مش إحنا في مصيبة؟ لازم نصقف

عندي إحساس إني كبرت شويَّة النهاردة على المستوى النفسي، والسبب هو إني اختبرت شعورين عكس بعض على مدار اليوم.. تليفوني ضاع في بداية اليوم، وحضرت مؤتمر عن موضوع مهم في مذاكرتي.. وطول اليوم وأنا حاسس بالشعورين دول.. من ناحية شعور سخيف من قلة الحيلة والضيق والندم عشان التليفون اللي ضاع، ومن الناحية التانية شعور جميل بالإنجاز والتشجيع على المحتوى اللي قدمته واللي قدمه غيري في المؤتمر..

اختبرت قبل كده المشاعر المختلطة.. ولما حصل الموقفين دول النهاردة على مدار اليوم سألت نفسي لو الإحساس اللي عندي هو إحساس واحد (متلخبط) ولا إحساسين منفصلين وشكلهم عكس بعض؟ لكن لقيت إنهم إحساسين منفصلين تمامًا.. متعلقين بموضوعين مختلفين، وكل واحد فيهم منطقي لوحده.. مش إحساس "رمادي" لكن إحساسين كل واحد ليه لون منفصل..

قبل النهاردة كنت غالبًا بأختار شعور واحد وأخليه هو اللي يكسب! شعور واحد بس يبقى هو البطل خلال اليوم عشان الدنيا تمشي سهلة.. ومرات كتير يمكن ده بيكون فيه تحدي أقل، حتى لو الشعور اللي اخترته هو الشعور السخيف.. وزي ما أكون كنت قبل كده بأضحك على نفسي بإني أوهمني إن الشعور السخيف "مش مهم" لأن فيه حاجات تانية كويسة.. أو الحل التاني إني أحس إني مش قادر أتبسط النهاردة لأن فيه حاجة منغَّصة عليَّ اليوم..

موضوع إني أغلِّب شعور على التاني ممكن يكون أسهل (ويمكن منطقي أو ضروري أكتر) لما يكون شعور منهم يخص حاجة مهمة قوي والشعور التاني أقل أهمية.. يعني مثلا لو فرح حد من أصحابي وتليفوني ضاع ممكن يكون منطقي إني أحس إنه مش مهم التليفون خالص دلوقت.. إنساه! أو في المقابل لو فيه موقف فيه حد عيان ومحتاج يروح المستشفى ممكن برضه وقتها يكون موضوع إني أخدت وظيفة جديدة موضوع ممكن يتأجل التفكير فيه..

لكن الأصعب غالبًا هو لما الشعورين يكونوا شعورين عاديين.. مش هاموِّت نفسي لو حاجة ضاعت، ومش هامشي أتنطط في الشارع لو المحاضرة طلعت كويسة في المؤتمر، والصعوبة هي إن كل شعور فيهم منطقي لوحده، والشعور التاني مش قوي كفاية إنه يلغي الشعور الأول أو "يغلوش عليه"..

كنت عارف قبل كده نظريًا إنه ينفع أبقى حاسس بإحساسين يبانوا عكس بعض في نفس الوقت، لكن مبسوط إني اختبرت ده عمليًا النهاردة.. مبسوط إني قدرت أميزهم، ومبسوط إني شفت منطقية في الإحساسين وعبَّرت عنهم على قد ما قدرت، وعلى الرغم من إنهم ساعات ممكن يبانوا إنهم "ما ينفعوش مع بعض" (حاجة كده شبه لما عاطف قال: مش إحنا في مصيبة؟ لازم نصقَّف!)، إلا إنهم متهيألي ينفعوا..

متضايق جدًّا إن تليفوني ضاع.. وفرحان قوي إن المؤتمر مشي كويس.. ومبسوط إني عرفت أميِّز الشعورين وأحس بيهم في نفس الوقت..

 

مش زُرار

من أربع خمس أيام مرت مصر بحدث كبير أثر على ناس كتير بطرق مختلفة.. ولأول مرة خلال شهور يكون فيه مشاعر مختلطة من حزن وخوف.. غضب.. شماتة.. قلق.. إحساس بإنه عادي.. ولو سألنا 10 أشخاص يمكن نسمع عشر مشاعر مختلفة وانطباعات عند كل واحد كأننا شايفين حدث مختلف...مع إن اللي مات شخص واحد معروف!

  

وبدأت أحاديث كتير وكلام مختلف على فكرة المحبة.. وإننا لازم نحب بعض.. وإن فيه "وصايا واضحة" وإلي آخره من الكلام اللي أغلبنا عارفه كويس قوي وبيردده..لكن صعب يعيشه..

هتلاقي اللي بيقول "السيد المسيح قال أحبوا أعداءكم" وهتلاقي اللي بيقول "الرسول صلى الله عليه وسلّم توقف لجنازة يهودي باعتبار إن اللي مات نفس تستحق الاحترام"...
وهتلاقي كلام يبان إنه "تعاليم" ومش بس كده لكن تعاليم "سامية" و"راقية" أعلى من مستوى البشر.. 

