علمني أختار

الرقابة المركزية في حياتنا هي الحياة وكل الحياة :).. مانقدرش نعيش من غيرها.. أفتكر وأنا صغير كنت مرات أبقى عايز أعمل حاجة عارف إن أمي مش هتوافق عليها.. كنت أروح أستأذنها.. ماكنتش ترضى تقوللي لأ أو آه.. كانت ساعات كتير تقولي "الحاجة دي غلط عشان كذا وكذا.. لكن إنت حر".. كنت أتجنن من كلمة "إنت حر" وأفتكر كذا مرة إني كنت أقولها "ماتقوليليش إنت حر"..

الحرية مصيبة.. الحرية غامرة.. الحرية هي iPad لطفل عمره 5 سنين.. غالبا غير قادر على استيعاب كل إمكانيات "الجهاز العجيب" ده.. الحرية محيرة.. مليانة اختيارات.. مليانة تحمل للمسئولية عن اختيار ممكن يكون غلط أو صح أو مش مناسب للوقت ده.. 

وعشان كده مش غريب إننا نكون ميّالين إن "ماما" هي اللي تختارلنا طول الوقت.. هي اللي تقول "ماشي.. اعمل كده" بحيث إن هي اللي تتحمل المسئولية.. أو هي اللي تقول "لأ.. ممنوع" بحيث هي برضه اللي تتحمل غضبنا وإحساسنا "بالقهر".. لكن تقوللي "إنت حر" ؟ حرام :)

ولأننا لما بنكبر بنحتاج "ماما" مختلفة.. فعايزين الحكومة تبقى هي ماما.. الحكومة هي اللي تصادر الكتب "الوحشة".. أصل الكتب دي ممكن "تبوّظ" العقول.. والحكومة هي اللي تقوم بالرقابة على الأفلام اللي بتتعرض في السينما.. عشان لو فيه فيلم "وحش" ماحدش من الناس اللي يا حرام غلابة يروح ويتفرّج عليه و"يضطر" يا عيني إنه يشوفه..

وأنا هنا مش بأتكلم على مناهج دراسية إجبارية.. ولا بأتكلم عن برامج على التليفزيون الرسمي بتتعرض في نفس توقيت برامج للأطفال وأوقات مشاهدة ممكن تكون مش مناسبة لسن معين.. لكن أنا بأتكلم عن أفلام في السينما ينفع يتحط عليها سن معين.. كتب ينفع إني أختار إني ما أقراهاش.. YouTube clips ممكن أشوفها وأنا بنفسي أقول "إيه الهبل ده".. لكن لأ.. إزاي.. إحنا هنا بنقدم خدمة خمس نجوم.. الدولة نفسها هي اللي هتقولك لو الكتاب ده "حلو" و"مناسب" ولّا لأ.. حلو ومناسب من وجهة نظر مين؟ مش مهم.. هيبقى غالبا من وجهة نظر اللجنة اللي بتقرا (أو بمعنى أصح مش بتقرا) الكتاب ده..

الكوميدي في كل القصة إن الشباب والأطفال ممكن يتعرّضوا لأفلام تافهة ولا تحمل أي قيمة فنية ولا مهنية في تصوير أو تمثيل أو غيره لكن ما دام الأفلام دي مافيهاش عُري واضح أو شتايم جنسية مباشرة يبقى خلاص..

وإحنا في 2012 صعب جدا إن الأب أو الأم أو الدولة يقوموا بالرقابة على كل اختياراتنا.. ولو كل حاجة مسموحلي إني أقراها أو أشوفها عدت بالفعل على رقابة إذاً فين النُضج في اللي أنا بأعمله إذا كنت أصلا ما أقدرش أعمل غيره؟

اللي ربّى وكبّر خلاص ربّى وكبّر.. وغالبا بدل ما نبّه أطفاله لمحاذير وممنوعات وكتب مُصادرة وأفلام مسيئة, ربّى جواهم القدرة على "الاختيار".. القدرة على تمييز الجيد من الرديء.. المفيد من الأي كلام.. اللي بيبني ويمتّع ويُنضج من اللي بيهد وبيوقّع..

