حظنا الهباب

مع الاعتذار لعدم لُطف التعبير، لكن من الملاحظ إن تعبير ’جاتنا نيلة في حظِّنا الهباب‘ مش بيُستخدم لما بنفتكر حاجة وحشة في حياتنا أو بنشوف قُبح أو مشاكل أو فقر أو جهل، لكن بنقوله غالبًا لما بنشوف جَمال أو تقدُّم أو نجاح في مكان تاني! فبنلاقي مثلًا كتير من أصحابنا بيشاركوا بصور على فيسبوك أو تويتر لأماكن رائعة أو اختراعات بتسهل حياة البشر أو حتَّى ناس شكلهم حِلو، وبيكون مع المشاركات دي التعبير الغريب ’جاتنا نيلة في حظنا الهباب‘!

وزي ما يكون بقى عندنا مُستقبِلات للجَمال والحلاوة، والمُستقبِلات دي شغالة وكل حاجة، لكن شغَّالة بالعكس: فلما أشوف حاجة حلوة، أفتكر الوِحِش اللي أنا فيه، ولما أتفرَّج على صور قديمة جميلة، أقريِف بسبب حالتي الحالية، ولما أسمع عن دُوَل تانية متقدمة أو أصحاب ناجحين أو حتَّى لما أشوف لوحات جميلة أو حيوانات لطيفة، يروح تركيزي على القُبح اللي أنا فيه أو عجزي عن النجاح في مجال معين، أو غياب الجمال في المكان اللي أنا فيه..

بعضنا حتَّى بيضيع جزء من أجازته في إنه يتحسَّر على إنه لازم يرجع العاصمة ويرجع للمباني العالية والتراب وغياب الخضرة الموجودة في مكان الأجازة..

الحلاوة الموجودة في كل حتَّة بتغيب قيمتها، وبتبهت لو كانت متوفِّرة على طول.. والخوف هو إنِّي أبطَّل أشوف الجَمال (حتَّى لو مؤقَّت)، لأنِّي كل مرة بأشوف جَمال بأتنكِّد وأتحسَّر وأفتكر القُبح.. الجَمال اللي بأشوفه وبيفكَّرني ’بحظِّي الهباب‘ هايجيله وقت ويبطَّل حتَّى يتشاف على إنّه جمال.. وممكن أوصل لمرحلة إن كل مرَّة آكل أكلة حلوة أنسى أستمتع بيها لأنِّي بأفتكر باقي الأكل ’الأي كلام‘ اللي باكله باقي الوقت..

لمحات الجمال القليلة اللي بنشوفها على مسافات متباعدة هي اللي ممكن تنعش أرواحنا وتنشَّط فينا الثقة في إن الجمال موجود لو شفناه، ولو حسِّينا بقيمته بدل ما نقارنه بباقي القُبح اللي عندنا..

لما بأشوف أصحابي لوقت قصير بعد سفر لوقت طويل، عندي اختيار إنِّي أفضل طول القعدة ’زعلان‘ إننا مش بنتقابل كتير، أو اختيار إني أتبسط بكل دقيقة قاعدين فيها مع بعض، و’أشحن‘ فيها شوية استمتاع أقدر أفتكره حتَّى بعد ما أمشي..

استقبالي للجمال الموجود في صور أو مواقف أو ناس أو بلاد تانية ممكن يبدأ يبهت لو في كل مرة بأشوف حاجة جميلة بأفتكر ’حظنا الهباب‘!

استفدت أنا إيه دلوقت؟

يافطة كبيرة مكتوب عليها ’لو عندك القدرة إنك تحلم بحاجة، يبقى لازم تحقَّقها‘، وعلى الرغم من إن اليافطة دي غالبًا الغرض منها نبيل بحيث إن كل واحد عنده حلم يكون بيسعى باجتهاد إنه يحقَّقه، إلا إن مشكلتها كبيرة..

مشكلتها إنها بتحصر قيمة الحلم في مرحلة تحقيقه.. على أساس إن ’إيه فايدة الحلم لو مش هايتحقَّق‘، والتخوُّف اللي ورا الفكرة دي هو إن ممكن ناس كتير تسيب أحلامها أو تبطَّل تستثمر في أحلام معيَّنة أو تبطَّل يكون عندها أحلام خالص لو الأحلام دي مش ممكن تتحقَّق لأي سبب..