لكن اللي شايفه إن الكلام ده مش "تعاليم"  على الرغم من إنه في منتهى السمو..

الكلام ده زي بالظبط الفرق بين "الوصفة" و"الوصف".. في الوصفة أنا باقوللك تعمل إيه ولو عملته تبقى كويس.. في الوصف أنا بأقولك الكويس بيعمل إيه!

دايما بافتكر تعبير لصديق ليّ بيقول إنه لما بنقول "حبيبك يبلعلك الزلط" مش معناها إني ينفع أروح لواحدة عايزها تحبني وأقولها: لو سمحتي بعد إذنك.. ممكن تبلعيلي الكام زلطة دول؟!  :)  أكيد لأ.. لكن لو حد باحبه فعلا بيبقى هاين عليّ أروح أقوله: على فكرة أنا باموت فيك.. مافيش عندك أي زلط أبلعهولك؟! :)

في الأحداث اللي فاتت اللي كان ملحوظ كان شبه "إنت لازم تحبني غصب عنك.. فيه وصية بتقول كده" .. أو "يابني أنا تعاليمي بتقوللي إني لازم أقبلك" فبنلاقي كل التوجه هو توجه إني هاعصر على نفسي لمونة "واحبك بقى وخلاص"!

أو على أفضل الأحوال جمل زي "خلينا إحنا الأحسن ونوريهم إننا بنحب بجد" وتحس إن الجملة محتاجة كمالة على غرار "الكلاب دول"!.. أو "مايصحش كده يا جماعة.. يقولوا إيه على تعاليمنا؟ على الرغم إن اللي مات ده ابن ستين في سبعين وياللا أهو غار في داهية لكن برضه لازم نراعي مشاعرهم"!

المحبة مش يعني إني "أطيقك" و"أستحملك" و"أهو هنعمل إيه".. و"نسيج واحد"

المحبة مش محتاجة "مبرر" و"قانون" و"نص" من الإنجيل أو القرآن..

مافيش "زرار" أدوس عليه أعرف أحبك.. ولو جبتلي ألف نَص مقدّس هبقى بقول كلام إني باحبك لكن جوايا أنا جازز على سناني!

"أحبوا أعداءكم" مش زرار.. "أحبوا أعداءكم" هي ببساطة "وصف" للإمكانية الضخمة اللي فيها ممكن أوصل لهذا السمو اللي يفوق البشر.. اللي فيه أبقى قريب من ربنا سبحانه لدرجة أبقى "مش قادر" أكرهك حتى لو حاولت..

دعوة التعاليم السامية دي هي مش دعوة لحاجات نعملها.. هي دعوة "لوضع عظيم" من قُرب خاص لربنا يخلليني "لوحدي" "مش عارف" غير إني أحب..

الأب والأم مش بيحبوا عيالهم لمجرد إن  محبة عيالهم "منطقية" و"هي دي الأصول" و"ثقافتنا بتعلمنا كده".. الأب والأم بيحبوا عيالهم من غير مايقدروا يفكروا حتى إنهم بيحبوهم زيادة

الأب اللي بيوطي على الأرض ويخللي ابنه الصغير يتشعبط على ضهره لمجرد إن الولد يبتسم هو نفس الشخص اللي قبل مايخلّف كان شايف الحكاية دي "عبط" و"دلع سخيف" لكن من محبته التلقائية لابنه "بيتلكك" عشان يلاقي أسباب تخللي شكل اللي بيعمله منطقي!

اللي بيتعامل مع أطفاله مش بيتعامل بالمنطق.. مش هيقول لابنه اللي عنده 4 سنين "مافيش حاجة اسمها أبو رجل مسلوخة.. إنت إزاي يابني عبيط كده!" لكن ببساطة باحط نفسي مكان الطفل أبو 4 سنين وباكتشف إن تحدي "ابو رجل مسلوخة" هو التحدي الراهن في المرحلة دي! "العولمة" و"ذوبان الثقافات" وكل الكلام "الصح!" هييجي بعدين..

إني أفهم إن المراية مهمة لمراتي هيخليني أقدر الوقت اللي بتقضيه قدامها.. لو "السلام عليكم" هتبسطك أكتر من "صباح الخير" ماقولهالكش ليه؟ لو أنا عارف إن بالنسبالك دة أحسن سلام ليه ما أقدملكش أحسن سلام؟ مش أنا يا أخي باقدمهولك إنت؟

لو بتهنيني بعيد الأضحى أو بعيد القيامة هل ده دليل إنك مؤمن بيهم؟ ولّا نِفسك يا أخي تتلكّك عشان تبسطني وناكل حاجة مع بعض ونخرج نتفسح؟

لما بيتفتح موضوع المسيحيين والمسلمين.. والمحبة.. وقبول الآخر.. وكل "الكلام" ده.. مش بييجي في بالي "أنا لازم أحبه.. فيه آية بتقول كده"!

