواقف دى أن كل حاجة ليها عمر فى حياتنا حتى لو عمرها ما انتهاش وفرقتنا .. واللى بيعرف يعيش اللحظة ويستمتع بكل حاجة لأخر "شفطة" ويبعبر عن مشاهره فى لحظتها مابييـأجلهاش ....... مش هايقطع نفسه من الحزن لو فقد حاجة.

    ReplyDelete
  12. first let me say that you are the most incredible person i've ever seen in my life that was the comment i used to get when i lose my sight :) elnadara ya3ny :) i know its everything for me to have them and without it i am completely lost because if i dont see i dont hear :( msh fahma eh el rabet bas howa keda ma3a eny minus 2 bas :(


    you know what thanks God coz we always forget and we will always keep moving in our life and by our choices we can make it better and better coz our life will never depend on something or somebody
    always get a great target with a unique altitudes and never lose it like el NaddarA it will stick in you anyways :D

    Maged you r great ... keep writing ... have a lovely valentine <3

    ReplyDelete
  13. بص كويس يمكن تلاقيها :D

    ReplyDelete