Sunday, January 8, 2012

وش وضهر

يافطة موجودة في القاهرة في مكان من الأماكن اللي المفروض تكون راقية.. اليافطة مكتوب عليها.. "البيئة النظيفة واجهة طيبة أمام السائحين" .. كما لو إن أنا وانت مانستاهلش البيئة النضيفة دي.. مانستاهلش نعيش بأمراض أقل أو بمنظر أحسن أو في مكان مريح للعين.. لأ.. السياح هيتبسطوا.. أنا وانت مش مهم..

وعلى الرغم إن طبعا اللي كتب اليافطة دي مايقصدش كده إلا إننا بنشوف التوجهات دي في كل يوم وكل مكان نتحرك فيه..

كام مرة رضينا بأقل القليل عشان الدنيا تمشي؟ كام مرة قبلنا بأقل من حقنا عشان الموضوع يعدي؟ وللأسف لا الدنيا بتمشي ولا المواضيع بتعدي.. بييجي يوم "بننفجر" فيه من الغضب لأننا عشنا أيام وسنين حاسين إنه "مش من حقي" أتعامل كبني آدم.. مش من حقي أبقى "طمّاع" في إني أحس بإنسانيتي!

من ضمن الحاجات الكوميدية الحزينة في نفس الوقت إن ناس كتير في الغرب حسّوا بمدى "الظلم" الواقع على المصريين لما بس "الإنترنت اتقطع" وقت الثورة.. وكان لسان حالهم: تخيل؟ قطعوا الإنترنت على الناس!! في مقابل إني في أوقات كتير بأبخس من حقي كإنسان ربنا كرمه وبأقبل إني أتعامل بأقل القليل..

الكلام ده بأشوفه في المطاعم وفي خدمة العملا وفي الشارع.. في المدارس وفي التيليفزيون.. في كلام السياسيين اللي مليان "منة وتفضّل" منهم على "الإنجازات" اللي عملوها!!

ياترى التوجه ده بيرضي الخالق؟ يا ترى هو ده "الرضا" اللي فيه أقول: "يا عم كويس إنه لاقي ياكل من الزبالة.. فيه غيره كتير مش لاقيين"؟ إني أرضى "بسحل" واحده مصرية عشان "لابسة بكباسين"؟ إني أبوس إيدي وش وضهر إني ماتحبستش!

ياترى هو ده أقصى طموحك إن خطيبك "بيحترمك"؟ هو ده آخر اللي تتمناه إن صاحبك مايكدبش عليك؟
ياترى هي دي التضحية إن الأم ماتشتريش لبس ليها عشان العيال يتبسطوا؟ هي دي التضحية إني أسيب شركة تضحك علي في الفلوس عشان مابقاش "عنيف وعدواني"؟ هو ده الرضا إني أرضى بمستوى خدمة أو إدارة أو حكم سياسي أقل من العادي عشان "الأمور تمشي"؟

يمكن شكلي يبقى وحش لما أطالب "بحقي".. يمكن الناس تحس إني "زودتها".. جايز يبان إني "عايز كل حاجة مثالية".. لكن متهيألي إني كبني آدم لازم أعيش بالمقاييس اللي الخالق حطها.. وعلى الصورة اللي التصميم الإلهي قصدها...

الصورة اللي فيها الله سبحانه كرمني كإنسان تستلزم إني أعمل واجباتي لكن كمان أطالب بحقوقي.. حقوقي الكبيرة والصغيرة.. حقي في الحرية والمساواة.. وحقي في النضافة والتعامل الكويس.. حقي في وقتي.. حقي في احترام الناس لخصوصياتي.. حقي في التعبير عن رأيي..

وقتها مجتمعي هيعرف حدود كل واحد.. السياسيين هيعرفوا إنهم مش بيكرموا البني آدم "من جيوبهم".. وإن السياح يتمنوا يتعاملوا معاملة أهل البلد.. ووقتها أنا اللي أقرر أتنازل عن حقي ولا لأ.. 

وأكيد هبوس إيدي وش وضهر! مش عشان أخدت أقل الامتيازات في المجتمع.. لكن عشان اتخلقت على صورة ربنا..

13 comments:

  1. مش عارف اقولك اية يا ماجد انا من زمان و انا نفسي منقولش كلمة خليها تعدي و بوس ايدك وش وضهر و ارضي بالمقسوم طيب و فين الطموح و فين الأحلام اللي اتخلقت عشان احققها ؟؟ لية ارضي بحياه انا فيها ميت و ربنا خلقني كائن حي ليا كيان و فكر و حريه لية بيكممونا و في الأخر اسكت و ارضي بنصيبك .. قلبت عليا المواجع بجد كل دي نار جوايا و مش لاقي اي حاجة تطفيها

    ReplyDelete
  2. والله يا ماجد انت قولت كلمتين كانوا محشورين فى زورى بقالهم زمن
    يسلم كيبوردك :)

    ReplyDelete
  3. لا جف قلمك ولا فض فوك!بالتوفيق ودايماً للأمام...تحياتي

    ReplyDelete
  4. اقول ايه؟؟؟؟؟ انا بقالي فترة قرفانة والله يا ماجد من اللي بيحصل ومن المجتمع وتفكيره اللي بيخليني عاوزه ارجع .. مره كباسين ومره ايه اللي نزلها ومره احنا نستاهل اللي بيجرالنا لو كنا قعدنا ف بيوتنا مكنش حصل اللي حصل .... امبارح ف مسيرة حدايق القبة اتحدف علينا تلج وجرادل وقزايز ميه ... انا بجد رغم اني كنت وما زلت وسأظل اعشق تراب مصر الا اني قرفت من الشعب اللي راضي بالعبودية وبيديها مسميات تانية زي الاستقرار والانتظار ووووو ... انا آسفة ان كلامي سلبي المرة دي... بس انت كلامك خلاني اطلع شوية من القرف اللي انا جاسه بيه ..... مرسي لكيبوردك اللي كل مره بيبدع ويبثبت ان مصر فيها (قلة) محترمة وبتفكر صح

    ReplyDelete
  5. معاك حق في كلمة يا ماجد بس للاسف لما يكون الوضع عندك متدني جدا بتوصل للمرحلة دي انك بترضى بأقل القليل للاسف , بس لازم نفضل نطالب بحقنا واهو 25 يناير قرب

    ReplyDelete
  6. All you said is true...but el ta3'yeer qaadem la ma7aala..Thanks ya Maged..N

    ReplyDelete
  7. احيانا التخوف من طلب الحق بيبقي ناتج من احساس الانسان انه اصلا مقصر في واجباته اللي عليه ، فماشي بمنطق .. واحدة بواحدة وخلصت على كده

    حقي يبقي الشوارع كلها نظيفه، بس برمي زباله في الشارع .. عشان كده مش بطلب الحق ده بقلب جامد

    ReplyDelete
  8. كلام رائع بس احنا فعلا مبقناش نقبل بالقليل ......

    ReplyDelete
  9. Great article as usual

    ReplyDelete
  10. Tnx Maged..Great article..Yet the topic of being Content vs ambitious..accepting and seeking happiness from within vs. Asking and demanding for the rights is a hot topic amongst believers..a thin line between accepting and rebelling. How do you see that?

    ReplyDelete