صادر الكتاب وإلغي عرض الفيلم وحاكم المعارضة.. لكن هل انتهت وسائل الحصول على كل الحاجات دي لما إنت منعتها؟ ولّا بالعكس إنت ساعدت في حملة "تشويق" و"تحفيز" للناس إنها تشوف الحاجة "الوحشة" اللي "كله بيتكلم عنها".. 

كان ينفع وإحنا أطفال تبقى طريقة التعامل هي "عايز تحيّره.. خيّره".. لكن أعتقد النهاردة وإحنا في عالم كل الاختيارات فيه متاحة محتاجين نتحرك ناحية "عايز تكبّره؟.. علّمه يختار.. وخيّره"

 

بدل ما تختارلي وتقررلي إيه اللي أشوفه وأقراه.. علّمني أختار.. إدّيني أدوات أعرف بيها أنقّي.. وسيبلي الباقي.. إنت بس علّمني أختار..

الخناقة الجايّة

بنمر بظروف مختلفة بتبيّن شخصياتنا.. وإذا كان فيه مواقف بتبيّن الشخصيات "بسطحية" فيه فرص تانية بتدّي جوانب أعمق جوانا.. 

الناس اللي بتروح أفراح أو حفلات تَخَرُّج أو أعياد ميلاد وتحاول تختار عروسة أو عريس غالبا بيكونوا شايفين الناس في أفضل صورهم: مستحميين ولابسين شيك.. مبسوطين..جايين مناسبة مبهجة مستعدين لوقت كويس.. عشان كده فرصة إني أشوف حد "على طبيعته" للآخر هي فرصة تكاد تكون مش موجودة..

إنما اتفرّج بقى على الناس وهي متضايقة أو متغاظة.. وإنت تشوف الناس بجد.. شوفهم وهم مستعجلين أو غضبانين أو ضايع منهم حاجة.. هتعرف وقتها إلي حد كبير شخصياتهم.. عصبيتهم بتوصل لحد فين.. تفكيرهم العقلاني قد إيه.. بيعبّروا عن مشاعرهم إزاي وهكذا..

وعشان كده "الخناقات" هي علامة مهمة قوي في شخصيتي.. لو ماشفتنيش وأنا متضايق يبقى متعرفنيش..

لكن مش بس المهارة بتاعة "أتصّرف إزاي وأنا باتخانق" مهمة.. مش بس أشتم ولّا لأ.. مش بس أعلّي صوتي ولّا أكسّر الفازة.. مش بس كده.. المهارة الأصعب هي مهارة "اختيار الخناقة".. أتخانق أنهي خناقة! إمتى أعمل مشكلة وإمتى "أفوّت"

مقولة بالإنجليزي بتقول: Pick your battles أو نقّي المعارك بتاعتك.. شوف إيه المهم اللي تتخانق وتتحمق عليه..

"فلترة" الخناقات نفسها مهارة أنا محتاج أشتغل عليها.. مع عيالك ومديرك.. مع أصحابك.. مع شريك حياتك فيه حاجات "تتفوّت" وفيه حاجات "نتخانق عليها"..

 

ناس كتير في المجال السياسي أو الفني أو ناس من المشاهير جزء كبير من احترامنا ليهم (حتى من غير ما ناخد بالنا) هو بسبب إنهم شاطرين في إنهم إمتى "يردّوا" وإمتى "يطنّشوا".. إمتى يدّوا أهمية للكلام وإمتى يوجّهوا وقتهم وطاقتهم ومشاعرهم في حاجة مختلفة..

مش شرط كل ما حد يشتمني أرد.. مش كل مرة حد يتهمك بحاجة تدافع.. مش مضطر إنك تثبت إن الحق معاك.. مش لازم كل يومين تلاتة تطلّع بيان أو تعمل مؤتمر صحفي أو تكتب مقالة ترد بيها على رسمة أو تويتة أو نكتة أو خبر عنك..لأن جزء من شخصيتك بيبان بناء على أنهي خناقات "بتختار" إنك تدخل فيها وأنهي معارك "بتترفّع" عن إنك "تشرّف" الطرف المخطئ ولو حتى باهتمام أو رَد..

