Tuesday, March 19, 2013

نُص الكوبّاية

دعوات التفاؤل في أحيان كتير بتستخدم فكرة "نُص الكوبّاية" عشان تعبّر عن إن ينفع الواحد يبُص على الحاجة الإيجابية بدل ما يشتكي من باقي الكوبّاية الفاضي.. وعلى الرغم من رجاحة الفكرة (حلوة "رجاحة" دي) إلا إن فيه مغالطات كتير بتحصل كل ما بنقيّم كوبّاية على إنها نُص مليانة..

عايشين بقالنا فترة بنُص كوبّاية.. وعلى الرغم إن بعض الناس اللي ممكن يسمّوهم متشائمين شايفين إن حتى نُص الكوبّاية مش موجود.. وغيرهم اللي شايفين إن الكوبّاية نفسها اتكسّرت من فترة إلا إن افتراضنا إن نُص الكوبّاية "كفاية" و"أهو يمشّي مؤقتاً" هو افتراض من وجهة نظري ساذج..

ليه؟ لأن ببساطة إذا إنت ماعندكش ميّة تكفّي الكوبّاية استخدم فنجان يا أخي!.. لكن إصرارنا على نُص كوبّاية إصرار بيودينا في دواهي (كذا داهية يعني).. نُص ديمقراطية (صناديق تقول كلمتها وطوابير).. نُص أمن.. ونُص تعليم.. ونُص صِحة.. ورُبع زتون!.. ببساطة تهريج..

اللي ممكن يكون ملفت الكام سنة الأخيرة دي هو كمان نُص الكوبّاية بتاع المعرفة.. كل واحد قراله مقالة أو دوّر على معلومة على جووجل (أو "غووغل" عشان لو قريب حد هنا ولّا حاجة) أو سمعله حلقة في برنامج بقى عارف كل حاجة عن الاقتصاد والجواز والعلاقات الدولية والأمراض النفسية وإحساس كبار السن والمثلية الجنسية!.. ولأن المخ عنده الميل (اللي المفروض إنه ميل طبيعي) إنه "يقرّب" المُعطيات اللي جايّاله لأقرب تفسير عنده فكتير مننا بنُقع في مشكلة إننا بنستنتج ونحلل ونقارن ونقرر بسرعة.. في مقابل إن لو المخ اتعرض لمُؤثر جديد تماما أو لمؤثر مالوش شبه في المخزون اللي عنده عادة بنميل إننا نستفسر ونحاول نلاقي معلومات أكتر عشان نفهم..

فيه تجربة لطيفة عرضوا فيها صورة باين فيها وش لاعيبة تنس وسألوا الناس إيه المشاعر اللي عند اللاعيبة في اللحظة دي.. نسبة كبيرة جدا من الناس قالوا "إحباط" أو "حُزن إنها ضيعت نقطة".. لما عرضوا الصورة كاملة (باين فيها قبضة إيد اللاعيبة) كان باين جدا إن المشاعر وقتها كانت العكس تماما.. إنها كانت مشاعر "سعادة" و"راحة".. كل ده كويس.. لكن اللطيف أكتر إن لما الصورة اتعرضت لناس تاني لكن الصورة كانت بخلفية مش واضحة والكاب مش باين ووش اللاعيبة بس هو اللي موجود الناس رفضت تقول أي مشاعر.. قالوا "قولولنا أكتر هي فين؟ بتلعب رياضة معينة؟ ولّا موجودة في جامعة؟ ولا في الأوتوبيس؟" ..لأن المُخ ما عرفش يقرّب اللي شايفه في الصورة اللي مش واضحة بالمخزون اللي عنده.. لكن المخ في أول تجربة اتخمّ بنُص التفاصيل.. وكان أحسنله إن مايكونش فيه وضوح (فالناس تستفسر أكتر) عن إن التفاصيل تبقى نُص نُص والناس تتخمّ..

نُص الحقيقة ونُص المعلومة ونُص المقال ونُص المعرفة هي طُرق استفزاز.. وعلى الرغم من إن نُص الكوبّاية بيبان إنه "خطوة" وإنه "أحسن من بلاش" إلا إن مرّات بلاش بيبقى أحسن!.. بلاش بيخليني أعرف إني محتاج أبحث في الموضوع وأدوّر فيه..

اعتيادنا على نُص الكوبّاية المليان هو حاجة مؤسفة لأنه لا خلّانا نكّمل نملا الكوبّاية ولا حتى بعنا الكوباية وجبنا كوبّاية أصغر ولا حتى اعترفنا إننا ماعندناش اللي يكفّي..

مش عيب إني بأعرف نُص معرفة لكن لو كل كوبّاياتي أنصاص يبقى بأضحك عليك لو وعدتك إنك تجيلي ترتوي..

