كلنا هانموت

بكا وحسرة وألم على شباب وأطفال بيموتوا.. بيموتوا كل يوم.. وعلى الرغم إن تشكيلة الأسباب مختلفة لكن الحاجة المشتركة إن ناس بتموت.. سواء واحد نازل مظاهرة أو رايح يتفرج على ماتش كورة.. داخل مستشفى يتعالج  أو بيعدي الشارع أو بياكل أكل ملوث أو بيقضي عقوبة في السجن أو راكب قطر أو راجع من مدرسته.. أو.. أو.. التشكيلة متنوعة..

لكن المؤلم مش بس إحساس الأهل في مصيبة فقدان حد بيحبوه لكن المصيبة في التمن.. المقابل اللي الحكومة ممكن تكون بتدفعه لأسرة واحد مات..ال4000 ولّا ال 200000 جنيه مش بس بيورّونا تمن الموت لكن أعتقد إنهم بيكشفوا عن قيمة الحياة...

والسؤال ياترى هو الموت سنة الحياة؟ ولّا سنة الحياة هي الحياة؟ ياترى لما صلاح جاهين سأل "الأصل هو الموت ولّا الحياة؟" ماكانش عارف الإجابة؟

عمرنا ماهانقدر نفهم الموت غير لما نعرف يعني إيه حياة.. يعني إيه عيشة.. يعني إيه بني آدم اتخلق على أحسن صورة من إله قرر يدّي عمر وحياة لمخلوق ضعيف.. قرر يدّي روح تعيش للأبد عايشة مؤقتا في جسم ضعيف.. يمكن وقتها نقدر نعرف لو ال4000 جنيه كفاية!

هي إيه العيشة؟ ويعني إيه واحد عايش؟ آكل وأتجوز وأخلف عشان عيالي ياكلوا ويتعلموا ويتجوزوا ويخلفوا.. (ولو واحد منهم مات آخد ال4000 جنيه وأأكل الباقيين عشان يكبروا ويخلفوا و..و..و)

لما نفهم يعني إيه حياة ويعني إيه إن خالق الكون كله اختار إنه يوهب روح للإنسان وإنه سبحانه يسمح للإنسان ده إنه يكلّم الخالق ويفهمه ويكوّن عيلة واحدة فيها حب وود مع الخالق سبحانه.. ممكن وقتها بس نفهم الموت.. ويمكن وقتها نعرف لو الموضوع يستاهل نطوّر المستشفيات والسكة الحديد والأكل والمدارس ولّا عادي بما إن "كلنا هنموت"؟

هو طبعا كلنا هنموت..بس مش معنى كده إن كلنا لسّة عايشين..

أحلى صباح

قرينا من كام يوم خبر جواز صباح للمرة التامنة عن سن 89 سنة.. وبعيدا عن تفاصيل الخبر وعن صحة حكاية موسوعة جينيس من عدمها إلا إن ردود الأفعال ناحية الخبر بتدل على كذا حاجة..

وعلى الرغم من اقتناعنا العقلي بإن من حق أي واحد يتجوز في أي سن هو عايزه إلا إننا برضه بنلوم ونعتب ونتريق ونستنكر.. عندنا شعور ضمني بإن فيه مرحلة معينة من الحياة "مش من حق" الكبير أو العجوز أو المسن (أو أياً كانت التسمية) إنه يفرح ويهيّص ويعمل حاجات تبان لينا إنها تافهة.. الكبير في السن يقعد في البيت منتظر إنه يموت.. يتفرّج على التيليفزيون حسب ميول باقي أفراد الأسرة.. يروح معاهم الأماكن اللي يروحوها.. وياكل الأكل الموجود.. في المرحلة دي "ممنوع" إنه يبقى "نِفسه" في حاجة.. الأحلام والتطلعات والكلام ده هو بس للي لسة قدامه على الأقل بتاع تلاتين أربعين سنة في عمره!

