الشكر لله

النهاردة الخميس الرابع في شهر نوفمبر معاد احتفال الولايات المتحدة بعيد الشكر.. واليوم ده المفروض إنه شكر على الحصاد والبركات اللي في السنة اللي عدت.. ناس كتير بتنتهز الفرصة دي وبتعبر عن مدى امتنانها لله على عطاياه وبركاته..

من ضمن الحاجات اللي بتشكل ثقافات الشعوب نظرتهم "للشكر".. فلو نلاحظ إحنا من الشعوب القليلة اللي بتاخد وقت طويل تشكر فيه الناس في الاحتفالات والمؤتمرات وعلى صفحات الجرايد.. يعني يبقى رئيس وزرا مبهدل الدنيا أو رئيس جمهورية هيتسجن أو وزير هيتطرد لكن تلاقي برضه "نتقدم بالشكر لفلان الفلاني لما قدمه للوطن"..

ومع كده رد فعلنا ناحية الشكر الشخصي بيبقى غريب شوية..

جرّب كده تشكر أي حد.. تلاقي الرد: "لا شكر على واجب".. أو"العفو" يعني ماتشكرنيش.. أو "هو أنا عملت إيه؟" أو "على إيه؟" أو "الشكر لله".. والإجابات دي بتتراوح مابين فكرة: "ماتشكرش" أو "أنا ماعملتش حاجة تستاهل أتشكر عليها" أو "ماتشكرنيش أنا اشكر ربنا"

واللي بيحصل إننا بقينا متعوّدين على جمل "يابني ده انت تشكر ربنا إنها جت على كده".. ودايما الجمل دي بتبقى عن مصيبة نص نص.. أو كارثة مش مميتة.. أو إعاقة بسيطة..

واللخبطة دي بتخليني ساعات مش عارف أشكر ربنا سبحانه على نعمه ورحمته وعطاياه..

الأطفال الصغيرين اللي بيبقوا مش عايزين يكملوا أكلهم بيتقاللهم إيه؟.. "يا ابني ده فيه ناس في الصومال مش لاقية الأكل ده".. وطبعا لسان حال الواد "طب ماتبعتولهم الأكل ده.. أنا مش عايز آكل خلاص!" ولأننا سمعنا ده كتير بقى عندنا إحساس بالذنب guilt  أكتر مابقى عندنا الإحساس بالامتنانgratitude ..إحساس بالذنب ناحية الناس اللي فقدت قرايبهم.. ذنب ناحية الناس اللي مش لاقية شغل أو أكل أو سكن..

لكن الرائع في ربنا سبحانه إنه بيقبل شكرنا.. بيشوف في شكرنا ليه امتنان وإحساس بخيره.. بيقدّر كل كلمة شكر وعرفان..

أشكرك يا رب على نعمك ورعايتك وعنايتك.. أشكرك على عطاياك المتجددة كل يوم.. أشكرك على اهتمامك بأدق تفاصيل حياتي وعيلتي وبلدي.. أشكرك إنك متحكم في كل الأمور الكبيرة والصغيرة.. أشكرك إن عندك بركات كتير ليّ ولبلدي..

أشكرك على الصحة والأصحاب والشغل.. أشكرك على الأمل.. أشكرك على الحياة.. أشكرك على امبارح والنهاردة ,أشكرك على بكرة اللي برضه هيكون مليان خير ورحمة وبركة..

 

أشكرك إني عارف أشكرك.. وأشكرك إنك بتقبل شكري...:)

الفايز الحقيقي

وقت إعلان الحاصلين على جايزة نوبل بيبقى دايما وقت ممَيّز مش بس للمرشحين لكن لعائلاتهم وبلادهم...بلاد كتير بتفتخر على غيرها بعدد الحاصلين على جوايز نوبل فيها..

وطبعا فيه معلومات طريفة كتير متعلقة بالجايزة..يعني مثلا واحد من الناس اللي فيه شبه إجماع إنه كان يستحق الجايزة على الرغم إنه ما أخدهاش كان غاندي..اترشح 5 مرات لنوبل في السلام لكن مافازش..وتم اغتياله يومين قبل ترشيحات سنة 1948 ومعروف إن ماينفعش في نوبل ترشيح حد بعد وفاته..السنة دي اللجنة اختارت إنها تحجب الجايزة وقالوا في الأسباب: إنه مافيش مرشح مناسب على قيد الحياة!

