عشان مصر تعيش.. تعيش إنت!

جملة "تعيش إنت" من الجُمل الغريبة اللي بنستخدمها كمصريين عشان نبلّغ بوفاة حد.. "فلان أخباره إيه؟" "لأ.. ده تعيش إنت" (يعني لأ.. ده مات) وده إن دل على حاجة فبيدل مرات كتير على تفادينا استخدام كلمة موت بشكل مباشر على اعتبار إن خبر موت شخص مش خبر لطيف على أي حال..

المهم إن الفترة الأخيرة دي الكلام والمناقشات كتير على فكرة "عشان مصر تعيش" أو "عشان البلد تمشي" وغيرها من التعبيرات اللي بأشوفها فضائية هلامية إنشائية! هي مصر دي اللي هي إيه؟ وتعيش أو تمشي إزاي؟ هل مصر هي زي ما بيقولوا: الجغرافيا؟ النيل والصحرا والوادي والدلتا وحلاوة شمسنا وكده؟ ولو كده هاتعيش أو هاتمشي أو هاتتقدم إزاي؟.. بلاش.. هل مصر هي التاريخ والحواديت والانتصارات والماضي والأهرامات والقلعة؟ برضه السؤال قائم.. هاتعيش الحاجات دي إزاي؟.. مصر لا هي الجغرافيا ولا التاريخ ولا المباني والشوارع ولا الفول والطعمية.. مصر مش النظام السياسي.. مصر هي البني آدمين..

أنا فاهم طبعا إن ده مش خبر جديد.. مش اختراع يعني.. مفهوم إن أي بلد هي سكان البلد.. لكن الفضائي في الموضوع هو فكرة إن المصريين لازم يضحوا عشان مصر تعيش.. ده بالظبط زي نكتة "مرة واحد كان يمتلك نُص بيت.. باعه واشترى النُص التاني، عشان يبقى البيت كله بتاعه!"

"البلد" مش كيان هُلامي نرمي عليه فكرة إننا عايزينه يتقدم.. نفس المبدأ ينطبق على "الدين" اللي ممكن ناس تكون بتحارب بني آدمين تانيين دفاعاً عنه.. "تقدم البلد" أو "استمرار الدين" أو "منطقية فكرة" أو "تميّز كيان علمي" ما هي إلا مرادفات لنجاح وتقدم ورفاهة وشطارة "الناس" الموجودين أو بينتموا للكيانات دي أو معتنقين الأفكار دي.. لما أب أسرة يقول "إحنا لازم كلنا نضحي عشان أسرتنا" أكيد يقصد إننا كلنا بنضحي عشان أفراد الأسرة، الأم عشان العيال، العيال عشان الأم، مش مجرد إن أهل البيت كلهم يقعدوا في البيت من غير أكل ولا شرب ولا كهربا ولا شغل ولا دراسة "عشان الأسرة"! أسرة إيه؟

الكلام الفضائي المطّاط سهل.. جُمل زي "مصر محتاجة مش عارف إيه" و"هانشوف مصر أحسن بلد" والكلام ده، سهل.. بتزيد صعوبته لما تفكر في مصر إنها المصريين.. مصريين هم اللي بيثوروا.. مصريين هم اللي بيشتغلوا.. مصريين هم اللي بيخترعوا ويزرعوا ويفكروا.. ولما بيعملوا كده بيعملوه عشان مصريين تانيين.. مش عشان "مصر" في مطلقها كده

 عشان مصر تعيش وتتقدم وتبقى "بلد" كويسة، المصريين محتاجين يعيشوا ويتقدموا ويكونوا كويسين.. مش يفقروا ويسيبوا أشغالهم ويقعدوا في ضلمة وحر وبطالة. لازم عشان مصر تعيش، تعيش إنت!