فكرة غريبة.. ومؤلمة.. بنوعظ وننصح بمعدل رهيب قد إيه الحياة حلوة وقد إيه التفاؤل كويس.. بنسمع أقوال مأثورة عن الأحلام والتطلعات مهما كان الإحباط والمشاكل.. لكن نيجي عند محك حقيقي نتصرف بطريقة مختلفة..

كلنا بنحب صباح وهي في العشرينات من عمرها.. وهي في العشرينات من حقها تغني وتمثل.. من حقها تلبس أحلى فساتين.. من حقها تحب وتتجوز.. من حقها تصرف فلوسها زي ما هي عايزة.. لكن لو فكرنا كويس يمكن نلاقي إن صباح وهي 89 أحلى.. أحلى في حبها للحياة.. أحلى في تصرفاتها اللي مش بتضايق حد لكن بتحققلها سعادة.. أحلى لأن وهي مش معاها فلوس ولا شغل ولا جمال قادرة إنها تعيش وتتبسط وتعبر عن مشاعرها.. قادرة إنها تكون جذابة لشخص مش مضطر بأي حال من الأحوال إنه يرضى يرتبط بيها..

اقتناعنا بإن الانتحار مش صح أخلاقياً لأننا مش بنمتلك حياتنا مش بيمنعنا من إننا نشعر إنه "الحل الوحيد" للي عجّزوا.. حتى لو ما انتحروش حرفيا إلا إننا بنأكد ليهم إن "الحل الوحيد" هو انتظار الموت.. ماهو مش معقول بعد ما شاب يودّوه الكتّاب.. فمش من حقه يتعلم حاجة جديدة ولا يمارس هواية مختلفة ولا يسافر (أصلنا خايفين عليه) ولا يتجوز (أصل هاتيجي واحدة تضحك عليه وتاخد فلوسه) ولا يحلم ولا يعيش في مكان جديد ولا يشتري حاجة جديدة غالية.. ولا أي حاجة.. بس ممكن يتنفّس!

أعتقد إن صباح الحلوة الجميلة الموهوبة الشيك الغنية لو قارناها بصباح دلوقتي هنلاقي إن صباح دلوقتي هي صباح اللي شايفة الحياة جميلة حتى لو مافيش فلوس.. وحتى لو الجمال راح.. حتى لو مافيش شغل ولا أضواء ولا برامج ولا جوايز.. صباح اللي لو في مكان تاني كانت تبقى نموذج لحب الحياة.. نموذج للرغبة في الاستمرار بغض النظر عن الظروف.. حتى لو سمعها ضعف.. حتى لو مش قادرة تغني أو تتكلم زي زمان.. فعلا "غريبة لعبة الساعات" على رأي عبد الرحمن الأبنودي اللي كتب الأغنية المشهورة "ساعات ساعات"..

مقارنة بالوقت اللي فات أعتقد إن صباح 2012 ببساطة هي أحلى صباح

العبد لله

الرغبة في إن العدل يسود وإن الحق ينتشر رغبة رائعة وتوجُّه جميل مافيش حد ينكر سموه..

سهل قوي إن الواحد يقعد ساكت ومايطالبش بحقه..

أصعب شوية إن الواحد يطالب بحقه..وأصعب وأصعب إن الواحد يطالب بحق غيره لو متفق معاه في الميول أو الأصول العرقية أو الديانة أو الدراسة أو مجال العمل...

لكن اللي بيبقى صعب قوي قوي هو إني أطالب بحق غيري على الرغم إن حصوله على حقه مش في مصلحتي أو مش هيفيدني في حاجة..

ويكاد يكون مستحيل إني أطالب بحقك لو ده هيعود عليّ بضرر سواء بشكل مباشر أو غير مباشر..

لكن الغريب إنه على مدى السنين شفنا ناس دافعت عن حقوق غيرها مش لغرض غير إن الحق والعدل يسود..إن الحرية وممارسة الحقوق تبقى مكفولة للكل..

كنت قاعد أقرا شوية عن تاريخ تجارة العبيد ولقيت بعض الحاجات المؤلمة والغريبة والجميلة..إزاي كانوا بيفكروا في الموضوع ده وإزاي لغوا تجارة العبيد..حاجات تستحق القراية..

