هو اللي كسب

عجيب أمرنا كبشر في نظرتنا لحكاية الخير والشر و"الصراع" بينهم! أقصى أحلامنا وتخيلاتنا عن انتصار الخير (زي ما بيحصل كده في الأفلام) إن القاتل يتمسك وإن الحرامي يتسجن وإن النصاب يتنصب عليه... مصيبة لو افتكرنا إن انتصار الخير هو بإعدام الأشرار! أعتقد إن إعدام الأشرار هو صورة من انتصار الشر، لأن فيه حتى لو الشرير أو النصاب أو الحرامي أو القاتل اتعاقب فهو بيتعاقب بأسلوب الشر، بطريقة الشر، بالكتالوج بتاع الشر برضه!

بيحصل إيه لما جريمة إرهابية بتحصل؟ أغلبنا بيشوف في ده شر وغلط وحرام.. بنعمل إيه تجاه الشر ده؟ أنا هنا مش بأتكلم على مستوى الدول وردود الأفعال الرسمية، لكن إحنا كأفراد جوانا رغبة إننا ننتصر على الشر ده، عايزين نغلب الشر ده، بنعمل إيه؟ بعد ما بنشجب وكده.. غالبًا بنكمل في دعم الشر.. يا إما بنكره المسلمين (لو اللي أعلنوا عن مسئوليتهم بيقولوا إنهم مسلمين) يا إما بنشوف في اللي بيكره المسلمين إنه عنصري (فبنكرهه أو بنحتقره) يا إما بنتريق على اللي بيغير صورة البروفايل لعلم دولة تانية، يا إما بنشوف إن اللي بيتريق ده ساذج وسطحي، يا إما بنقول إشمعنى ما حطش علم دولة أقرب لينا.. وممكن فينا ناس تشمت في اللي حصل، وممكن ناس تبص بنظرة دونية على اللي بيشمت.. إلى آخره..

لستة طويلة رائعة! لستة طويلة متكاملة من جوانب مختلفة، لكنها كلها بتصب في ناحية الشر.. بدرجات.. سواء كُره أو احتقار أو شماتة.. أو إشمعنى.. أو على أحسن الفروض رغبة في الانتقام، واستعداد لقتل كل قاتل..

موضوعي مش الردود الرسمية للدول والمفروض يعملوا إيه ومايعملوش إيه.. لكن اللي بأخاف منه إنه الشر يكون "منتصر" للدرجة اللي فيها عشان "أحاربه" أنا بأستخدم "أدواته".. فبأكره وأتريق وأسعى للانتقام وأتشفى وأدعي على القاتل والظالم والنصاب.. كما لو إني بأحاول "أولع في النار" عشان أقضي عليها!

أكبر انتصار للشر هو قساوة القلب.. قساوة القلب اللي فيها أفرح لما "أشفي غليلي" بإني أشوف القاتل بيتعذب ويتقتل..

يمكن أغلبنا مش صناع قرار واحتمال ضعيف إننا نكون كأفراد في مواقف بتحتم علينا نعلن حالة حرب أو نحكم على حد قانونًا، لكن في حياتي اليومية أخاف إن الشر يكون هو الزعيم.. هو اللي بيملي شروطه.. حتى لو بأوجه الشر ده للأشرار.. قلبي يتقسى فأكره اللي يغير بروفايله وأحتقر اللي بيتبع معتقد معين وأشمت في ناس ما ساعدوناش قبل كده.. والظريف مع ده كله إني أفضل فاكر إني في معسكر الخير!

الخير يكسب لما شروط الخير هي اللي تسود.. لما في بيتي ومع أصحابي واللي بأتعامل معاهم يكون الأساس هو الخير والجمال والحب.. بدل ما يكون مع كل انتصار وهمي للخير (زي بتاع الأفلام كده) يكون برضه الشر هو اللي كسب!

