أهو ارتاح!

زي مافيه دورات تدريبية لكذا حاجة، يعني لامتحانات أو مسابقات وغيره، الظاهر إن فيه مجتمعات أو بلاد أو ساعات أُسر بتحب تقدم خدمة الدورات التدريبية في "الموت".. بحيث إن اللي "عايش" يكون برضه بيتمرّن على قد ما يقدر، عشان لما يجيله معاد موته يكون جاهز

مجتمعاتنا زي ما تكون "قاصدة" الحكاية دي! الموت  

اللي حوالينا في كل حتة مش بس بقى يخلينا "ما نستغربش" لكن كمان "بيموّت" جوّانا حتت صغيرة يوم ورا يوم، على أمل إن لما "موتة ربنا" ييجي معادها، نكون وقتها جاهزين.. ومش نكون جاهزين لأننا عشنا كويس، لأ، لأننا مُتنا قبل كده ١٠٠ مرّة

بتموت جوانا شوية بشوية حتت صغيرة مننا. أجزاء من إنسانيتنا "بتبطّل تعيش" لما الظروف اللي حوالينا تقنعنا إن الحتّة دي مش مهمة. مش لازم تعيش

فيه حتّة فيّ بتموت لما بأتظلم.. لما بأتهان.. جزء منّي بيموت لما مش بأقدر ألاقي طريقة أحقق بيها حلمي البسيط.. أو لما مش بألاقي طريقة أعبّر بيها عن حلمي .. أو ساعات لما بيقولولي إني مش مفروض يكون عندي حلم.. اللي هو نظرية "إنت بتحلم؟!" كأنه ممنوع إن الواحد يحلم

بنموت مع كل خبر عن تحرّش وفساد وإهمال. بتموت جوانا حتة من العدالة الإنسانية البسيطة الأساسية اللي اتولدنا بيها في كل مرة بنشوف ظلم وقهر وعنف وتخويف

الظاهر إن المجهود الخرافي اللي بعض المجتمعات بتبذله عشان يدربّونا على الموت جايب نتيجة.. بقت موتة ربنا أسهل وأرحم وفيها حكمة وعدل ومنطق.. فيها رقّة لأنها بترحم اللي مات من إنه يفضل يكمّل موت يومياً.. والظاهر هاتفضل منطقية جداً جملة "أهو ارتاح".. على أساس إنه اترحم من إنه يفضل يكمّل يموت مئات المرات وهو عامل نفسه عايش  

انتحار مش تقليدي

أحد الظواهر الموجودة في الاستبيانات اللي بتطلب من الناس اختيار إجابة من بين مجموعة اختيارات هي ظاهرة بيسموها ال Primacy Effect   وفيها بيبقى ملحوظ إن الناس عندها ميل أكبر لاختيار "أول اختيار ينفع" من مجموعة اختيارات كتير. أول إجابة تبان أنها صح.. وعشان كده لقوا إن فيه تحيّز أكبر للاختيارات الأولى (مثلا من 1 ل 5 لو عدد الاختيارات عشر اختيارات) في حين إن نفس الاختيارات دي لو اتعكس ترتيبها، برضه بيكون فيه ميل لاختيار "أول اختيار يبان صح".

الأزمة في الموضوع ده إن ما بيكونش فيه فرصة لاختيار اختيار "أفضل" أو "أحسن" أو "أدق" لأني "بأتخمّ" في أول حاجة شكلها صحيح.

الموضوع ده موجود في التواصل بشكل عام. وإحدى النظريات اللي بتشرح التواصل بتتكلم عن فكرة إن العقل بيدوّر على أكتر معنى ليه علاقة بالموضوع بأقل مجهود ممكن. مش مجرد إن العقل بيدوّر "في كل المعاني المحتملة" لجملة معينة.. لأ.. أقرب معنى. وإلا المخ مش هايلاحق على فلترة كل الكلام اللي بيتقال.