تجارة العبيد في أميريكا بدأت رسميا في فيرجينيا لما راجل أقنع المحكمة إن الخادم اللي عنده (وكان أسود البشرة) يُعتبر ملكه للأبد. المحكمة حكمت فعلا لصالحه وبكده بقى الخادم ده أول عبد بحُكم رسمي من ولاية فيرجينيا..

اللي استغربته في القصة إن اللي رفع القضية ده شخصيا كان أسود البشرة! ومش بس كده..ده كان جَي فيرجينيا كــindentured servant  يعني خادم بيشتغل مقابل الديون اللي كانت عليه أو بعقد لسنين طويلة جدا مقابل الإقامة والأكل! لكنه بطريقة ما حوّش فلوس كتير ودفع مقابل السنين اللي باقية له هو ومراته وأخد حريته..

ولما اغتنى جدا بدأ يستورد عبيد سود ليه هو شخصيا من أفريقيا..وبكده خد منحة 250 فدان لأن أي حد كان يستورد عبيد كان يحصل على 50 فدان مقابل كل عبد!..القصة مش بتخلص على كده لكن في النهاية بيتم مصادرة الأرض بتاعته لصالح راجل أبيض وفي أسباب المصادرة إنه "أسود وبالتالي غريب الجنس"!!

مين بقى اللي دافع عن حق العبيد؟ مين اللي سعى عشان تجارة العبيد تتلغي؟

ناس كتير منهم راجل مشهور قوي اسمه ويليام ويلبيرفورس..عنده كل حاجة يتمناها.. درس في كيمبردج.. عضو في البرلمان الإنجليزي..يعني ببساطة ممكن أي حد مكانه ولا يعبّر "الناس السود" دي!

الراجل ده سعى بكل طريقة ممكنة سواء في البرلمان أو في جمعيات كونها هو وأصحابه وناس أقنعهم بالقضية وفضل أكتر من 40 سنة يناضل عشان الهدف اللي بيه كان شايف إن الله سبحانه خلق كل البشر متساويين.

لاحظ إن  إلغاء تجارة العبيد في امبراطورية زي إنجلترا بالتأكيد اتسببت في خساير اقتصادية كتير وتغييرات مش في الحسبان ولخبطة عند ناس مختلفة..لكن الحق حلو..العدل رائع..وعشان كده مكلف!

لو عندك فرصة اتفرّج على فيلم Amazing Grace اللي بيحكي القصة بالتفصيل.. وشوف قد إيه ممكن حد يدافع عن حقوق غيره حتى لو مختلفين عنه..

وتعالى أنا وانت نتمنى ونحلم باليوم اللي يكون فيه راجل بيدافع عن حقوق الستات..وشاب بيتكلم عن الظلم الواقع على كبار السن..وناس متجوزين بيدافعوا عن حرية اختيار سن الجواز..عزّاب بيتكلموا عن حقوق المطلقات..معتنقي ديانات بيدافعوا عن حق معتنقي الديانات التانية في حرية العبادة...

باحلم باليوم اللي فيه أقدر أقف ضد ظلم موجَّه لناس مش من نفس عيلتي أو بلدي أو ديانتي أو ميولي أو مجال شغلي..

وأطالب بحقوق ناس ممكن يكونوا مختلفين معايا في كل حاجة ماعدا إنهم بني آدمين.

وأدافع عن ناس بيُعاملوا النهاردة زي العبيد..وأشوف فيهم إخواتي وقرايبي وناس زيي بالظبط....زي العبد لله!

..... الست السمرا المسيحية اللي بتعرج

يعني إية تمييز؟ معناه إيه أنك تضطهد حد؟ وإيه ممكن تكون الأسباب؟

من وجهة نظري بأشوف إن التمييز مش هو إني أتعامل مختلف مع الآخر ومش هو إني أكره حد أو ما احبش حد لأنه مختلف عني..التمييز بيبتدي –في وجهة نظري- قبل كده بشويتين تلاتة..

