كلمة حلوة

مين أكتر حد بتحبه؟ مين أكتر ناس تتمنى تقضي معاهم وقت؟ مين لما تفتكره دايما تبتسم؟ مين من أصحابك بتجري عليه تشارك معاه الأخبار الحلوة؟ أو تشتكيله من حاجة مضايقاك؟

لو فكرنا في الأسئلة دي غالبا بييجي في بالنا ناس بعينها..يمكن جه في بالك أسماء أصحاب أو قرايب أو زمايل في الشغل.. عارف إيه اللي بيجمع الناس دي؟ في الغالب حاجة واحدة..

مش الحكمة...مش إنهم أكتر الناس تدين...مش الكوميديا...مش طول مدة الصداقة...مش وظيفتهم...

اللي بيجمعهم هو إنك لما بتقابل الناس دي بتحس بانطباع حلو عنك...آة عنك انت.. بتحس مع الناس دي إنك جميل ومحبوب..لما بيبقوا موجودين بتحس إن ليك قيمة...بتحس إنك مميز وحلو...

سهل جدا إن حد ينقللك إحساس إنك مش فاهم كويس...سهل قوي إن حد يفهّمك إنك مش حكيم..أو إن الموضوع ده صعب عليك! اللي فيه تحدي هو إنه يشوف فيك حد مميز وليه قيمة كبيرة...

نفسك تكون مصدر سعادة للآخرين؟ نفسك أصحابك يلجأولك لما يحتاجوا يفضفضوا؟ نفسك لما حد من زمايلك يفتكرك يبتسم؟...

يبقى احرص إنك تكون بتشجعهم على تكوين انطباع حلو عنهم...

خليك فاكر إن الناس بتنسى انت قلت إيه..لكن عمرهم ما بينسوا الإحساس اللي سيبته معاهم...ممكن ينسوا التعليق اللي انت قلته..لكن هيكونوا فاكرين لو اتبسطوا أو اتضايقوا بسببك...

لسه مخلص كتاب بيتكلم عن الذاكرة اسمه: Boost Your Memory-52 Brilliant Ideas  ل Darren Bridger وفيه جزء منه بيتكلم عن إن ارتباط الأحداث بالمشاعر القوية بيسهل إن الواحد يفتكر الأحداث دي في المستقبل..

كلام التشجيع الإيجابي مش دايما سهل..لكن افتكر إن تأثيره زي السحر..جرب تكون بتعلق بكلمة حلوة كل ماتيجي فرصة...واستمتع بقد إيه علاقاتك هتبقى أجمل...

المرة الجاية حاول تستخدم: تسلم إيدك...شيك قوي لبسك...برافو عليك...انت عارف إنك أقرب حد لي؟...وحشتيني...شاطر...هايل...ذوقك حلو قوي...

كلمة حلوة ممكن ترفع علاقاتك لمستويات رائعة..جرّب :)