بيت الرعب

لفت نظري خبر يبدو تافه على أغلب المستويات.. عنوان الخبر هو إن فيه مجموعة من العاملين في متحف في بريطانيا  بيدوَّروا على طفل كان من حوالي سنة كسر دورق أثري من غير ما يقصد، وطبعًا الولد ساعتها حس إحساس صعب جدًّا، وهدف المتحف إنهم لما يلاقوه يطمِّنوه إنّهم صلَّحوا الدورق!

إيه ده؟ إيه الفضا ده؟ ماتسيبوا الواد يخاف! ماتسيبوه يكره حياته كده ويكره المتاحف، ويحرَّم ما ياخدش باله بعد كده! سيبوه يعيش مرعوب من نظرات الناس لو وقَّع حاجة وكسرها، ماهو غلطان.. أينعم عنده حوالي 4 أو 5 سنين بس، لكن برضه! أهو درس عشان مستقبله.. هو إحنا بنعمل كده ليه؟ مش عشاننا! إحنا خايفين عليه! (خايفين برضه!)

الخوف حوالينا في كل حتة، خايف على ابنك تخبطه عربية لأن الشارع اتحول لتلات اتجاهات! وخايف على أختك حد يضايقها في الشارع ومراتك حد يعاكسها في المواصلات وقريبك يتقبض عليه بالغلط.. وخايفة عيالك ما يدخلوش كلية كويسة، وخايف لو اتجوزت وخلفت يا ترى هاتلاقي فلوس تكفي ولا لأ..

نكاد نكون بنحب الخوف وبنحترمه، بنقدَّره كده، وقليل ما بننساه.. لدرجة إننا بنخاف لو ضحكنا زيادة، ونخاف لو حد حصله حاجة كويسة، ونخاف نشارك أخبار أو صور مفرحة أحسن نتحسد.. ده إحنا حتى بنستخدم تعبير "فلان بيخاف ربنا" تعبيرًا عن مدى ورع وتقوى الشخص، ولو حد سأل نقصد إيه نرد ونقوله لأ إحنا "بنخاف ربنا" مش "نخاف من ربنا".. شوف الفرق الرهيب!

حبنا للخوف وتقديرنا ليه هو اللي مدِّي لبرامج الإرهاب والتخويف التليفزيوني قيمة، ده فيه يا جماعة مواطنين بيفتحوا التليفزيون يتفرجوا على ممثل أو حد مشهور وهو ميِّت من الرعب وخايف يغرق أو ياكله أسد أو ينط من الطيارة، والمواطنين دول بيتفرجوا ويضحكوا! يبتسموا! يتبسطوا ويشعروا براحة كده وسلام!

إحنا حتى ألطف تعبيراتنا اللي بتعبر عن محبتنا فيها جمل زي "هاموّتك لو ماشفتكش الأسبوع ده"، "أقطع دراعي إن ماكانش فلان هايقول كذا" و"اللي يقول عليك حاجة وحشة أخزقله عنيه"، فإحنا بنجامل مجاملات لطيفة بكلام مليان موت وتخزيق عينين وقطع إيدين وكسر رقاب وما إلي ذلك!

حبِّي لحبايبي المفروض مش بس يخلِّيني "خايف عليهم" لكن يشجَّعني أطمِّنهم وأتطمِّن لهم.. الحب الأصيل هو اللي يطرد الخوف، هو اللي يسعى عشان المحبوب يحس بأمان مش بالخطر، الحب اللي بجد هو اللي يدوَّر على فرص عشان يطمِّن ويهدِّي.. يمكن حاجات تبان عبيطة زي مثلا إن متحف يدور على طفل صغير عشان يطمِّنه إنهم صلَّحوا الدورق اللي كسره بالغلط، يمكن الحاجات الصغيرة دي هي اللي بتقاوم ثقافة الخوف وبتسمح للناس يعيشوا بشكل عام في مناخ مطمئن مريح وهادي مش في بيت رعب طول الوقت!