عارفين بيبتدي امتى؟

بيبتدي من تصنيفي للآخر..فكر كده فيها؟

أنا لما بافترض إني بانتمي للمجموعة الأصلية -أيا كانت المجموعة دي- زي مثلا الرجالة أو الأهلاوية أو الشباب أو القاهريين أو أو أو..بافترض إن اللي برة المجموعة دي هو الآخر..ممكن طبعا بعد الافتراض ده أتعامل كويس مع الناس دي..لكن المشكلة في التصنيف من أساسه..لأني حتى لو اتعاملت كويس مع اللي أنا فاكرهم مختلفين عني باعمل كده من منطلق إني أنا اللي كويس وإني باقبل الآخر –رغم إني عندي اختيار إني ماقبلهومش- لكن لأني إنسان كويس أو معتقداتي بتقوللي أقبل كل الناس فأنا مضطر أقبلهم...

المصيبة في التقسيمة..مش في اللي بعد كده..اللي بعد كده ممكن يكون ممارسات وحشة أو كويسة لكن الفكرة في الدوافع اللي قبل كده...

تعالوا ناخد مثال: هل فيه في بلدك تمييز ضد الستات؟ أو المنتمين لديانة معينة؟ أو اللي ساكنين في أماكن معينة؟ متهيألي ناس كتير ممكن تقول إنه فيه..صح؟

طب هل فيه تمييز ضد الطوال أو القصيرين؟ أو الرجالة اللي بشنب أو من غير؟ ليه مبتسم دلوقتي؟ فهمت الفكرة؟

الفكرة إنك غالبا هتلاقي تمييز لو لقيت تقسيم...لكن لإنك عمرك ما قسمت الناس لقرع وبشعر أو لناس بتحب البني و ناس الأزرق أو لنباتيين أو غيره بتلاقي إن فكرة التمييز على أساس الحاجات دي تكاد تكون ساذجة أو غير واردة...

جايز وانت بتقرا المقال ده تكون هتموت وتعرف الكاتب مسلم وللا مسيحي وللا يهودي وللا لا ديني..ممكن تكون عايز تعرف يا ترى راجل وللا ست.. تمييز؟؟ ها؟ أعتقد كده

يمكن ما يفرقش معاك سنه كام أو بيشجع نادي إيه...

نفسك تعرف لو بتميز ضد ناس معينة وللا لأ؟ فكر في الأسئلة دي:

-لو هتوصف حد لواحد صاحبك هتقوله إيه؟ < الراجل جارنا المسيحي ده > (واخد بالك؟ انت بتوصف بس..انت مارحتش قلتله انت كافر..)

-بتستخدم كلمات زي: بس – حتى – لكن...إزاي؟ < فيه واحد معايا في الشغل مسلم بس متفتح...>

-النكت والهزار رايح لفين...؟

المهم..شكرا على القراية..أحب أوضح إن الفكرة هي في التقسيم..لو بتقسم الناس لعمي ومفتحين أضمنلك إنك عايش في ثقافة فيها تمييز لفئة من الاتنين..وغالبا المشاكل بيحس بيها الأقل عددا أو اللي صوته مش بيوصل...

ستات؟ أطفال؟ رجالة؟ مسلمين؟ مسيحيين؟ شيعة؟ صعايدة؟ دكاترة؟ ذوي احتياجات خاصة؟ فقرا؟ أغنيا؟

مين الآخر؟؟؟؟

لما اتخلقت..انت اتخلقت مميز جدا..ماتسمحش لحد إنه يحدك في مجموعة ويقوللك إن المجموعة دي هي انت وإن اللي مش من المجموعة دي آخر محتاج يا إما تكرهه أو تتعامل معاه كويس..

المرة الجاية لما تحتاج توصف حد جرب تستخدم أوصاف زي: فلان المبتسم..أو فلانة اللي ساعدتنا امبارح...جارنا البشوش..قريبتنا اللي جابتلنا طقم الكوبيات...يمكن ده يكون أحسن شوية من ..... الست السمرا المسيحية اللي بتعرج...