اللي مالوش كبير

بنقول إن اللي مالوش كبير يشتريله كبير، والحقيقة أنا مش متأكد إن فيه إجماع على الغرض من إن الواحد يكونله كبير، لكن الاحتمالات هي إن الهدف إن الواحد يلاقي حد "يتشرَّف" بيه أو حد "يحميه"، لكن فيه جانب تاني مفيد من إن الواحد يكونله كبير، وهو إن الواحد يلاقي حد "يحاسبه" و"يتحداه عشان يكون أفضل" و"يتابعه".. حد يكونله الحق في إنه يسألني ويحاسبني..

أزمات كتير سواء على مستوى العائلات أو في الشغل أو ساعات على مستوى دول بترجع للمشكلة دي.. الزوج مثلًا بقى هو الكل في الكل ومالهوش كبير، بمعنى إن أبوه أو حماه أو عمه مش موجودين وعشان كده ممكن فكرة إن حد يحاسبه أو حد يراجعه في اللي بيقوله أو بيعمله تكاد تكون مش موجودة.. اللي مننا بيشوف كتير من رجال الأعمال أو رواد الأعمال (entrepreneurs) ممكن يلاحظ الحكاية دي.. رائد الأعمال ده مبسوط بفكرة إنه الكل في الكل، وممكن طبعًا يكون معاه فريق عمل وزمايل وكل حاجة، لكن فكرة إن ما فيش حد أعلى مني مش دايمًا فكرة إيجابية..

أزمات كتير على مستوى الدول ممكن تقل لو المنظومة مترتبة بشكل يكون كل واحد له كبير.. كل حد فيه حد أعلى منه يحاسبه.. يكون ليه الحق في إنه يسأل أنا بأعمل كده ليه.. يكون بيتحدَّى دوافعي.. مش شرط يكون بيجبرني أعمل اللي هو عايزه، لكن أكون عارف إنه في أي وقت من حقه يسألني.. مش لأني "كويس" و"مرن"، لكن لأن دوره كده..

عشان كده اللي مالوش كبير لكن يتمنى إنه يكون بيمشي في سكة أفضل يمكن يكون محتاج يشتريله كبير.. اللي مالوش كبير محتاج يكون عنده دواير في حياته هو فيها مش الكل في الكل.. مش الريس.. مش النجم.. مش أهم واحد.. مش أشطر واحد.. دواير يكون فيها واحد عادي من الناس.. نفر وسطهم.. دواير يكون فيها حد عنده الحق إنه يحاسبه ويتابعه ويسأله.. وممكن يوبِّخه ويطلب منه تعديلات..

الزوج والزوجة اللي مالهمش كبير ممكن يكون جوازهم معرض لمشاكل أكبر وأكتر.. لكن لو ليهم أب أو حما أو عم أو مرشد نفسي أو عيلة تانية أكتر خبرة منهم ممكن يكونوا بيوفَّروا على نفسهم مشاكل كتير..

لو في حياتي دواير أنا فيها مجرد نفر فغالبًا فرصي في إني أكون إنسان أفضل هاتكون فرص أعلى.. لسبب بسيط إنه الأعلى مني ليه الحق في إنه يوجهني ويقدم تعليقات على شغلي أو دراستي أو تصرفاتي من غير ما يحس إنه بيضايقني..

مش كفاية إن يكون عندي ناس على نفس المستوى من المسئولية.. أصحاب أو زملا مثلا.. مهم إن يكون في حياتي ناس "أكبر" مني ليهم الحق في التعليق على اللي بأعمله.. ليهم الحق في إنهم يقولوا كلام سلبي أو إيجابي عليَّ.. ليهم الحق الطبيعي في تقييمي.. مدرسين أو مديرين أو مرشدين أو دكاترة نفسيين.. ناس على المستوى الرسمي أعلى مني في التسلسل الوظيفي أو الحياتي.. أخاف لو بقيت كبير قوي لدرجة إن ماليش كبير..

الأهل والأصحاب والمغفلين

كل الناس اللي بيعملوا أفكار تجارية جديدة أو أي نوع من ال business بيكون في بالهم أمل الوصول لأكبر عدد من الناس اللي ممكن تقتنع بفكرتهم أو بالمنتج أو بالخدمة اللي بيقدِّموها، وكتير منهم بيبدأوا التسويق للفكرة من الدواير الصغيرة اللي يعرفوها، وفي الغالب حتى الأفكار الساذجة أو اللي ما فيهاش ابتكار أو الفاشلة بتلاقي صدى عند بعض الناس حوالين صاحب الفكرة، وساعات التعبير اللي بيُستخدم في ال businessهو إن الفكرة لو مش ناجحة من نفسها غالبًا هاتكون بتجتذب بس: الأهل والأصحاب وبعض المغفلين (family, friends, and fools)..