بييجي في بالي هاني وكريم وشادي وجو وشريف وإميل وإسلام.. أندرو ومايكل وأحمد ولاري ونادر ومصطفى وعمرو (أنا متأكد إن أصحابي قوي هيكملوا ويقولوا "وأشرف إبراهيم")..

ده اللي بييجي في بالي.. وجدع؟ اقنعني ماحبهمش!

حبي ليهم مش فضل باقدمهلهم.. ده استمتاع مستمر ليّ.. وعشان كده فيه ناس بتتلكك عشان تثبت من نصوص إنه "ينفع" أحب غيري..

عشان أحب نفسي وأقبلني وعشان أحب غيري وأستمتع بالمحبة دي أنا دايما محتاج أبقى أقرب ما يمكن من مصدر المحبة.. الله الودود.. الله المحبة.. الله سبحانه مليان محبة وود.. الله من الأزل ودود.. من قبل ما يخلق الإنسان.. الله جواه محبة أصيلة..و يا بخت اللي يقرب منه.. هتلاقيه بيحبب فيه خلقه.. وكمان "يحببه" في خلقه..

مش زرار أدوس عليه أعرف أحب! لكن قُرب حقيقي من مصدر الحب هو اللي ممكن يخلليني "أطنش" الفيديوهات اللي بترد على بعض وأكلم محمود وريمون ومهند وتوني وبيتر وأشوف اللي فاضي فيهم نخرج! :)

XX

الاختصارات اللي بنستخدمها على الإنترنت من أكتر الحاجات اللي بتلخبط المستخدمين الجُداد.. ولو جربت تشرح لحد كبير سنا الاختصارات والحاجات دي ساعات بتبقى المشكلة إنهم مابيصدقوا! فتلاقي بين كل جملة والتانية LOL أو BRB وهكذا..

وطبعا من ضمن الحاجات اللطيفة استخدام نفس الحروف في لغة تانية.. فتلاقي ناس كاتبة: لول! أو برب!

البنات بصفة عامة أشطر شوية في التفصيلات والـemoticons الجديدة.. فتلاقي مثلا الراجل ببساطة بيستخدم علامة" :) " للتعبير عن ابتسامة.. تلاقي البنات عندهم "خط إنتاج" كامل للتعبير عن ابتسامات مختلفة..:-) :> :--)  :+) =) :)) ده طبعا غير: o-O وغيرها!

والمعروف عند معظمنا إن علامة X معناها "بوسة".. عادة الناس بتستخدم XX.. ولو بوسة وحضن يبقى XO.. ويمكن مش كلنا عارفين مصدر استخدام حرف الـ X للتعبير عن "بوسة"..:)

من ضمن التفسيرات اللي موجودة التفسير اللي بيقول إن في العصور الوسطى الناس اللي ماكانتش بتعرف القراية والكتابة كانوا لما بيحتاجوا إنهم "يمضوا" على عقد أو اتفاقية أو كده كان الشخص بيرسم علامة X مكان الإمضا.. وبعد كده "يبوس" على الـ X كتعبير على الأمانة وإنه كأنه بيمضي!

المحيّر إننا مرات بنبقى شايفين في الحاجات الصغيرة قيمة صغيرة! مجرد بوسة.. حضن بسيط.. سلام بحرارة.. ابتسامة.. لكن قد كدة كانت مجرد "بوسة على ورقة" علامة إخلاص وموافقة رسمية على عقد أو اتفاق..

بسيطة آه لكن مش تافهة!..كل كلمة حلوة أو ابتسامة أو تربيتة على كتف أو حضن.. كل صقفة أو سلام حار أو مكالمة مشجعة ليها قيمة كبيرة.. كل كلمة "بحبك" أو "انت غالي" آه ببلاش.. بس مش رخيصة! حتي لو كانت مجرد كام حرف على شاشة على الإنترنت!

XX  :)

قزازة أمل

فيه في التجارب الطبية نوعيّات مختلفة من الأبحاث..  وعشان يجرّبوا دوا جديد مثلا لازم يكون فيه مجموعتين من العيانين.. مجموعة بتاخد الدوا.. ومجموعة تانية مش بتاخد الدوا (بيسموها control group) بحيث يقدروا يقارنوا النتايج.. وطريقة من طرق تقسيم أنواع التجارب دي بتعتمد على مدي معرفة المريض بإنه بياخد الدوا الجديد اللي بيجربوه وللا لأ..

ففيه مثلاً نوع من التجارب اسمه blind study وفي  النوع ده ال control group بتاخد حاجة شَبَه الدوا بالظبط في كل حاجة ماعدا في المكوِّن العلاجي..عشان يبقوا حاسّين نفس إحساس المجموعة التانية اللي بتاخد الدوا بجد..وفي الحالة دي كل العيانين بيتصرفوا على إنهم بياخدوا الدوا بحيث إن العيان مايكونش متأثّر على المستوي النفسي لأن ده ممكن يؤدي لنتايج مالهاش علاقة مباشرة بالقدرة العلاجية للدوا..

