مغلق للكريسماس

فيه هيئة غير هادفة للربح اسمها ’’Raise the Roof Homeless Project‘‘ جمَّعت تبرعات عشان تقدر تحجز ليلة في فندق تستضيف فيه 28 شخص بدون مأوى، عشان يقدروا ولو لمدة يومين يكونوا بيقضوا وقت الكريسماس في مكان كويس، بدل ما يكونوا في الشارع، وبعد ما الهيئة دي حجزت الفندق بالفعل، فوجئوا بإن الفندق لغى الحجز. الفندق بعدها قال إنهم لغوا الحجز لأن جالهم تحذير إن نفس الهيئة دي كانت حجزت فندق تاني السنة اللي فاتت لكن الضيوف سابوا الأوض ملخبطة وسرقوا حاجات من الأوتيل، وقالوا إنهم ما يحبُّوش إن الضيوف التانيين الموجودين في الفندق وقت الكريسماس يكونوا بيتضايقوا بسبب مجموعة تانية من النزلاء اللي ممكن يسيئوا التصرُف.

المهم إن الموضوع وصل لناس كتير، والفندق اعتذر وقالوا إنهم هايوفَّروا الأوض للمجموعة دي، لكن الطريف في الموضوع إن مُذيع البي بي سي وهو بيقدِّم الخبر قال ما معناه إن ’ماكانش ليهم مكان في الفندق وقت الكريسماس‘ في إشارة لذكرى ميلاد السيد المسيح اللي لما اتولد ماكانش ليه مكان مناسب يليق بيه.

كتير بيربطوا الكريسماس باللاجئين اللي مالهومش مكان أو اللي سافروا سعيًا للحماية في بلد غريب، وكتير بيربطوا الكريسماس بالفقراء والمهمَشين والضعفاء، وكتير بيربطوا الكريسماس بمعجزة ميلاد من عذراء، وكتير بيحاولوا يفكَّروا نفسهم إن الكريسماس مش شجرة وزينة وهدايا غالية ولبس جديد.

الكريسماس كل ده، لكنه بالنسبالي بيتحدَّاني في قبول المعجزة، بيتحداني في إني أكون جزء منها. أغلبنا مصدَّق إن ربنا ما عندوش مستحيل، وإنه يقدر ببساطة يعمل أي حاجة، لكن يمكن التحدي هو إني أقبل أكون جزء من المعجزة، وأفتح بابي لفقير أو مُشرَّد أو ضعيف، وأرحَّب وأقبَل وأطمِّن، قبل ما المعجزة تحصل! ووقتها يا بخت البيت اللي قبل إن الطفل الضعيف الفقير ده يتولد فيه!

كريسماس جميل، إلخ!

بأحب أحضر احتفالات الكريسماس وبأتبسط بالمزيكا والأغاني القديمة المشهورة، وفي احتفال حضرته الأسبوع اللي فات اتوزَّع على الحاضرين كلمات الأغاني دي مكتوبة، وفي آخر صفحة مكتوب ’’شكرًا على حضوركم‘‘ وتحتها بين قوسين ’’(اكتب هنا رسالة تتمنَّى للحاضرين كريسماس جميل، إلخ)‘‘.. غلطة عاديَّة بتحصل، المسؤول عن الطباعة طبع الورق زي ما هوَّ من غير ما يكتب رسالة في آخر صفحة تتمنَّى للحاضرين كريسماس جميل، و’إلخ‘!

