Saturday, December 24, 2011

محاسن الصُدف

بنسمع كتير عن صُدفة أدت لاكتشاف حاجة جديدة أو لاختراع مفيد.. أو حاجة كانت بتستخدم لغرض معين وبعدين استفادوا بيها في حاجة تاني..

من الحاجات اللي معظمنا يعرفها هي إن كريستوفر كولومبوس ماكانش رايح يكتشف أميريكا.. وإن كوكاكولا ماكانتش أصلا مخترعة كمشروب لكن كعلاج.. اللي عمل كوكاكولا كان جون بيمبيرتون (صيدلي من أتلانتا) وكان بيحاول يوصل لتركيبة لعلاج إدمانه للمورفين بعد إصابته!..

حاجات كتير زي الساكارين (بديل السكر) والتراب الذكي والبلاستيك والنشاط الإشعاعي ومنظم ضربات القلب.. كلها حاجات اتعملت أو اكتشفت "بالصدفة" لكن مش أي صدفة.. صدفة جاية لواحد "مستعد" للصُدف!
 
النصيحة اللي قدمها لُوِي باستور (اللي برضه اكتشف شوية حاجات كدة بما يشابه الصدفة) قال فيها: "الفرصة بتيجي في صف العقل المستعد"..

العالِم اللي شغّال ليل نهار في معمله والباحث اللي طول الوقت بيدوّر ويبذل مجهود هيكون من السهل إنهم "يتخبطوا" بالصدفة في حاجة تغيّر العالم.. الثائر اللي هَمُّه مصلحة بلده وبيقرا ويبحث ويدوّر لخيرها هو اللي ممكن "حظّه" يقوده لاستنارة جديدة بيها يغيّر تاريخ شعب كامل!

أنا نِفسي أبقى على طول مستعد.. على طول باجتهد للأفضل.. سواء في شغلي أو مع عيلتي أو بلدي أو علاقاتي.. اجتهادي هو اللي ممكن "يقنع" الفرصة إنها تجيلي..

أنا مستعد إنه "في يوم وليلة" ممكن مستقبلي يتغيّر بسبب "صدفة حلوة".. لكن في الغالب دي هاييجي بعد "أيام وليالي" من مجهود وتعب وجد..

مش كل الصدف جميلة.. لكن الصدفة اللي جاية لواحد مجتهد بتبقى من محاسن الصدف!

8 comments:

  1. حقيقة مش صدفة إني بقرأ كلمات حقيقية ومُعبرة عن واقع محتاجة أعيشه اليوم وبكرة وطول العمر، المثابرة والاستعداد في حياتي وعلاقتي بيسمح اني اكتشف اسرار ومفاجئات في حياتي وهي في الحقيقة نتيجة لاستعدادي الدائم.....شكراً ليك ياماجد على الكلام الجميل والجامد
    Vanda

    ReplyDelete
  2. أنا لا أؤمن بالحظ الوصدفة ..

    أؤمن فقط أن الحياة غنية جداااااااااااااا
    وإننا نتجاهلها جداااااااااااااا
    ونعدما نستفيق للحظات من العمى والشروط والتخطبط
    ونلتفت لمعنى أو نلاحظ مايستحق الملاحظة .. نسمى مالم نتكاسل عنه صدفة أو حظ.

    ReplyDelete
  3. STUNNING ya maged =)

    ReplyDelete
  4. Always with good intentions everything eventually falls in place. Great article. Thanks.

    ReplyDelete
  5. حلوة اوي الفكرة دي وحقيقية دايما السعي ورا الحاجة هو اللي بيخلقلك الصدفة او الفرصة :)

    ReplyDelete
  6. Fantastic article as I read it again. What you are talking about is not the lottory. It is a hard worker who succeed faster than anticipated, accedentaly, or kind of Synergy.
    Thanks again Maged.

    ReplyDelete