موسم دخول المداعش

 كتير مننا بقى عندنا اقتناع إن البُعد الجغرافي لداعش مش بيقلل من الخطر خصوصاً لو كنا صادقين مع نفسنا وقادرين نشوف قد إيه أجزاء كتير من مجتمعنا بتُعتبر تربة خصبة للإقصاء واعتبار الآخر أقل (أي آخر) وإننا لو مش وحشين قوي في إننا نولّع في الآخر لكن ممكن يكون توجّهنا إنه "ياكش يولع"!

لكن مع النظرة دي اللي ممكن تبان "عميقة" (باعتبار موضة العُمق الكام شهر دول)، إلا إن أغلب حلولنا اللي بنتخيلها هي حلول داعشية.. عايزين نقضي على الإقصاء عن طريق إقصاء اللي بينادي بالإقصاء..! عايزين نطفّي النار بنار أقوى منها.. عايزين "نقتل" اللي "بيقتل" عشان "القتل" وحش! ناسيين إن الكُره والإقصاء والانتقام مش هو ده الكاتالوج بتاعهم!

بصيص الأمل موجود، لكن يمكن في الأجيال الصغيرة.. الأجيال اللي لسة مش "متمرّسة" في العنصرية.. الأطفال الصغيرة اللي لسّة مش بيسألوا إنت مسيحي ولّا مسلم ولا صعيدي ولا بحيري.. اللي لسّة ما بقاش عندهم "الخبرة العظيمة" بتاعتنا في "تصنيف" الناس على حسب لابسين الحجاب شكله شيك ولا شكله "بلدي" ولا مش لابسين حجاب.. لسة يا حرام "بُسطا"..

إذا كان الأمل موجود في الأطفال دول، فالمدارس هي السياق اللي يا إما هايكمل في نقل "الخبرة" و"المعرفة العظيمة" بتاعتنا للأجيال الجاية، يا إما هايكون السياق اللي بينضّف ويطهّر وينقّي.. السياق اللي بيفرش أرضية منوّرة، بيمهّد أرض كويسة ينفع يتزرع فيها خير وقبول وتسامح وبشاشة..

سهل قوي إننا نفتكر إن الشر والظلم والقتل لازم يكونوا بيترد عليهم بنفس القوة والعنف.. اللي صعب هو إننا ننوي إننا نشوف الخير ونربّي الحب ونُنشر القبول..

مع جَو دخول المدارس والكشاكيل الجديدة والأساتيك والبرايات والمقالم.. مع موسم البدايات الجديدة مع كل طفل لسة رجله ما خدتش على الجزمة الجديدة، ولسة الكشكول بتاعه أول كام يوم "ماعدّاش النُص" فيقدر يسلّف صاحبه ورقة "مِجوز".. ومع كل مدرس داخل الفصل أول يوم وبيقول ربنا يستر كام عيّل شقي وكام عيّل عايز يتعلم.. مع الجو ده، عندنا كلنا فرصة جديدة.. مش فرصة لنبذ العنف والتأكيد على إن الإرهاب لا دين له، ولا فرصة إننا نورّي قد إيه الإرهابيين دول "أشرار ووحشين" و"هايتشووا في النار".. لكن يمكن فرصة إننا نجرب نُنشر الاحترام والجمال والخير.. نجرّب نشوف في الجيل الأصغر بذرة أمل.. نور صغير ممكن نلحقه.. حتّة بساطة وتفاؤل وإقبال على الحياة.. وبدل ما نحس إنه "يا عيني على العيال الصغيرين! مش عارفين اللي فيها!"، نكون بنشوف فيهم الحل (وجايز يكون الحل الوحيد)!

كل مدرس ومدرسة وأب وأم وكل حد عنده ناس في العيلة هايبدأوا سنة دراسية جديدة وكل حد في مجتمعنا هايشوف عيال لابسين لبس المدرسة و"زاحمين" الشوارع، كلنا عندنا اختيار إننا نحط أملنا في العيال دي.. ونشاورلهم على الرحمة والحب والأمل والجمال والضحك.. نورّيهم خير ونور وتشجيع ومساندة.. نطفّي النار بالميّة، ونحمي مجتمعاتنا من الشر بالخير.. ونكون بنعمل معروف في عيالنا وبلدنا..وترجع المؤسسات دي اللي بيقضي فيها الأطفال وقت طويل ترجع تكون مدارس، مش مداعش!