افتكرت الموضوع ده مع خبر موت روبين ويليامز وردود أفعال وتعليقات ناس كتير على الخبر. هاسيب التعليق على الخبر نفسه وفكرة الانتحار، وهاسيب التعليق على "الهري" و"الفتي" بحسب تعبير ناس كتيرة، وهاسيب التعليق على حُرمانية الانتحار من عدمها. هاسيب كمان مناقشة هل المنتحر يُعتبر مريض نفسي يستحق التعاطف، أو مُجرم قرر ينهي حياته اللي هي مش ملكه.. وبرضه هاسيب الوعظ والنصايح والتأملات في مدى فايدة حياة المشاهير، وهل هم بجد سُعدا وكل الكلام ده.. هاسيب كل المناقشات دي، لأنها بالنسبالي هي تحت فكرة "أول حاجة بتيجي في البال" لما بنسمع عن خبر انتحار.. وإذا كان روبين ويليامز كوميديان فأعتقد إنه هو شخصياً لو شاف المناقشات "البدائية" دي كان ممكن ببساطة يبتسم ويحس إن الانتحار كان أحسن قرار ياخده!

لكن اللي حابب أفكر نفسي بيه هو الآتي: حواليّ ناس كتير انتحرت من زمان.. وقّفت حياتها. أنهت عُمرها.. من غير ماتاخد منومات ولا تشنق نفسها بحزام ولا تقطّع شرايينها.. ناس باينين أنهم لسّة "صاحيين وبيلعبوا".. بيشتغلوا، وبيتجوزوا وبيخلفوا وبيذاكروا وبيتفسحوا.. وبيصلوا وبيصوموا.. كأنهم عايشين بالظبط!

انتحروا لما حسّوا إن مالهمش قيمة.. انتحروا لما حسّوا إن حياتهم ماتساويش أي حاجة.. انتحروا، بس قرروا يفضلوا يتنفسّوا ويفضل قلبهم يدق.. جايز مكسوفين أو خايفين أو مستحرمين "الانتحار التقليدي"..

على قد ما بيكون موت أي شخص مؤلم، على قد ما بيكون مؤلم أكتر موت ناس كتير حوالينا فاكرين إنهم عايشين.. هم فاكرين إنهم عايشين، وإحنا فاكرين إنهم عايشين!

يمكن يكون صعب إني أمنع حد من أنه يربط حزام حوالين رقبته عشان يموّت نفسه، لكن أخاف أكون يومياً بأساعد ناس إنها تنتحر! خايف أكون في تعليقاتي أو عدم تعليقاتي أكون بأخلي ناس بأتعامل معاهم يفقدوا حتة ورا حتة من قيمة وجودهم.. ناس تكون بتنتحر وتفضل باينة أنها عايشة..

التويت اللي في الصورة مبعوتة في فبراير اللي فات من حد بيشكر روبين ويليامز وبيقوله "أشكرك إنك خليتني أضحك جامد جداً. أنا كنت محتاج لكده".. وكان رد روبين ويليامز عليه في تويت بيقول "أنا كنت محتاج التويت بتاعتك دي. أشكرك!"

أتمنى أعرف ألاقي وأميّز الناس اللي بأحبهم حواليّ، وأكون سبب أدعى لإحساسهم بقيمتهم وقيمة وجودهم، سواء بكلمة أو بابتسامة أو بخدمة أو بوقت كافي أقضيه معاهم.. قبل ما يفوت الوقت وأسأل انتحروا ليه، وهايروحوا فين، والسعادة إيه!

قطر الحياة

من يومين كان فيه خبر من أستراليا عن راجل رجله اتحشرت وهو بيركب القطر بين القطر والرصيف. الراجل ماقدرش يخرّج رجله فلما الناس لاحظت كده، قالوا لسوّاق القطر عشان مايتحركش، وبدأ الركاب كلهم يتحركوا جوة القطر بحيث يكون كل التُقل بتاعهم على الناحية التانية. ماكانش فيه فايدة من الموضوع ده، فراح الناس على الرصيف فضلوا يزُقّوا جسم القطر بعيد عن الراجل لحد ما خرّج رجله.
 

