جيت على بالي

إحساس حلو لما حد يقولك "جيت على بالي إمبارح" أو "حلمت بيك" أو "كنا بنتفرج على فيلم وافتكرتك" أو "شفت باقي أصحابنا وكنا جايبين في سيرتك".. إحساس إنك "على بال حد" أو إن ممكن مواقف معينة تفكر أصحابك بيك إحساس جميل، وجزء من جماله إنه في معظم الأوقات بيكون تلقائي.. اللي بيقولك كده (في معظم الأوقات برضه) مش مضطر إنه يقولك كلام كويس.. مش بيجاوب على سؤال إيه رأيك في فلان، ولا بيحاول إنه يجاملك وخلاص..

في المقابل هانلاقي ناس بتلومنا إننا مش فاكرينهم.. بيعاتبونا (من عشمهم) إننا مش "بنيجي في بالهم".. مش بنسأل عليهم.. مش فاكرينهم.. وردودنا غالبًا ردود حزينة في نفسها ولا ليها معنى.. "كنت مشغول قوي الوقت اللي فات".. "إزاي بس يا راجل، ده أنا كنت لسة هاكلمك" وغيرها من الردود المفقوسة!

لو بييجي على بالي سؤال هو ليه الناس مش بتفتكرني أو مش "بآجي على بالهم ليه" فده مش سؤال غريب ولا حاجة.. ولا اللي بيسأله عنده "نقص" ولا "عقدة" ولا حاجة.. حلو إننا نتمنى نكون متواجدين في ذاكرة حبايبنا.. متاحين في فكرهم.. بنيجي على بالهم من وقت للتاني من غير ما نضطر نلوم ونعاتب ونحسب مين آخر واحد فينا اتصل.. السؤال نفسه عادي.. لكن بعضنا بيقرر إنه عشان الناس تفتكره محتاج يسمم عيشتهم ويحسسهم بالذنب! وفيه نوع تاني بيقرر إنه "يستثمر" في العلاقات القريبة.. يدفع وقت ومجهود واهتمام.. يبذل شوية جهد علشان ابنه أو بنته أو مراته أو جوزها أو أصحابه أو الناس اللي معاه في الشغل يفتكروه وييجي على بالهم بالخير..

لما بأستثمر في الصداقة وباسافر مع أصحابي أو بنخرج أو بنتفرج على مسرحية أو ماتش إحنا بنبني سياق مشترك.. حاجة متبادلة ممكن في المستقبل تفكرنا ببعض.. لما بأستغل الفرصة اللي فيها ممكن "أكوِّن ذكريات" أنا بأستثمر للمستقبل اللي فيه الذكريات دي غالبًا هاتكون بتقرب الناس من بعض وبتخليهم ييجوا على بال بعض لو حد فيهم افتكر حاجة أو مر بموقف ليه علاقة بالذكريات دي..

المزيكا اللي عملتها مع أصحابي بتفكَّرني بيهم.. والمسرحيات اللي حافظينها، والشغل اللي عملته مع زمايلي، والأماكن اللي رحتها، والصور اللي أخدناها، كلها فرص مش بس للاستمتاع بالحاجة وقتها، لكنها كمان فرصة لبُنا أرشيف ذكريات يقرَّبني من ناس بأحبهم.. ويخلينا نيجي على بال بعض..

ذكريات أبيض وإسود

المجتمعات المختلفة بتمر بمراحل مهمة في تاريخها، ومن أهم المراحل دي مرحلة ابتكار نظام للكتابة.. أول ما المجتمع يبدأ يتفق على شكل الحروف وقواعد عامة للكتابة بيبدأ المجتمع يدخل في مرحلة جديدة، لأنه بيقدر وقتها يوثَّق تاريخه ويعبَّر عن أحلامه ويدوِّنها، ويقدر كمان ينقل رسايله لناس تانية بطرق أسهل شوية و"أدق" من التواصل الشفهي..

