كبرنا على العيدية

سواء حضرتك بقيت شاب يافع نافع وكبرت على العيدية.. أو لو لسّة برضه العيدية جزء أساسي من العيد (لأنك لسّة ماوصلتش للسن القانوني لإلغاءها أو لأنك بتخمّهم في البيت والعيلة عشان ماتتلغيش) فكل سنة وإنتوا طيبين وبخير..

كل سنة والكل طيب ومبسوط وناجح.. وكل سنة وكل واحد مستمتع بكل "الرموز" اللي ارتبطت بالفرح.. عشان كده مهما بنكبر ومهما بتتغير نظرتنا لقيمة الفلوس لكن بتفضل العيدية "رمز" نتمنى إنه لا يُمس..

والرموز حوالينا مش بتخلص سواء في مناسبات أو لأ.. من أول الورد للكروت للرسايل على التيليفون.. الكلمة والتصقيفة والحضن.. الابتسامة والسلام والطبطبة على الكتف.. كلها رموز.. كلها إشارات لحاجات أعمق.. كلها دلايل على مشاعر أعمق.. أعمق بكتير من إنها يتعبّر عنها حرفيا للدرجة اللي تنقل كل معانيها..

وعشان كده لما بنبدأ نحسّ إن الرموز دي بتتشال من حياتنا.. لما بنبدأ نحس إننا "كبرنا" على إن حد يفتكر أعياد ميلادنا.. أو "خلاص بقى" بطّلنا نحتفل بعيد جوازنا.. أو "المهم العيال".. بنبدأ للأسف نفقد حتة حلوة من الحياة..

ولارتباط الرمز بالمشاعر أو المعنى اللي بيوصله بنحس إن خسارة الرمز هي خسارة للمشاعر والرسالة والمحتوى اللي كان بيوصّله.. الأحضان اللي بطّلنا نعرف نستقبلها من والدينا.. والورد اللي بطلت أجيبه لمراتي.. ومفاجأة رحلة نُص السنة.. والأكلة الجديدة اللي كنتي بتعمليها لجوزك.. والعيدية اللي يمكن تحس إن "الواد بقى شحط طويل عريض" فبطلت تديهاله.. هي كلها فُرص ضايعة.. خسارة لمشاعر وتعبيرات كان سهل جدا تستمر.. لولا إننا "بنستعيب" أو "بنستسهل" أو ساعات "بنستهبل"..

القيمة المادية لأي رمز من الرموز دي ماتساويش حاجة.. ويمكن ده اللي ساعات بيصعّب فهمنا للقيمة اللي جواها.. ممكن نضحك أو نستغرب لو عرفنا التكلفة الفعلية للميداليات الأوليمبية اللي اتوزّعت على الفايزين من المتنافسين في لندن السنادي.. الميدالية البرونزية تمنها الفعلي 3 جنية إسترليني.. أيوة تلاتة.. يعني حوالي 29 جنية مصري.. لكن الهُلّيلة مش عشان التلاتة جنية.. الهُلّيلة عشان القيمة المعنوية للجايزة والمسابقة والبلد والمتنافسين واللعبة نفسها والتدريبات اللي قبلها وكل ده..

ماتنساش العيدية.. ماتنساش تطلب العيدية.. اطلب العيدية كمبدأ.. اعلن لوالدك أو والدتك إنك لازلت بتقدّرهم وفخور بيهم ومهما كبرت واشتغلت وأخدت فلوس قد كده إلا إنك مبسوط بالجنيهات القليلة اللي ممكن يدّوهالك عيدية.. العيدية اللي بتاخدها منهم هي علامة على قبولك لمحبتهم.. واحتياجك ليهم.. وإنك مهما استقليت عنهم وبقى ليك كيانك وبيتك الخاص إلا إنك جزء منهم.. ولازلت بالنسبالهم الابن اللي كان بيبقى طاير من الفرح يوم العيد وهو صاحي من الفجر.. فرحان بكل حاجة جديدة.. فرحان باللبس الجديد.. بالأكل.. باللعب مع القرايب.. بالعيدية..