صورة مثالية نموذجية لشيء واحد. لأ مش النظام، ولا التعاون، ولا الذكاء. صورة إن دلت على شيء فهي بتدل على الفطرة الطبيعية البشرية الغريزية في الإنسان إنه يحب الحياة. يحب الحياة كلها. حياته هو وحياة البشر التانيين. فطرة الإنسان العادي المتوسط إنه يتمنى خير وسعادة وصحة الناس التانية.
 

موضوع القطر ده محتاج دراسة فعلاً..  كتير مننا بقى بيؤمن خصوصاً في الأوقات الأخيرة إن الخير والجمال والحق والحب مش هم الطبيعي. الغريزي والتلقائي هو العنف، أو على الأقل المصلحة الشخصية. للدرجة اللي فيها بنعرف نلاقي أسباب أنانية في أفعال الخير. اللي بيتمنى الخير لحد بيحبه بيلاقي شبع ورضا معين، والأب والأم اللي بيضحّوا بيشوفوا مقابل وبيلاقوا سعادة في فرحة عيالهم، لكن ناس في محطة قطر؟ إيه نوع الرضا أو الشبع الأناني اللي ممكن يكونوا حسّوا بيه لما أنقذوا الراجل؟ مين من الناس دي روّح بيتهم وقال لمراته "ده لولايا الراجل ده كان يفضل محشور بين القطر والرصيف"؟ مين من الناس دي اللي كانوا بالميّات اتحرك عشان يساعد الراجل ده علشان يعرفه من قبل كده؟ أو عشان جاره؟ أو عشان مسلم أو مسيحي أو ملحد أو مهندس زيّه؟ مين حتى اتحرك عشان يساعد عشان "عيب  حد في منطقتنا يكون في زنقة ومانساعدوش! الناس ياكلوا وشّنا!"؟
 

الحاجة الوحيدة اللي جمعت الناس دي هي الإنسانية. مافكّروش! إحنا مخلوقين بحاجة تلقائية جوانا بتلاقي في الخير حاجة طبيعية. وعلى غير اقتناع بعضنا إن مافيش خير مصفّي كده من غير غرض! أو إن الخير حتى لو باين إنه صافي لكن ممكن يكون بمبدأ "قدّم السبت"، إلا إن مئات الناس في محطة قطر قرروا كل واحد بشكل فردي وهو مش مضطر إنهم يعملوا حاجة يساعدوا بيها واحد مايعرفوهوش .ده دليل على بذرة خير وحياة موجودة جوانا كلنا، 

مهما حاولنا نطمرها ومهما ظهرت فينا قسوة، ومهما كان حوالينا قتل، فطرتنا حب وخير وحياة..

سلّي صيامك

إن كان فيه شعائر أو طقوس مشتركة في معتقدات دينية كتير وبيساء فهمها، فأعتقد إن الصيام ييجي نمرة واحد في اللستة دي. يمكن قليلين اللي عارفين أي سبب لفكرة الصوم، وأقل منهم اللي ممكن يكونوا فكّروا في السبب الأقرب للصح.

جملة "سلّي صيامك" مش هي الوحيدة اللي بتظهر عدم فهمنا للصيام.. سلّي صيامك ببساطة بتشجعنا على إننا نعمل حاجة وقت الصيام.. نضيع بيها الوقت.. أو ننسّي نفسنا إننا لسة مش هناكل دلوقت.. أو "نغلوش" على جسمنا عشان مايحسش بالجوع.. وممكن تكون حاجة مفيدة أهو نعملها ما دام ما فيش إمكانية لسجارة أو كوباية ميّة أو ساندوتش..

ومع النوايا الطيبة اللي بتبقى مصاحبة لأفكار زي "سلّي صيامك" دي بتيجي حاجات تاني ممكن تكون بنية طيبة أو يمكن ببساطة (أقرب للسذاجة) أو يمكن بغرض ممارسة الصوم على إنه "أننا ماناكلش".. بتيجي بقى في الفئة دي كل النصايح العظيمة بتاعة تاكل إيه في السحور عشان ما تحسش بالجوع.. وتشرب قد إيه وإمتى عشان تفضل أكبر كمية ميّة في جسمك.. وتنام إمتى وتشتغل كام ساعة ونخلّي دُوَل تشتغل بالتوقيت الشتوي في الصيف (على اعتبار إن حلاوة شمسنا، والجو عندنا ربيع طول السنة، فممكن نعتبر التوقيت الشتوي في الصيف هو التوقيت الربيعي!)