الله يخرب بيتك

وإحنا صغيرين كان السؤال الأزلي بتاع "عايز تبقى إيه لما تكبر؟" والإجابات "النموذجية": ظابط – دكتور – مدرسة .. وعلى الرغم من إن معظمنا ما كانش يعرف أصلا هو عايز يطلع إيه (فما بالك بالسبب هو عايز يطلع دكتور ليه) فكنا عادة بنقول حاجات زي كليشيهات كده عن الأسباب.. دكتور عشان أخفف أوجاع المرضى (وطبعا الطفل مش فاهم في الجملة دي غير كلمتين: "دكتور" و"عشان") ولو ظابط عشان أحمي بلدي.. والمدرسة طبعا عشان تربّي أجيال.. ما حدش بيكون في ذهنه الأسباب الشريرة بتاعة "عشان أسرق كِلية" أو "أسحل المتظاهرين" أو "أحلق للطلبة" إلا إن عامل مشترك بيجمع بين المهن دي هو فكرة "التحكم".. وفكرة التحكم أو ال control  وإن التانيين هيسمعوا كلامي مش نابعة (حلوة نابعة دي) من محبة العيانين والمواطنين والطلبة ليّ.. لأ.. ضمنيا كده نابعة من فكرة إنهم شايفين إن معايا "حقنة" أو "مسدس" أو "عصاية" (وحديثا "مقص")..

ولأننا كأطفال شايفين الجزء بتاع "سلطة" الأب أو المدرس أو الدكتور متضخمة شوية مش بنقدر نشوف أبعاد تاني.. فبنحس إنه لما ها نبقى آباء لازم نقطع المصروف عن عيالنا شوية.. ماهو مش معقول بعد الغُلب ده نطلع آباء عاديين كده..

لحد هنا والمصيبة مفهومة.. المصيبة الأكبر بقى إن الموضوع ده بيخلينا نشوف ربنا بنفس الطريقة بالظبط.. "الله يخرب بيتك" و"إلهي يحرق قلبك".. "يارب يا شيخ تولع".. "يشيل ويحط عليك".. وكلها "بلاوي" بنحس إنها أحد المهام الأساسية للإله اللي خلق الدنيا دي.. هو اللي بيبهدل الناس ويحرق قلب أمهات على عيالها ويخرب بيوت.. هو اللي بياخد الناس ويعاقبهم لمجرد إنه يقدر.. وسواء التعبيرات دي مقصودة أو هزار وسواء صدقنا فيها أو اعتبرناها زلة لسان إلا إن تكرارها بيثبّت جوانا الأفكار دي..

النهاردة والناس بتتابع أخبار الإعصار في بلاد الغرب شايفين ناس كتير مبسوطة وحاسّة إنه "أيوة كده.. تمام.. عايزين أكتر" في صورة أشبه بطفل صغير بيشجع أبوه إنه يحرم أخوه من رحلة أو المصروف..

الإله اللي أعرفه مش بيخرب بيوت.. الإله اللي خلق الدنيا دي هو اللي بكل تأكيد بيحب مخلوقاته كلها.. إله ودود محب.. إله رحيم.. إله عنده أبوّة لكل الخليقة.. إله شايف صنعة إيديه من أجمل ما يمكن.. إله بيدّي فرص كتير للبشر.. إله بيحترم قوانينه وبيحترم حرية الإنسان واختياراته..

الهلاك هو البُعد عن مصدر الحماية والحب والرحمة.. هو ده الهلاك.. هو ده خراب البيوت..

على الرغم من إدراك معظمنا للحقيقة دي إلا إن ردودنا على اللي بيدعوا على الغرب إن ربنا يحرقهم ويولع فيهم هي ردود مشابهة.. بنرد عليهم بإن "إنتوا كمان ربنا ابتلاكم بغباوة".. أو "يارب يكونلك إنت كمان نفس المصير" في حين إن دعواتهم هي صرخة واضحة لاحتياج للرحمة والود اللي مش موجودين غير عند ربنا..

الله هو الهادي.. هو الودود.. هو المحب..هو الملجأ والحصن.. هو الحماية.. الله هو البركة والرحمة والتضحية..الله هو القوة الحانية.. هو القدرة والرعاية..هو الأب الحنين اللي ضامم ولاده تحت جناحيه..

دعواتي لكل حد بيتعرض لخطر من الطبيعة أو غيره بالحماية والرحمة.. قلبي معاكم..ولكل حد شايف "إنهم يستاهلوا" برضه قلبي معاكم لأنكم لسّة خسرانين كتير لو مالاقيتوش الود والرحمة في الخالق سبحانه..

وإنت بترد على اللي بيدعوا على الغرب بالخراب والدمار قدّم محبة وتفهّم.. بدل ما رد فعلك يكون "هُم وإنت الله يخرب بيتك"!

ما بيفهمش

 وإحنا صغيرين كنا نفتكر إن المدرسين بيبقوا مبسوطين لو الطلبة مش فاهمين.. وإن كل ما الموضوع يبقى معقد كل ما المدرس يبقى حاسس إنه راضي كده! لكن لما بدأت في التدريس اكتشفت إن ده أسوأ كابوس ممكن ييجي للمدرس.. إنه يكون عنده حد "مش فاهم"..