والظاهر إن رغبة الإنسان في "تثبيت" أو "تسجيل" الخبرات هي رغبة ملحة وفي الغالب هي الدافع ورا اختراعات وأفكار كتير زي الكاميرات وزي الكتابة على الجلود والحيطان وغيره.. بنحس إن عقلنا ممكن ما يسعفناش عشان نفتكر اللي حصل، لكن لو معانا صورة أو فيديو أو كتاب متسجِّل فيه التفاصيل ممكن نحس بالأمان أكتر..

وفي الزمن ده اللي فيه ممكن نصور ونسجِّل وندوِّن ونوثَّق كل حاجة بسهولة، بقى عندنا مشكلة في الحاجات اللي تفاصيلها بهتت، الحاجات اللي مش بوضوح الألوان.. وبقى الأبيض والإسود رمز للتأخر، رمز لعدم الوضوح..

لكن لما الموضوع يخص الذكريات لازم نفتكر إن فيه متعة خاصَّة في الذكريات الباهتة.. فيه ذكريات جزء كبير من جمالها هو إنها باهتة! حلاوتها في المجهود الذهني اللي بنبذله وإحنا بنحاول نفتكر تفاصيلها..

الخوف ساعات إن اعتمادنا على إننا "اتصوَّرنا" بيوهم عقلنا إنه "يريَّح" هو! مش محتاج يفتكر، أصل كلُّه "متسجِّل".. ونكاد نكون بنفقد المهارة الحلوة (المتعبة أحيانًا) اللي فيها بنحاول نفتكر ذكرياتنا.. نحاول "نلوِّن" صورنا الباهتة، و"نكمل" باقي القصة..

يا ترى هل هو ده اللي بيخلِّي تيتة وجدو والناس الكبيرة بيكرَّروا القصص كل ما يشوفونا؟ يا ترى هو ده اللي بيخليهم يحكوا نفس الأحداث بنفس تفاصيلها حتَّى وهم عارفين إنهم بيكرروها؟ يمكن يكونوا بيلوِّنوا قصصهم؟ "بيزهُّوا" عليها عشان ما ينسوش؟..

فيه جمال خاص في القعدات الأسرية وقعدات الأصحاب اللي فيها جمل زي "فاكر لما....؟" ويترد عليها "أيوة، ساعة ما..." وتكون المجموعة قاعدة تجمَّع خيوط الذكرى معتمدين على "خط" كل واحد بيحاول "يزهِّي" بيه صورة بهتت..

مش شرط نفتكر كل الذكريات.. حلو إن بعض الذكريات تفضل باهتة ونفضل حاسين بحلاوتها.. من غير ما نسجِّلها، ولا نثبِّتها، ولا نحتفظ بيها متلونة وزاهية وواضحة.. حلوة برضه الذكريات الأبيض والإسود..

اللي يموّت الموت

معظمنا جاله وقت وإتمنى أمنية "آه لو نعرف نموّت الموت".. "آه لو نقدر ما نعبّرش الموت ولا يكون فارق معانا".. رغبتنا في إننا نغلب الموت رغبة قريبة قوي من الغريزة لكنها كمان بتبان منطقية وجذابة لو فكرنا فيها..

لما بتيجي أخبار عن موت حد نعرفه أو شاب صغير أو ناس بريئة أو أطفال بتيجي مع كل خبر أحاسيس مُرعبة من الحيرة واللخبطة.. مشاعر إن الموت مالوش "مسكة".. ما حدش إذا جاز التعبير عارف "يلمّه".. ماحدش قادر يفهمه أو يتوقعه أو يستعد له للآخر..

ومع كل الصدمة والألم والبُكا بتيجي مرحلة من شوية حسابات غالبا معظمنا بيعملها تلقائيا بعد ما يهدى شوية.. أسئلة وعلامات استفهام زي "هو أنا ممكن أموت قريب؟" "في السن ده؟" "أهلي وأصحابي وحبايبي هايعملوا إيه؟".. وبرضه بتيجي كسرة القلب مع كل تعليق بنسمعه اتقال على لسان اللي ماتوا.. إزاي كانوا متضايقين في آخر وقت.. أو إزاي كان ممكن يتفادوا الحادثة.. أو قد إيه أحلامهم كانت أحلام بسيطة.. أو قد إيه كانوا بُسطا وطيبين ومحبوبين..