لما حد يبدأ يشاكل فيّ على طول بافكر: "يا ترى أتخانق دلوقتي؟ ولّا أستنى للخناقة الجايّة؟"

آسف

مجهود كبير وطاقة رهيبة بنبذلها في حياتنا عشان "نعمل الصح".. وقت كتير بنقضيه يا إما بنحاول نعمل الصح يا إما بنعلم ونربي  حد تاني عشان يعمل الصح.. يا إما بنتكلم عن الصح.. لكن جزء كبير من "عملان" الصح ده جواه "الخطأ".. عنصر الإخفاق موجود.. الفشل في الوصول لأصح حاجة طول الوقت حاجة موجودة حوالينا..

لكن هل مجتمعنا بيقدملنا طريقة للتعامل مع الغلط؟

هل أسرنا علمتنا لو عملنا غلط نعمل إيه؟

ثقافتنا عظيمة ومليانة عمق في نواحي كتير.. لكن تيجي عند فكرة "الاعتذار" وحاسب قوي.. وعلى قد ما احنا "حافظين" المُثُل والقيم.. وعلى قد ما احنا ممكن "نوعظ" بعض للصبح لكن تيجي جزئية إني أغلط وأقول إني غلطت؟ لا لا لا.. إزاي؟!

الدليل؟

هو أنا لما بأعتذر عادة بأقول إيه؟

معلش يا سيدي ماتزعلش مني!

أنا غلطان يا سيدي!

لو اتضايقت مني أنا محقوقلك!

آيوة أنا زعقت لكن هو استفزني

وطبعا دي المرات اللي بنبقى فيها في منتهى الجرأة والإحساس بالتواضع.. وبنلاحظ طبعا إن الجمل دي يا إما بتعبر عن إن الطرف اللي قدامي هو اللي "قمّاص" (ما تزعلش) أو (لو اتضايقت مني) أو إني باحاول "أغلوش" وأهزر وتدخل كلمة "يا سيدي" في كل جملة عشان قال إيه "تلطف" الدنيا.. يا إما طبعا اللي قدامي هو اللي غاظني وخرّجني عن شعوري!

ولو أنا أقل جرأة بأقول حاجات شبه:

انت أكيد فهمتني غلط..

أنا ماقصدش كده خالص..

الشيطان دخل بيننا وخلّاك تضايق (مظلوم الشيطان في بعض المرّات!)

على مستوى الحكومات والسياسيين والمسئولين.. على مستوى المدرسين وساعات كتير الآباء ورجال الدين والرموز والفنانين امتى آخر مرة شفنا حد بيعتذر؟ وساعات لما بنفتكر إن جهة رسمية اعتذرت تلاقيهم يطلعوا يقولوا: لأ إحنا قلنا "نأسف" يعني "نشعر بالأسف والحزن" وده مش معناه إننا غلطنا أو علينا أي مسئولية!

إمتى آخر مرة شفت والدك بيبوس على راس والدتك وبيقولها: أنا غلطت في حقك فعلا! أنا آسف.. (مش: خلاص يا ستي! حقك علينا! عايزة إيه نبوس راسك يعني؟)

من الحاجات الجميلة في الإنجليزي إنه من المعروف إن لو هتذكر نفسك مع شخص تاني تبدأ بالشخص فتقول مثلا: My brother and I… وما ينفعش تقول I and my brother إلا في حالة واحدة.. لو بتقدم اعتذار!

ياترى نقدر أنا وانت إننا نغير فكرة "الاعتذار" في مجتمعنا حتى لو على نطاق ضيق؟ يمكن الكلمة نفسها بتصعب علينا الموضوع لأن أصلها اللغوي معناه: "ذكر العذر" أو "ذكر السبب"..

لما باعتذر أنا محتاج أقول: أنا غلطان إني عملت كذا وكذا.. أنا آسف! من غير "بس" و"أصل"..

مايقللش من قيمتي إني أقول إني غلطت..

