مجهود كبير وطاقة رهيبة بنبذلها في حياتنا
عشان "نعمل الصح".. وقت كتير بنقضيه يا إما بنحاول نعمل الصح يا إما
بنعلم ونربي حد تاني عشان يعمل الصح.. يا
إما بنتكلم عن الصح.. لكن جزء كبير من "عملان" الصح ده جواه
"الخطأ".. عنصر الإخفاق موجود.. الفشل في الوصول لأصح حاجة طول الوقت
حاجة موجودة حوالينا..
لكن هل مجتمعنا بيقدملنا طريقة للتعامل مع
الغلط؟
هل أسرنا علمتنا لو عملنا غلط نعمل إيه؟
ثقافتنا عظيمة ومليانة عمق في نواحي كتير..
لكن تيجي عند فكرة "الاعتذار" وحاسب قوي.. وعلى قد ما احنا
"حافظين" المُثُل والقيم.. وعلى قد ما احنا ممكن "نوعظ" بعض
للصبح لكن تيجي جزئية إني أغلط وأقول إني غلطت؟ لا لا لا.. إزاي؟!
الدليل؟
هو أنا لما بأعتذر عادة بأقول إيه؟
معلش يا سيدي ماتزعلش مني!
أنا غلطان يا سيدي!
لو اتضايقت مني أنا محقوقلك!
آيوة أنا زعقت لكن هو استفزني
وطبعا دي المرات اللي بنبقى فيها في منتهى
الجرأة والإحساس بالتواضع.. وبنلاحظ طبعا إن الجمل دي يا إما بتعبر عن إن الطرف
اللي قدامي هو اللي "قمّاص" (ما تزعلش) أو (لو اتضايقت مني) أو إني باحاول
"أغلوش" وأهزر وتدخل كلمة "يا سيدي" في كل جملة عشان قال إيه
"تلطف" الدنيا.. يا إما طبعا اللي قدامي هو اللي غاظني وخرّجني عن
شعوري!
ولو أنا أقل جرأة بأقول حاجات شبه:
انت أكيد فهمتني غلط..
أنا ماقصدش كده خالص..
الشيطان دخل بيننا وخلّاك تضايق (مظلوم
الشيطان في بعض المرّات!)
على مستوى الحكومات والسياسيين والمسئولين..
على مستوى المدرسين وساعات كتير الآباء ورجال الدين والرموز والفنانين امتى آخر
مرة شفنا حد بيعتذر؟ وساعات لما بنفتكر إن جهة رسمية اعتذرت تلاقيهم يطلعوا
يقولوا: لأ إحنا قلنا "نأسف" يعني "نشعر بالأسف والحزن" وده
مش معناه إننا غلطنا أو علينا أي مسئولية!
إمتى آخر مرة شفت والدك بيبوس على راس والدتك
وبيقولها: أنا غلطت في حقك فعلا! أنا آسف.. (مش: خلاص يا ستي! حقك علينا! عايزة
إيه نبوس راسك يعني؟)
من الحاجات الجميلة في الإنجليزي إنه من
المعروف إن لو هتذكر نفسك مع شخص تاني تبدأ بالشخص فتقول مثلا: My brother and I… وما ينفعش تقول I and my brother إلا في حالة واحدة.. لو بتقدم
اعتذار!
ياترى نقدر أنا وانت إننا نغير فكرة
"الاعتذار" في مجتمعنا حتى لو على نطاق ضيق؟ يمكن الكلمة نفسها بتصعب
علينا الموضوع لأن أصلها اللغوي معناه: "ذكر العذر" أو "ذكر
السبب"..
لما باعتذر أنا محتاج أقول: أنا غلطان إني
عملت كذا وكذا.. أنا آسف! من غير "بس" و"أصل"..
مايقللش من قيمتي إني أقول إني غلطت..
مايعيبنيش لما أعتذر..
من أعظم الكلمات كلمة آسف!
من أعظم الكلمات كلمة آسف!
اللي فينا ماعتذرش في حياته لسّة قدامه كتير!
عن خبرة شخصية تأكد امكانية الممارسة العملية أكترالأوقات تصالحا مع نفسى ومع الآخرين تأتينى بعد الاعتذار شعور بالسكينة ينتابنى مختلطا باحساس
ReplyDeleteبالرضى تأثيره سحرى أشجعكوا تجربوه لن تندموا
Joanna
رائعة كالعادة يا ماجد .. لكن للاسف برضه فى بعض الناس كلمة اسف عندهم بقت طبيعية جدا .. ممكن يقولوها فى كل وقت و لكل الناس و يرجعوا يعيدوا نفس الغلطات تانى .. الكلمة رائعه لكن الاجمل اننا نكون فعلا اسفين
ReplyDeleteالاهم من الكلمة إنك تبقى حاسسها والأجمل إنك تعتذر خوفا من إن حد إتضايق دون قصد
ReplyDeleteفي ناس دايما بتفكر نفسها وتراجع مواقفها عشان تعتذر عشانميذعلوش اللي بيحبوهم.