ماتنساش العيدية.. إذا كنا بنفرح بالرموز الصغيرة وبإن مهما كبرنا إحنا لسّة غاليين في عينين أهالينا نقدر إحنا كمان نفرّح ناس أصغر مننا.. يمكن يطيروا من الفرح وهم بياخدوا منك العيدية.. يتبسطوا لأنهم مش متوقعينها..

على قد ما الحياة بتحرمنا من الرموز الصغيرة و"العوايد" اللي زي ما بيقولوا "قطعها فال" على قد ما بتسرق مننا جزء من إنسانيتنا.. وعلى قد ما بنفضل فاكرين الرمز وحابّينه على قد ما بنقدر نستمتع بطفولة وانطلاق وبساطة وحب ومشاعر نضيفة بريئة صافية.. مهما كُنا فاكرين إننا كبرنا على العيدية..

عيّنة ميّة

المفروض خلال كام يوم أروح أعمل تحليل لعينة من المية عشان يشوفوا نسبة الأمونيا فيها, لأن لو النسبة عالية يبقى فيه خطورة.. لأ.. مش ميّة الشرب.. بأتكلم على عينة من مية حوض السمك اللي جالي هدية من أسبوعين..

الفكرة كانت فكرة أختي اللي كانت عايزة تجيبلي سمك هدية.. روحنا المحل وطبعا عشان نشتري سمك لازم يتأكدوا إن السمك اللي هايبيعوهلنا ها يتمتع بعناية ورعاية سليمة!..

وعشان كده كانت الأسئلة كالتالي.. عندك حوض سمك فيه فلتر؟ <لأ.. أنا عايز أشتري الحوض المدوّر الصغير ده>.. لأ النوع ده بطلنا نبيعه.. لازم الحوض اللي يكون عندك يكون فيه فلتر وإلا مانقدرش نبيعلك السمك.. <طيب ماشي.. هشتري من عندكوا حوض وفلتر>.. ماشي.. تجيلنا بعد 3 أيام عشان تشتري السمك.. <3 أيام؟ لأ أنا عايز أشتري السمك النهاردة>.. لأ ماينفعش لأن الحوض لازم تملاه مية الأول وبعدين تعالج المية بمادة تقلل الكلور اللي في مية الحنفية.. ولازم الحوض يبقى فيه زرع أو ألعاب أو كده عشان السمك ما "يتوترش" من الفراغ.. !

حصل.. عملت كل ده.. وشغلت الفلتر على حوض سمك فاضي (كنت مستعبط نفسي قوي وأنا داخل من الشغل بأبص على الحوض عشان أطمن على السمك اللي لسة ماجبتوش) !..

رحنا نجيب السمك أخيرا..سألوني على حجم الحوض وحددولي 5 أنواع سمك بس ممكن أشتري منهم.. ومش كلهم ينفع يعيشوا مع بعض.. اخترت نوع اسمه Paradise Fish ..هيبيعولي سمكتين بس في الأول لحد مانشوف الدنيا ماشية إزاي في الحوض والفلتر وكده.. وبعد أسبوع ينفع أروح أعملل "تحليل" لعينة من المية يتأكدوا منها إن نسب كل حاجة كويسة, وممكن وقتها أشتري سمكة كمان..

على قد ما الموضوع يبان سخيف وتافه إلا إن التفكير في قد إيه قيمة السمكة دي غالية حتى لو تمنها مايجيش 5 جنية إسترليني! الصحة "النفسية" للسمكة مهمة.. الأكل لازم يبقى بمعدل معين ومايتسابش بواقي منه في الحوض لو ما أكلوهوش..