أغلبنا لو عنده حلم شاغله ليل ونهار بيكون بيفكَّر في طرق لتنفيذ الحلم.. وظيفة معيَّنة، أو فكرة مشروع، أو أغنية جديدة أو حاجة يشتريها أو مكان يروحه.. ومع ذلك، أغلبنا برضه عارف إن بعد تحقيق الحلم، بيبدأ يبهت، وبيبدأ يبقى ’أمر واقع‘، ’حاجة عادية‘ حتى لو باين للناس التانيين إنه حاجة رهيبة.. ماما كانت كتير بتشير للجملة اللي بتقول ’للأحلام بريق، ينطفئ عند تحقيقها!‘

دي مش دعوة لعدم تحقيق الأحلام! لكنها دعوة لإعادة النظر في قيمة الحلم.. أي حلم.. كل حلم بأحلم بيه بيشكِّل جزء فيَّ، وكل مرَّة بأنسج في خيالي مشاهد من جمل زي ’يا سلام لو.. ‘ أنا بأستخدم قدرة عقليَّة مميَّزة، والقدرة دي في حد ذاتها ليها قيمة.. لو قرَّرت إني أستغنى عنها (لسبب استحالة تحقيق الحلم مثلًا)، أكون كأنِّي بأستغنى عن الرسومات والمزيكا والأعمال الفنِّيَّة والأحلام الحرفيَّة (وقت النوم) وكل حاجة يبان إنه ما فيش ليها ’فايدة‘..

مش حلو إننا نخاف من الأحلام.. ومش حلو إنِّنا لما نسخر من فكرة، تكون سخريتنا في صياغة ’إنت بتحلم يا عم!‘ كما لو إنه غلط! الحلم حاجة، وتحقيقه حاجة، والاتنين حلوين.. والخوف إني أمنع الأحلام اللي مش باينلها إنها هاتتحقَّق..

كل حلم هايتحقق أو مش هايتحقق هو في حد ذاته نعمة.. جمال.. قُدرة أتمنى تفضل موجودة عندي.. أفضل أقدَر أحلم، وأفضل أقدَّر الأحلام، كل الأحلام.. حتى اللي مش ناوية تتحقَّق!

اختيارات الحياة

في حياتنا اختيارات طول الوقت.. وكل واحد فينا غالبًا عنده معايير بيختار من خلالها، خصوصًا لما بعض الاختيارات تكون متشابهة أو كلها صح.. وعلى قد ما تصرفاتنا وكلامنا بيعبروا عننا، على قد ما اختياراتنا كمان بتعبر عن جزء كبير من شخصيتنا..

الوقت اللي فات قرَّرت إن الاختيارات اللي أكون بأختارها في الحياة تكون ’اختيارات حياة‘ بمعنى إنها تكون اختيارات فيها حياة.. اختيارات بتعلِّي من قيمة الحياة.. بتدِّي حياة.. بتشجَّع على الحياة.. بقدر الإمكان..

بنحتار كتير.. وحقيقي لو عايز تحيَّر إنسان، خيَّره.. لكن يمكن الحيرة تزول لو قاعدة الاختيار بقت مبنيَّة على كمِّيِّة الحياة ومستواها في كل اختيار.. هل التعليق اللي هأقوله أو الشغل اللي هأعمله أو القرار اللي هآخده هايكون مُحيِي؟ هايكون بيشجع ويقوِّي ويبني ’ويدِّي حياة‘؟ 

لما بأحتار بين العدل والرحمة، وبين الحق والتضحية، وبين القانون والنعمة، احتياري مش بالضرورة محسوم.. لكن يمكن يساعد على حسمه فكرة كمية الحياة الموجودة في كل اختيار.. مرَّات هأختار الرحمة والفرصة التانية، عشان الغلطان يكون ليه فرصة تانية في حياة أحسن، ومرَّات هأختار العدل عشان أحمي حياة ناس تانية..

حتى القوانين اللي بتعاقب بالحبس هي قوانين المفروض إنها بتحمي حياة باقي الناس في المجتمع.. عقاب المُذنب مش اختيار الهدف منه إن المُذنِب ينال جزاء اللي عمله وبس، لكنه كمان لضمان حياة أفضل لباقي أفراد المجتمع..

هأجرب استخدام المقياس ده في اختياراتي.. الاختيار اللي مليان حياة يكسب.. وهأشوف هايحصل إيه.. جايز اختياراتي في الحياة تكون مليانة حياة..