لأ وننتقد اللي بياكلوا كتير.. أو اللي مش بيعملوا موائد رحمن.. أو اللي بيعملوا.. أو اللي بياكلوا في موائد رحمن وهم يقدروا ياكلوا في بيوتهم.. ونتعصب ونتنرفز على اعتبار إننا صايمين.. أو يكون الحل الأسلم "صحوني لما المدفع يضرب".

الصوم مش هو إني ما آكلش.. الصوم ببساطة هو الرجوع لاعترافي بإني محدود.. إني مخلوق.. إني معتمد على الخالق في إنه يسدد احتياجاتي.. حتى أبسط احتياجات جسمي في الأكل والشرب.. في الصوم أنا بأتدرب إني أتخلى عن ال control عن السيطرة.. السيطرة اللي في الأكل هي ببساطة إني عارف إني وقت ما أجوع بأفتح التلاجة أو بأكلم ماكدونالدز أو بأعلّي صوتي "ماما، تعالي حمريلي الفراخ اللي جوه دي" على رأي عاطف السكري. عطشان؟ بأعمل نفس الحكاية.. الصوم هو اللي بيخليني "أرتجع" عن الحتة دي.. كل ما أعطش أو أجوع أفتكر إن خالق الكون ده عارفني بالاسم، وإن في إيده حياتي وصحتي، إن في إيده أحاسيسي الطبيعية الأساسية من الجوع والعطش.. في الصوم أنا بأرجع زي الطفل الرضيع اللي مش في إيده خالص إنه يقوم يفتح التلاجة أو يكلم ماكدونالدز..

الصوم مالوش علاقة بالفقرا.. لأن الفقرا كمان بيصوموا.. الصوم مالوش علاقة بإنه "بينظم جسم الإنسان" وكل الكلام اللي بيحاول يُضفي شكل طبي على الصوم.. الصوم ببساطة هو تحرر من سيطرتي وتحكمي، للدرجة اللي فيها بأرجع "أسلم" لربنا وأحط بين إيديه إذا جاز التعبير أبسط وأسهل وأتفه حاجة.. جوعي وعطشي.. بأختار إني أتخلى عن قدرتي على تسديد احتياجاتي البسيطة دي وبأفكر نفسي إن كل حياتي وكل نَفَس داخل خارج وكل حركة وكل نبضة قلب هي من عنده هو.

عشان كده لو مش بأجوع أو أعطش وقت الصوم، يبقى ده صوم؟ لو مش بأحس بالاحتياجات الأساسية دي، يبقى أنا كده صمت؟

عجبني قوي لما حد من أصحابي قاللي "الصوم مش بيبتدي من بعد آخر مرة آكل، لأ، الصوم بيبتدي لما أبدأ أجوع"..

كل المطلوب مني وقت الصيام إني ما أعملش حاجة.. مش مطلوب مني إني أسلي صيامي.. ولا إني أعمل الخير عشان أعمل نفسي إني كويس! مطلوب مني ببساطة إني أرجع "ما أعملش حاجة".. أرجع أعترف إني مخلوق بسيط معتمد بشكل كامل على خالق مبدع ودود أقدر أثق فيه في تسديد حتى احتياجاتي اللي ساعات بأحس إني مش محتاجه فيها..

محتاج في الصوم إني أرجع زي الطفل الرضيع ده.. الفرق الوحيد إني بأعمل كده باختياري.. بأختار إني أقدم وقتي وثقتي وتركيزي لربنا.. بأصدق إن حتى الاحتياجات الأساسية من الأكل والشرب هو الوحيد اللي يقدر يسددها حتى لو في مرات افتكرت بغبائي إني مش محتاجه في كده.. كما لو إني بأجوع وبأعطش لربنا.. عايز أقرّب منه أكتر وأرتوي وأشبع منه هو

مش محتاج أسلّي صيامي ولا حاجة.. محتاج بس إني أجوع وأعطش بجد.. ليه هو

الأمل موجود في نجمة

من العلامات اللي بعضنا بيستخدمها في الكتابة علامة ال asterisk اللي هي *. أحد الاستخدامات بتاعة النجمة دي هي لما بنكتب حاجة غلط في الchat أو في رسالة على التيليفون وبنحاول نصححها. فمثلا بنكتب: 

أنا هتأخرر شوية. 

