أنا وإنت وإنتي غالبا في رحلة...طول الوقت وفي أي مرحلة في حياتك هتلاقي إنك في رحلة..سواء طويلة أو قصيرة.. وغالبا فيه محطة وصول محددة انت بتتحرك ناحيتها...ماتخفش مش باكلمك عن الحياة بعد الموت...مش باكلمك عن هتكون فين لما حياتك تخلص..أنا باتكلم عن كل يوم بنعيشه...
دايما فيه سكة..ودايما فيه محطة وصول...
سؤالي هو: إيه الأهم؟ السكة؟ وللا محطة الوصول؟..
أف بقى أنا زهقت..امتى هنوصل؟ - ياه لسه قدامي تلات سنين واخلص دراسة – امتى أولد واخلص من الوجع ده؟
دي جمل ممكن تكون سمعتها وممكن تكوني قلتي بعضها...
السكة أو الطريق ماينفعش من غير محطة وصول..وساعات المشكلة بتكون إننا بنبص على الطريق على إنه حاجة مضطرين نمشيها عشان نوصل للهدف...يعني محطة الوصول حلوة وجميلة وعايزينها...والسكة غالبا طويلة وسخيفة ومملة بس مضطرين...
اللي نفسي ألفت نظرك ونظري ليه هو إننا ينفع نستمتع بالسكة...ينفع نتبسط بالطريق...ينفع نكون مشتاقين نمشي مشوار ممكن يكون طويل وفي نفس الوقت نتطلع لمحطة الوصول الجميلة...
الفرق بين الطفل والكبير والناضج ممكن يتلخص في الطريقة اللي بيتعاملوا بيها مع الطريق...
الطفل بيزن ويعيط وتبقى عايز تلهيه في أي حاجة لغاية ماتوصل عشان مايقرفكش...
الكبير ممكن يستحمل و يلهي نفسه بنفسه لغاية مايوصل...عشان مايقرفكش برضه..
لكن الناضج هو اللي بيستمتع بالمشوار..وبيلاقي حاجة جميلة في كل دقيقة بيمشيها ناحية هدفه..وبيرتب إنه يتبسط السكة كلها مش بس لما يقرب يوصل...
الموضوع مش مجرد إني أستحمل السكة في سبيل الهدف..لأ..الفكرة إني أستمتع بالسكة وبالهدف...
أغلبنا بيقضي وقت في السكة أكتر من الوقت في محطة الوصول..لو بتذاكر طب انت بتذاكر سنين وتحتفل بالتخرج في يوم...لو بتسعى لتكوين أسرة حلوة بتفضل طول العمر في السكة دي...لو بتربي بنتك بتفضلي في مشوار طويل..
لو فكرت هتلاقي إن أجمل ذكرياتك كانت سكك مش محطات وصول...فاكر التمنتاشر يوم في الميدان؟ فاكرة لما كنت مضطر أشتغل شغلانتين؟ فاكرين لما كنا بنسهر نذاكر مع بعض وننام لنا ساعتين ونقوم نكمل؟ فاكر لما كان النونو يفضل يرفس طول الليل؟ فاكر لما تهنا وفضلنا من غير أكل أربع ساعات؟
إن المشوار بيقى جميل أو لأ؟ ده اختيارك...إن السكة تبقى ممتعة وللا مملة؟ ده قرارك...
أنا قررت إني أختار الاستمتاع بالسكك اللي بامشي فيها..
رحلتك الجاية أخبارها إيه؟ تلاتاشر ساعة طيران؟ حمل تسع شهور؟ مذاكرة ست سنين؟ تربية أطفال عشرين سنة؟ اعتصام ومطالبة بالحقوق والعدل شهور؟...
أيا كانت..أتمنى ليك رحلة ممتعة...
Nice ya maged
ReplyDeletei like it so much :)
ReplyDeleteTony Yacoub
I like it,,but i think it is easy to say that it was nice memory coz u have gone thru it and over with it and u reached ur destination. Exactly when u r studying hard and then succeed ,the success makes u forget the hardship of the way,or in other words convert the hard journey to a nice memory but honestly i don't know how practically u can enjoy a hard journey generally without looking at the final destination and reaching it successfully
ReplyDelete3agbani awiiiiiiii , w f3ln 7asesha ht3'yer fekri n7yat 7agat kteer 3mlali 3a2ek w f3ln mstni mnha BS enni awsl ll hadf lkn el sekka nafsha r5ma . god bless you ya 7obi : ) Mina Youssef
ReplyDelete