مواقف كتير كانت محرجة..يعني مثلا سنة 1926 جايزة نوبل في الطب كانت لجوهانز فيبيجر لاكتشافه إن فيه "طفيليات" سببت أورام سرطانية لفيران المعامل!..وطبعا الكشف ده إدّى انطباع إن علاج السرطان على الأبواب!

لكن الأعجب من كده كان إزاي الموضوع كله ابتدا..

ألفريد نوبل كان اخترع الديناميت ..ووقت وفاة أخوه فوجئ بجورنال فرنساوي بينشر نعي لأخوه (لكن واضح إن اللي نشره اتلخبط بين الأخ وألفريد) وكان العنوان "موت تاجر الموت"!

وقتها قرر إنه مش عايز تكون ذكراه في التاريخ بالشكل ده ..وكتب وصية بخصوص جوايز نوبل "للناس اللي بتقدم أكبر فايدة للإنسانية في السنة اللي قبل الترشيح"..

 ومات ألفريد نوبل..وطبعا قرايبه فُوجئوا وقت سماعهم للوصية..حتى الجهات اللي أَوكَل نوبل ليها إنها تشرف على تسليم الجوايز ماكانوش عارفين أي حاجة عن الفكرة قبل قراية الوصية..وعشان كده الموضوع أخد وقت لغاية ما بدأت الجوايز فعلا تتقدم (خمس سنين كاملة بعد وفاته!)

الراجل ده "اختار" إنه يغير مصيره..

الراجل ده اختار إن ذكراه يكون الناس فيها بتتناقش في مين أكتر حد خدم الإنسانية..

من تدمير وموت...لخير وتقدّم..

الراجل ده قرر إنه يغير حياته (أو يمكن ذكراه) 180 درجة..

أنا وانت في إيدينا نعمل كده..

مش مضطرين نفضل أسرى لاختيارات غلط عملناها قبل كده..مش مضطرين نقضي باقي حياتنا نندم ونبكي ونقول ياريت!

نقدر نختار مصير أحسن..

لو واقع في إدمان..لو مش قادرة تلاقي هدف تعيشيله..لو كاره الناس..لو شاعرة بفشل..لو أحلامك مش بتتحقق..لو شايف دمار في كل حاجة حواليك..

لسة تقدر تختار الخير والجمال والحق..

نقدر نختار التقدم والفرح والتفاؤل..

دمار ويأس وألم وبكا...ممكن يتحولوا لتنافس جميل على جايزة للي خدموا الإنسانية...تخيّل؟

مش هي دي قصة كل إنسان؟

إنسان بيختار يفضل في الدمار..وحد تاني بيلجأ لربنا سبحانه..وحده يقدر يحوّل كل دمار وألم وشر لخير وجمال وتقدم..

اللي فاز بنوبل اجتهد وكان مخلص.. لكن نوبل نفسه بذل مجهود رهيب عشان يصدّق إن ممكن "خير" يخرج من "ديناميت"..ممكن "تاجر الموت" يبقى "مصدر أمل"!

أقدر بثقة أقول إن اللي فازوا بنوبل كتير..لكن نوبل نفسه كان هو الفايز الحقيقي!

النجم شخصيا؟

مفهومنا عن النجومية مفهوم غريب شوية..وأقصد بغريب إنه مالوش معايير قياسية (حلوة الحتة دي) تُحكم على مدي نجومية واحد من عدمها..

فيه نُجوم فُقرا ونجوم أغنيا..بيفيدوا مجتمعاتهم بطريقة مباشرة أو غير مباشرة..بيعملوا شغلانات صعبة أو سهلة..شكلهم حلو أو لأ..مافيش حاجة محددة..

وزي ما النجومية كان بيُعبَر عنها قبل كده في العلماء والمخترعين والمفكرين وزاد عليهم الممثلين والمغنيين ولعيبة الكورة..بدأت دلوقتي صورة مختلفة من النجومية تتضاف على النجوم دول..

وبنسمع كتير جُمل زي: "عارف مين عمللي  follow النهاردة على تويتر؟"..مصحوبة غالبا باسم نجم من النجوم كان حظ صاحبنا حلو إنه يقع عليه الاختيار في إن حد مشهور ومعروف وناس كتير بتتابعه وتقراله على تويتر يكون شخصيا بيتابعه..

من أسبوع بالظبط قابلت واحدة من الراهبات اللي كانوا بيدَرّسُونا ويشرفوا علينا في المدرسة..أنا سبت المدرسة دي من أكتر من 21 سنة! واستغربت إني أشوف الراهبة دي وإنها تقف وتسلم علىّ وتفتكرني بالاسم وتسأل عني وعن إخواتي بالاسم..