والظاهر كده إن الحكاية دي حركت ولسة بتحرك أنشطة كتير في الحياة زي مثلا الاختراعات والأبحاث اللي بتحاول تطوّل العمر أو تمنع التعب أو تعالج أمراض.. أو الأنشطة اللي بتساعد الناس تكسب فلوس أكتر عشان تعيش عيشة أريح وتأجل "الضيف السخيف" اللي كلنا عارفين إنه هاييجي..

أكترنا قبول لفكرة الموت بيشوف فيها انتقال لحالة أفضل فيها حياة لكن من نوع شكله مختلف عن الحياة على الأرض.. لكن من أكتر الناس قبول للفكرة فيه ناس مش عايزة الموت عشان الألم والوجع اللي بيسببه مش لينا لكن للناس اللي بنحبهم وبنسيبهم ورانا..

ولأن الموت في مفهومنا البسيط هو أقصى درجات غياب الحياة, فالمطلوب لهزيمته حاجة تكون "أقصى" برضه.. ما ينفعش نُص نُص.. واعتقادي الشخصي هو إن الوحيد اللي يغلب الموت هو "الحب"..

الحب هو اللي بيخلي الأم والأب على استعداد كامل إنهم يموتوا حرفيا عشان ابنهم ما يتأذيش.. ذكرى اللي بيموت بتفضل مستمرة مش على قد ما أنجز من اختراعات وفايدة للبشرية.. ومش على قد تأثيره وقوته السياسية ولا عدد الأحلام اللي عرف يحققها.. ناس كتيرة "ماتت" وهي لسة بتتنفّس وبتاكل وتشرب وتمشي لأن ما حدش حبها.. ذكرى اللي بيموت بتفضل مستمرة عند الناس اللي بتحبه.. وعند الناس اللي حبهم..

الحاجة الوحيدة اللي تخلي إنسان يفضل عايش حتى لو مات هي إنه يكون حَب واتحَب للآخر.. ساعتها بس وجود الجسد الضعيف ده أو غيابه مش هو العلامة الوحيدة اللي بتدل على الحياة..

كل واحد عرف يحب وعرف يستقبل الحب غالبا أخد شوية خطوات عشان يموّت الضيف السخيف اللي ممكن يفرّق أجسام الناس عن بعض لكن ما يقدرش يمسح مشاعر حب اتكونت بين المحبين..

كل حد حبني وحبيته محبة حقيقية هايفضل عايش على طول.. والحب هو اللي هايخليه عايش في تفكيري.. عايش في ذكريات حلوة بأفتكرها.. عايش في ألبوم الصور وفي أماكن روحناها وحكايات قلناها.. عايش في أحلام حلمها وناس أثر فيها وبصمات سابها..

اللي غلب الموت ما غلبهوش بالشطارة ولا التكنولوجيا والعلم.. اللي موّت الموت موّته بالحب..

يا خسارة

إحساس "الفقد" من أسخف الأحاسيس اللي ممكن نمر بيها.. بقالي أكتر من أسبوع مش لاقي النضارة بتاعتي.. وبجد عمري ماكنت أتخيل إن الموضوع ممكن يبقى بالسخافة دي..

نظري مش ضعيف قوي.. لكن بأبقى طبعا محتاج النضارة.. آه قادر أمشّي حالي وأقرا وكل حاجة.. لكن كل ما أحس إني مش لاقي النضارة أتغاظ قوي..

اللي يغيظ قوي إني عارف إن النضارة هنا في البيت.. قلبت عليها الدنيا.. كلمت المطعم اللي اتعشينا فيه (يوم ما اكتشفت إن النضارة ضاعت) وقالوا مالاقوش حاجة.. (الظريف إني كلمت المطعم يومين ورا بعض.. نظام "معلش كده بص كويس يمكن تلاقيها"!)

