نسيت تاكل؟ نسيت تشرب؟

شغلانة ليها ناس متخصصة في مجالات كتير..لكن الشغلانة دي بالذات كلنا بنعملها أو على الأقل عملناها كذا مرة...التدريس!

 فيه ناس الحقيقة بتكره الكلمة دي وبيجيلها ذكريات مش لطيفة لما تسمعها..لكن بالنسبة لي الكلمة دي كبيرة قوي ومهمة قوي ومليانة جمال وعطاء ومستقبل ورجاء وصبر وتشجيع..

النهاردة بالظبط أكمل 7 سنين بأشتغل مدرس! 7 سنين مليانة تحضير ومذاكرة وطلبة هايلين وضحك وامتحانات وأقلام وسبورة بيضا وسبورة اليكترونية وكومبيوتر وبريزيىنتيشنز وكوميديا وأسئلة كتير وآمال وأحلام..و...و...

أحلى شغلانة في الدنيا... ولأني بادرّس أحلى حاجة تتدرس وهي اللغات - أنا بادرس انجليزي-  فالمتعة بالنسبة لي مزدوجة! في البداية كنت فاكر إني هزهق..لكن اكتشفت إن مع كل مجموعة جديدة من الطلبة أنا باكسب مجموعة جديدة من ناس رائعة باتعلم منهم ومعاهم وباعلمهم...باشوف أشواق حلوة للمعرفة..باشوف أحلام لتحقيق حاجات كتير...باشوف رغبة كبيرة في إجادة لغة من ألطف وأكثر اللغات استخداما!

أنا محظوظ قوي إني باعمل حاجة باحبها...أعتقد إني ماكنتش هبقى مدرس كويس لو ماكنتش باحب المهنة دي..

المهنة دي هي المهنة الوحيدة في الدنيا اللي مانقدرش نستغنى عنها...كلنا بندرّس حتى لو ماكناش مدرسين...كلنا بنوصل معلومة أو خبرة أو حرفة سواء خدنا بالنا أو لأ...

الأم مع أطفالها...الميكانيكي مع الصبي بتاعه...المهندس مع زميله...الدكتور...المخرج...الكاتب...المذيع...

خلال كل يوم بتجيلك كذا فرصة إنك تتعلم وتعرف وتضيف حاجة ماكنتش عارفها..ومصادرك مختلفة باختلاف الناس اللي بتتعامل معاها...انت كمان أكيد مصدر لمعرفة ومعلومات وعلم وخبرة لناس كتير...يبقى مدرس وللا لأ؟ :)

لو مش عايز تبقى مدرس..ماشي...بس خلليك فاكر إنك كده كده شخص مؤثر وفيه ناس كتير بتبصلك على إنك مصدر المعرفة والحق والعلم والخبرة..ماتستهونش بده وماتخيبش توقعهم...

لو كان نفسك تبقى مدرس وماقدرتش مش مشكلة...فرص إنك تأثر وتشكل في اللي حواليك فرص ماتتعدش...شارك خبرتك وأفكارك ومعلوماتك وأحلامك مع سواق التاكسي وبنت أختك وأصحابك والناس اللي متابعاك على تويتر وأصحابك على فيسبوك...وماتبخلش على زمايلك في الشغل ومديرينك واللي أقل منك في الوظيفة...أحسن طريقة تكبر بيها وتثبّت معلومتك هي إنك تشارك حد تاني بيها وتكبره...

أنا وانت زي بعض..الفرق الوحيد إنك مش مضطر تصحح 100 ورقة في نهاية التيرم...ابسط يا عم :)

شجع واصبر وشارك باللي عندك على قد ما يفيد غيرك... وبلاش جملة: نسيت تاكل؟ نسيت تشرب؟ :)