5 comments:

  1. لا تجالس أنصاف العشاق.ولا تصادق أنصاف الأصدقاء. لا تقرأ لأنصاف الموهوبيين.لا تعش نصف حياه ولا تمت نصف موت. لا تختار نصف حل ولا تقف فى منتصف الحقيقة. لا تتعلق بنصف حلم ولا تتعلق بنصف أمل. اذا صمت فأصمت حتى النهايةواذا تكلمت فتكلم حتى النهاية .لا تصمت كى تتكلم ولا تتكلم كى تصمت.
    اذا رضيت فعبر عن رضاك. لا تصطنع نصف رضا. واذا رفضت فعبر عن رفضك لأن نصف الرضا قبول.
    النصف هو حياه لم تعشها وهو كلمة لم تقلها وهو ابتسامة أجلتها. وهو حب لم تصل اليه وهو صداقة لم تعرفها. النصف هو ما يجعلك غريبا عن أقرب الناس اليك وهو ما يجعل أقرب الناس اليك غريب عنك.
    النصف هو أن تصل وأن لا تصل. ان تعمل وان لا تعمل.أن تغيب وأن تحضر.
    النــــــــــصف هـــو أنت عندمـــا لا تــــكون أنت.
    لانك لم تعرف من أنت. النصف هو ان لا تعرف من انت.ومن تحب ليس هو نصفك الأخر.هـــو أنت فى مـــــكان أخــــــــر فى نفـــــس الوقـــــت.
    نصف شربة لم تروى ظمأك ونصف وجبه لم تشبع جوعك. .نـــصف طـــــريق لا يوصــــلك الى أى مكـــــان .ونصف فكرة لن تعطى لك نتيجة
    النصف هو لحظة عجزك وأنت لست بعاجز لأنك لست نصف انسان.
    انت انسان وجدت لكى تعيش حياهو ليس كى تعيش نصف حياه.
    ليس حقيقة الانسان ما يظهره لك
    لذلك : اذا اردت ان تعرفه فلا تصغى الى ما يقوله بل الى ما لا يقوله.
    كلمات للرائع جبران خليل جبران.
    للصدفة الغريبة انى قرأتها بعد الموضوع بتاعك علطول

    ReplyDelete
  2. :))
    في ناس مش شايفه الكوبايه اصلا:))

    موضوع نص المعرفه ده هيجنني اصلا
    كله بقا بيفتي

    ReplyDelete
  3. ثقافة الهزيمة .. أرجوك لا تعطنى هذا السرطان

    نشرت جريدة المصرى اليوم فى 20 و 23 أكتوبر 2012 "مرسى" لأهالى مطروح: المشروع النووى فى الضبعة.. و"ما أدراكم ما الضبعة!" قال الرئيس "مرسى" للأهالى إنه يسعى لإنشاء 5 مشروعات نووية لتوليد الطاقة الكهربائية، وليس مشروعاً واحداً فى الضبعة، ومازح الأهالى قائلاً: "الضبعة.. وما أدراك ما الضبعة"


    نشرت مجلة دير شبيجل الألمانية فى 19 مايو 2011 "الفلبين : أطلال المفاعل النووى باتان مزار للسياح " كارثة فوكوشيما أعطت رد فعل ، المفاعل النووى الوحيد فى الفلبين Bataan
    لم يتم تشغيله أبدا و لم ينتج كيلو وات واحد من الكهرباء للأن و سيظل هكذا مستقبلا ، و الأكثر من هذا أن المفاعل النووى الذى يقع على شبة جزيرة باتان أصبح منذ مايو 2011 مزار للسياح.

    ألمانيا و بلجيكا و سويسرا يقرروا إنهاء الطاقة النووية و أغلاق مفاعلاتهم النووية تدريجيا.

    و نشرت صحيفة Salzburger Nachrichten النمساوية فى 16 أكتوبر 2012 "ليتوانيا تقول لا للطاقة النووية " فى أستفتاء شعبى رفضت الأغلبية بأكثر من 62 % خطط لبناء مفاعل نووى جديد .

    و نشرت صحيفة دير شتاندرد النمساوية فى 15 يونيو 2011 إيطاليا تظل خالية من الطاقة النووية، هو قرار الإيطاليين فى أستفتاء شعبى و الذى صوت بنسبة 95 % ضد الطاقة النووية...

    باقى المقال بالرابط التالى www.ouregypt.us


    لماذا الأصرار علي الحرث في البحر ؟!! والمنطقة العربية مشهورة بصحاريها المشمسة فترة طويلة من العام. العالم الغربي يرجونا أن نصدر له الطاقة النظيفة عن طريق الخلايا الشمسية بالصحراء الغربية ، والمسؤلين الكهول المتحجرين الملتصقين بكراسيهم ما زالوا يصرون علي مشروع الضبعة النووي حتي لا يفقدوا عمولات حصلوا علي جزء منها والباقي ما زال في أنتظار التنفيذ ؟! طبعا سيستوردوا مفاعلات من نفايات أوروبا النووية ولتذهب منطقتنا الي جحيم الذرة ما دامت كروشهم مستمرة في التضخم

    ReplyDelete
  4. جميلة جدا الحقيقة

    عزه عارف

    ReplyDelete