السهم المتين

من أبسط الرموز اللي مختلف الثقافات والشعوب بتفهمها رمز السهم.. ببساطة علامة بتشاور على اتجاه أو على حاجة تانية.. وعلى الرغم من أهمية الرمز ومدي جدية الحاجة اللي بيشاور عليها إلا إننا نادرا ما بنبص على السهم نفسه.. عمرنا ما بنشوف مثلا تشريح لجسم الإنسان في كتاب لعلم التشريح ونلاقي سهم بيشاور على غدة معينة مثلا ونقول "يا سلام! أما سهم!.. لولاه ماكناش عرفنا الغدة الدرقية هي أنهي زغميدة في الكلاكيع دي".. ماحدش بيقول كده.. (أو على الأقل مش هتقول كده لو بتذاكر بصوت عالي وفيه احتمال حد يسمعك!)

وطبعا مظلوم السهم.. ماحدش عايز يبقى سهم.. كله عايز يبقى الغدة الدرقية.. أو أي غدة تانية تحمل اسم أكثر رومانسية!

المهم إن في نظريات القيادة والإدارة بدأ من وقت طويل تغيير في مفاهيم بخصوص "القائد".. نظريات زمان كانت بتبص على القائد من منظور "شخصيته".. مولود قائد.. القيادة في دمه.. ونظريات تانية بدأت تبص على القائد "بيعمل إيه" وتحاول تقدم نصايح للناس اللي عايزين يكونوا قادة إنهم يعملوا كده..

لكن الملفت إن فيه توجه بدأ يبص مش على القائد.. مش على أول واحد في المنظومة.. مش على الرسام المشهور.. مش على رئيس الجمهورية.. لكن على "السهم".. على أول واحد "صدق" إن الشخص ده ممكن يكون فنان.. أول واحد "شاور" عليه وقال يا جماعة اقروا للكاتب ده.. اسمعوا صوت المغني الجديد ده..

"السهم" نفسه ممكن صوته يكون وحش.. ممكن يكون مش بيعرف يمثل.. ممكن لا يصلح يكون قائد.. بس من غيره يمكن مش ناس كتير تتشجع إنها "تبص" على واحد هيبقى في يوم من الأيام حاجة..

موسيقيين كتير اكتشفوا فنانين وفي بعض الحالات كمان إدوهم اسمهم.. مدرسين كتير شافوا في طلبة كانوا "شوية أطفال" حاجة كبيرة.. أمهات وآباء.. أصدقاء وإخوات شجعوا وشددوا وشاوروا على واحد شافوا إنه في يوم من الأيام ممكن يبقى قائد..

تشجيعك واقتناعك بحد مش مجرد تصديق فيه.. لكنه بمثابة سهم بيشاور بوضوح على واحد موهوب.. أنا وإنت مش شرط نكون موهوبين.. لكن حوالينا من أصحابنا وزمايلنا طاقات رهيبة.. ينفع نكون بنشاور عليهم.. ومين يعرف؟ ممكن نكون السبب في إن آلاف يسمعوهم ويشوفوهم..

من أحلى الفيديوهات اللي شفتها مؤخرا.. بسيط بزيادة.. بس فيه المفيد.. سيبك من أول واحد وركز في التأثير الكبير لأول واحد تجاوب معاه..

ممكن ماكونش قائد.. لكن ينفع آخد المخاطرة إني أكون أول تابع.. أول واحد شاور على شخص مش معروف ممكن يكون رئيس.. وأكون أول سهم يشاور على قائد أو فنان أو عمل جميل..

لما تكبر شوية

لو حد منكم يفتكر كان فيه زمان كده مواد دراسية معينة مطلوب فيها نجلد الكشاكيل والكراريس..فاكرين؟ وطبعا كشكول التعبير يتجلد جلاد لون أحمر والإملاء جلاد أزرق والتطبيق بني! المهم يعني..لو فاكر دي يبقى أكيد فاكر النصايح اللي كانت بتبقى مكتوبة في ضَهر الكراسة أو الكشكول أو حتى الكشكول وش ووش!

جمل زي "اغسل يديك قبل الأكل وبعده".."صوتك العالي دليل على ضعف موقفك" وما إلى ذلك من وعظ ونصايح وكلام شكله جميل..افتكرت الجمل دي لما جت في بالي جملة "الصغير يحترم الكبير والكبير يعطف على الصغير"..مش متهيألي إن الجملة دي كانت مكتوبة معاهم..مش محتاجينها تبقى مكتوبة أصلا..لأنها محفورة جوانا..بنطبقها يوميا..بقت جزء من كياننا وفكرنا والتوجه العام بتاعنا..