لكن فيه نوع تاني من التجارب بيسموه ال double blind studies وفي النوع ده لا العيان بيبقى عارف.. ولا كمان الدكتور.... بحيث إن النتايج تبقى حيادية لأقصى درجة..

ليه بقى؟

لأنهم اكتشفوا إن لو الدكاترة المعالجين عندهم "أمل" في الدوا الجديد اللي بيحاولوا يشوفوا تأثيره.. عادة بيكون عندهم ميل –من غير مايقصدوا- إنهم ينقلوا الأمل دة للعيانين... وفي كتاب لفيليب يانسي بيقول إن الدكاترة دول ممكن ينقلوا الأمل ده في ابتسامة.. في كلمة تشجيع.. في انطباع على الوش.. في طبطبة على كتف عيان.. وكل جرعات الأمل دي من شأنها إنها تزود النتايج الإيجابية في صف الدوا..

التصديق اللي عند الدكتور إن الدوا ده ممكن يبقى مفيد بيتنقل للعيان وبيتنقل معاه "عدوى" مشجعة للعيان ولجسمه على إنه يستجيب للدوا..

لولا الفرق الواضح في النتايج ماكانوش لجأوا لل double blind studies وخبّوا على الدكاترة كمان.. الفرق الواضح ده نتيجة بس "للأمل"..

وسط كل حاجة صعبة ومؤلمة في الحياة.. مع كل تحدّي ووقت فيه وجع.. فيه "عيان" "بيتلكك" عشان يسمع كلمة أمل.. صديق يمكن يكون الفاصل بينه وبين الاكتئاب هو شعاع ضوء بسيط قوي أنا وانت بننوره.. يمكن من غير مانقصد.. زي الدكاترة دول اللي كانوا "حقيقيين" في رغبتهم في نجاح الدوا..

شعاع نور صغير بيفك ضلمة رهيبة.. كلام أمل بسيط ممكن يغير مصاير.. نظرة فيها إيجابية ممكن تحوّل حياة بني آدم..

ده احنا في إيدينا قوة للدرجة اللي فيها اضطروا "يخبّوا" على الدكاترة مين بياخد الدوا عشان العيانين "ماتخِفِّش" أسرع والنتايج تبوظ!

مع كل حد حواليّا بيتألم.. أنا عندي فرصة إني "أنوّر" حتة أمل قدامه.. يمكن كلمة أو جملة أو ابتسامة تفرق.. يمكن تعليق أو طبطبة أو سمع بإنصات يساعده "يخفّ"..

خلليك جاهز.. حواليك ناس مش ناقصها غير شوية صغيرين من قزازة أمل..

سيبه يعيّط

شكلك متضايق النهاردة

آه فعلا.. متضايق.. مفتقد حد بشكل محزن جداً..

طب محتاج حضن؟

لأ.. أنا مش ضعيف للدرجة دي!

حوار حقيقي حصل النهاردة قدامي.. 4 جمل خللوني أفكر مرة تاني في المشاعر والاحتياجات.. إحنا رايحين فين؟

"أنا مش ضعيف للدرجة دي!"؟ درجة إيه؟ إنك تحتاج حضن من صديق؟ إنك تحس بإن واحد حاسس بيك؟ 

من أجمل الحملات اللي شفتها كانت حملة Free Hugs والراجل اللي بدأها بدأها لما اضطر إنه يرجع بلده.. وعلى المطار مالاقاش حد مستنيه.. وشعر كما لو إنه سايح في بلده! طلع لوحة وقلم وكتب Free Hugs (أحضان ببلاش).. الناس الأول استغربت.. لكن بعدها بدأت الناس تيجي وتتكلم معاه.. تشاركه مشاكلها.. فيه ناس حضنته.. وفيه ناس قالوله إن الحضن ده فرق جدا في يومهم.. الحملة كبرت خصوصا لما الشرطة "منعت" الحملة فبدأ الراجل يجمع توقيعات من الناس..

استغربت من نفسي لما لقيتني باتخيل مشهد أي واحد بيبكي.. إيه أول جملة بتيجي في بالك؟ إيه أول حاجة بتقولهاله؟

"ماتبكيش!".. "ماتعيطيش".. "مش عايزك تبكي"!

كأني باقوله: "ماتعبّرش".. "ماتخرّجش اللي جوّاك".. "مش عايزك تسيب نفسك على راحتك".. "ماتحسّش"..

وطبعا الجمل التقليدية بتاعة "الراجل مايعيّطش" (طبعا الغدد الدمعية ربنا خالقها "زيادة" في الراجل!) أو "ماتعيّطيش.. كل حاجة هتبقى كويّسة"

في الوقت اللي فيه بابكي باحتاج إيه؟ باحتاج حد "موافق" إنه يشوفني بابكي.. حد "متواجد" جنبي.. مايعملش حاجة.. ماينصحنيش.. ما يحاولش يخلليني أبطل أبكي..

