Thursday, January 5, 2012

أبو مبدأ

اختلاف الآراء من الحاجات اللي مش ممكن تنتهي طول ما الأطراف اللي بتتناقش عندها خط مفتوح من التواصل.. احترام الآراء مش مجرد "تصريح" يقوله طرف قبل ما يبدأ "يهزق" الطرف التاني لكنه حاجة بتبان لو موجودة من غير ما حد يحتاج يقولها..

ووسط اختلافاتنا بنلاحظ كتير كلمة "مبدأ".. فتلاقي حد بيقول "على الأقل فلان عنده مبدأ".. أو "أنا باحترم الشخص ده لأنه رجل مبادئ" وهكذا.. جمل بتعظم وتجل فكرة "المبدأ"..

المبدأ يعني إيه؟ ببساطة يعني "نقطة بداية".. "مكان لأول خطوة" (في اللغة العربية بيسموه "اسم مكان" على وزن "مفعل" من فعل "بدأ" ومقصود منه "مكان بداية")

وطبعا ماحدش يقدر يكمل مشوار ويوصل إلا لو "بدأ".. لكن هل أحترم رأيك لمجرد إن عندك "مكان بداية"؟ هل هحترم رأيك لمجرد إنك مش "عشوائي" وبدأت أفكارك "من أي حتّة" وخلاص؟

المشكلة دي بنواجهها لأننا مرات بنفتكر إن مجرد إنك تكون مخلص "لمبادئك" أو "المرجعية" بتاعتك يبقى انت كده رأيك يدعو للاحترام لوحده..

أعتقد إن "طغاة العالم" وكل "ديكتاتور" وبعض "الحرامية" عندهم مبادئ! عندهم أساسيات مش بيخرجوا عنها.. عندهم أنماط تفكير "بيلتزموا" بيها.. عندهم "منهاج فكري" مش بيخرجوا عنه.. تقدر تتوقع ردود أفعالهم.. توجهاتهم فيها اتساق consistency .. مش كل يوم برأي.. مش هتحتار يا ترى هيعملوا كده ولّا هيتصرفوا إزاي؟

لكن إيماني "بمبادئي" مش طول الوقت كفاية.. ولا طول الوقت هيدل إني باخد القرارات السديدة (حلوة السديدة دي).. مش كفاية إني أقوللك "بس هو ده إيماني".. "هو دة اللي أنا مصدق فيه".. "هي دي ثقتي".. لأنك كده كأنك بتقوللي ماتناقشنيش في الأساسيات.. اللي انت غالبا تقصده "ماتناقشنيش في "أساسياتي"!

اللي بيدعو لدولة دينية عنده مبادئ.. واللي بيدعو لدولة عسكرية عنده برضه مبادئ.. واللي بيدعو للحرام عنده مبادئ.. واللي بيدعو لاسترجاع نظام ديكتاتوري عنده مبادئ.. واللي مش بيدعو لأي حاجة خالص عنده برضه مبادئ!

"تصديقك" الأمين قوي لحاجة معينة مش دايما بيديها منطقية "اوتوماتيكية"!..اشرحلي "منطقية" مبادئك بدل ما تسكّتني بإن عندك مبدأ!

حلو قوي إنك تبتدي! بس متهيألي أحلى إنك تبتدي من مكان صح.. مش تبتدي وخلاص يا أبو مبدأ! :)

12 comments:

  1. حلو قوي إنك تبتدي! بس متهيألي أحلى إنك تبتدي من مكان صح Nice one bro :)

    ReplyDelete
  2. Good job .... this is a new good point of view for me, I love it. Thanks

    ReplyDelete
  3. بس أنا عندى مبدأ .. أنه لازم يبقى عندى مبدأ

    لو كللللللللللللل "بمعنى الكل فى الكل" قابل أنى أغيره ومافيش حاجة ببقى عارفة وانا بنطلق منها أنى هارجع واستكين فيها تانى .. يبقى الحياة جحيم من الشك.

    ReplyDelete
  4. Great and important article . Thanks . N

    ReplyDelete
  5. حلو إن الواحد يبقى عنده مبدأ وياريت لو المبدى دا صحيح والأحلى بقى إنه يصحح المبدأ دا كلما أمكن وكلما اتيحت الفرصة ووجد المكان الأصح!

    بالمناسبة
    consistency
    غالبا بتقال عليها تناسق

    S

    ReplyDelete
  6. صح جداً يا ماجد..مش كل مبدأ هو حق وعدل وصح لكن كل حق وعدل في الأساس مبدأ!أبدعت"كالعادة"..أشكرك

    ReplyDelete
  7. المبادئ هيا مجموعه من القيم والثوابت اللى اتفق عليها اغلبية الناس
    زى الاخلاق كده
    الصدق مبدا
    والامانه مبدا

    الانسان مش محتاج يشرح منطقية الصدق!
    احنا مش هنعيد اختراع العجله من الاول لمجرد النقاش

    ReplyDelete
  8. صح جدا
    حتى حمادة هلال عنده مبدأ ... وغناها في اغنية: "مش أي حد يقولك عني كلام تصدق .. تصدق"ـ

    ReplyDelete