ويمكن عشان كده الأفكار التجارية محتاجة دراسة وافية ومحتاجة كمان تكون بتتعِرِض على ناس متخصصة وليها في المجال، مش بس على ناس بيحبوني وهايوافقوا على كل حاجة بأعملها وهايشتروا أي منتج هأقدِّمه..

في الحياة اليومية حتى البعيدة عن التجارة أو الخدمات، كلنا لينا دواير تأثير.. كلنا عندنا أهل وأصحاب ويمكن بعض المشجعين اللي هايكونوا بيوافقونا على كل حاجة بنقولها، وعلى الرغم من إن تأثير كل واحد فينا مختلف عن التاني، إلا إن أغلبنا عندنا الدواير دي سواء كان فيها ملايين من الناس أو عشرات من الناس اللي بتأيِّد وتوافق وتشجع كل حاجة بنعملها..

عشان كده المسئوليَّة كبيرة على الكل، مش بس على أصحاب المناصب أو المشاهير، ومش بس على الفنَّانين أو اللي عندهم مئات الآلاف من المتابعين على تويتر، لكن كلنا مسئولين لأن في الغالب فيه ناس بتتابع كل حد بيقول إيه، وجايز نكون بالنسبة للناس دي "مهمين"..

آراءنا اللي ممكن نكون بنقولها ببساطة، وتعليقاتنا اللي بتبان لينا تلقائية ممكن يعتبرها ناس من الدواير الصغيرة اللي حوالينا آراء وتعليقات مصيريَّة ومهمة وملهمة وعبقريَّة.. دواير تأثيرنا موجودة حتى لو كانت دواير صغيرة..

اللي مرَّ مننا بتجربة الأبوَّة أو الأمومة عارفين قد إيه نظرة الطفل الصغير لأبوه أو لأمه، قد إيه هم بالنسباله اللي عارفين كل حاجة واللي شاطرين في كل حاجة.. كتير من الناس القريبة من كل حد فينا بيبصولنا بنفس الطريقة، بيشوفوا هانعمل إيه وهانقول إيه وهانقرر إزاي، وهانفسَّر إزاي، وهاننتخب مين، وهانمدح في مين..

مافيش ولا حد فينا عنده تأثير يساوي صفر! يمكن الشطارة تكون في استخدام التأثير القليل أو الكتير اللي ليَّ بحكمة مش باستخفاف..

سواء مشهور أو لأ، كل واحد فينا حواليه دايرة من الناس اللي مستنيَّة تشوف وتسمع هايقول إيه.. المسئوليَّة خطيرة!

إنت حُر

فيديو رائع انتشر مؤخرا على الإنترنت لمجموعة من قرود الشيمبانزي اللي فِضلت تخضع لتجارب في المعامل لمدة 30 سنة من غير ماتشوف العالم الخارجي..من غير ماتشوف أي حاجة برة المعمل..الفيديو بيبدأ بباب بيتفتح لأول مرة..وشوف رد فعل القرود..

اتفرج وكمّل قراية..

لما اتفرَّجت على الفيديو ده ماكنتش عارف المفروض انطباعي يبقى إيه! ماكنتش عارف أتبسط وللا أستغرب وللا أضحك..أبكي وللا أتفائل..ماكنتش عارف أتخيل مين من القرود هيطلع ومين هيفضل في القفص..

شفت أول قرد لما طلع وشاف الشمس وراح حاضن القرد التاني؟..شفت خطواتهم المحسوبة اللي بعد كده بقت أكثر عفوية وطبيعية؟ شفت الخضّة اللي فيها فرحة مع استغراب؟

حد بقاله 30 سنة..آه 30 سنة..تخيّل؟..30 سنة في قفص..حماية؟ أيوة..أكل واهتمام صحي و"استقرار"..أيوة..مافيش مفاجئات ولا مشاكل..مش محتاج يفكر يجيب أكل إزاي..ولا محتاج يبذل مجهود في أي حاجة..