في الوقت اللي بابكي فيه مش محتاج حد يطبطب عليّ عشان أسكت.. مش محتاج حد "يهدّيني".. مش محتاج حد يدّيني منديل (حركة في منتهى الاستفزاز...بجد.. وإن دلّت على شيء فبتدل على إنك مش عايزني أبكي قدامك أو يمكن عايز تساعدني "أشيل أثر الجريمة"!)

هيحصل إيه لما هتبكي؟ كده يعني مابقتش راجل؟ كده رجعتي عيلة صغيرة؟ كده بقيت ضعيف؟

عايز أرجع أتلامس مع الطفل اللي جوايا.. اللي بيتبسط قوي.. وبيبكي قوي.. اللي مش همه شكله يبقى إزاي.. اللي بيعبر عن اللي جواه زي ما هو.. من غير مقدمات.. من غير ذواق..

هيحصل إيه لما تطلب من صاحبك حضن؟ لما تطلبي من أمك إنها تضمك؟

أصحابك اللي بيبكوا قدامك بيثقوا فيك.. وشايفينك حد يقدروا يكونوا "معرّضين" vulnerable قدّامه.. بدل ما تمنع صاحبك من إنه يبكي قدامك.. اسمعه.. كون متاح.. اسكت.. وسيبه يعيّط!

منغيرمسافات

من كام يوم كده كذا حد على تويتر قررنا نكتب من غير مسافات!.. بمعنى إنه بدل ما بيفصل بين كل كلمة والتانية مسافة عادية تكونكلحروفكلالكلماتمتشبكةفيبعضزيكده!

طبعا الموضوع فضل شوية وناس كتير بدأت تكتب بالطريقة دي.. وطبعا اللي يغيظ إن الناس اللي بتقرا كانت حاسة إن فيه حاجة غلط.. ولما بدأوا يقروا لقوا إن محتوى الكلام ممكن يبقى عادي لكن بياخد وقت أطول في القراية وبيحتاج تركيز..

المهم إن الإحساس بتاع إن فيه حاجة غلط ده فكرني برضه بإحساسنا في حياتنا اليومية لما مش بنعرف نحافظ على "المسافات" و"الحدود" بيننا وبين الناس..

من أكتر التحديات –وساعات المشاكل- في العلاقات هو تحدي إني أرسم لنفسي حدود.. أبقى عارف أنا بَاخلَص فين وغيري بيبدأ فين.. أنا هنا مش باتكلم عن الممتلكات ولا احترام الخصوصية –على الرغم إن ده طبعا جزء ليه علاقة بالموضوع ككل.. لكن أنا هنا باتكلم عن الحدود boundaries اللي بارسمها..

فيه مقولة جميلة بالإنجليزي بتقول Good fences make good neighbors.  بمعنى إن الأسوار الجيدة بتعمل جيران كويسين.. تخيل لو بيني وبين جاري مافيش أي حدود تفصل.. مهما كنا كويسين ومهما كنا بنحب بعض هتحصل مشاكل.. كمان لو بيني وبين جاري حيطة منيعة من غير بوابة وللا شباك برضه هتبقى مشكلة.. عشان كده المهارة الخاصة بتاعة معرفة الحدود مهارة محتاجين نتعلمها..

"أنا ماقدرش أقول لحد لأ" .. "ماأستحملش حد يبقى متضايق مني" .. "ما أقدرش أشوف حد محتاج وأسكت" .. "أكسفه يعني؟" .. "أمي بقى وماأقدرش أرفضلها طلب" .. "معقول أقول للمدير بتاعي إني مش هاعمل كده؟" .."هيموِّت نفسه لو ماجبنالوش العربية اللي نفسه فيها" وغيرها كتير من الجمل اللي قلناها أو سمعناها.. ولو الجمل بتدل على حاجة فهي بتدل على إني عايشحياتيمنغيرحدودمنغيرمسافات.. أقصد: عايش حياتي من غير حدود من غير مسافات!

أنا دايما بافكر نفسي إن سعادة كل بني آدم هي مسئوليته الشخصية.. لو حد بيربط سعادته ورضاه بي غالبا عنده مشكلة.. وغالبا أنا عندي مشكلة لو فاكر إني المصدر الوحيد لسعادة حد تاني.. افتكر إن الله سبحانه هو الوحيد اللي ممكن ندُور في فلكه.. أنا وانت مش ربنا..

وكمان بافكر نفسي إن كلمة "لأ" مش معناها إني مش باحبك.. أو مش باقدرك.. كلمة لأ ببساطة معناها لأ!

كل مرة أنا باحاول أرضي كل الناس أنا بامارس اللي بيسموه في الطب النفسي "السيطرة" control .. وساعات السيطرة بتبقى عن طريق "أنا مافيش حد يستحملك قدي".. فعشان خايف أخسر حد باحاول أسيطر عليه بأي طريقة.. حتى لو عن طريق إني ماأقوللوش لأ أبداً..

أعرف حد من أصحابنا اضطر يجيب مُغَنِّي معين في فرحه عشان باباه "مايزعلش" (أبو العريس مش أبو المغني طبعا!).. أعرف حد تاني مش ممكن يقول لأ لأي شحات بيطلب مساعدة.. للأسف بيبان "صيدة" سهلة للي ممكن يستغل ده..