طبعا الكبير يعطف على الصغير..ليه؟ أصل الصغير ده مسكين غلبان..مابيفهمش..مالوش رأي..أصل الصغير مافيش في إيديه أي سلطة..أصل الصغير مالوش أي تأثير..والصغير هنا مش بس الصغير سنا..لكن كمان الصغير مقاما وفكرا وخبرة..الأقل مني يعني..يعني أي حد أنا أحسن منه..

مين اللي قال كده؟ مين اللي قال إن الصغير سنا موجود عشان بس  نهتم بيه ونكبره لغاية مايوصل للسن ال"صح" ويبقى مفيد..أعتقد إن ده مبدأ الخرفان :)..تأكلهم تأكلهم عشان يسمنوا كده ويكبروا..غير كده مالهومش لازمة!

الدول الكبيرة جزء من تنافسها هو إنهم يثبتوا مدى احترامهم وتقديرهم للأطفال والمسنين وذوي الاحتياجات الخاصة وفئات كتير من المجتمع بتبدو كأنها جديرة بمجرد "العطف" أو "الحنان" أو "يا عيني" و"يا حرام"..بيمتد احترامهم للحيوان والنبات كمخلوقات جديرة بالاحترام..

احترامي ليك مش لأنك أكبر سنا..ولا لأنك مديري..احترامي ليك نابع من إنك إنسان..إنسان يعني صنعة ربنا..خلقة جميلة منه سبحانه..توليفة مليانة عبقرية..تركيبة أنحني ليها احترام وتبجيل..

الله ماخلقش حاجة مش كاملة..وللا إيه؟ ماخلقش أطفال يستحقوا نُص احترام..مؤقتا يعني لحد مايكبروا ويبقوا جديرين باحترام كامل..

لما الشعوب بتحترم أطفالها وشبابها مش بتحترمهم لأنهم صنّاع المستقبل ورجال الغد وقادة الأمة فيما بعد..بتحترمهم لأنهم كمان صنّاع الحاضر..وجدعان اليوم (رجالة وستات) وقادة الأمة النهاردة..

الشعوب اللي ثارت على حكامها كان سبب رئيسي في ثوراتها هو إحساس الشباب بالذات بالتهميش على أفضل تقدير وبعدم تلقي الاحترام اللائق..إحساسهم بالمهانة في بلدهم لأن لسان حال بلدهم: "لما تكبر هحترمك" :)

كل حد فينا بيحس بالإحساس ده لما يكون في موقف هو فيه الطرف الصغير..في بيتك مع أبوك..في الجامعة مع مدرسك..في الشغل مع مديرك..محتاجين نصحح الوضع دة كمان للمواقف اللي فيها أنا الكبير..

مع أخويا الصغير..مع الموظفين اللي تحتي..مع حارس العمارة..مع اللي بيقدملي الأكل في مطعم..مع مواليد بعد سنة 2000..مع الطلبة اللي بتدرسهم..مع فريق الكورة اللي انت بتدربه..مع أصحابك اللي على تويتر اللي عندهم عدد أقل من الناس اللي متابعينهم!..مع اللي بيسوق التاكسي..مع اللي بيجيبلك المشاريب على القهوة..مع الكوافير اللي بيعملِك شعرك..مع اللي بيصلح عربيتك..مع الدكتور اللي بيعالجك..مع كل حد أنا ممكن أحس إنه أصغر مني لسبب أو لآخر..

باحترمك..

باحترمك لأني باحترم فيك الصورة العظيمة اللي خلقك عليها ربنا..صورة فيها إبداع وجمال وكل ما يدعو للاحترام..باحترمك لأني متأكد إن ربنا كمان بيحبك ويحترمك

هختلف معاك في الرأي والتوجهات والمهارات والميول والذكاء والسن..وهحترمك..

أحترمك يعني أسمعك..أحترمك يعني أحس باحتياجاتك..أحترمك يعنى أسعى لخيرك..أحترمك يعني أفكر في رأيك..أحترمك يعني أعرف إنك مميز..أحترمك يعني أشوفك زي ما أحب إنك تشوفني..أحترمك يعني أكلمك كويس..أحترمك يعني أقدملك تقدير ومحبة وود كإنسان زيي..

لو رَجّعوا تاني النصايح المكتوبة على الكشاكيل..وإدوني اختيار أكتب إيه..احتمال أختار: "احترم كل اللي خلقه ربنا"..وممكن برضه: "اغسل يديك كل لما يتوسخوا" إشمعنى يعني قبل الأكل وبعده بس؟ :)

احنا مش وحشين قوي

في كل الدواير اللي أنا وانت بنتعامل فيها دايما فيه قائد...واحد كده مُلهِم للمجموعة..شخص الناس تحب تمشي وراه..حد بنبقى عايزين نسمع رأيه..مستعدين نعمل اللي يقول عليه..