بس في قفص!

مع كل ما تحمله الحالة دي من قلة حيلة..موت للأحلام..أيام مكررة..طموح غايب..أمل مش موجود..متعة تعب مالهاش مكان أصلا..

ليه؟

لأن مكانه الطبيعي مش في معمل تجارب..مكانه اللي فيه يقدر يظهر كل إمكاناته مش جوة القفص..اتخلق برة..اتخلق يشوف الشجر والشمس..اتخلق يجري ويتنطّط..اتخلق يدوّر على أكل..اتخلق يحِب ويتحَب ويدوّر على مكان سكن..اتخلق حر طليق..

صعبة؟ محتاجة جرأة؟ محتاجة قرار إني أطلع من مكان الراحة بتاعي؟

الشمس هتتعِب عينيّ أول مرة..يمكن مالاقيش أكل على طول..هاواجه مخاطر وحاجات مش متوقَّعة..بس هبقى حُر..

السطور اللي فاتت مش بس لسان حال قرد الشيمبانزي اللي ماكانش متأكد هو ينفع يطلع للنور وللا لأ..

لكن ده لسان حالي وحالك..

من واحنا صغيرين وجملة "انت حُر!" هي أقرب للتهديد عنها للمعلومة..:)

"انت حر!" يعني: هتشوف الويل لو عملت كدة..:)

"انت حر!" يعني: لو فاكر نفسك جدع اعمل كده.. 

"انت حر!" يعني: انت فاكر نفسك هتعرف أكتر؟

لكن النهارده أنا ناوي أمارس الحرية اللي الله سبحانه منحهالي..حرية إني أخرج للنور..أطلع من مكان الراحة اللي أنا فاكرُه بيحميني..أخرج من حالة "الاستقرار" للحالة اللي فيها أكتشف الإمكانيات الجبارة اللي ربنا ليه المجد حطها فيّ! إمكانيات مش هتبان جوة قفص.. طاقات مش هتظهر وأنا في الصندوق" الحلو الهادي الجميل"..

القفص ممكن يكون علاقة بتستنزفني..شغل بيرجعني لورا..مكان بيسلبني إنسانيتي..صداقة بتستهلك وقتي..

القفص ممكن يكون البعد عن مصدر النور والحب والأمل..مصدر كل شيء جميل..الله سبحانه..

القفص ممكن يكون نظام فاسد بيحكم بلدك..

انت حر..اتخلقت حر..ماتخلقتش عبد..

انت حر..مش تهديد..معلومة..:)

انت حر..وعلامة على حريتك هي حريتك في إنك تقرر تفضل في القفص وللا تخرج حر..انت حر!

رقم تلاتين

مش باكتب غير من حوالي شهرين..وكانت أول حاجة كتبتها الست السمرا المسيحية اللي بتعرج..مش قادر أوصف للآخر إحساسي بخصوص الكتابة أو مشاعري بتبقى عاملة إزاي قبل ما أخلص البوست أو بعد ما أصحابي يقروها..إلا إنه في المجمل إحساس جميل وإيجابي..

والنهاردة نفسي أكتب عن الكتابة..

وعلى الرغم إن الكتابة نفسها هي وسيلة (زي ما أغلبنا يعتقد) إلا إني بأتمنى إني أبص شوية بعمق على الوقت البسيط اللي عدي من ساعة ما كتبت أول حاجة لحد التدوينة دي..

هارجع شوية لورا لبعض المعلومات اللي بتُرجِع تاريخ بداية الكتابة لسنة 3200 قبل الميلاد في مصر وسنة 1300 قبل الميلاد في الصين ومش معروف بالظبط لو الحضارات المختلفة اللي استخدمت الكتابة كانت استفادت من خبرات بعض (عن طريق التجارة والتعرف على الكتابة من بلاد بدأتها بالفعل) وللا كانت الفكرة متواردة بشكل كبير..

إلا إنى مش قادر أنكر أهمية الخطوة دي..خطوة عاملة زي تحويل الأحداث اللي بامر بيها قي حياتي لصوت وصورة متصورة فيديو أقدر أسترجعها في أي وقت..كأنك توصلت لحاجة تخلليك تقدر تتفرج على أحلامك بعد ما تصحى!

فكرة عبقرية..محاولة تحويل حاجات مش ملموسة (أفكار وآراء وحسابات وتخيلات) لحاجة ممكن أرجعلها في أي وقت لأنها بقت ثابتة وملموسة قدامي على حَجَر أو خشب أو جلد حيوان أو ورق أو شاشة كومبيوتر...