التصور العام هو إن فكرة "الفهم" دي بتعتمد على اتنين.. مرسل ومستقبل.. زي أي حاجة فيها تواصل.. لكن مع وجود استثناءات قليلة إلا إن المفروض إن كل الناس يبقى عندهم قدرة من عند ربنا كده إنهم يفهموا الحاجات العامة اللي بتتدرس مثلا في المدارس أو الجامعات أو الحاجات العامة في السياسة..

 

الافتراض الأساسي هو إن كل الناس بتفهم.. ولو بدأنا من المنطلق ده مش بس هنبطل نرمي اللوم على "اللي مش فاهم" وأنا بقى كمدرس أقول: آه طالب غبي.. أو إيه اللي جابه ده هنا؟!.. (طبعا ممكن يكون المكان مش مناسب للطالب في المستوى.. لكن بصفة عامة كلنا عندنا قدرة أساسية على الفهم..) فلو بدأنا بالتوجه ده هنكون بنحاول أكتر إننا نوصل رسايلنا و"نفهّم" كل حد بنتكلم معاه..

الفكرة إن كل حد فينا بيستقبل المعلومة بطرق مختلفة عن غيره.. التحدي اللي عندنا كمدرسين مثلا هو إننا نستخدم أكتر طرق لتوصيل المعلومة..

جرّب كده تحاول تدّي رقم تيليفونك لحد.. هتلاقي الناس بترتاح لطرق مختلفة.. ممكن حد يقوللك: "رنللي" أو "ملليني النمرة" أو "قول وأنا هاحفظها" أو "استنى لما أكتبها".. على الرغم من أنها نفس المعلومة لكن ممكن كل حد فينا يرتاح إنه يفهمها بطريقته..

من ضمن التدريبات اللي ساعات بنعملها عشان نثبت ده هو إننا بنطلب من مجموعة من الناس إنهم يغمضوا عينيهم ويتخيلوا.. بنقوللهم كلمة والمطلوب منهم يوصفوا بعد دقيقة كاملة شافوا أو سمعوا أو حسوا بإيه.. الكلمة بتكون مثلا "كلب".. ردود الفعل بتبقى مختلفة تماما.. على الرغم إن ناس كتير بتشوف –وهي بتتخيل- كلب وبتقدر توصفه.. ناس تانية بيسمعوا صوت هوهوة.. ناس تانية بتحس بإنها شايفة مشهد بتفاصيله.. ناس تاني بتحس بملمس الكلب.. وهكذا..

أنواع كتير من المتعلمين.. مثلا البصري: وده يحب يشوف الحاجة قبل مايكون حاسس إنه فهمها.. يحب يشوف الكلمات مكتوبة قبل ما ينطقها.. يحفظ بسهولة الصور.. يفتكر أماكن المعلومات في الصفحة..

ناس تانية سمعية: يفتكروا تفاصيل اتحكتلهم.. عندهم ذاكرة قوية للحاجات اللي بيسمعوها.. لو سمع الحاجة مرة واحدة يفهمها.. يمكن لو قراها يحتاج إنه يقرا بصوت عالي عشان يسمع نفسه..

ناس تانية حركية: لازم تستخدم المعلومة في أداء لعبة أو حركة عشان تستوعبها.. وإلا تزهق وتحس إنها مش مستفيدة..

فيه ناس موسيقية.. هندسية.. تحليلية.. ناس تتعلم من غيرها.. ناس تتعلم بإنها تتأمل لوحدها ولو موجودة مع غيرها تركيزها يتشتت..

إحنا بقى كمدرسين علينا إننا نخاطب أكبر عدد من طرق التعلم دي.. عشان كده بنلعب وبنعمل مسابقات وبنكتب وبنتكلم.. بنستخدم صور وحركة وكل اللي نقدر عليه عشان نقدر "نتفهم"..

أنا محتاج أفكر نفسي طول الوقت إن كل الناس.. كل الناس بتفهم.. يمكن بيفهموا بطريقة مختلفة عني.. مسئوليتي لو عايز أفهمهم إني أكتشف بيفهموا إزاي..

مصيبة لو أنا فاكر نفسي مابفهمش.. أنا محتاج أكتشف إيه أحسن طريقة بأستقبل وبأحتفظ بيها بالمعلومة..

عيالك مش زي بعض.. الطلبة بتوعك مش زي بعض.. كلهم عندهم ذكاء لكن بصورة مختلفة.. ولو أنا وانت شاطرين نقدر نحاول نكتشف كل أصحابنا وقرايبنا واللي بنتعامل معاها مفاتيحهم إيه؟ بيستوعبوا إزاي..