على إيه كل ده؟ على حتة سمكة؟ طبعا.. الموضوع مش فكرة حتة سمكة على قد ماهو تطبيق للعلم.. العلم اللي بيتوصل لمعلومة أو اكتشاف أو اختراع, بيتم استخدامه عمليا بأسرع ما يمكن.. في كل حتة حواليك في دول كتير هتلاقي إن الاكتشافات الحديثة موجودة من أول الراديو اللي ينفع يشتغل لوحده مع المنبة.. مرورا بحوض السمك..

مش ناقصنا علم.. ومش لسة في عهد ماعندناش فيه تواصل مع باقي العالم عشان نعرف أحدث الاختراعات والاكتشافات.. لكن هل إحنا عايزين؟ هل عايزين نوفّر مية أنضف للشرب وطاقة أرخص وأنضف عن طريق الشمس اللي العالم كله بيحسدنا عليها؟ هل عايزين نبدأ مشاريع واضحة وحقيقية لتدوير المواد؟ ولّا الأسهل إن مانعملش حاجة؟

تطبيق العلم مش دايما مكلف.. المكلف هو وجع الدماغ في التفكير عشان نطبقه ولّا لأ..

وسواء الموضوع هو كهربا بتقطع أو مية شرب مش نضيفة أو حوض سمك, فالفكرة واحدة.. العلم موجود والتجارب اتعملت والمعلومات متاحة للكل.. بس اللي ينوي..

عبد الهادي

 أشجار كريسماس في كل مكان.. أغاني مشهورة.. ألوان وزينة.. تماثيل بابا نويل في كل حتة.. أخضر وأحمر وفضي.. أجراس واحتفالات خاصة.. مزيكا.. لبس جديد.. ديك رومي.. فيلم Home Alone!

مش بس كدة.. لكن مع اختلاف الطقوس من بلد للتانية ومن عيلة للتانية غالبا بيجمع الكل استقبالهم للهدايا..

الهدايا!

عنصر مهم قوي في معظم إن ماكانش كل المناسبات.. بغض النظر عن إذا كانت المناسبة دينية أو لأ.. وكل المجتمعات تقريبا ليها توجه في الهدايا.. هدايا يعتبروها مناسبة.. هدايا أحسن من غيرها..

إيه اللي بيخلي الهدية مميزة؟ إيه اللي يخلليني أحب هدية أكتر من هدية تانية؟ إيه اللي يفرق معايا؟ إيه اللي يخليني "أحتفظ" بالهدية أو "أفتكرها" لوقت طويل؟

إجاباتنا "النموذجية" تقول إن تمن الهدية مايفرقش معانا! تلاقي مثلا قبل عيد الأم: ماما نِفسِك في إيه على عيد الأم؟ <إني أشوفكم مبسوطين يا حبيبي> ماما.. اللي بعده.. نجيبلك إيه هدية يا ماما؟ <ولا حاجة يا حبيبي.. ماتتعبش نفسك>.. لأ لازم يا ماما.. <أي حاجة بسيطة.. كارت صغير.. خاتم دهب.. أي حاجة!!>

طبعا اللي يفرق معانا قوي هو "مين" اللي بيهدي.. هدية من خطيبتي غير هدية من مصطفى ابن عمك!

يفرق معايا ساعات المجهود المبذول في الهدية.. ملفوفة حلو.. الكارت ملزوق كويس.. كمان "الإبداع" أو "الفكرة" اللي في الهدية.. لو الهدية فيها خيال و فن بتفرق جدا.. وياريت بقى لو حاجة كان نفسي فيها أو محتاجها يبقى هايل..

ممكن الحاجات دي كلها تبقى موجودة لكن عنصر تاني يغيب عن الهدية ويعمل فرق رهيب.. ياترى الهدية وصلتلي إزاي؟ في البريد؟ لقيتها تحت شجرة الكريسماس؟ اتبعتتلي من محل الورد على مكتبي؟ وللا اللي بيحبني جابلي الهدية بنفسه؟ وأعتقد إنه ده اللي ساعات بيحسسنا بفرح مش كامل قوي لما في الشغل مثلا "يلمّوا" من بعض ويجيبوا "أي" هدية!..