"سوري مش هقدر أديك فلوس".. "لا مش هاينفع آجي الرحلة".. "لأ أنا مش عايز أتفرج على الفيلم ده".. "لأ اليوم ده مش فاضي".. كلها جمل تُحتَرَم.. كلها جمل بتعبر عن إن انت شايف فيّ حد كبير ومش قلقان إني ممكن "أتقمص" لو حصل واللي أنا طلبته منك ماكانش مناسب ليك..

في شغلي وفي بيتي ومع أصحابي.. ياترى أنا عارف أعمل "حدود" مش هسمح لحد إنه يدخل وقت ماهو عايز إلا لو ده مناسبني؟؟ وللا كلحاجةسايحةعلىبعضمنغيرمسافاتأوحدود؟

ماحدش بيبرَد من رجليه

لسة يا دوب الجو بدأ أهو يسقّع شوية في القاهرة..مش بَرد يعني لكن السقعة اللطيفة دي..افتكرت النهاردة الأيام دي في المدرسة زمان من حوالي 22 سنة كده..

كان زِيّ المدرسة جميل..كنا بنلبس أخضر..الولاد كنا بنلبس شورت وقميص..ولما كان  الشتا يدخل كنا بنلبس بنطلون وجاكيت (وكله أخضر)..كانت كل المشكلة في بدايات أكتوبر..كان الزي لسة شورت لكن فوقه الجاكيت..وأفتكر لما كنا نبقى بردانين كان الرد: "ماحدش بيبرد من رجليه"! :) :)

إزاي يعني؟ يعني إيه ماحدش بيبرد من رجليه؟ أنا اللي بردان!

لكن لما افتكرت الجملة دي افتكرت جُمل تانية كتير ليها نفس المَنحَى (حلوة المنحى دي)..جُمل مجتمعنا زرعها فينا..جُمل هناخد وقت كبير نفكر فيها ونغيرها..

فكرة إن فيه "أحاسيس" معينة غلط! "مشاعر" مش مفروض تبقى موجودة! فتلاقي مثلا جمل زي: "إوعى تخاف!"..أو "ما تزعلش"..أو "الراجل مايعيطش"..أو "البنت الكويسة ماتتنرفزش"..أو "ماحدش بيبرد من رجليه"!! يعني الخلاصة: بطّل تحس! بلاش تشعر..خلّيك على طول كويس!

الفكرة دي هي بالظبط زي لما أقوللك: ماتحسش بالحر..بلاش تعطش..ماتبردش! الأحاسيس النفسية والجسدية قريبين من بعض في فكرة التلقائية..

الطب النفسي بيقوللنا إن مافيش حاجة اسمها مشاعر "سلبية" ..المشاعر مشاعر..يعني حاجة بأحس بيها..يعني حاجة المفروض تلقائية..رد فعلي تجاهها ممكن يكون مختلف لكن الإحساس نفسه مافيهوش "وحش وكويس"..

اللي معظمنا بيقصده لما بيقول: "ماتغضبش" هو "ماتكسّرش الكوبايات"..أو لما بيقولوا "ماتتنرفزش" يقصدوا "ماتشتمش"..لكن بسبب الخلط ده بدأنا نشجع بعض إننا "مانحسّش"! وفاكرين إننا كده "بنحمي" بعض وبنحافظ على "الاستقرار"..

إيه المشكلة يعني؟... المشكلة كبيرة..لو أنا مش قادر أعرف أنا حاسس بإيه مش هاعرف أتعامل مع المواقف المختلفة..يمكن أبقى فاكر في الأول إني "متماسك" و"مش بأشتم" لكن أكتشف إني بقيت "مش فارق معايا" أساسا!

بشكل عام الستات أشطر شوية لغويا..وده بيخليهم –بشكل عام برضه- أكتر قدرة على "التعبير بكلمات" عن مشاعرهم.. البنت ممكن تفرَّق بين "متضايقة – غضبانة – ندمانة – حزينة – محبطة "..بالنسبة للولد كل ده: "مخنوق شوية"!

لما بدأت أسأل نفسي كل شوية "هو أنا حاسس بإيه دلوقتي؟" كانت تجربة صعبة قوي..وبعدين بالممارسة اكتشفت إن الموضوع لطيف.."أنا مقريف شوية" "ليه؟" "أصل فلان شافني وماسلمش"..الحوار الداخلي ده لطيف جدا لأنه بيساعدني أعرف هو أنا حاسس بإيه وليه ولو في إيدي أغير الظروف أو لأ..

معظم المشاعر بيخرجوا من 4 مشاعر أساسية: خايف – سعيد – غضبان – حزين  (sad, mad, glad, afraid)

أحب أحط التحدّي ده قدامك وقدامي..كل ماتفتكر الموضوع ده اسأل نفسك: "هو أنا حاسس بإيه دلوقتي؟" و"ليه؟"

من حقي "أحس"..ومش من حق حد يقوللي أحس بإيه..