الشمسية

في قرية صغيرة كان الاعتماد الأكبر على ميّة المطر عشان الناس تزرع وتلاقي أكل.. وكان بقالهم وقت كتير مستنيين المطرة لكن ماحصلش.. الناس كلها كانت بتحلم بالمطر فقرروا يتجمعوا ويدعوا ربنا ويمارسوا طقوسهم الخاصة على قد ما يقدروا عشان الدنيا تمطر.. كان حلمهم حقيقي إلا إن بنت صغيرة كانت مصدقة في الحلم وفي إمكانية إنه يتحقق أكتر من أي حد فيهم.. في اليوم اللي قرروا يتجمعوا فيه منتظرين المطر البنت دي كانت الوحيدة اللي جات ومعاها "شمسية"..

في أحلامنا الشخصية أو أحلامنا لبلدنا بالتغيير بنعرف نحلم.. بنعرف نتخيل الوضع من غير حاكم ظالم أو مش كفء.. معظمنا عارفين إحنا "مش عايزين" إيه.. وفي سعينا إننا نمشّي رئيس أو وزير أو مسئول مش قايم بدوره غالبا مش بنبقى مصدقين للآخر إن الحلم ممكن يتحقق..

بنعرف نحلم أحلام كبيرة.. بنقول إن من حقنا ديمقراطية وحرية وعدالة ونضافة ومستوى معيشي كويس.. عارفين إننا ينفع نكون بلد كويسة.. عارفين إن عندنا موارد وإمكانيات طبيعية وبشرية نقدر بيها ننافس في مجالات كتير.. لكن وسط أحلامنا الكبيرة مش دايما بنكون مصدقين للآخر إن الحلم ممكن يحصل.. إذا مصدقين إنه هايتحقق طب ليه مش دايما معانا "شمسية"؟.. ليه مش دايما شايفين إن الفاسد هايمشي وبعدها....آآآ وبعدها.... آه مش مهم بعدها.. خلينا بس نخلص منه!.. على الرغم إن "الخلاص منه" في حد ذاته إنجاز لكن لو أنا مصدق فعلا إننا هانخلص منه فين باقي حلمي؟ فين حلمي بالمرحلة اللي بعد كده؟ فين علامة إن حلمي منطقي وهايحصل وآدي الشمسية اللي هاأستخدمها لما المطرة تغرق الدنيا وتجيب الخير للأرض؟

في التواصل عن طريق اللغة مش كل سؤال غرضه الاستفهام.. وطبعا السؤال ممكن يكون هو هو لكن هدفه مختلف.. أنا هنا مش بأقول "فين البديل؟" كأني بأطرح سؤال استنكاري.. كما لو إني بأقول "على فكرة مافيش بديل فخلينا زي ما إحنا" ولا بأقول "أهو ده أحسن من غيره".. أنا هنا بأسأل سؤال غرضه الاستفهام فعلا.. "فين البديل؟"

اللي بيحلم إنهم يكلموه عشان يروح يعمل مقابلة شخصية لشغل جديد مش كفاية إنه يكون بيقول "يا رب يكلموني إن شالله في نص الليل وأروحلهم على طول".. اللي بيقول كده لو فعلا مصدق في الحلم هايكون على الأقل مجهّز البدلة اللي هايلبسها وطابع ال CV بتاعته.. إلا بقى لو حلمه هو مجرد حاجة بيتمناها لكنه غالبا مستبعدها..

أعرف ناس من كتر تصديقهم لحلمهم بيتصرفوا كما لو إن تحقيق الحلم هو مسألة وقت مش أكتر.. الناس دي من الذكاء بحيث مش بيضيعوا وقت.. مش مستنيين "يا سيدي أهو بس يمشي ونبقى نشوف".. لأ.. الناس دي "بتشوف" من بدري.. ويمكن مازال الحلم ما اتحققش..

خوفي إن على الرغم من شرعية الحلم بالإزاحة (حلوة الإزاحة دي) بمسئول غير كفء إلا إن "شرعية" الحلم مش كفاية.. المصيبة إن الحلم لما يتحقق مايلاقيناش جاهزين.. تجيلي فعلا مكالمة التيليفون عشان المقابلة الشخصية وأقعد ألف الدنيا كلها عشان أطبع ال CV.. شعب بحاله يطيح (زي إزاحة كده) بمسئول سَكّة لكن "يتوحل" يعمل إيه بعد كده..