أما بقى لو أنا مش فارق معايا إني أوصّل معلومتي فيبقى أسهل حاجة إني أقول عن اللي قدامي "مابيفهمش"!

ج د ع

من ساعة ما إدارات المرور بدأت تشتغل بالنِمَر الجديدة اللي فيها حروف وأرقام وأنا باحب أبُص على الحروف وأشوف لو بيكَوِّنوا كلمة ليها معنى وللا لأ.. ولأن  كلمات العربي أساسا بيرجع جذرها ل3 حروف وكمان لأننا ممكن نستخدم نفس الحروف بتشكيل مختلف فعدد الكلمات المختلفة رهيب..

طبعا قالوا في بدايات تطبيق الحكاية دي إنها شالوا أي كلمات ممكن تِتقِري على إنها شتايم أو كلمات خارجة.. الظريف إن كلمات كتير من الشتايم في العربي مكونة من 3 حروف (عشان اللي بيشتم بيبقى مستعجل فمش معقول هيقول مثلا: يا بطريق المجاري! أسهل قوي إنه يقول: يا جحش!) :)

المهم.. راجع من شغلي من يومين ولقيت عربية ملاكي أرقامها (ط ف س) و3 أرقام مش فاكرهم.. طبعا صِعِب عليّ صاحب العربية وحاولت أتخيل اليوم اللي راح فيه يجيب النمر الجديدة..

التلات الساعة 10 ونص الصبح.. إدارة المرور.. صباح الخير.. <صباح النور (أو وعليكم السلام)>.. بعد إذنك عايز أعمل النمر الجديدة.. <أوراقك..> اتفضل.. <ارتاح وهأنادي عليك..>

التلات (كويس.. يا مسهّل) الساعة 1 ونص وخمسة (داخلة على إلا تلت).. إدارة المرور (نهار داخلي)..< الأستاذ فلان الفلاني..>.. لأ "الفللاني" يا فندم مش الفلاني..< يا سيدي مش هتفرق.. اتفضل النمر..>

إيه ده؟.. <إيه فيه إيه؟..> إيه النمر دي؟ ط ف س 504؟ طِفِس504؟..<يا عم اشكر ربنا اللي قبلك كان ط ف س 507..>

وهو أنا متضايق من الرقم؟؟ معلش يا أستاذ شوفلي حروف تانية..<حروف تانية دة إيه؟.. هي دي الحروف المخصصة ليك>.. طب أنا ممكن أستنى وآجي بكرة (الأربع نهار داخلي أو خارجي أي حاجة).. <بكرة زي بعده.. هي دي النمرة المخصصة ليك>.. طب شوفلي حاجة أرحم شوية.. يعني مثلا ر ز ل 309 أو غ ل س 734.. أي حاجة غير طفس دي!

يمكن مش كلنا بييجي حظنا في كلمة شكلها وحش على ضهر العربية.. لكن كلنا من غير استثناء اتكتب على ضهورنا كلام على مر السنين.. كلام بيسموه labeling  أو "وضع مسمى" ومع السنين فضل المسمى ده مرتبط بي.. والناس شايفاه علي وشي..

يمكن مش موظف إدارة المرور هو اللي حط المسمى ده عليّ.. يمكن أبويا.. يمكن أصحابي في المدرسة وأنا صغير.. جايز مراتي.. ممكن زميلي في الشغل..

"هو كده على طول غبي".. "عمره ما هيتعلم".. "ما ده العادي إنه يضيع الفلوس".. "يا عم ده ضايع في الكورة" "أنا ماشفتش حد بخيل زيك".. "إنتي دايما كده همك على الفلوس".. وغيرها من العناوين أو الـ labels اللي اختارناها لغيرنا أو ناس قررت إنها تختارهالنا..

كل مرة أنا بيتقاللي "انت شاطر في المزيكا" مش بس باتبسط.. لكن كمان باتشطر في المزيكا.. وكل مرة بيتقاللي "سواقتك أي كلام" غالبا بتبقى نبوءة بتحقق نفسها خصوصا لو جاية من حد قريب ليّ..

كلنا بتجيلنا فرص كتير إننا "نسمي" الناس.. ياترى هاقدر أختار عنوان يشجع ويفرّح ويزق لقدام؟ ياترى ممكن أكون السبب في إن طالب عندي يكون متفوق بسبب إني قلتله "إنت دايما مركز.. برافو عليك"؟ يا ترى ممكن جوزِك يبقى متميز في شغله بسبب إنك شايفاه "على طول ملتزم في الشغل"؟..

لو مش قادرين نغير النِمَر.. ممكن نكتب "عناوين" حلوة لبعض.. وافتكر إن اللي بتقوله النهاردة لحد ممكن يكون "النمرة اللي بيستلمها ومايقدرش يغيرها"