لما بتجيلنا رسايل على فيسبوك مثلًا في أعياد ميلادنا، مرَّات كتير بنحب إن الرسايل تكون شخصيَّة، وأنا بأقدَّر فكرة إن ناس كتير بتُستَفز لما حد يبعتلها ’HBD‘ أو ’كل سنة وإنت طيب‘ أو أي رسالة شكلها ’مُعلَّب‘، رسالة غالبًا فيسبوك هو اللي مقترحها! ويمكن ده بيخلِّي ناس كتير تشيل تاريخ الميلاد من فيسبوك، عشان لو أصحابهم القريِّبين افتكروا لوحدهم يبقى أحسن من إن كل الناس يجيلهم notification من فيسبوك فيبعتوا رسالة من الرسايل المُعلَّبة دي (للأسف طبعًا ساعات بينسوا يشيلوا تاريخ ميلادهم من LinkedIn فبيحصل نفس التدفُّق من الرسايل العامَّة!)

والبعض مننا عشان يخلِّي الرسالة شخصيَّة ممكن يبعت صور موجود هوَّ فيها مع صاحب عيد الميلاد، أو يكتب رسالة فيها حاجة معيَّنة لصاحب عيد ميلاد تبعد ’شُبهة‘ العموميَّة أو فكرة ’إلخ‘ دي بإنَّه يقولَّه ’كل سنة وإنت طيب، فين الصور يا عم؟‘ أو ’عقبال مليون سنة، هأشوفك يوم التلات‘، أو أي حاجة من هذا القبيل، عشان يوصَّل إحساس إن الرسالة مبعوتة مخصوص.

الكريسماس بالذات ما ينفعش يبقى ’مُعلَّب‘ أو عمومي ووسط الزحمة والزيطة، وبالرغم من إن الكريسماس للكل، وبيحتفل بيه الملايين، لكنَّه حدث شخصي جدًّا.. وعلى الرغم من ميل ناس كتير إنها تحتفل بالكريسماس مع العيلة أو مع الأصحاب، وإحساسهم إن اللي بيقضي الكريسماس لوحده أكيد تعيس، إلَّا إن يمكن أساس احتفال الكريسماس لازم يكون شخصي جدًّا..

الكريسماس شخصي لأن ولادة المسيح حصلت في حدث معيَّن محدَّد.. طفل اتولد لعيلة معيَّنة في بلد معيَّنة، والرجاء والمحبَّة والسلام اللي جه بيهم الحدث ده كانوا لكلِّ الناس أيوة، لكن لكلِّ الناس ’واحد واحد‘.. لكل واحد يستمتع بالرجاء والمحبَّة والسلام بينه أوَّلًا وبين الله.

ولادة المسيح ماكانتش مُجرَّد وصول واحد مشهور بيحيِّي ’جماهيره‘ وبيقولهم قد إيه ’بيحبُّهم كلهم‘.. لأن في الغالب الممثِّل أو الفنَّان أو الشخص المشهور اللي بيحب ’جمهوره كلهم‘ هو بيحب ’عددهم‘ لكن ما يعرفهمش واحد واحد..

في الكريسماس أنا عندي فرصة إنِّي أفرح، مش بس وسط الزيطة واللمَّة والصُحبة، لكن كمان أفرح بميلاد المسيح، الحدث الشخصي جدًّا ليَّ..

(اختم بقى البوست بإنَّك تتمنَّى لكل قارئ كريسماس جميل، إلخ)!

فلاشباك كريسماس

لما بنقرا رواية بوليسية أو فيلم فيه جريمة وبيحاولوا طول الفيلم يعرفوا مين القاتل غالبًا لو الرواية أو الفيلم معمولين كويس مش بنعرف نكتشف الجاني غير في الآخر، لما الكاتب يقرر إن الخيوط كلها تتكشف.. في حين لو بنقرا نفس الرواية تاني أو بنشوف الفيلم مرة كمان بنحس إنه "كان باين قوي إنه هو المجرم".. بيبقى عندنا حاجة بيسموها في الأبحاث الـ hindsight bias أو التحيز بأثر رجعي ودي ظاهرة كتير مننا بيتعرضلها من غير ما ناخد بالنا، فتلاقينا لما نسمع كلام عن حد نقول "أنا طول عمري مش بأرتاحله" ونبدأ نفتكر بعض المواقف اللي بتثبت إننا "كنا حاسين" وإن "الموضوع كان واضح قوي"..

