Tuesday, January 3, 2012

مش شوكولاتة

زي اليومين دول من 9 سنين كان فيه مقال بيتكلم عن "انتصار لذيذ" حققته إنجلترا في معركة غريبة شوية من نوعها.. المعركة كانت على "الشوكولاتة" وعلى سماح بعض دول الاتحاد الأوروبي للشوكولاتة الإنجليزية إنها تتباع بحرية في الدول دي  تحت "مسمى" شوكولاتة!!

أنا مش باتكلم على سوء تفاهم أو فرقعة أو خبر طريف.. أنا باتكلم عن معركة فضلت مستمرة 30 سنة (1973-2003)..واتأثرت فيها شركات كبيرة زي Cadbury وNestle .. أسبانيا وإيطاليا كانوا عاملين زي حصر لمبيعات الشوكولاتة المتصنعة في بريطانيا عشان فيها نسبة 5 % دهون نباتية بدل ماتكون معمولة من زبدة الكاكاو الخالصة!

وعلى الرغم من إن فيه اتفاقية واضحة إن ممكن الشوكولاتة يتضاف عليها نسبة قليلة من الدهون النباتية طالما إن المكونات مكتوبة بوضوح على الغلاف إلا إن أسبانيا وإيطاليا كانوا مصرين على تسمية الشوكولاتة الإنجليزي: "بديل للشوكولاتة".. المنتجات دي كان ممنوع تتباع تحت مسمى شوكولاتة والسبب اللي كانت الدول دي بتقدمه هو "حماية المستهلك"..

وعشان كده حتى لغاية دلوقتي هتلاحظ إن منتجات كتير مش مكتوب عليها خالص "شوكولاتة" على الغلاف.. هتلاقي مثلا: Dairy Milk أو حاجات شبيهة.. وفي بعض الإعلانات ممكن تلاقي تفادي شيك للكلمة.. فتلاقي حاجات زي: طعم السعادة.. دلّع نفسك مع كذا..

وعلى الرغم إن الموضوع ده شكله تافه إلا إنه في منتهى الخطورة.. حياتنا كلها ما هي إلا "مسميات".. وكتير من السياسيين بيدفعوا كل اللي معاهم مش لتغيير مفاهيم ولا لتصحيح أخطاء ولا حتى لوصول لأراضي مشتركة.. لكن بيدفعوا كتير من فلوس ووقت ومجهود لتغيير "أسامي"..

واجهنا كتير محاولات بتقول: معقول ثورة يقودها واحد اسمه وائل وشادي؟ أكيد مش "ثورة".. لأ ماتسميهاش ثورة.. سميها "فورة" سميها "غضب شعبي".. لأ ماتقولش شهدا قول "ضحايا".. قول "قتلى"...ماتقولش "مدنية"..
ماتقولش "انتهاك" ولا "هتك عرض" قول مثلا.. "فعل مخل بالحياء!!".. أو "كشف عذرية".. اختار اسم شيك حتى لو الكل عارف إن مصيبة حصلت..

مش هتقدر تضحك عليّ لما تختارلي اسم "شيك" للمصايب اللي انت بتعملها..

مش عايز يتضحك عليّ بمسميات بتحاول تخفف أو تهول من معاني..

عايز أرجع من تاني للمنطق في التقييم.. وقبل ما أحكم على حاجة عشان اسمها أبص للمحتوى وللجوهر.. عايز أرجع أسمع رأيك من غير ما أحاول أعرف اسمك الثلاثي عشان أشوف انت أشرف أحمد رمضان ولّا شوقي أبانوب فيلوباتير!

وهافضل أحب آكل كل حاجة طعمها حلو وبتديني طاقة وإحساس بالنشاط وياريت لو فيها بندق حتى لو مكتوب على الغلاف من برة: "مش شوكولاتة"!

17 comments:

  1. ماجد نفس حروف عبقري :D

    ReplyDelete
  2. هايلة جدا يا ماجد :))

    ReplyDelete
  3. وهو البني آدم مننا آيه غير شوية مسميات ومصايب فوق بعض

    ReplyDelete
  4. رائع رائع رااااااااااااائع

    ReplyDelete
  5. انت بتعرف الحاجات دي ازاي , اول مرة اعرف حكاية المش شيكولاته دي :)
    بس فكرتك حقيقية فعلا بيفرق معانا اوي اسم الشخص مش الكلام اللي بيقوله حلوة :)

    ReplyDelete
  6. لذلك غنت جواهر حط الورد على الشوكلاطة ... حلوة يا ماجد يا جامد

    ReplyDelete
  7. بوست رائع و عبقري يا ماجد
    ..N

    ReplyDelete
  8. وهافضل أقرأ مقالاتك لأن روحها حلوة وبتديني طاقة وإحساس بالنشاط والأمل والتفاؤل. بجد بتفرق زى إحساس الشيكولاته لما أكلها وأنا هبطانه وتعبانه.

    S

    ReplyDelete
  9. أنا قلت قبل كده ولازم أقول تاني وهفضل أقول:أفكارك الراقية بأسلوبك السهل الممتنع ده لازم توصل لكل الناس وفي كل مكان،هتغير وتفرق كتير في حياتهم ...لااااازم!! مكانك مش بس علي تويتر والمدونة!!أشكرك وأرق تحياتي

    ReplyDelete
  10. You are such a great blogger :) I am enjoying my trip here in your blog .. Keep it up man :)

    ReplyDelete
  11. ثقافتك مربوطة مع موهبتك فا بتخليني استمتع يا ماجد

    ReplyDelete