الفكرة في الفكرة

الصورة دي لهدية من أكتر الهدايا المفيدة اللي جاتلي.. زي ما شايفين في الصورة الهدية عبارة عن ستاند على شكل مناخير عشان أحط عليه النضّارة بدل ما أركنها في أي حتة.. وطبعا الموضوع بقى أسهل وما باقيتش أقلق أنسى سِبت النضّارة فين..

فكرة عبقرية.. ما فيهاش أي تكلفة بحث أو تكنولوجيا متطورة أو تقنية معقدة.. مش محتاجة مصاريف ومباني ولجان وقرارات..

وفي حاجات واختراعات ووظايف كتير بتكون كل الحكاية في فكرة جديدة.. اللي بيشتغلوا في الإعلانات والأخبار والتأليف والمزّيكا ومعظم إن ماكانش كل المجالات طول الوقت بيدوّروا على فكرة.. يمكن يلاقوا ناس كتير عندهم استعداد لبذل مجهود.. أو ناس أمينة في الشغل.. أو ناس عندها مهارة عالية.. لكن اللي ما يتقدرش بتمن عادة بيكون "فكرة".. وغالبا بتكون فكرة بسيطة لكن تأثيرها كبير..

على مستوى العالم فيه بحث مستمر على فكرة جديدة.. وإذا كان على الفلوس ففيه شركات وأفراد على استعداد إنهم يدفعوا أي مقابل مادّي في سبيل الحصول على فكرة عبقرية جديدة..حوالينا في كل حتة فكرة جديدة يوميا.. مش شرط تكون فكرة جديدة لمنتج.. لكن ممكن تكون فكرة جديدة في كلام أغنية أو صورة إعلان.. وعلى قد ما بندرّب عقولنا إننا "نُلقط" الأفكار الجديدة ويبقى عندنا حساسية أكتر لاستقبال "الإبداع" في البساطة على قد ما القدرة على إبداع أفكار جديدة بيتطوّر عندنا..

الفكرة مش بس في المجهود.. الحكاية مش حكاية حظ أو مثابرة أو تعب أو فلوس.. القصة مش بس تكنولوجيا معقدة وبحث ممكن يستمر سنين.. ساعات الموضوع بيبقى أبسط لكن عميق في نفس الوقت.. ساعات ببساطة بتكون الفكرة في الفكرة..

أنا اللي لقيتها

من ضمن الحاجات اللي بتبان سهلة من بعيد لكن في منتهى الصعوبة وإحنا جواها: الجواز وتربية العيال.. معظمنا عندنا عين ثاقبة ناقدة نقدر بيها نشوف قرايبنا وهم بيزعقوا في عيالهم وننتقدهم.. نسترجع ذكريات مع والدينا ونحس إنهم كانوا المفروض مايعملوش كذا.. أو كان أحسن لو عملوا كذا..

اللي في الموقف نفسه رأيه غالبا مختلف.. في التربية بالذات العيال مرات كتير فعلا بتطلّع عين الأب والأم.. وعلى الرغم إن "الغلاسة" هي مهارة مش متوفرة عند كل الأطفال بنفس الدرجة إلا إن معظمهم عنده استعداد :).. العيل الرزل بيبقى فعلا رزل! وساعات بيستخدم فكرة إنه "طفل" كسلاح يتيح ليه إنه يمارس الغلاسة ويعيّط لو حد زعّق فيه وخلاص.. :)

وعلى الرغم إن الوضع الأسري بيختلف من بيت للتاني إلا إن فيه حاجة في البرمجة بتاعة الغلاسة في الأطفال بتبقى default فيهم كلهم.. لو دورنا هنلاقي معظم الأطفال بيعملوا مسابقة مين يخلص قزازة الكوكاكولا أسرع.. وطبعا اللي يخلص أسرع ويعلن فوزه يفاجئ بأخوه اللي لسّة ماخلصش (غالبا بيبقى الأخ الأكبر) بيغيظه بإنه "لسّة بيستمتع بيها"..:)

"لعب باللعبة بتاعتي من غير ما يستأذن".. "كسرت العروسة.. وماليش دعوة عايزة العروسة تبقى سليمة تاني".. وغيرها من الخناقات الكلاسيكية اللي فقدت أي عنصر مفاجأة أو إبهار للأب أو الأم المحنكين..

لكن تيجي أكتر المواقف استفزازا والأكثر حدوثا وهي "أنا اللي لقيته".. حاجة لقاها واحد من الأطفال.. الحاجة بتاعة أخوه لكن ضايعة بقالها وقت وهو اللي لقاها..