أسوأ الأحلام هي الأحلام اللي بتتحقق لناس مش مستعدة.. ساعتها ياريت الحلم ما يتحقق!.. بدل ما يجيلنا الحلم شخصيا ونلاقي نفسنا بنقول "لا مؤاخدة يا حرية.. إحنا مش مستعدين.. ما كنّاش فاكرين إن الموضوع جد وإن حضرِتك ممكن تشرَّفي".. "الحقيقة كنا بنحلم بالمطرة.. بس ما صدقناش قوي في الحلم"!

مش الشمسية هي اللي هاتجيب المطر.. لكن لو أنا مصدق قوي إن حلمي على الأبواب هايكون سهل عليّ إني أستعد كما لو إن المطرة جاية جاية.. ساعتها إني أروح أشتري شمسية ممكن يكون أبسط خطوة أعملها وأنا مستني حلمي يتحقق..

غريبة قوي

من وقت للتاني بتنتشر صور على فيسبوك أو تويتر.. وفيه صور كده بتنال حظ أكبر من النشر.. عادة الصورة بيبقى فيها حاجة جديدة أو غريبة أو مثيرة للانتباه وعشان كده ناس كتير بتشارك أصحابها بيها..

إلا إنه فيه صورة انتشرت من كام يوم ولفت نظري حد من أصحابي ليها.. اللي كان ملفت هو عدم وجود أي شيء ملفت!

حاولت أشوف إيه وجه الغرابة في الصورة..

صورة لسيدتين مصريتين محجبتين واقفين بيصلوا على منبر كنيسة في القاهرة..واحدة منهم لابسة بالطو وواضح من التوقيت والمكان إن الاتنين كانوا بيسعفوا الجرحى في المستشفى اللي كانت جوة الكنيسة في ميدان التحرير..

حاولت أبص على الصورة و"أألف" أي وجه غرابة!. ماعرفتش..

إيه؟ غريبة إن سيدة تكون بتشتغل طبيبة؟ 

غريبة إن سيدات يساعدوا بقلب جامد في إسعاف ناس بتنزف وتترعش وفيه شظايا في أجسامهم؟

غريبة إن طبيبات ومتطوعات ماينسوش معاد الصلاة؟

غريبة إن مسلمات "يرضوا" يساعدوا ويشغّلوا مستشفى ميداني جوة كنيسة؟

غريبة إن كنيسة "تسمح" لمسلمات إنهم يدخلوها؟

غريبة إن مسلمات يصلّوا جوة كنيسة؟

غريب قوي استغرابنا..

إحنا اللي طول عمرنا شايفين أمهاتنا وإخواتنا بيشتغلوا ومتميزين في كل المهن..

طول عمرنا شايفين أمهاتنا بقلبهم الحنين لكن الأقويا.. اللي بيواجهوا المحن واقفين..

أمهاتنا اللي ياما شفناهم وسمعناهم بيصلوا.. بيصلوا ويدعوا لينا ولبلدنا وللخير.. ويمكن ساعات ينسوا يصلوا لنفسهم..

ستات بلدنا اللي مستعدين يعملوا كل حاجة ويساعدوا في كل مجال عشان نشوف الأحسن..

بيوتنا اللي مفتوحة ليل نهار للجيران.. للعيال تلعب مع بعض وماحدش فيهم دريان مين أبوه أحسن من التاني ومين ديانته إيه!

بيوتنا اللي "بتتلكك" تاخد أجازة وتتفسح في كل الأعياد المسلمين والمسيحيين.. أهالينا اللي "هرونا" بالكحك رايح جاي..

مسلمين ومسلمات عمرهم ماتأخروا في حضور فرح ولا عزا في كنيسة..

كنايس تتمنى يدخلها مسلم ومسيحي..

صورة.. عادية جدا.. مش غريبة ولا حاجة!