النهاردة وأنا بأفكر في احتفالات الكريسماس اللي فيها بيحتفل العالم كله بميلاد السيد المسيح فكرت شوية كتير في حكاية الهدية... مش بس عشان تبادلنا هدايا كعيلة.. لكن فكرت في ربنا سبحانه كمصدر للهدية..

هديته: غالية.. مبذول فيها إبداع وفن وتضحية.. مليانة رحمة ونعمة وبركة..أنا في احتياج ملح جدا ليها..

مش بس كده.. ده مش بس بيقدم بنفسه الهدية.. ده بيقدم نفسه هدية!..

الله بنفسه بيدعوني لرحمة وبركة من عنده.. لخير وجود وإحسان من إيديه..لسعادة حقيقية في القرب منه.. مش هو الهادي؟ مش بس بيقدم الهداية.. لكن بيقدم الهدايا..

هفضل طول عمري..عبد الهادي...

بتتكلم لغات؟

"انت عمرَك حتى ما قلتلي باحبِّك!".."البيت بالنسبة لك أوتيل".. "ولا حتى جيت سلِّمت عليّ" .. "جه من السفر ولا جابلي أي حاجة معاه!" .. "حتى ما فكّرش يصلح الحنفية اللي بتنقّط بقالها يومين!"

جمل ممكن نكون سمعناها في بيوتنا أو بيوت أصحابنا أو شفناها في مسلسلات..مِتقالة من ناس عندها عشم..ناس عايزة تستقبل محبة وتقدير وشايفة إن الطرف التاني مش بيقدم ده!

لما آجي أكلمك بالفرنساوي وأقوللك كلام كويس أو أطلب منك طلب أو أفكّرك بحاجة..ماينفعش ألومك لو انت مش بتتكلم فرنساوي..في تواصلنا كل واحد فينا بيبقى حريص إنه يستخدم "لغة" مفهومة للحد اللي بيكلمه..

 كمان في التعبير عن المحبة والتقدير والاحترام فيه لغات..بنختلف فيها كلنا وفيها بنستقبل الحب بطرق مختلفة..

في كتابه المشهور The Five Love Languages  (لغات المحبة الخمس) بيتكلم جاري تشابمان عن 5 طرق أساسية بنستقبل بيها كبشر المحبة..

كلمات التشجيع: لاحظ إن الكلمة الكويسة بيكون ليها مفعول السحر عند الناس اللي بيستقبلوا المحبة كده..تلاقيهم دايما حاسّين إنهم محبوبين أكتر لو اتقالهم كلام مشجع..

التلامس الجسدي: السلام الحار أو التربيت على الكتف أو التقبيل بين الأصدقاء كلها بتوصل محبة للناس اللي بيتكلموا اللغة دي..

الهدايا: لما بتقضي وقت تفكر تجيب لصاحبك هدية إيه..وبتنزل تدفع فلوس في الهدية وتدّيله معاها كارت حلو..كل ده بيوصل تقدير وحب لو دي اللغة اللي بيستقبل بيها..وتلاقي الناس دي بتفتكر كل الهدايا اللي جاتلها قبل كده..وفيه منهم ناس بيفضلوا محتفظين بالهدية ومايستخدموهاش خالص..

تقضية وقت: أهالينا كتير بيشتكوا أنه "مش بتقعد معانا في البيت خالص".."مش عايز يروح معانا المصيف" ففي الغالب همه نِفسهم يستقبلوا منك حب عن طريق أنك تقضي معاهم وقت..

أعمال خدمية: فيه ناس بتحس أنك بتحبها لو انت بتتفانى في إنك تخلّصلهم ورق أو تعمل معاهم مشاوير أو توصّلهم مكان معين أو تجيبلهم معلومة محتاجينها..

