Friday, January 3, 2014

حلمي مكتوب؟

قررت من قبل بداية السنة على طول إني أبدأ أكتب أحلامي والمشاريع اللي نفسي أعملها أو أشارك فيها.. كان إحساس عظيم لما بدأت أحط على الورق شوية أفكار لأحلام وخطط كبيرة يمكن مالهاش معالم لسّة, لكن بقى شكلها ينفع! مجرد التفكير في صياغة حتى لو مبدئية لكل حلم فيهم إديتني انطباع إن الأحلام دي مش مستحيلة..

نوتة زي بتاعة المحاضرات كده.. ومخلّي كل صفحتين قدام بعض فيهم حلم أو مشروع واحد.. واكتشفت الكام يوم دول من بداية السنة إن أفكار كتير وتفاصيل كتير جاتلي لكذا حلم فيهم, وبقيت أقلّب في النوتة وأوصل للحلم أو المشروع وأضيف التفاصيل.. أحلام منهم محتاجة سنين وفلوس كتير عشان يتحققوا.. وأحلام تانية كان شكلها أصعب قبل ما أكتبهم..

المرحلة اللي فيها الحلم مالوش معالم ولا تفاصيل واضحة.. شكله بعيد قوي ومالوش "مسكة"! هي مرحلة صعبة.. وسهل جدا عليّ إني أزهق وأحس إنه لما يبقى معايا فلوس أو ألاقي حد من أصحابي متحمس أبقى أفكر في المشروع ده.. لكن هاأشوف بقى حكاية نوتة الأحلام دي وإذا كان مجرد كتابة الحلم ممكن تساعد أو تعجّل من تحقيقه..

مريح نفسيا إن حلمي أو المشاريع اللي أتمنى أعملها في يوم من الأيام مايفضلوش أفكار فضائية هلامية في ذهني.. فاكر منهم شوية وناسي نصهم.. كاتب شوية وبأضحك على نفسي فاكر إني هأفتكر الباقي.. 

ناوي أبطل أكسل على الأقل إني أكتب أي فكرة حلوة ممكن يوم من الأيام تتحقق.. حتى لو فكرة أو مشروع أو حلم فيهم هايحتاج خمس سنين أو مليون جنيه عشان يتحقق.. أهو على الأقل لما يجيلي المليون جنيه يبقى حلمي جاهز على التنفيذ على طول!..

12 comments:

  1. حتصدق لو قلتك ان حلمي الوحيد اني اوصل للمرحله اللي يبقالي فيها احلام اساسا واعرف انا عاوز احقق ايه ؟؟!!!؟

    ReplyDelete
  2. حتصدق لو قلتك ان حلمي الوحيد اني اوصل للمرحله اللي يبقالي فيها احلام اساسا واعرف انا عاوز احقق ايه ؟؟!!!؟

    ReplyDelete
  3. واو تجنن .الفكرة جميلة وتنفيذها مش سهل لكن مش مستحيل .هاطبقها .ولان الورقة والقلم اصحابى جدا فمش هالاقى صعوبه ف كدا .وهاسيب ورقتين بعد كل حلم فاضيين عشان التفاصيل

    ReplyDelete
  4. Genius Idea.

    A "Hispanic" comedian once said "Dream Big".. you will achieve it one day.
    There is a difference though between the Arabic and the English use of the same word.

    ReplyDelete
  5. كوني أعرف أنا عايزا إيه دا في حد ذاته إنجاز
    كوني أتخيل مجرد التخيل المفروض أخشي في أي اتجاه دي الصعوبة الحقيقة
    أسهل حاجة إنك تخطط وتنفيذ هدف محدد ومعروف
    الأصعب إنك تحدد الهدف/الحلم/رؤية

    مواقفني?
    لو آه يا ريت تقدرتساعدني
    S. El Behairy

    ReplyDelete
  6. أمشي في أي إتجاه

    ReplyDelete
  7. تقريبا كلنا نفس الفكر..مش محددين او مش قادرين نحدد اللي عايزينه حلم او هدف. ..بس عارف. ؟؟ ده لاننا أحيانا بنخاف نفكر ..بنخاف نحلم عشان منتصدمش.وبنفضل كده لحد ما نفقد الأمل. وننسى اصلا يعني ايه حلم..يتحقق...انا يمكن حلمي مش عظيم بس قدرت عالاقل اعدي حتة الخوف.وحددت هدف وحلم اسعى واتعب عشان يتحقق. ..وبجد عايزة اكمل..وخايفه

    ReplyDelete
  8. حلو هحاول أعمل كده

    ReplyDelete
  9. حلو الكلام
    عودا حميدا :)

    ReplyDelete