أظن المشكلة وحلها في قد إيه إحنا بنقدر علاقتنا بغيرنا.
بنحبه ونحترمه ومنستغناش عنه فعلا ولا.... يتحرق
بابا كان يقولي و أنا صغيرة
ReplyDeleteمش عايزة تعتذري ما تغلطيش من الاول
=D
STUNNING ya merged , that was missing point!
Yes ya Maged ,we need to learn that .
ReplyDeleteVery good and useful article .Thanks .
N
أحييك وأشكرك يا ماجد!..بس مش لوحدك المرة دي....لكل الناس الجميلة اللي علقت قبلي وكتبت كلام حقيقي كله صدق وإحساس،لكم أرق التحية ووافرالشكر
ReplyDeleteFantastic again, and I am sorry I don't have better words to express my appreciation.
ReplyDeleteرائع جدا جدا يا ماجد . من الأشياء الجميلة جدا فعلا ان الإنسان يعتذر لما يغلط لكن لما تعتذر كتير لشخص واحد لأنك بتغلط كتير في حقة أعتقد بعدها الإعتذار مش بيبقي لية معني .. لكن انا مش بحب حد يعتذرلي الا لو غلط غلطة شنيعة او كدة ف حقي . غير كدا بتضايق من نفسي لما حد يعتذرلي علي موقف بسيط مش مستاهل ...
ReplyDeleteحلو الاعتذار ..بحاول كثير واجتهد مع نفسى
ReplyDeleteعلشان اعتذر ..لكن فى النهايه بعتذر لما اكون غلطانه
ومعاك حق اللي فينا ماعتذرش في حياته لسّة قدامه كتير!
فية ناس مبتعرفش تنام لو غلطانة الا لما تروح للطرف التاني و بتعتذر كتير دي نوعية من الناس مش بيرتاح بالها ولا يجييها نوم الا بكدة و فية ناس "مرضي " بتعتبر اي تصرف غلط عملوة مش حاجة كبيرة "" مش"big deal " و بيمشوها بهزار و بسخافة ..
ReplyDeleteالمشكلة ان الناس بقت تاخد الاعتذار على انه انكسار ولو اعتذرت يبقى انا كدا قليت في نظر الناس، ودا بيخلي الناس مايقولوش "انا اسف" صراحةً وبيقولوا بدلا منه الكلام اللي انت ذكرته...مقال رائع وجميل كالعادة..أشكرك بشدة :)
ReplyDeleteاكثر من رائعة ، وما كتبته برقه وتسلسل منطقي يذكرني بتدوينة كنت كتبتها بهذا المعنى تحد عنوان "فيها إبه" .."http://elofouk.blogspot.com/2011/10/blog-post_12.html#more"
ReplyDeleteولكن مع فارق انك جعلت كلماتك تنتلق كالرصاص في اذن من يحاول ان يتعلم
اتمنا من الله ان تصل مثل هذه الطلقاتك الى كل من يعتقد انه فوق الخطأ لتحطم كبريائه
....وائل جلال
سعيدة إن فيه حد لسه بيفكر كده :)
ReplyDeleteملاحظة: السمك بتاعك كان جميل جدًا... بس كان هايجنني من كتر الحركة!
لو فكرت فى الموضوع من زاوية اخرى وبقدر كافى من الصدق وبعيدا عن الكبرياء والاحساس ابالذات من المحتمل انى اجد ان الشخص المنتظر الاعتذار هو نفسه المخطئ وكبرياؤه منعه من مجرد أمحاولة التفكير الخطأ مش بس بيكون بالكلام ممكن يكون بالتصرف ولازم افهم شخصية الانسان اللى بتعامل معاه علشان اعرف ان التصرف اللى ممكن يكون عادى بالنسبالى ممكن يكون جارح بالنسبة له يمكن يكون هو نفسه فى نفس الموقف ده بيتعامل بشكل مختلف مع الناس ممكن يكون كان محتاجلى وانا اهملته حتى لو عن غير قصد ممكن اكون تعاليت عليه ممكن اكون اهنته وجرحته علشان عاتبنى ممكن اكون قسيت عليه جدا وسببت له الم كبير اكبر من احتماله وبعد كده ظلمته كمان وقولتله انت لازم تعتذر وتعتذر بالشكل اللى يرضينى اعتقد ان ثقافة الناس اتغيرت مبقاش فى مشكلة انى اغلط واعتذر ولكن ممكن يكون عندى مشكلة فعلا انى اعتذر وانا مش غلطان
ReplyDeleteياريت نطبق الكلام دة على نفسنا قبل مانكتبة !!
ReplyDeletegameeeeeeeeeeeeeeeeeed gddddddddddddddn
ReplyDeleteممتاز كالمعتاد ما شاء الله
ReplyDelete