أنا عارف إن ده تحدّي صعب.. خصوصا لما الطبيعة تكون مش بتساعد إنك تفضل محتفظ بشكلك اللي كنت عليه وانت 10 سنين! :)  خضار العينين بيغمق طبعا :).. واللون الأصفر للشعر بيروح (في حالتي الشعر نفسه كمان بيروح) وهكذا! :) :) ..لكن افتكرتني..

إحساس رهيب إن النجم يفتكرك..إن حد مشهور يعرفك..إن واحد مهم يشجعك..

بس اللي كمان اكتشفته إن أنا وانت نجوم..نجوم لناس تانية..نجوم في أماكن تانية..ناس كتير بتحكّي وتقول: "عارف مين عمللي  follow النهاردة على تويتر؟" وبيبقى السؤال دي مصحوب باسمك انت!

في حياتك ناس بتبصلك على إنك عالي ومشهور..نجم..

يمكن الناس اللي بتقدملك خدمات؟ يعني مثلا سواق التاكسي أو الميكروباص؟يمكن بنت أخوكي؟ أخوك الصغير؟

الطلبة بتوعك؟ فريق العمل اللي انت بتديره في الشغل؟ حارس العمارة اللي ساكنين فيها؟

ممثل خدمة العملا على التيليفون؟ طيار الديليفري؟ المضيفة في الطيارة؟ السباك والكهربائي اللي بيصلحلك أو يركبلك حاجة؟

كل دول ناس شايفينني نجم! تخيل؟ كل دول شايفين فيك حد مهم..حد بيفهم..حد يتمنوا رضاه في معظم الأوقات!

الإحساس اللي كان عندي لما الراهبة دي سلمت بحرارة..والإحساس اللي عندك لما حد مهم عمللك follow  شبه جدا الإحساس اللي عند حارس العمارة لما بتقول له: "صباحك فل..بأتبسط لما أشوفك الصبح.." (تخيل رد فعله طول اليوم)..

أو لو عزمت على اللي بيجيبلك طلبات على القهوة إنه يقعد معاك انت وأصحابك وتعزمه على شاي بالنعناع..

أو لو امتدحت ممثل خدمة العملا على ذوقه أو سرعة الخدمة..أو لو لعبت مع بنت أختك لمدة ساعة..أو لو قلت جملة حقيقية من قلبك تعرّف فيه عامل في المطعم إنك بتيجي المطعم ده بالذات عشان الخدمة الممتازة..

في إيديك تخللي يوم حد تاني من أجمل الأيام..

 

ناس كتير شايفاك نجم!

دوّر على ال fans  بتوعك.. ابتسامة أو تعليق حلو أو كلمة تشجيع ممكن تقلب كيان بني آدم خصوصا لو جاية من قلبك يا...يا نجم! :)

الحمد لله إني غني!....

مش عارف كنت هاعيش إزاي لو مش غني..

استنى..اقرا للآخر

شوية حاجات في حياتنا ببلاش..ببلاش فعلا..لكن أتحداك لو تقوللي الحاجات دي مش بتفرق معاك..مش بتأثر فيك..

أيوة الغالي تمنه فيه..بس فيه حاجات ماتتقدرش بتمن....صح؟ .. بص معايا ع الحاجات دي..

الابتسامة..سحر فعلا..إيه اللي يخللي خط منحني يعمل كل التأثير ده؟

كلمة حلوة..إزاي كلمة واحدة ترفع ناس للسما وكلمة تانية تنزل لسابع أرض؟ وحشتني..كل سنة وانت طيب..انت غالي عليّ..انتي شاطرة قوي..أنا باحبك...فخورة بيكي..هنفضل أصحاب على طول..ما فيش غيرك هيفهمني..

شوية مزيكا..غنوة قديمة؟ موسيقا لعمر خيرت؟ مقدمة مسلسل ليه ذكريات حلوة عندك؟..تقدر تقاوم؟

رسمة بسيطة...ألوان متناسقة...خطوط عفوية..ممكن تغير مزاجك بالكامل

زرعة جديدة بتكبر في بيتك..

حضن صاحبك..بوسة من مامتك..اسم دلعك على لسان أختك..

لمّة عيلة أيام أعياد..رمية ابنك في حضنك..

تمشية مع ناس بتحبها..

رنة تليفون مستنيها...

كتاب قديم عزيز عليك..

أنا وانت شكلنا أغنيا قوي..أغنيا أغنيا يعني..عندي كتير يبسطني..وعندك كتير تبسط بيه اللي حواليك

...تدفع كام؟