مايعيبنيش لما أعتذر..
من أعظم الكلمات كلمة آسف!

اللي فينا ماعتذرش في حياته لسّة قدامه كتير!

أسهل بكتير

 بعد أول يوم دراسي في سنة جديدة رجعت البنوتة اللي عمرها 4 سنين بيتها وبدأت تسأل الأسئلة اللي مليانة استغراب ومحاولات للفهم..

ماما.. هو إحنا "مسيحيين وللا مسلمين"؟

إحنا مسيحيين.. ليه يا حبيبتي؟

أصل أصحابي في المدرسة النهاردة سألوني.. طب هو إيه الفرق؟

مافيش فرق يا حبيبتي.. بس إحنا بنصلّي لربنا في الكنيسة وهم بيصلّوا لربنا في الجامع..

يعني "نحبهم"؟؟

وعلى الرغم من توقعنا للرد إلا إن الرد مالهوش وزن قدام السؤال بتاع: يعني نحبهم؟.. كما لو إن لسان حال البنوتة هو إنه "ماحدش يقوللي على الفروق.. أنا بس عايزة أعرف لو ينفع أحبهم وللا لأ"

جوانا كلنا ميل تلقائي فطري للحب.. مخلوقين و"العادي" بتاعنا إننا "عايزين" نحب ونتحب.. الكُره هو الحاجة الجديدة.. الحاجة الغريبة..

عشان أكره أنا محتاج أبذل مجهود.. عشان أكرهك أنا محتاج إني أعرف معلومات عنك.. أكوّن أسبابي.. أحدد شوية أمثلة تساعدني إني ماحبكش.. محتاج "أبطّل" ألعب معاك.. محتاج "أعمل نفسي" مش شايفك.. محتاج أتفادى التواجد في أماكن إنت موجود فيها.. محتاج أفضل أفكّر نفسي بمواقف انت عملتها فيّ أحسن "أنسى" وألاقي نفسي "باحبك"!..

عشان أحبك أنا مش محتاج أكتر من إني "أسيب نفسي".. الطبيعة اللي ربنا حاططها فينا كلنا لسّة فيها الميل للخير والحب والاحترام.. النزعة (حلوة النزعة دي) للبر والتقدير والمساعدة.. التوجه النقي لمحاولة إسعاد حد تاني...

عايز تشوف أكتر علامات ميلنا للمحبة؟ مثال ممكن يبان عكس المحبة تماما: إيه أكتر أمنية عند واحد مسلم مخلِص؟ مش إن صديقه اللي مش مسلم "يهتدي"؟ لو واحدة مسيحية نفسها في إيه؟ مش إن جارتها اللي مش مسيحية "تيجي للنور"؟ هم لو مش بيحبوا بعض كان كل واحد قال: "ياللا مش مهم أهو هيروح جهنم".. "ياللا أحسن.. أهي هتروح النار"!

على الرغم إن الأمثلة تبدو طفولية.. إلا إن رغبة الخالق سبحانه هي إننا نرجع أطفال في النقطة دي بالذات.. نحب "الإنسان"..

تحدي صعب إنك تحاول تكره.. جرب تكره الطبيعة.. صعب قوي.. الشجر والشمس.. السما والمية والورد.. محتاج تبذل مجهود ضخم عشان تكره عمل إيدين الله..

وأصعب وأصعب إني أحاول أكره إنسان اتخلق على صورة هذا الإله اللي مليان رحمة وخير وحب وتقدير..

يعني أحبهم؟ آه.. أسهل بكتير!

ج د ع

من ساعة ما إدارات المرور بدأت تشتغل بالنِمَر الجديدة اللي فيها حروف وأرقام وأنا باحب أبُص على الحروف وأشوف لو بيكَوِّنوا كلمة ليها معنى وللا لأ.. ولأن  كلمات العربي أساسا بيرجع جذرها ل3 حروف وكمان لأننا ممكن نستخدم نفس الحروف بتشكيل مختلف فعدد الكلمات المختلفة رهيب..