هتأخر*

استخدام تاني ليها في الكتابة بنشوفه في كتب كتيرة لما الكاتب يحب يضيف تعليق (ممكن مايكونش مهم قوي في صلب الموضوع لكن بيوضّح حاجة للقارئ) فيكتب الجملة وبعدها النجمة دي، وفي آخر الصفحة يكتب footnote فيها المعلومة الإضافية أو ساعات المرجع اللي جايب منه المعلومة أو حاجة زيادة.

لو الموضوع ده اُستخدم في حاجة مش رسمية أو في أغنية مثلا، أتوقع إن الأغنية الوحيدة اللي بتيجي في بالي ليها علاقة بالموضوع ده هي أغنية إيهاب توفيق:

 وخاصمني النوم* 

*يعني بأنام تخاطيف

لكن إن الموضوع يوصل إن التعليق أو الإضافة يكون معناه عكس الكلمة تماماً، أهو هو ده الغريب! الصورة دي عنوانها: منشور جدول انقطاعات المياة بالقاهرة الجديدة، إلخ وطبعاً لطيفة قوي جملة "لحين الانتهاء من المحطة الجديدة الغير معلوم موعد تسليمها".

"أهو كتّر خيرهم. بيقولوا للناس إمتى المية بتقطع".. ماشي.. كتر خيرهم!.. لكن بص على الجدول. جدول أنتيكة! لأ ومرسوم ساعات قال وخطوط.. وحالة المياة.. أخبارها إيه المياة صحيح؟ والحتة دي في الجدول بيقولك حالة المياة يا إما: متواجدة أو غير متواجدة. منظم قوي! وكل ده لازال في إطار "كتر خيرهم". لكن كله كوم والfootnote كوم تاني.. وهنا مُصمِّم المنشور بيقدم تعريف لكلمة "متواجدة" علشان مايكونش فيه أي لغط يعني.. عشان كله يكون على نور.. وهنا تعريف متواجدة أهو.. لأ ونجمتين: **متواجدة: تعني ضعيفة لمن ليس عنده متور مياة / منقطعة للأحياء البعيدة مثل الثالث

حلو قوي إن اللغة بتتجدد، وجميل إن التجدد يوصل لإن الكلمة ممكن يتحول معناها للعكس تماماً.. زي كلمة "بشع" اللي ممكن يكون معناها رائع، وكلمة "جاحد" يعني فوق الهايل.. وغالباً القاموس الشعبي أهو بيزيد وبتنضم ليه كلمة "متواجدة" اللي الظاهر ممكن يكون معناها منقطعة (وجايز ده معناها بس للأحياء البعيدة مثل الثالث!)

لازلت مصدق إننا نقدر نتغير.. ولازلت محتفظ بتفاؤلي وعارف ومتأكد إن الأمل متواجد*

*متواجد: يعني ضعيف / منقطع!

فركة كعب

أخيراً بقى فيه مصدر نستخدمه كدليل إنها "فركة كعب" مش "فردة كعب".. وأنا صغير كنت فاكر إنها فردة كعب.. على اعتبار أنك تفرد مشط رجلك مرة واحدة (فردة يعني) تكون وصلت.. وما كنتش مقتنع هي ممكن تكون "فركة" ليه.. المهم يعني.. الموضوع أكبر مننا وخلاص بقت الجملة المظبوطة فركة كعب بناء على أغنية الجسمي بشرة خير..

لفت نظري شوية حاجات في الأغنية وفي الحاجات اللي حوالين الأغنية دي.. لكن بمناسبة "الكعوب"، افتكرت قصة "كعب أخيل" ولقيت شوية تشابهات مع الأغنية ومع بعض الحاجات اللي حصلت مع الأغنية..