خللينا نفتكر أننا مخلوقين عشان نحب ونتحب.. وعشان أعبرلك عن حبي وتقديري أنا عايز أتأكد من المفاتيح اللي عن طريقها بيوصلك الحب..

أعرف منين؟

اسمع أصحابك أو أهلك أو خطيبتَك أو جوزِك بيشتكوا من إيه بصفة متكررة..لأنهم غالبا بيشتكوا من إحساسهم من عدم وصول الحب ليهم "بالطريقة اللي بيحبوها"..يعني تخيل انت بتجيب هدية لخطيبتك لكن هي نِفسها إنك تقولها عن محبتك..أو بتقضي وقت مع باباك ومامتك وهمه عايزينك تروح تشتري عيش!

كمان شوف همه بيقدموا محبة إزاي..عادة الواحد بيقدم محبة بالطريقة اللي بيبقى شايفها أفضل طريقة للتعبير..(في حين إن مافيش طريقة أفضل..لكن يمكن هي دي الطريقة اللي هو بيستقبل من خلالها)

اسأل بشكل مباشر..بابا: عيد ميلادك قرّب وأنا نفسي أعبرلك عن احترامي وتقديري وحبي..تحب أعمل إيه؟ (ممكن يقوللك على طول: خد المروحة صلحها!..وممكن مايكونش عارف..لكن على الأقل هتقدر تكتشف شوية هو ميّال لإيه)

مانقدرش نعيش من غير مانحب ونتحب!

وضّح للناس يقدمولك محبة إزاي..وانت كمان فكّر همه بيستقبلوها إزاي واستخدم لغة يفهموها ويقدروها..

أنا اللي هخسر لو أصريت أحضن وأبوس ابني اللي عنده 11 سنة وهو مابقاش بيحب كده..

أنا اللي هخسر لو باصلح كل حاجة في البيت في حين إن أمي نِفسها إني أقضي معاها وقت نحكي..

مش كفاية إني أكون نظريا باحب أهلي وأصحابي ومراتي..لكن ما أروع إن الإحساس ده يوصلهم!

مش كفاية إني أقوللك "باحبك"! أنا عايز أقولها بلغتك.. بطريقتك!

الحمد لله إني غني!....

مش عارف كنت هاعيش إزاي لو مش غني..

استنى..اقرا للآخر

شوية حاجات في حياتنا ببلاش..ببلاش فعلا..لكن أتحداك لو تقوللي الحاجات دي مش بتفرق معاك..مش بتأثر فيك..

أيوة الغالي تمنه فيه..بس فيه حاجات ماتتقدرش بتمن....صح؟ .. بص معايا ع الحاجات دي..

الابتسامة..سحر فعلا..إيه اللي يخللي خط منحني يعمل كل التأثير ده؟

كلمة حلوة..إزاي كلمة واحدة ترفع ناس للسما وكلمة تانية تنزل لسابع أرض؟ وحشتني..كل سنة وانت طيب..انت غالي عليّ..انتي شاطرة قوي..أنا باحبك...فخورة بيكي..هنفضل أصحاب على طول..ما فيش غيرك هيفهمني..

شوية مزيكا..غنوة قديمة؟ موسيقا لعمر خيرت؟ مقدمة مسلسل ليه ذكريات حلوة عندك؟..تقدر تقاوم؟

رسمة بسيطة...ألوان متناسقة...خطوط عفوية..ممكن تغير مزاجك بالكامل

زرعة جديدة بتكبر في بيتك..

حضن صاحبك..بوسة من مامتك..اسم دلعك على لسان أختك..

لمّة عيلة أيام أعياد..رمية ابنك في حضنك..

تمشية مع ناس بتحبها..

رنة تليفون مستنيها...

كتاب قديم عزيز عليك..

أنا وانت شكلنا أغنيا قوي..أغنيا أغنيا يعني..عندي كتير يبسطني..وعندك كتير تبسط بيه اللي حواليك

...تدفع كام؟