القاموس والتوكتوك

من أطرف قضايا المحاكم كانت قضية رفعتها ماكدونالدز على مجموعة فنادق اسمها Quality Inns  سمت سلسلة من فنادقها McSleep .. ماكدونالدز قالوا في القضية إن مقطع ماك  Mc خاص بماكدونالدز وإن شركة الفنادق دي بتحاول تستغل شهرة ماكدونالدز في الترويج لفنادقها.. ماكدونالدز كمان قالوا إن المستهلك عارف إن بقى فيه حاجة اسمها McLanguage أو لغة ماك وفيها كلمات زي ماك فرايز وماك تشيكن وMcFish  و McShakes وإن المقطع ده (ماك) هو جزء من الشركة وصورتها قُدام المستهلك..

المهم إن شركة Quality Inns  اللي كانوا هايعملوا سلسلة McSleep جابوا محامين وقالوا في حيثياتهم إنهم بيستخدموا مقطع Mc لأنه مقطع مشهور لأسماء اسكتلندية ولأن الاسكتلنديين مشهورين بإنهم موفّرين ومش بيصرفوا مصاريف كتير وإن سلسلة الفنادق دي هاتستخدم الصورة الذهنية دي عشان توضح للمستهلك إن أسعارهم معقولة..

عشان يثبتوا إن كلمة ماك مش بس بتاعة ماكدونالدز راحوا استعانوا بخبير لُغوي اسمه Roger Shuy والراجل ده استعان بقواميس بتبين إن مقطع Mc دلالته هي "أساسي وموائم ومش غالي وقياسي"..

راحت ماكدونالز ماسكتتش.. بدل مايستعينوا ببتاع لغة راحوا عملوا بحث يشوفوا المستهلك العادي بيفهم إيه من مقطع ماك.. وطبعا نتيجة البحث كانت إن المستهلك العادي ربط مقطع ماك بماكدونالدز..

الطريف في القضية دي إن المحكمة حكمت لصالح ماكدونالدز وأخدت بكلام البحث العملي مش كلام القواميس.. لأن هو ده اللي الناس العادية هاتفهمه..

وإحنا النهاردة بنعيش عصور عظيمة من عصور "النهضة" و"الديمقراطية" و"حرية المعارضة" و"استفتاءات" و"انتخابات نزيهة" و"دستور توافقي".. هل عايشين الكلام ده بجد؟ ولّا بنقدم للكلمات دي نماذج جديدة من تفسيرات هي العكس بالظبط؟

هل الكلمات دي "اتعلم عليها" خلاص إنها باظت وحمضت وبقت مثار للسخرية والتريقة وهز الراس ومصمصة الشفايف؟

هل لسّة عندنا فرصة إنه نحتفظ بالمعاني الأصلية للمفاهيم دي؟ ولّا وصلنا لمرحلة إن الكلام ده بقى يضحّك؟

خسارة إن كلام من كام سنة كان معناه "تقدم" و"تنوع" و"رأي آخر" و"اختيارات" يبقى النهاردة معناه ناس بتموت وتزوير وتزييف إرادة.. تسلّط ودكتاتورية.. غباوة وتحكّم رأي وتجبّر..

الحكم في النهاية مش على الكلام ومعناه في القاموس.. النهاردة ماحدش عبيط .. هاتلي ألف قاموس يكلمني عن "النهضة" وأنا ممكن أجيبلك ألف ميّت ومُصاب ومُحبَط ومُهاجِر وفاقد أمل.. هاتلي ألف شرح على قد إيه النهضة حلوة.. وانا ممكن أجيبلك آلاف الدلايل إن لسة فيه قطارات بتتحرق وناس بتموت ومستشفيات مش شغالة ومدارس بتحرّض على الفتنة واستفتاءات أقرب للهزار. 

