وأنا طيب؟

إيه الأسهل؟ مشاركة الناس أحزانها ولا مشاركتهم أفراحهم؟ أعتقد إن الأسهل هو مشاركتهم أحزانهم. سهل إني أتأثر لما حد تجراله حاجة صعبة أو يشعر باحتياج مادي أو تقابله مشكلة صحية، لكن يمكن صعب إني أتبسط بجد لحد تاني عمل إنجاز أو اترقَّى أو مر بظروف حلوة. ويمكن عشان كده مناقشات كتير حوالين لو حلال ولا حرام تهنئة الناس بأعيادها، في حين إن سهل إننا نشارك الناس حزنها ونحس بيهم

إذا كانت علامة من علامات الإنسانية هي إني أشعر بوجع ومشكلة اللي حواليَّا، فعلامة من علامات الحب والصداقة هي إني أفرح في فرحهم وأشاركهم أحلامهم الحلوة وأتحمِّس لمشاريعهم الإيجابية. الموضوع ده بيبان جدًا في ردود أفعالنا لما حد يحط على فيسبوك مثلا صورة تخرجه أو بوست عن عياله أو مشاركة عن نجاح معين في حياته، وساعات كتير بنحس إن الموضوع مبالغ فيه، أو إن فلان كل صوره وأخباره حلوة وإيجابية وإنه ’مزودها‘ شوية. كل أسبوع صورة في مطعم شكل، وكل شهر سفرية، وكل شوية مع أصحابه، ويمكن مش أول انطباع بييجي على بالي هو إني قد إيه مبسوط عشانه. لكن بالمقارنة، يمكن يكون أسهل شوية إني أحط نفسي مكان حد فقد حد عزيز عليه، أو مر بأزمة مالية، أو عمل حادثة، أو فقد وظيفته.. ساعتها يمكن يظهر الجانب الإنساني الطيب اللي جوانا.

وقت الأعياد والاحتفالات، محتاج أراجع فرحتي للناس الفرحانة، ومحتاج أفكَّر نفسي إن الموضوع مش بيدور حواليَّ أنا، لأن علامة من علامات القُرب والمحبة والصداقة الحقيقية هي إني أكون فرحانلك بجد، فرحان لفرحك حتَّى لو فرحك مالوش علاقة بظروفي والحاجات اللي بأحبها. وعشان كده مش لازم أبرر فرحتي بإن ’الإنجاز نفسه‘ مُفرح، لكن فرحتي هي لفرحتك إنت! مش شرط لما أهنيك بعيدك أكون مقتنع بسبب العيد، لكن ممكن ببساطة أكون فرحان بفرحتك إنت!

لما بآجي أباركلك عشان اتجوزت أو عشان خلفت، مش بأباركلك عشان ’الجواز‘ فكرة كويسة، ولا عشان ’الخلفة‘ أحسن حاجة في الدنيا، لكن بأفرح معاك لأنك فرحان! ولما بأقولك كل سنة وإنت طيب عشان عيدك، مش بالضرورة يكون معنى كده إني أنا شخصيًّا بأحتفل بالعيد ده ومقتنع بكل تفاصيله. وعشان كده، لما بنهنِّي بعض بالأعياد مش شرط نبرر تهانينا دي بإن ’كل الأديان بتقول كذا‘ أو ’إحنا كمان بنعمل كذا‘، لأني لما بأهنيك بأبقى عايز أشاركك فرحتك إنت، بأبقى عايز أقولك كل سنة و’إنت‘ طيب.

اقرا الفرحة

واحد كان ماسك جرايد بيوزعها في الشارع وسألني:

’’تحب تحصل على أول عدد من جريدة مجانية عن أخبار المدينة الصغيرة هنا؟‘‘

ماشي شكرًا

’’الجريدة ببلاش، واللي يفرق بين الجريدة ده والجرايد التانية هي إن كل الأخبار اللي فيها أخبار إيجابية ومفرحة‘‘

أنا اتلخبطت.. ليه ما فكَّرتش قبل كده إن ما فيش جرايد أعرفها إلَّا وأكيد فيها أخبار وحشة مع شوية أخبار كويسة؟ ده غير الجرايد المتخصصة في أخبار الجرايم والحوادث؟ شكلها إيه الجرايد دي اللي ما فيهاش غير أخبار حلوة؟ يعني ما فيش ’’يقتل شقيقه بعد مشاجرة بسبب طبق فول‘‘؟ ولا ’’عاطل ينتحل صفة جرَّاح ويُجري عمليَّات لأكثر من عشرين سنة‘‘؟ طب ولا ’’القبض على عصابة تخصَّصت في تزوير العملات فئة العشرين جنيه‘‘؟؟

حسيت قد إيه الفكرة عظيمة.. بس برضه سألت نفسي، طب هايجيبوا أخبار حلوة منين؟! ها يملوا جورنال كامل أخبار حلوة؟!