لما كنت بأقرا روايات أجاثا كريستي، وبعد ما قريت كذا رواية قررت كده إني "أركز" لما أقرا الرواية الجديدة.. وأحاول أعرف أنا بنفسي مين المجرم.. وكل واحد تيجي سيرته في الصفحات الأولى من القصة أشك فيه لأني عارف إنه هايطلع واحد مش متوقع.. بس طبعًا الموضوع كان بيبقى محبط، وكنت مرات بأشك في القتيل نفسه إنه هو كمان القاتل! (بس عمري ما شكيت في ’أجاثا‘)

في السياسة الموضوع ده رهيب! بنشوف أحداث حصلت قبل كده ولسان حالنا "إزاي ما حدش أخد باله؟ دي واضحة زي الشمس!".. طبعًا وضوحها اللي زي الشمس ده ما بقاش بالوضوح ده غير لما الصورة كلها اكتملت.. لما بقينا في الحاضر وبصينا على الماضي حتة واحدة..

وإحنا بنحتفل بالكريسماس، بنحتفل بالقصة كاملة.. قصة شكلها مظبوط ومترتب ومتنظم.. "باين جدًا" دور كل شخص في القصة.. وتكاد القصة تفقد كل معناها بسبب الفلاشباك ده اللي بيخلي كل حاجة منطقية في الإطار الكبير للأحداث.. مع إن أبطال القصة ما كانوش كلهم عارفين أبعاد القصة بشكل كامل.. كل حد فيهم اختار اختيار صغير أو كبير لكنه صح.. اختار اختيار صح (لما القصة اكتملت) لكنه اختيار صعب لو مش عارف القصة.. لو بتعيش القصة في الحاضر.. لو ما عندكش كتب التاريخ تعرف إيه "اللي هايحصل" بعد اختيارك..

بنت مش متجوزة يجيلها ملاك يقولها هاتبقي حامل.. خطيبها يعرف إنها حامل لكن يصدق إنها شريفة.. ما يلاقوش مكان عشان تولد فيه لكن حد يستضيفهم في حظيرة للحيوانات.. هو فيه إيه؟! تحس إن كل حاجة غريبة.. فيه حاجة غلط.. إزاي القصة دي تخلص على حاجة كويسة؟ إزاي قِدر كل واحد من الشخصيات دي إنه يختار يعمل حاجة صح في حين إن القصة مش باينلها نهاية عِدلة؟!

جايز الشجرة اللي بنزيِّنها تكون منظمة ولطيفة، وممكن مشهد الكريسماس اللي بنحط فيه قش وملايكة وحيوانات بلاستيك صغيرة يكون شكله حلو وجميل.. وفي الغالب بننسى ريحة الأسطبل وبهدلة السفر والقلق إن ما فيش مكان للولادة والخوف من فضيحة لو الناس ما صدقتش، والرعب على الطفل المولود..

قصتنا الحالية المكتملة قصة ’نضيفة‘ حلوة مرتبة مليانة مزيكا وفرح وشياكة.. قصة شكلها منطقي.. فاكرين إننا لو مكان كل بطل من أبطال القصة هانختار نفس الاختيار الصح..

قصة الكريسماس هي قصة كل تفاصيلها ملخبطة، لكن على بعض هي قصة ضعف وخوف وفقر وقلة حيلة انتهت بميلاد السيد المسيح.. انتهت برجاء عظيم، وتغيير للبشرية كلها..

أتمنى ما أضيعش فرص مشاركتي في قصص لسة ما خلصتش.. قصص مش باينلها لو نهايتها خير ولا لأ.. أتمنى لو كان الدور اللي هألعبه مؤثر إن تكون عندي البصيرة إني ألقطه واقوم بيه.. وتفضل قصة الكريسماس حدث يومي في حياتي العادية..