طبعا ولأني بدأت الماجستير قريب بقيت أروح المحاضرات أقعد قدام!.. بالعافية باقاوم إغراء إني ألزق في التيليفزيون عشان أشوف كويس.. ولغاية ما أعمل نضارة جديدة كل ما أروح في حتة في البيت أفضل كده أدوّر يمكن ألاقيها!

والفقد والحرمان على الرغم من إنهم قريبين من بعض لكن إحساسنا بالفقد في معظم المرات بيبقى أشد ومؤلم أكتر.. الزوجة اللي ماخلفتش ماعندهاش نفس مرارة وألم الأم اللي ابنها مات أو اتخطف.. واللي فقد عين من عينيه غير اللي اتولد نظره ضعيف أو بعين واحدة..

فقداننا لأحد الاختيارات في حياتنا بيسببلنا توتر وألم.. حتى لو الاختيار ده مش مستخدم أو مش أهم اختيار..

ولو فيه فرق شوية بين الرجالة والستات في الموضوع ده تلاقي إن الرجالة مهم عندنا يكون فيه اختيارات options في حين إن الستات أشطر شوية في فكرة استغلال المتاح واستخدام الموجود.. المتجوزين جديد تلاقي الراجل عايز يجيب أوضة للعيال بحيث إنها تكفي 8 عيال (احتياطي! أو لو أليط بقى وبيستخدم إنجليش لانجويدج: Just in case!) في حين إن الزوجة ممكن تكون مبسوطة وهي بتحاول تفكر إزاي نستغل المساحة الصغيرة دي في إننا نقفلها دولاب أو نحط كومودينو (أو nightstand بقى بما إن الأليط لازم ياخد واحدة أليطة!)

سفر الأصحاب.. أو وفاة القرايب.. أو انشغال الناس القريبين عنا بيحسسنا بالفقد أو بالخسارة.. بنحس إنه: ياااه.. مش هنقرا تاني تعليقات كوميدية من جلال عامر!.. يا خسارة.. مش هنسمع ويتني هيوستين بتغني تاني!.. مش هشوف صاحبي اللي هاجر! مش هسمع كتير صوت بنتي اللي اتجوزت وسافرت!

الحياة بتستمر.. وبنفضل في القطر ده اللي فيه ناس بتنزل قبلنا.. حاجات بتضيع.. ناس بتمشي.. والحياة بتكمل بينا.. مش دايما ده معناه إننا أحسن أو أوحش..

الاختيار عندي..

الاختيار إني أسترجع ذكريات حلوة مع صديق.. أو أفتكر مواقف جميلة مع حد مات.. أو إني أعيش باقي العمر حزين ورافض التعزية..

زي مافيه ناس "رفضت" أخبار موت مطربها أو مطربتها المفضلين فيه ناس بدأت تجمع كل أغانيهم وترجع تسمعهم كلهم..

مش طول الوقت هيبقى عندي كل الاختيارات.. لكن معظم الوقت أنا عندي اختيار أساسي في توجهي ناحية اللي فاقده أو مفتقده..

لسّة طبعا مالاقيتش النضارة.. (متغاظ قوي!)

لكن متأكد إني هلاقيها طبعا.....أول ما أعمل واحدة جديدة!

ج د ع

من ساعة ما إدارات المرور بدأت تشتغل بالنِمَر الجديدة اللي فيها حروف وأرقام وأنا باحب أبُص على الحروف وأشوف لو بيكَوِّنوا كلمة ليها معنى وللا لأ.. ولأن  كلمات العربي أساسا بيرجع جذرها ل3 حروف وكمان لأننا ممكن نستخدم نفس الحروف بتشكيل مختلف فعدد الكلمات المختلفة رهيب..