اتبسطت من فكرة إن فيه جورنال ممكن تجيبه وتقراه وماتكونش بتقول ’’يا رب استر‘‘..

فهمت إن الأخبار الحلوة وفي نفس الوقت ببلاش لسَّة موجودة.. الخبر اللي يفرح ويطمِّن القلب ويكون ببلاش هو اللي ممكن يصبَّر ويشجَّع ويعزِّي وسط الأخبار الصعبة والمؤلمة اللي مالية العالم بتاعنا..

الراجل المتطوِّع ده اللي كان بيوزع الجريدة دي راجل هايل.. يا بخته.. يا بخت كل واحد شايل على كتافه أخبار حلوة تدِّي نور وبُشرى لعالم حزين.. وبدل ما ماشي ينادي يقول اقرا الحادثة، ماشي يوزع أخبار حلوة ببلاش!

تشترط الخبرة

فيه تعبير في الإنجليزي اسمه "Kicking the bucket" وده تعبير عن الموت، وغالبًا هو أصل جملة "Bucket List" وهي عبارة عن قائمة بمجموعة حاجات الشخص يتمنَّى يعملها قبل ما يموت..

الملحوظ في معظم القوائم دي إن الحاجات اللي فيها غالبًا متعلقة بخبرات حياتية مش بممتلكات، يعني قليل ما هنلاقي حد كاتب إنه يتمنَّى قبل ما يموت إنه يشتري حاجة معيَّنة، لكن الأغلبيَّة بيتمنُّوا يعملوا حاجات ليه علاقة بخبرة حياتيَّة جديدة، زي مثلًا السفر لمكان معين أو حضور حفلة لمغني بيحبه أو إنه يتصوَّر مع شخص معين وهكذا..

ولأن العصر اللي بنعيش فيه هو عصر استهلاكي فأغلب الإغراءات اللي حوالينا هي إغراءات لحاجات عايزين "نمتلكها" سواء عربيات أو تليفونات أو بيوت أو أو أو... واللي شاطرين شويَّة في التسويق بيحاولوا يسوَّقوا المنتج اللي عايزينَّا نشتريه على أساس إنه هايدِّينا خبرة مختلفة، فلو اشترينا شاليه في المكان الفلاني هانبعد عن الزحمة وهانستمتع بالخصوصية؛ ولو اشترينا العربية الفلانية هانكون أكثر جاذبية وشياكة وكل الناس هاتصاحبنا!

جزء كبير من فكرة الغِنى ليه علاقة بالاستثمار، ومن وجهة نظري الاستثمار الصح هو في إني أدفع فلوس عشان أحصل على "خبرات حياتية" جديدة أو إيجابية مش إني أكنز ممتلكات..

كتير هايستغربوا من الناس اللي ممكن تدفع فلوس عشان تسافر تتفسح، أو عشان يتعلموا مزيكا، أو عشان يحضروا أمسية شعرية، وغيره، ولسان حالهم "يابني مش كنت تشتريلك قميصين أفيَد؟"

فيه خيط رفيع بين الممتلكات اللي بنشتريها عشان نمتلكها "ونتطمن" لأن الحاجة عندنا، والممتلكات اللي بنشتريها عشان نحصل على خبرة جديدة تغني أرواحنا أو نفوسنا أو عقولنا..

الغِنى اللي بتنتجه الخبرات الحياتية دي هو غنى ماينفعش يتسرق مني، ما ينفعش حد يستلفه، ما ينفعش يضيع أو يتخبط أو الشاشة تتجرّح..

أنا غني بالحاجات اللي ماينفعش تتسرق مني، أنا غني بالحاجات اللي مش عندي، اللي مش بامتلكها،

لكن ممكن أكون غني بالعلم وبالخبرة وبالحب وبالقيمة، ودي حاجات ماينفعش تتاخد من حد..

عشان كده القعدة مع الأصحاب على القهوة هي مش مجرد كوباية الشاي اللي بنشربها.. وبالتالي مش بنحسب بس تكلفة كوباية الشاي نفسها لكننا على استعداد لدفع فلوس أكتر شوية في سبيل الاستمتاع في إننا نشوف الماتش على القهوة مع بعض..

السفر والحب والعلم وتقضية الوقت مع الأطفال ومع الكبار في السن، كلها خبرات ماينفعش تتسرق من اللي مر بيها.. السمعة والشهرة والفطنة ماينفعش حد يستلفهم، حب الناس وفن التعامل وغيرهم كلها حاجات عليها علامة مائية بتاعة الشخص..