دايما هتلاقي قائد في شغلك..بيتك..شلة أصحابك..منطقة سكنك..شخص جذاب ويعرف يجمع الناس..الناس بتحبه وتحب تمشي وراه..أنا مش بتكلم عن مدير لكن عن قائد..يعني مصدر إلهام وأمان وتشجيع وحشد للي حواليه...

بص حواليك كويس..لو مالاقيتش قائد ممكن يكون السبب هو إن انت بنفسك القائد للمجموعة دي...يا بختهم لو انت قائد كويس..:)

القادة في مختلف المجالات بيسعوا دايما إنهم يحافظوا على التركيبة العبقرية دي..اللي فيها توازن بين الحزم والمرونة..التشجيع والتحفيز على تحقيق نتايج..الاهتمام بالفرد وفي نفس الوقت الهدف العام ورؤية المجموعة..

وعلى مستوى العالم وفي كل الدواير تقريبا..بتتوحد رؤية كل القادة في إنهم عايزين يتنقلوا مع المجموعات بتاعتهم من نقطة نسميها" أ" لنقطة "ب"..نقطة "ب" ممكن تكون هدف إنتاجي أعلى..أو عدد ساعات شغل زيادة..أو استكمال لتدريبات أكتر..أو بناء ديمقراطية..أو حصول على شهادة أعلى...الأمثلة مالهاش نهاية..بنفس عدد الأهداف المختلفة اللي في الدنيا واللي بيكون فيه دايما قائد شايف الطريق لقدام وبينوّر السكة للي معاه..

في محاضرة رائعة لبيل هايبلز كان بيتكلم عن الفكرة دي..كان بيقول إن القائد بيبذل مجهود رائع في إيه؟

شرح الوضع الجميل لو وصلنا للنقطة ب..السكة اللي هنمشيها..الصعوبات اللي ممكن تواجهنا وهنتغلب عليها إزاي..شطارتنا كلنا كفريق عمل وكأفراد وإزاي احنا أنسب ناس للمهمة دي..

فيه حاجة ناقصة؟

هو اللي ماكملش تعليمه واشتغل أي شغلانة..ماكانش عارف إن التعليم أحسن؟

هو الشعب اللي زهق من ثورته وقرب يقول خلاص كفاية مش لاعب..مش عايز مستقبل أحسن؟

هو أنا لما بارمي بواقي أكل وشرب في الشارع..مش عارف إني ممكن بلدي تكون أنضف لو ماعملتش كده؟

هو أنا لما أختار اللي يمثلني في البرلمان حسب العيلة بتاعته أو لأنه هيديني فلوس أو لأنه هددني..مش عارف إن  ممكن بلدي تبقى أحسن لو أنا ماعملتش كده؟

بيل هايبلز بيرجع يكمل ويقول إنه بالإضافة للمجهود الرائع اللي هبذله كقائد عشان أحببك في نقطة "ب"..إلا إن فيه حاجة ناقصة..فيه حاجة غايبة عن أذهان بعض القادة..الحاجة دي هي إني كمان محتاج أكرّهك في نقطة" أ" ..أنا وانت محتاجين نفهم أننا ماينفعش نفضل في"أ".."أ" وحشة.."أ" مضرة.. متعبة..

خدت بالك إن الشعوب اللي كملت ثوراتها كانت الشعوب اللي وصلت لمرحلة مش قادرة تستحملها؟ في حين إن شعوب تانية مش ناوية تكمل على الرغم إن حالتها أفضل شوية..تصحيح: مش "على الرغم"... لكن "بسبب"

الشعوب اللي بنت نفسها بعد الحروب أو بعد التعرض لفيضانات وصلت لمراحل متقدمة جدا مقارنة بشعوب "ماشي الحال" فيها..

عند معالجين الإدمان بيستخدموا تعبير "الارتطام بالقاع" تعبيرا عن وصول المدمن لأسوأ حالة وغالبا بسببها بيسعى للعلاج..مقارنة بمدمن حاسس إنه "مش وحش قوي"..."آه مدمن بس عادي يعني"

لما حاولت تشجع الناس إنهم ينضموا ليك في مطالباتك بالعدل والحرية والديمقراطية..هل لما اتكلمت مع حد عن التعذيب أو الفساد أوالتجاوزات اللي بتحصل مع بعض الناس ..سمعت جمل زي :"أنا عن نفسي ماشفتش منهم حاجة وحشة!" ؟

لو انت القائد..انت الوحيد اللي شايف الرؤية كاملة..أنا مش شايف غير دلوقتي وهنا!

اقنعني بمحطة الوصول..لكن ماتنساش تقنعني إيه اللي يخلليني أسيب هنا..ماتحبطش لما ماأوافقش آجي معاك مكان كويس..فهمني الأول ليه ماينفعش أفضل في الحتة اللي أنا فيها..

وإلا..مش هاتعتع من هنا!