طبعا قالوا في بدايات تطبيق الحكاية دي إنها شالوا أي كلمات ممكن تِتقِري على إنها شتايم أو كلمات خارجة.. الظريف إن كلمات كتير من الشتايم في العربي مكونة من 3 حروف (عشان اللي بيشتم بيبقى مستعجل فمش معقول هيقول مثلا: يا بطريق المجاري! أسهل قوي إنه يقول: يا جحش!) :)

المهم.. راجع من شغلي من يومين ولقيت عربية ملاكي أرقامها (ط ف س) و3 أرقام مش فاكرهم.. طبعا صِعِب عليّ صاحب العربية وحاولت أتخيل اليوم اللي راح فيه يجيب النمر الجديدة..

التلات الساعة 10 ونص الصبح.. إدارة المرور.. صباح الخير.. <صباح النور (أو وعليكم السلام)>.. بعد إذنك عايز أعمل النمر الجديدة.. <أوراقك..> اتفضل.. <ارتاح وهأنادي عليك..>

التلات (كويس.. يا مسهّل) الساعة 1 ونص وخمسة (داخلة على إلا تلت).. إدارة المرور (نهار داخلي)..< الأستاذ فلان الفلاني..>.. لأ "الفللاني" يا فندم مش الفلاني..< يا سيدي مش هتفرق.. اتفضل النمر..>

إيه ده؟.. <إيه فيه إيه؟..> إيه النمر دي؟ ط ف س 504؟ طِفِس504؟..<يا عم اشكر ربنا اللي قبلك كان ط ف س 507..>

وهو أنا متضايق من الرقم؟؟ معلش يا أستاذ شوفلي حروف تانية..<حروف تانية دة إيه؟.. هي دي الحروف المخصصة ليك>.. طب أنا ممكن أستنى وآجي بكرة (الأربع نهار داخلي أو خارجي أي حاجة).. <بكرة زي بعده.. هي دي النمرة المخصصة ليك>.. طب شوفلي حاجة أرحم شوية.. يعني مثلا ر ز ل 309 أو غ ل س 734.. أي حاجة غير طفس دي!

يمكن مش كلنا بييجي حظنا في كلمة شكلها وحش على ضهر العربية.. لكن كلنا من غير استثناء اتكتب على ضهورنا كلام على مر السنين.. كلام بيسموه labeling  أو "وضع مسمى" ومع السنين فضل المسمى ده مرتبط بي.. والناس شايفاه علي وشي..

يمكن مش موظف إدارة المرور هو اللي حط المسمى ده عليّ.. يمكن أبويا.. يمكن أصحابي في المدرسة وأنا صغير.. جايز مراتي.. ممكن زميلي في الشغل..

"هو كده على طول غبي".. "عمره ما هيتعلم".. "ما ده العادي إنه يضيع الفلوس".. "يا عم ده ضايع في الكورة" "أنا ماشفتش حد بخيل زيك".. "إنتي دايما كده همك على الفلوس".. وغيرها من العناوين أو الـ labels اللي اختارناها لغيرنا أو ناس قررت إنها تختارهالنا..

كل مرة أنا بيتقاللي "انت شاطر في المزيكا" مش بس باتبسط.. لكن كمان باتشطر في المزيكا.. وكل مرة بيتقاللي "سواقتك أي كلام" غالبا بتبقى نبوءة بتحقق نفسها خصوصا لو جاية من حد قريب ليّ..

كلنا بتجيلنا فرص كتير إننا "نسمي" الناس.. ياترى هاقدر أختار عنوان يشجع ويفرّح ويزق لقدام؟ ياترى ممكن أكون السبب في إن طالب عندي يكون متفوق بسبب إني قلتله "إنت دايما مركز.. برافو عليك"؟ يا ترى ممكن جوزِك يبقى متميز في شغله بسبب إنك شايفاه "على طول ملتزم في الشغل"؟..

لو مش قادرين نغير النِمَر.. ممكن نكتب "عناوين" حلوة لبعض.. وافتكر إن اللي بتقوله النهاردة لحد ممكن يكون "النمرة اللي بيستلمها ومايقدرش يغيرها"