بدأت الفترة الأخيرة دي أراجع مدي اتساع الخبرات الحياتية اللي بأمر بيها ومدى استعدادي إني أستثمر في حاجات أغنى وأعمق وأكتر دوامًا من الممتلكات..

بغض النظر عن الBucket List وهل هاكتب قائمة محددة أو لأ، أحب إن أحلامي الوقت الجاي تكون بتغني الخبرات الإنسانية اللي بأمر بيها..

 

إسعاد يونس: بص على الحلاوة

من غير مقدِّمات طويلة عن برنامج "صاحبة السعادة" أقدر أقول إنُّه من البرامج القليلة اللي لاحظت عنها قبول كبير من عدد كبير من الناس، وعلى الرغم إنِّي ماتابعتش غير حلقات قليلة، إلا إن جاذبية البرنامج وإسعاد يونس غالبًا ما بقوش سر!

كتير ممكن يتكلموا عن شطارة إسعاد يونس، أو فكرة إن الإعداد للبرنامج فيه اجتهاد ملحوظ، أو خبرة إسعاد في الحياة أو في الشغل المتعلِّق بالميديا، أو خفِّة دمَّها، أو عنصر النوستالجيا اللي في لقاءات كتير في البرنامج، أو أو، كل دي حاجات صعب إنكارها.. لكن، السر في حاجة تانية!

سر الجمال والقبول والحلاوة والعذوبة اللي بنشوفها في إسعاد يونس مرتبط ارتباط ضخم بجمال وروعة وحلاوة ضيوفها.. إسعاد مش بتستضيف ناس وتسألهم أسئلة محرجة، أو تسألهم عن لحظات فارقة في مشوارهم، أو تطلب الرأي والرأي الآخر، أو تستفهم منهم عن مشكلة مع فنان تاني، أو تستعلم عن شائعة طلعت عنهم.. مش بتقرا اسئلة من ورقة عن آراءهم في فنانين تانيين، مش بتعمل ولا حاجة من الحاجات دي! كل اللي بتعمله إنها بتقعد معاهم، تدردش وتضحك وتدندن وتغني، تفكَّرهم بلحظات حلوة، وتكمل دردشة، وتفضل طول الفقرة مش بتعمل حاجة غير إنها بتشاور على جمال وحلاوة إنسانيَّة حقيقيَّة موجودين في كل ضيف على حدة.

والظاهر كده إنها لما بتشاور على الجمال اللي في ضيوفها جزء من الجمال ده "بييجي فيها"، بيخبط فيها هيَّ.. كل ما تشوف حاجة حلوة في اللي قدامها وتقولُّه عليها تلاقي نسبة ولو صغيَّرة من الحلاوة دي جت فيها! عشان كده مش غريب لما تكون تعليقات كتير على البرنامج بتمتدح إسعاد وبتشوف فيها جمال في الشخصية والروح وعذوبة بنستغربها ونشتاق ليها..

هل هي دي الديناميكيَّة اللي بيشتغل بيها الجمال؟ الظاهر كده! ديناميكية غريبة جدًا لكن شكلها كده شغَّال: كل ما تشاور على حاجة حلوة وتكون بجد مدرك لجمالها ومقدَّر لحلاوتها تلاقي جزء صغير من الجمال والحلاوة دول جُم فيك! "بهتوا عليك"! تلاقيك بتحلوّ مش لما بتحاول تبقى أحسن ولا لما بتركِّز على نفسك عشان تكون إنسان أفضل ولا حتى لما تحاول تبسط ناس تانية.. لكن بنحلوّ لما بنشوف جمال ونقدَّره ونشاور للناس ونقولهم بُصُّوا على الجمال ده..

استثمار جميل ومش مكلِّف لكنه محتاج وقت وشويِّة مجهود.. كل مرَّة أشاور على جمال شخص أو حلاوة في الطبيعة أنا بأفتح باب لجزء من الجمال ده إنه يجيلي وبأدِّي فرصة ليَّ إني أكون إنسان "أحلى" في الروح والشخصيَّة لأنِّي سامح لنفسي إني أشوف روعة وعذوبة وجمال وأشاور عليهم وأقول لغيري: بُص على الجمال ده..

القريبين من الله سبحانه اللي هو صانع الجمال وأساسه واللي هو التعريف الواضح للجمال بنشوف فيهم حلاوة خاصة، بنلاقي عندهم نور مختلف، بنكتشف إن الناس دي كل ما بتقرَّب من الله وتلتقي بيه وتشوف جماله بينوَّروا، وجماله مش بيكسف وشوشهم، بالعكس: بينوَّر وشوشهم ويجمِّلها ويحلِّيها..