طب أنا اتعلمت إيه من الحاجات اللي كتبتها؟ اتعلمت كتير:

قدرت أعرف نفسي أكتر..مرات لو مش بتقول اللي جواك أو مش بتكتبه مش بتكون عارف هو انت خايف وللا مطمن وللا مبسوط وللا إيه..لما بتبدأ تكتب..المشاعر وفهمك لنفسك بيبقوا أوضح..الجمل المكتوبة أوضح بمراحل من الأفكار اللي طايرة في الذهن..

بدأت أفكر أعمق..أول تفاصيل بتجيلك لما بتبدأ تكتب عادة بتبقى تفاصيل بسيطة مباشرة معتادة..لما بتبدأ تدي نفسك وقت للتفكير بيبدأ تدفق جميل لمجموعة أفكار أو زوايا تانية تخدم وتعمق الفكرة..

بدأت الحاجات اللي باكتبها تساعدني أبقى شخص أفضل..لأني لما باكتب عن الخير أو العدل أو المساواة أو الحرية أو الاحترام أو غيرها من القيم الجميلة..أنا باحط على نفسي مسئولية ضخمة إني لازم على الأقل أحاول أطبق الحاجات دي في حياتي الشخصية..

بدأت الأفكار في ذهني تكون منظمة بشكل أكبر..أفكاري وهي مكتوبة شكلها مختلف عن وهي لسة في عقلي..شكلها متنظم مترتب..وكل ما باكتب أكتر كل ما الأفكار الجديدة بتيجي مترتبة لوحدها..الظاهر إن العقل بيبقى عارف إن الحاجات دي ناوية تتكتب فبيحاول يساعد حتّة بدري..:) :)

بدأت أستمتع بقراية الكتب المختلفة و كمان بقراية اللي كتبته قبل كده..وأنا بكتب النقطة دي افتكرت بنوتة صغيرة كان نفسها لما تكبر تشتغل كاتبة..مامتها حاولت تشجعها على القراية..البنت مش عايزة..طب ما ينفعش تبقي كاتبة من غير ماتكوني بتقري..لأ ماتخافيش يا ماما..مانا ها قرا الحاجات اللي هاكتبها! :)

أخدت تشجيع من ناس كتير.. وده إحساس جميل أتمناه لكل حد..إحساس إن حد يقوللك إن اللي بتقوله مهم أو قادر على التغيير أو بيسيب أثر طيب..أو فيه بساطة حلوة أو عميق..كل الكلام ده بيشجع ويزق لقدام..

عيني اتفتحت على أفكار أجمل..عارف لما يبقى معاك كاميرا بتاعة محترفين؟ لأنك عارف إن الكاميرا رائعة فانت بتبقى ماشي في كل مكان واخد بالك من كل تفصيلة ينفع تتصور..عينك وقتها هتجيب أحلى وردة وأجمل مشهد إنساني وأرق صورة للطبيعة..الحاجات دي طول الوقت موجودة..بس لما تبقى عارف إن معاك كاميرا متميزة..أو إن معاك قلم وهتكتب..أفكار أجمل بتحوم حواليك (حلوة "بتحوم" دي)  :)

اتعرفت على أصدقاء وناس يشاركوني الرأي..لما بتكتب فكرة وتلاقي حد بيقوللك: انت على فكرة كتبت اللي جوايا..أو انت بتكتب اللي عايز أقوله بس ببساطة..قد إيه ده إحساس جميل..بتحس إنك مش بتتكلم في الهوا وإن فيه ناس تانية واصلها مشاعر وأفكار مشابهة..

حاولت أتدرب إني أفكر في وجهات النظر المختلفة..لأني لو بس باتكلم مع أصحابي واحنا بنشرب شاي أقدر أقول اقتناعي وحد تاني يكمل الفكرة..لكن في غياب المناقشة دي وأنا باكتب..أنا محتاج أغطي أكبر جزء من جوانب الفكرة بأكبر قدر ممكن من الحيادية.. التدريب ده لوحده بيكبّر الفكر وبينمي مهارة مفتقدينها كتير في كلامنا ومناقشاتنا العادية..