طبعا قالوا في بدايات تطبيق الحكاية دي إنها شالوا أي كلمات ممكن تِتقِري على إنها شتايم أو كلمات خارجة.. الظريف إن كلمات كتير من الشتايم في العربي مكونة من 3 حروف (عشان اللي بيشتم بيبقى مستعجل فمش معقول هيقول مثلا: يا بطريق المجاري! أسهل قوي إنه يقول: يا جحش!) :)

المهم.. راجع من شغلي من يومين ولقيت عربية ملاكي أرقامها (ط ف س) و3 أرقام مش فاكرهم.. طبعا صِعِب عليّ صاحب العربية وحاولت أتخيل اليوم اللي راح فيه يجيب النمر الجديدة..

التلات الساعة 10 ونص الصبح.. إدارة المرور.. صباح الخير.. <صباح النور (أو وعليكم السلام)>.. بعد إذنك عايز أعمل النمر الجديدة.. <أوراقك..> اتفضل.. <ارتاح وهأنادي عليك..>

التلات (كويس.. يا مسهّل) الساعة 1 ونص وخمسة (داخلة على إلا تلت).. إدارة المرور (نهار داخلي)..< الأستاذ فلان الفلاني..>.. لأ "الفللاني" يا فندم مش الفلاني..< يا سيدي مش هتفرق.. اتفضل النمر..>

إيه ده؟.. <إيه فيه إيه؟..> إيه النمر دي؟ ط ف س 504؟ طِفِس504؟..<يا عم اشكر ربنا اللي قبلك كان ط ف س 507..>

وهو أنا متضايق من الرقم؟؟ معلش يا أستاذ شوفلي حروف تانية..<حروف تانية دة إيه؟.. هي دي الحروف المخصصة ليك>.. طب أنا ممكن أستنى وآجي بكرة (الأربع نهار داخلي أو خارجي أي حاجة).. <بكرة زي بعده.. هي دي النمرة المخصصة ليك>.. طب شوفلي حاجة أرحم شوية.. يعني مثلا ر ز ل 309 أو غ ل س 734.. أي حاجة غير طفس دي!

يمكن مش كلنا بييجي حظنا في كلمة شكلها وحش على ضهر العربية.. لكن كلنا من غير استثناء اتكتب على ضهورنا كلام على مر السنين.. كلام بيسموه labeling  أو "وضع مسمى" ومع السنين فضل المسمى ده مرتبط بي.. والناس شايفاه علي وشي..

يمكن مش موظف إدارة المرور هو اللي حط المسمى ده عليّ.. يمكن أبويا.. يمكن أصحابي في المدرسة وأنا صغير.. جايز مراتي.. ممكن زميلي في الشغل..

"هو كده على طول غبي".. "عمره ما هيتعلم".. "ما ده العادي إنه يضيع الفلوس".. "يا عم ده ضايع في الكورة" "أنا ماشفتش حد بخيل زيك".. "إنتي دايما كده همك على الفلوس".. وغيرها من العناوين أو الـ labels اللي اختارناها لغيرنا أو ناس قررت إنها تختارهالنا..

كل مرة أنا بيتقاللي "انت شاطر في المزيكا" مش بس باتبسط.. لكن كمان باتشطر في المزيكا.. وكل مرة بيتقاللي "سواقتك أي كلام" غالبا بتبقى نبوءة بتحقق نفسها خصوصا لو جاية من حد قريب ليّ..

كلنا بتجيلنا فرص كتير إننا "نسمي" الناس.. ياترى هاقدر أختار عنوان يشجع ويفرّح ويزق لقدام؟ ياترى ممكن أكون السبب في إن طالب عندي يكون متفوق بسبب إني قلتله "إنت دايما مركز.. برافو عليك"؟ يا ترى ممكن جوزِك يبقى متميز في شغله بسبب إنك شايفاه "على طول ملتزم في الشغل"؟..

لو مش قادرين نغير النِمَر.. ممكن نكتب "عناوين" حلوة لبعض.. وافتكر إن اللي بتقوله النهاردة لحد ممكن يكون "النمرة اللي بيستلمها ومايقدرش يغيرها"