دي بتاعتي على فكرة

بتاعتك ده إيه؟ أنا اللي لقيتها

إنت لقيتها بس هي بتاعتي أصلا.. بابا جابهالي في عيد ميلادي اللي فات

آه.. بس دي كانت تحت السرير وإنت مادورتش عليها.. وأنا اللي لقيتها..

ماحدش طلب منك تدور عليها

وتستمر الخناقة لحد ما الأب يزعق أو الأم تاخد الحاجة..

السخيف إن الطفلين كل واحد منهم عنده منطق..صاحب اللعبة منطقه ببساطة إنه صاحب اللعبة...واللي لقاها بذل مجهود على الرغم إن أخوه كان سايب اللعبة ضايعة وقت طويل.. حتى في الثقافات الأخرى يغيظوا بعض بجملة: Finders keepers, losers weepers. بمعنى اللي يلاقي حاجة تبقى بتاعته واللي تضيع منه حاجة يقعد يعيّط!

في العالم اللي حوالينا "أنا اللي لقيتها" هي فكرة حاصلة يوميا.. وليها مبررها ومنطقها.. سواء وافقنا أو لأ.. ينفع تحكيلي من هنا لبكرة عن إن المصريين القدماء كانوا أول من فهم الطب والفلك.. استخدموا الكتابة وفهموا الهندسة.. لكن هل المعلومة دي تفرق النهاردة؟ أي عالم تاني لو "لقى المعلومة" وطورها وكمل عليها وشرّف بلده باكتشاف جديد النهاردة.. هل هقولّه على فكرة المصريين القدماء هم أول ناس فكروا في الفكرة؟

أول واحد حاول الطيران أو أول كاتب هاجم النظام القديم.. أول مدون.. أو أول واحد ضيفته على فيسبوك.. كلها قد تكون إنجازات.. لكنها لا تتعدى إنجاز إنك "أول" واحد عمل كده.. ده مش معناه إنك لا زلت الأكفأ النهاردة.. مش معناه إنك "أكتر" واحد بتفهم في الطيران أو السياسة..

"أنا اللي لقيتها" هتفضل معضلة.. هتفضل دول "متغاظة" من دول "سبقتها" في الوصول للقمر.. لكن الركّ النهاردة على مين يقدر يعمل إيه.. مش مين أول واحد عمل إيه..

الكاتب والباحث والطبيب والمهندس والسياسي اللي توصلوا لأفكار وابتكارات سبقت عصرهم ممكن ببساطة يخسروا كتير لو اكتفوا بكونهم "أول ناس" فكروا وعبروا عن إبداعاتهم.. لما ببساطة ييجي حد غيرهم يطوّر ويحدّث ويبني على فكرهم..

لو معتقدي الديني هو أول من ساوى بين البني آدمين.. لو أسرتي هي أول أسرة عارضت نظام مستبد.. لو بلدي هي أول بلد طلعت القمر.. كل ده رائع.. الأروع هو أنا فين دلوقت؟ هل لازلت بأتغنّى بإني كنت أول واحد؟ وسبت حد تاني ييجي وياخد الفكرة ويطورها ويجتهد للوصول للأحسن؟

محاسن الصُدف

بنسمع كتير عن صُدفة أدت لاكتشاف حاجة جديدة أو لاختراع مفيد.. أو حاجة كانت بتستخدم لغرض معين وبعدين استفادوا بيها في حاجة تاني..

من الحاجات اللي معظمنا يعرفها هي إن كريستوفر كولومبوس ماكانش رايح يكتشف أميريكا.. وإن كوكاكولا ماكانتش أصلا مخترعة كمشروب لكن كعلاج.. اللي عمل كوكاكولا كان جون بيمبيرتون (صيدلي من أتلانتا) وكان بيحاول يوصل لتركيبة لعلاج إدمانه للمورفين بعد إصابته!..

حاجات كتير زي الساكارين (بديل السكر) والتراب الذكي والبلاستيك والنشاط الإشعاعي ومنظم ضربات القلب.. كلها حاجات اتعملت أو اكتشفت "بالصدفة" لكن مش أي صدفة.. صدفة جاية لواحد "مستعد" للصُدف!

 

النصيحة اللي قدمها لُوِي باستور (اللي برضه اكتشف شوية حاجات كدة بما يشابه الصدفة) قال فيها: "الفرصة بتيجي في صف العقل المستعد"..