وتخيّل بقى؟ فيه بنات كتير ممكن تتنرفز..وفيه رجالة كتير بتعيّط..وفيه ناس مؤمنين ممكن يمرّوا بحزن..وأعرف ناس شخصيا "بيبردوا من رجليهم"!

اللي وقع بودانه

كل عيلة أو شلة أصحاب بيبقى عندهم مسرحية أو فيلم أو أغنية مفضلة وبيبقوا فاكرين إن كل الناس بتحب العمل الفني ده..

في عيلتنا العمل ده هو مسرحية العيال كبرت.. حافظين المسرحية دي مش بس لدرجة إننا بنستشهد بيها في مواقف كتير..لكن لدرجة إننا نادرا مابنوافق نتفرّج عليها مع بعض :)..والسبب طبعا إننا بنتسابق في إننا نسَمّع الجمل الحوارية..أو نلفت نظر بعض لحتت صغيرة قوي في حركات وشوش الممثلين أو غلطاتهم وهكذا..:)

المهم..في مشهد من المشاهد عاطف هيموت ويقول لأمه على السر اللي كلهم بيحاولوا يخبّوه عنها..المشهد ده بيحتوي على جملة من الجمل اللي باستخدمها كتير مع أصحابي: "آه..مش هاتمشي إلا لما تعرف كل حاجة!" :) ..اتفرّج على المشهد وكمّل قراية..

عمرك اتعرضت لموقف لقيت نفسك بتحكي قصة واكتشفت في النص إنك ماكانش المفروض تحكيها؟ تلاقي نفسك مش عارف توقّف الحكاية..ولو اتجرّأت كده وقررت تسكت تبقى مش عارف تسكت في أنهي حتة..وتسكت إزاي..يعني تعمل زي المغني المشهور وتقول "بس خلاص"؟ [مش بافضل أقول اسم المغني المشهور عشان مايبقاش إعلان مجاني عن شعبان عبد الرحيم :) ].. وللا تستظرف وتقول "تمت"؟ :)  وللا تعمل إيه؟ موقف سخيف..

لساننا مش دايما بيستر..أوقات كتير الواحد ممكن يقع بلسانه ويقول تعليق أو نكتة أو خبر ماكانش المفروض يقوله.. وطبعا مهما اعتذرت وقلت مش بينفع ترجّع الكلام اللي اتقال..كأنه ماتقالش..

أي واحد فينا ممكن يقع بلسانه بتعليق سخيف..قصة مش مفروض يشارك بيها..نكتة مش في وقتها..مبالغة مالهاش لازمة (قال يعني فيه مبالغة ليها لازمة)..

ممكن كمان نقع بلساننا بمعلومة مش كاملة..رقم مش صحيح..خبر مش متأكدين من مصدره..

ممكن أقع بلساني لما أتكلم كتير..لما أتكلم بصوت عالي..لما أستخدم نبرة تهكمية..لو شتمت أو أهنت حد أو اتريقت على حد بغرض إنك تقلل من قيمته..

اللي صعب أقع بيه: وداني!..

ماسمعناش عن حد "بيسمع زيادة عن اللزوم"..أو حد "من ساعة مادخل وهو فضل يسمع يسمع بطريقة سخيفة"..أو "أنا ماسمحلكش تسمعلي بالطريقة دي"!!

قليل قوي ما ممكن أندم إني سمعت..نادر إن حد يحس إنه ماكانش مفروض يدي ودنه لصديقه لما احتاجه..

للتعبير عن الاهتمام والتركيز المقولة بالعربي بتقول: "كلي آذان صاغية" وبالإنجليزي حاجة بنفس المعنى: I’m all ears!  

فرانك تايجر قال: كون مستمع جيد..عمر ودانك ما هتسببلك مشاكل!

معظمنا بيقاوم الإغراء بتاع إنه يقول رأيه في كل حاجة....لما بنبقى قاعدين مجموعة تلاقي ناس كتير نفسها "تاخد فرصتها" في الكلام..وتلاقي ساعات الموضوع مبالغ فيه للدرجة اللي فيها الواحد يخاف ياخد نَفَسه أحسن حد غيره "ياخد المايك" ويتكلم..

التحدي اللي قدامي وأتمنى يكون قدامك إننا نسمع..

الاستماع بيبني..الاستماع بينوّر ويطوّر الإنسان..

الاستماع النشط بيوصّل اهتمام واحترام وتشجيع للغير..

مرّات صاحبي بيكون محتاج حد يسمعه بس..جوزك ممكن يكون عارف حل كل المشاكل في الدنيا لكن بس عايزك تسمعيه..

ابنك نفسه يلاقي فرصة ماما وبابا يكون قاعدين ساكتين وبيسمعوه..

اسمع..مش بس تسمع مزيكا..مش بس تسمع آراء المحللين السياسيين..مش بس تسمع الرأي الآخر..لكن تعالى نتدرب نسمع بإنصات للناس اللي بنحبهم..