قدرت أوثّق بعض أحلامي وأشواقي على الورق..أقدر أرجعلها أي وقت عشان آخد طاقة إيجابية عشان أكمل سكة الحلم..لو الحلم أو الفكرة مش مكتوبة..جايز أنساها أو يتشوش عليها أو ماتاخدش أولوية..

فيه متوسط 12000 من مستخدمين جووجل كل شهر بيعملوا بحث عن جملة: How to change the world (كيفية تغيير العالم) واكتر من 1,2 مليون بيعملوا بحث عن: Change the world  (تغيير العالم) وفي المقالة اللي استشهِدِت بالأرقام دي قصة حقيقية عن شخص شاف إن عشان تغير العالم: اكتب...عشان تشوف عالم مختلف: اكتب..

يا ترى ممكن اللي باكتبه يغير العالم بتاعي؟ عالم أفكاري وطموحاتي؟ عالم علاقاتي؟ ياترى ممكن لما أكتب أكون إنسان أفضل؟ أكثر قدرة على التعبير عن نفسي؟ أكثر قدرة على التساؤل والتخيل؟ متحمس أكتر إني أدوّر على كل وجهات النظر؟

ياترى ممكن اللي باكتبه يغير العالم بتاعك انت؟

أحب أشجعك (وأشجعني أنا كمان) اننا نكتب..طلع اللي جواك على الورق..مش مهم تنشره..مش مهم حد يقراه..مش مهم يبقى حلو أو مظبوط..مش فارق..

لما بتكتب بتتشجع وبتعرف نفسك أكتر..وبتفكر أعمق..وبتحط في اعتبارك وجهات نظر تانية وبتجيلك أفكار أكثر إبداعا عن غيرك..

أنا مبسوط إني كتبت التدوينة دي :) ..وبالمناسبة..دي التدوينة رقم تلاتين..

اكتب..غير العالم بتاعك...ومين عارف؟  فيه كتابات غيرت العالم كله!

القطر هو اللي غلطان

جمل بسيطة ويمكن معروفة لكتير مننا..وكلها بتبدأ بكلمة I" " يعني" أنا" ومكانها في الجملة فاعل..الجمل دي بتعبر بطريقة مش مباشرة على مسئوليتي عن الحاجات اللي حصلت..الغريب شويتين إن الجمل دي مختلفة في تركيبها في العربي..أنا عارف إن الاختلاف في التركيب متوقع بين أي لغتين..وفي اللغة العربية الفصحى الجمل دي مافيش عليها أي غبار زي مابيقولوا..لكن في العامية الجمل دي مختلفة تماما..تعالوا نشوف الجمل دي بتتقال إزاي بالعربي..وهاسيبلك التعليق...

I missed the train

القطر فاتني! –واخد بالك؟ القطر هو اللي غلطان

I cut my finger

صباعي اتعوّر

I ran out of coffee

القهوة خلصت –قال يعني خلصت لوحدها

I spilled the tea

الشاي اتدلق –عمرك سمعت حد قال: أنا دلقت الشاي؟

I lost my keys

مفاتيحي ضاعت –صح؟

I broke my leg

رجلي اتكسرت –على فكرة لو حاولت تقول الجملة دي حرفيا في الإنجليزي الجملة مش هاتبقى صح..يعني ماينفعش تقول: My leg was broken.

I like this phone

التليفون ده عاجبني!

I overslept

راحت عليّ نومة –بمعنى إن النوم ابن الإية ضحك عليّ وأنا غلبان ماليش ذنب

I outgrew my shirt

القميص صغر عليّ- يا شيخ؟

I missed you

وحشتني! –انت اللي اديتني الإحساس ده!

I had an accident

حصلتلي حادثة –الدنيا مستقصداني!

زي ماقلتك في البداية التعليق متروك ليك...

الظريف إن فيه تركيبة مخصوص في الانجليزي تقول بيها إن حد متخصص عملك حاجة..لكن في العربي باقول إني أنا اللي عملتها..بص معايا

I had my car repaired

رحت صلحت عربيتي

I had my hair cut

حلقت شعري

جملك جايز ماتتغيرش في العربي.. ومش مطلوب من أي حد فينا إنه يتكلم انجليزي..لكن ممكن نفكر إزاي ممكن نتحمل مسئولية أكتر..

ونفتكر إن احنا نتيجة أفكارنا واتجهاتنا وكلامنا وقراراتنا...

أسيبكم بقى عشان الوقت سرقني –الوقت هو اللي وحش :)