العالِم اللي شغّال ليل نهار في معمله والباحث اللي طول الوقت بيدوّر ويبذل مجهود هيكون من السهل إنهم "يتخبطوا" بالصدفة في حاجة تغيّر العالم.. الثائر اللي هَمُّه مصلحة بلده وبيقرا ويبحث ويدوّر لخيرها هو اللي ممكن "حظّه" يقوده لاستنارة جديدة بيها يغيّر تاريخ شعب كامل!

أنا نِفسي أبقى على طول مستعد.. على طول باجتهد للأفضل.. سواء في شغلي أو مع عيلتي أو بلدي أو علاقاتي.. اجتهادي هو اللي ممكن "يقنع" الفرصة إنها تجيلي..

أنا مستعد إنه "في يوم وليلة" ممكن مستقبلي يتغيّر بسبب "صدفة حلوة".. لكن في الغالب دي هاييجي بعد "أيام وليالي" من مجهود وتعب وجد..

مش كل الصدف جميلة.. لكن الصدفة اللي جاية لواحد مجتهد بتبقى من محاسن الصدف!

ليه لأ؟

مشوار النضوج مشوار طويل.. ومش دايما سهل..بس حلو..ممتع..قد إيه بتكون فرحة الأب لما يشوف ابنه بيكبر قدامه.. وبيعرف يعمل حاجات أكتر من السنة اللي فاتت.. وبيتكلم كلام أعمق من قبل كدة...فرحة الأب والأم مش لأن الابن كبير لكن لأنه كبر..يعني مشي مشوار النضوج...

ومع وجود بعض الشبه مع الطفل اللي بيكبر..إلا إن فكرة إني أنضج أو لأ هي أولا وأخيرا اختياري...هاكبر وأعجّز غصب عني..لكن مش شرط أنضج...

المشوار ده محتاج كتير..محتاج مجهود ووقت..ويمكن شوية إحباطات ولخبطة..وشوية خطوات كبيرة..ومرات خطوات صغيرة قوي..كل ده يهون..لو أنا على السكة الصح...الممتع في مشوار النضوج إنه مشوار مش بيخلص..مشوار مالوش نهاية...مش هالاقي كده وأنا ماشي فيه أي يافطة تقوللي باقي كام كتاب أقراه عشان أنضج..ماحدش هيقوللي كده فاضللك 4 مواقف صعبة وموقف نجاح وتبقى وصلت...

المشوار ده ممكن أبدأه في أي وقت..لكن كل ما أبدأه بدري كل ما كان عندي فرصة أكبر للاستمتاع...

نفسي أشاركك وأفكر نفسي النهاردة بإن خطوة من الخطوات اللي ممكن تساعدني على طريق النضج هي حاجة ليها علاقة بكلمات: طبعا..أكيد..أمّال إيه؟

الكلمات دي بتوريني عدد من المسلمات الموجودة في ذهني.. والمسلمات دي ممكن تكون بتشدني بعيد عن سكة النضوج والإبداع...

الطفل اللي عنده 3 أو 4 سنين وفاكر إن السكّينة حاجة وحشة..لازم لما يكبر يبدأ يفهم إن السكّينة في حد ذاتها مش وحشة ولا حلوة...

عايز تعرف انت على سكة النضوج وللا لأ؟ فكر في عدد المسلمات اللي مش ممكن تتناقش فيها!

الكبيرة لازم تتجوز قبل الصغيرة..ماينفعش يروح البيت بعد الساعة 12..طبعا لازم تدخل الجامعة..وغيرها كتير من الجمل اللي ممكن نختلف أو نتفق فيها..

تخيل لو اللي فكر في استخدام الورق في الكتابة كان قال: أكيد ماينفعش نكتب غير على الجلود! تخيل لو حد كان قال: غسالة تغسل آه... لكن تنشف؟ إزاي؟ هيطلع يعني منها حبل وتنشر الغسيل لوحدها؟ أكيد مش هينفع!

كل الابتكارات بدأت بجملة: ليه لأ؟

وأنا وانت ممكن نوصل لأعماق فكرية جميلة وعلاقات شخصية مثمرة وابتكارات واختراعات متميزة لو قلنا ليه لأ؟ بلدي وبيتي وصداقاتي وشغلي وصحتي وسعادتي ممكن يتغيروا للأحسن..لو عندي استعداد أعيد التفكير في حاجات كنت فاكر إني ماينفعش أقرب منها..

أنا ناوي أمشي سكة النضوج وهكمل أسمع وأقرا وأتناقش في الأفكار اللي هقابلها...أنا عارف إن مافيش محطة وصول..بس على الأقل هكون راكب القطر الصح..

ليه لأ؟