شيل النهضة من القاموس.. ووريهالي في الشوارع والمدارس والمستشفيات والهيئات والوزارات والقطر والأكل والمترو والمايكروباص.. والتوكتوك يا سيدي..

مش شوكولاتة

زي اليومين دول من 9 سنين كان فيه مقال بيتكلم عن "انتصار لذيذ" حققته إنجلترا في معركة غريبة شوية من نوعها.. المعركة كانت على "الشوكولاتة" وعلى سماح بعض دول الاتحاد الأوروبي للشوكولاتة الإنجليزية إنها تتباع بحرية في الدول دي  تحت "مسمى" شوكولاتة!!

أنا مش باتكلم على سوء تفاهم أو فرقعة أو خبر طريف.. أنا باتكلم عن معركة فضلت مستمرة 30 سنة (1973-2003)..واتأثرت فيها شركات كبيرة زي Cadbury وNestle .. أسبانيا وإيطاليا كانوا عاملين زي حصر لمبيعات الشوكولاتة المتصنعة في بريطانيا عشان فيها نسبة 5 % دهون نباتية بدل ماتكون معمولة من زبدة الكاكاو الخالصة!

وعلى الرغم من إن فيه اتفاقية واضحة إن ممكن الشوكولاتة يتضاف عليها نسبة قليلة من الدهون النباتية طالما إن المكونات مكتوبة بوضوح على الغلاف إلا إن أسبانيا وإيطاليا كانوا مصرين على تسمية الشوكولاتة الإنجليزي: "بديل للشوكولاتة".. المنتجات دي كان ممنوع تتباع تحت مسمى شوكولاتة والسبب اللي كانت الدول دي بتقدمه هو "حماية المستهلك"..

وعشان كده حتى لغاية دلوقتي هتلاحظ إن منتجات كتير مش مكتوب عليها خالص "شوكولاتة" على الغلاف.. هتلاقي مثلا: Dairy Milk أو حاجات شبيهة.. وفي بعض الإعلانات ممكن تلاقي تفادي شيك للكلمة.. فتلاقي حاجات زي: طعم السعادة.. دلّع نفسك مع كذا..

وعلى الرغم إن الموضوع ده شكله تافه إلا إنه في منتهى الخطورة.. حياتنا كلها ما هي إلا "مسميات".. وكتير من السياسيين بيدفعوا كل اللي معاهم مش لتغيير مفاهيم ولا لتصحيح أخطاء ولا حتى لوصول لأراضي مشتركة.. لكن بيدفعوا كتير من فلوس ووقت ومجهود لتغيير "أسامي"..

واجهنا كتير محاولات بتقول: معقول ثورة يقودها واحد اسمه وائل وشادي؟ أكيد مش "ثورة".. لأ ماتسميهاش ثورة.. سميها "فورة" سميها "غضب شعبي".. لأ ماتقولش شهدا قول "ضحايا".. قول "قتلى"...ماتقولش "مدنية"..

ماتقولش "انتهاك" ولا "هتك عرض" قول مثلا.. "فعل مخل بالحياء!!".. أو "كشف عذرية".. اختار اسم شيك حتى لو الكل عارف إن مصيبة حصلت..

مش هتقدر تضحك عليّ لما تختارلي اسم "شيك" للمصايب اللي انت بتعملها..

مش عايز يتضحك عليّ بمسميات بتحاول تخفف أو تهول من معاني..

عايز أرجع من تاني للمنطق في التقييم.. وقبل ما أحكم على حاجة عشان اسمها أبص للمحتوى وللجوهر.. عايز أرجع أسمع رأيك من غير ما أحاول أعرف اسمك الثلاثي عشان أشوف انت أشرف أحمد رمضان ولّا شوقي أبانوب فيلوباتير!

وهافضل أحب آكل كل حاجة طعمها حلو وبتديني طاقة وإحساس بالنشاط وياريت لو فيها بندق حتى لو مكتوب على الغلاف من برة: "مش شوكولاتة"!