وأنا بأسمعك..عايز أحط نفسي مكانك..لو انت "شاب عنده 25 سنة وداخل الجيش قريب"..أقدر أحاول أفكر لو أنا مكانك هابقى حاسس بإيه..وأسمعك بناء على الإحساس ده.. لو "أب خايف على ابنه"..أو لو "بنّوتة خايفة من الضلمة"..أقدر أحط نفسي مكان المتكلم عشان أعرف أسمع حلو..

لما باعمل كده: السمع بيبقى أسهل..والتجاوب بيبقى أسهل..وساعات بابقى مش محتاج أقول أكتر من: أيوة أنا معاك..أنا سامعك..

ومطمن إني مهما أسمع مش هاقع بوداني!

النجم شخصيا؟

مفهومنا عن النجومية مفهوم غريب شوية..وأقصد بغريب إنه مالوش معايير قياسية (حلوة الحتة دي) تُحكم على مدي نجومية واحد من عدمها..

فيه نُجوم فُقرا ونجوم أغنيا..بيفيدوا مجتمعاتهم بطريقة مباشرة أو غير مباشرة..بيعملوا شغلانات صعبة أو سهلة..شكلهم حلو أو لأ..مافيش حاجة محددة..

وزي ما النجومية كان بيُعبَر عنها قبل كده في العلماء والمخترعين والمفكرين وزاد عليهم الممثلين والمغنيين ولعيبة الكورة..بدأت دلوقتي صورة مختلفة من النجومية تتضاف على النجوم دول..

وبنسمع كتير جُمل زي: "عارف مين عمللي  follow النهاردة على تويتر؟"..مصحوبة غالبا باسم نجم من النجوم كان حظ صاحبنا حلو إنه يقع عليه الاختيار في إن حد مشهور ومعروف وناس كتير بتتابعه وتقراله على تويتر يكون شخصيا بيتابعه..

من أسبوع بالظبط قابلت واحدة من الراهبات اللي كانوا بيدَرّسُونا ويشرفوا علينا في المدرسة..أنا سبت المدرسة دي من أكتر من 21 سنة! واستغربت إني أشوف الراهبة دي وإنها تقف وتسلم علىّ وتفتكرني بالاسم وتسأل عني وعن إخواتي بالاسم..

أنا عارف إن ده تحدّي صعب.. خصوصا لما الطبيعة تكون مش بتساعد إنك تفضل محتفظ بشكلك اللي كنت عليه وانت 10 سنين! :)  خضار العينين بيغمق طبعا :).. واللون الأصفر للشعر بيروح (في حالتي الشعر نفسه كمان بيروح) وهكذا! :) :) ..لكن افتكرتني..

إحساس رهيب إن النجم يفتكرك..إن حد مشهور يعرفك..إن واحد مهم يشجعك..

بس اللي كمان اكتشفته إن أنا وانت نجوم..نجوم لناس تانية..نجوم في أماكن تانية..ناس كتير بتحكّي وتقول: "عارف مين عمللي  follow النهاردة على تويتر؟" وبيبقى السؤال دي مصحوب باسمك انت!

في حياتك ناس بتبصلك على إنك عالي ومشهور..نجم..

يمكن الناس اللي بتقدملك خدمات؟ يعني مثلا سواق التاكسي أو الميكروباص؟يمكن بنت أخوكي؟ أخوك الصغير؟

الطلبة بتوعك؟ فريق العمل اللي انت بتديره في الشغل؟ حارس العمارة اللي ساكنين فيها؟

ممثل خدمة العملا على التيليفون؟ طيار الديليفري؟ المضيفة في الطيارة؟ السباك والكهربائي اللي بيصلحلك أو يركبلك حاجة؟

كل دول ناس شايفينني نجم! تخيل؟ كل دول شايفين فيك حد مهم..حد بيفهم..حد يتمنوا رضاه في معظم الأوقات!

الإحساس اللي كان عندي لما الراهبة دي سلمت بحرارة..والإحساس اللي عندك لما حد مهم عمللك follow  شبه جدا الإحساس اللي عند حارس العمارة لما بتقول له: "صباحك فل..بأتبسط لما أشوفك الصبح.." (تخيل رد فعله طول اليوم)..

أو لو عزمت على اللي بيجيبلك طلبات على القهوة إنه يقعد معاك انت وأصحابك وتعزمه على شاي بالنعناع..

أو لو امتدحت ممثل خدمة العملا على ذوقه أو سرعة الخدمة..أو لو لعبت مع بنت أختك لمدة ساعة..أو لو قلت جملة حقيقية من قلبك تعرّف فيه عامل في المطعم إنك بتيجي المطعم ده بالذات عشان الخدمة الممتازة..

في إيديك تخللي يوم حد تاني من أجمل الأيام..

 

ناس كتير شايفاك نجم!

دوّر على ال fans  بتوعك.. ابتسامة أو تعليق حلو أو كلمة تشجيع ممكن تقلب كيان بني آدم خصوصا لو جاية من قلبك يا...يا نجم! :)