حصاني الجديد

كنت في نقاش هايل النهاردة مع مجموعة كبيرة من الناس وافتكرت المقولة دي...المقولة دي هي حكمة لمجموعة هنود داكوتا وبيمرروها من جيل للتاني وبتقول: ترجّل عن حصانك الميت! لقيت المقولة دي بتنطبق بشكل كبير على معظم إن ماكانش كل جوانب حياتي وحياتك...

في حياتي طرق وسكك وأساليب استعملتها واتعودت عليها لوقت طويل..الطرق دي ممكن تكون أدت الغرض في وقت وظروف معينة..لكن دلوقتي ممكن الطرق دي تكون حصان ميت...

ناس كتير ممكن تتعامل مع الحصان الميت بطرق مختلفة هاقتبس بعضها من مقالة ممكن تحب تتطلع عليها:

1-      نقول الحصان لاهو ميت ولا حاجة

2-      نجيب لجنة تبحث طرق التعامل مع الحصان الميت

3-      نضرب الحصان أكتر

4-      نشتكي من اللي كان بيركب الحصان قبل كده

5-      نجمع شوية أحصنة ميتين كتير يمكن يشجعوا بعض ويمشوا أسرع

6-      نعيد تعريف الموت..يمكن الحصان مش ميت قوي

7-      نحط أكل أكتر للحصان

8-      نقلل المسافة المطلوبة إن الحصان يمشي بينا

9-      نعمل ندوات عشان نتصرف مع الحصان

10-   نلوم الحصان

11-   نلوم الناس اللي حوالينا اللي سابت الحصان يموت

12-   نعمل مسابقة نختار بيها ناس جديدة هي اللي تسوق

13-   ننكر إن فيه مشكلة ونقول احنا طول عمرنا بالحصان ده بالشكل ده

14-   نزور أماكن تانية عشان ناخد خبرتهم في إزاي بيسوقوا الأحصنة الميتة

15-   نعين لجنة تحاول تفوق أو تعالج الحصان

16-   نقارن نفسنا بناس ماعندهاش أحصنة من أساسه ونكتشف إننا أحسن من غيرنا

17-   نعلن إن بصراحة وضعنا أحسن والحصان ميت..

أو جايز يكون جه الوقت إني أنزل من على الحصان الميت!

كلنا عندنا أحصنة ميتة...طرق استخدمناها زمان في مدارسنا ومساجدنا وكنايسنا وبيوتنا...طرق مذاكرة أو شغل...أساليب ضغط سياسية...والطرق دي أثبتت بالوقت إنها إما مش كفاية أو مش فعالة أو مش جايبة النتايج اللي اتعودنا عليها..

وعندي اختيارين: ممكن أحارب في إني أحاول أثبت إن طريقتي هي الصح..أو أفكر في طرق تانية تحققلي نفس أهدافي حتى لو هاستغنى عن طريقة ماتت...

ممكن طريقة الثواب والعقاب اللي كانت بتنفع مع ولادك من سنين تكون حصان مات...ياترى هتقضي وقت تشرحلهم قد إيه طريقتك كويسة؟

ممكن الاعتصام في سبيل تحقيق هدف سياسي يكون حصان مات...يا ترى هأفضل أحكي للناس قد إيه أنا كويس؟ وللا أفكر في حاجة تانية تجيب نتايج؟

ممكن طرق مذاكرتك القديمة تكون حصان مات...هتفضل متمسك بيها لمجرد إنها نفعت في تالتة ابتدائي؟

أنا مش عايز أكون باحاول أستخدم نفس الحصان لمجرد إني مكسوف إني أعلن إنه مات..أنا الوحيد اللي هاخسر..

الأفضل إني أنزل وأكمل المشوار في السكة الصح... وأكمل مشي..أو جري..أو على حصان جديد...