أخيل، في القصة الأسطورية، كان اسم طفل اتولد وتنبأوله أنه هايموت صغير.. عشان كده أمه قررت أنها تحاول حمايته من الموت عن طريق أنها غطسته في نهر، والأسطورة بتقول أنها كانت ماسكاه من كعبه، وأن كعب أخيل هو المكان الوحيد اللي ماجاتش عليه ميّة النهر.. بتكمل الأسطورة وبتحكي عن إن أخيل مات بعد كده بسنين كتير عن طريق سهم مسموم جاله في كعبه. من هنا بدأ استخدام تعبير "كعب أخيل" لما الواحد يحب بتكلم عن أضعف نقطة في جسد قوي جدا.. أكتر حتة معرضة للخطر وسط منظومة أو حاجة كبيرة قوية..

رجوعاً بقى للغنوة، لاحظت إن في مناقشاتنا وسياساتنا وطرق تفكيرنا كمية كعوب لأخيل مدمرة جدا.. الغنوة دي هوجمت كتير واتحبت كتير.. ناس اتريقوا عليها وناس قالوا فيها أحلى كلام.. كل ده مفهوم، لكن اللي ساعات بيبقى مش مفهوم هو "منطق" تكوين الرأي.. مش بيفرق معايا الرأي لو مختلف أو متفق معايا.. لكن يفرق معايا جداً إن الرأي يكون متفق مع الشخص اللي بيقوله.. يبقى الشخص بيطبق منطق معين (أي منطق) في تكوين رأيه.. مش يقول رأيه على حسب مزاجه في الموقف ده

"إيه قلة القيمة دي؟ مطلعين الناس بترقص في الأغنية!"، تلاقي الرد "ماتسيب الناس تفرح!".. نفس اللي بيقول ماتسيب الناس تفرح ممكن يكون بينتقد الرقص وتعبيرات "الفرحة" في أغاني تاني.. بشكل ما الغنوة إدت انطباع إنها تأييد لواحد من المرشحين الرئاسيين مش للانتخابات كلها.. منين الرأي ده؟.. ناس كتير بتمدح "بساطة" الأغنية، وممكن توصف أغاني شبيهة "بالتفاهة" أو "السذاجة" على اعتبار إن الأغنية عبارة عن سرد لأسماء بعض محافظات الجمهورية..

اللي حاصل مع الأغنية هو نموذج مصغّر للي حاصل على الدايرة الأكبر حوالينا.. عايزين الرئيس اللي يفوز يفوز بعدد أكبر من الأعداد اللي فاز بيها الرئيس اللي فات (ليه؟ إيه المنطق في مقارنة امتحانين مختلفين ببعض؟).. وعايزين نعرف مين اللي أبطلوا أصواتهم! أصل شكلهم كتلة واحدة!.. وغيرها..

الأزمة في ده إن لما بأخترع وأألف منطق جديد عشان يخدم رأيي النهاردة، بأنسى إن نفس المنطق ده هايستخدم أو ممكن يستخدم قدام. يعني لو الانتخابات الجاية، الفايز بالرئاسة أخد أصوات أقل من أصوات المرادي، مش هايبقى ريس قوي؟ ولو ناس أكتر نزلت الانتخابات يبقى إيه الوضع؟ ولو الغرب مبسوط؟ طب لو متضايق؟ طب لو الغرب مش مهتم؟.. عشان كده دعوات كتير من اللي بتطالب الناس تنزل أو ماتنزلش أو تبطل أو تصوت لده أو تصوت لده ممكن تقابل بالتهكم على سذاجة منطقها مش على محتوى الدعوة نفسها.. سذاجة الدعوة دي هي اللي ممكن تكون "كعب أخيل" في المستقبل لما يحصل حاجة مش على هوى منطق الدعوة دي!

حتى لو كانت فركة كعب، فمحتاج إني أحافظ على اتساقي مع نفسي في تكوين الرأي.. مش عايز منطقي ما يكونش منطقي بالنسبالي، ويرد في وشي بعد كام سنة لما الظروف تتغير.