صاحبة السعادة إسعاد يونس احلوِّت وزاد جمالها مع كل مرَّة قررت تكون بتشاور على ضيف عندها في البرنامج ولسان حالها بيقول لكل مشاهد: بُص على الحلاوة!

حب إيه!

"حب إيه اللي أنت جيّ تقول عليه!" يمكن الجملة دي تكون مناسبة لليومين دول، جملة يمكن نعلَّق بيها على كلام الحبِّيبة اللي "يا حرام متفائلين"، اللي شايفين الدنيا وردي، وعلى الرغم من إن سياق الأغنية بيفسَّر استهجان كلام الحبيب عن الحب باعتباره "مش عارف قبلا معنى الحب إيه"، إلا إن غالبًا استهجاننا للكلام عن الحب حاليًا بيكون على اعتبار إنها "أيَّام سودا"، والواحد بالعافية بيقاوم إنه يرد على أي ذكر لعيد الحب بكلمة "اتنيِّل"!

"حد يموِّتني يا جدعان" كانت جملة سمعتها واستغربت قوي، لكن بسرعة كدة لما قدَّرت الموقف والمكان اللي أنا فيه فهمت على طول! المكان ببساطة كان Internet café ومجموعة من الشباب الصغيَّر قاعدين بيلعبوا على الكومپيوتر، وحد فيهم لسبب ما قرَّر إنه استراتيجيًّا لازم يموت!

كتير من ألعاب الكومپيوتر قايمة على فكرة إنك تموِّت أكبر عدد من الناس أو الكائنات الفضائيَّة، وإذا ماكانش كده يبقى تصميم اللعبة قايم على إنك تتفادى الموت وتحاول تهرب من التنانين والأشرار والعمالقة والقراصنة وكل دول عشان مايموِّتوكش قبل ما توصل للأميرة!

وطبعًا مش كل الألعاب كده، يعني مش كل الألعاب فيها قتل ودم ومطاردات وأسلحة متطوِّرة وجماجم، ولا كل الألعاب بتصب في خانة إنك تلمّ فلوس أو محصول أو تخلَّص السباق بسرعة والعربيات اللي جنبك تفرقع، مش كلها كده، لكن نسبة كبيرة منها كده..

ويمكن لما بنستغرب من انتشار العنف والقتل والدم يمكن استغرابنا هو اللي غريب؟ يا ترى الإنسان اللي بيشوف أخبار قتل في معظم النشرات والجرايد هايطلع يبقى عامل إزاي؟ اللي بيفتح فيسبوك يلاقي ماسورة صور لناس راسها مقطوعة أو غرقانين في الدم أو قطر مقلوب أو شباب ميِّت يا ترى هايبقى ذهنه مشغول بإيه؟ مشغول بالخير؟ بالجمال؟ بالأمل؟ بالحب؟ حب إيه؟!

عايزين عيالنا واخواتنا يطلعوا متفائلين وخيِّرين؟ محتاجين نقاوم كميَّات القتل والدم والجماجم والتعذيب دي، محتاجين أضعاف أضعاف الأخبار دي يكون حياة، يكون رحمة، يكون خير..

محتاج الحب يسود؟ قدم الحب؛ اقرا عنه وعيشه واتمناه وافرح بيه، اتكلم عنه واتلكك تشوفه، وريه لعيالك في زرعة بتهتم بيها؛ في حيوان أليف بتربيه، في كلمة طيبة بتقولها،

خايف عليهم من داعش؟ غرق بيتك بمحبة وخير ومساعدة؛ وقتها الكره والقتل والعنف مش هايلاقي مكان خصب يتربى فيه..

كل كلمة ذوق وكل مجاملة رقيقة وكل امنية حلوة هي ملو لخزان الرحمة، وكل فيلم عنف وفيديو قتل ولعبة كومپيوتر فيها موت وخناقة في البيت فيها شتايم هي ملو لخزان داعش!

يمكن يرجع اليوم اللي فيه نتبسط لكل حد مبسوط باللي بيحبُّه؟ يمكن ييجي اليوم اللي مانحسِّش فيه إن الپوستس بتاعة الورد والخضرة والمناظر الطبيعيَّة والكلاب الصغيَّرة والأطفال البريئة هي پوستس "بناتي" قوي! مش "واقعيَّة"، مش "عايشين معانا"!

لما نسمع "عيد الحب" جايز مايكونش المقصود كلمة "عيد" كاسم! لكن يمكن كفعل! فعل أمر! بلاش تعيد الڤيديو بتاع الحرق، بلاش تعيد الفرجة على صور التعذيب والسحل والدم، بلاش تعيد كلام الخناق والزعيق، لو عايز تعيد حاجة عيد الخير، عيد الكلمة الكويِّسة.. عيد الحُب :)