ماما زمانها جايّة

كل فترة كده بييجي عليّ أنا وأصحابي هاتف (!) يخلينا كده نفتكر أغاني الطفولة القديمة..طبعا حاجة جميلة وكل حاجة لكن ساعات المكان بيبقى مش مناسب قوي..يعني لو إنت وأصحابك قاعدين على قهوة مثلا والدنيا زحمة وافتكرتوا أغنية "أنا أنا أنا أبريق الشاي" وبدأتوا تغنوا بصوت عالي ممكن تلاحظ نظرات جديدة من الناس..مش بيبقى استغراب..ولا متضايقين..بيبقوا "متغاظين" عشان مش فاكرين كلمات الأغنية..وانت طبعا وأصحابك عمالين بتتحدوا بعض مين يفتكرها كلها..

الأغاني دي كانت جميلة وللا لأ؟ مش عارف..بجد مش عارف..مع الموجة العامة اللي بتقدّس كل حاجة قديمة لمجرد إنها قديمة بقيت أحاول أفكر كذا مرة قبل ما أقول "آة طبعا جميلة" (مش متهيألي إن كل حاجة قديمة حلوة..اللوحة القديمة والجبنة القديمة غير الجزمة القديمة تماما!)

المهم ..الأغنية اللي لازقة في دماغي بقالها شوية هي "ماما زمانها جايّة".. غناها محمد فوزي بطريقة جميلة وشقية.. لكن الكلام بيقول إيه؟..

عارف الواد اللي اسمه عادل جه الدكتور وعمله إيه؟ لقى رجليه كانوا زي الفتلة بص شوية جوة عنيه..راح مديله حقنة كبيرة..عارف إدّاله الحقنة ليه؟ (ليه يا ترى؟) مابيشربش اللبن الصبح وكل أصحابه ضحكوا عليه..وأهو من يومها شرب وبيكبر وإتربّاله عضل في إيديه!

طبعا هو بيقول الكلام ده لولد صغير يا حرام مستني مامته..فبيحاول يطمنه! بس بدل ما يطمنه قرر "يرعبه" عشان يسكت خالص لحد ما "ماما" تيجي! وأتوقع إن الكام جملة دول من الأغنية كفيلين بإنهم يخللوا الولد: خايف من الدكتور..مرعوب من الحقن.. مش طايق "كل أصحابه اللي ضحكوا عليه"..طفشان من اللبن.. وبيكره كل العيال اللي اسمهم عادل!

لأ والظريف إن بعد كل الكلام ده يقول له: "ماما زمانها جاية".. وقتها طبعا الجملة بتفقد "الأمل والإشراقة" المقصودين وبتبقى  عاملة زي "ماما زمانها جاية وهتورّيك".. أو "لما ييجي أبوك هقول له!"

عادي..بيحصل إن فيه جزء من أغنية يُخفِق (!).. لكن لأ..إزاي؟ تخلص الغنوة على كده؟ لا لا لا..

وأحمد برضه إيده مربوطة (يا دي النيلة!) ومامته عارف ليه مخاصماه؟ (ليه؟ عمل إيه راخر؟) كان بيحب تمللي يلعب بالكبريت ويشيله معاه .. وفي يوم جاب كام عود ولّعهم ..وأخته بوسي كانت شايفاه (سوسة البت بوسي دي!) راحت النار ملهلبة إيده ولسّه إيديه الاتنين واجعاه.. وأهو من يومها لا بيتعفرت ولا بيشيل كبريت وياه!

لكن تيجي الجملة اللي مليانة أمان واطمئنان إن "ماما زمانها جاية!"

رعب..رعب..رعب..طول الوقت!

"لو ما ذاكرتش هتسقط وتبقى فاشل زي الأسطى سيد" (طبعا الأسطى سيد شخصية موجودة في نطاق كل أسرة لكن يحب الأب والأم ينسجوا –حلوة ينسجوا دي- القصص المبالغ فيها عن إن سبب فشله إنه ماكانش بيذاكر وهو في رابعة ابتدائي.. غني عن الذكر إن الأسطى سيد بيكسب فلوس أكتر من الأب والأم مع بعض.. وفي الغالب بيقول لعياله: لو ضيعتوا وقتكوا في المدارس والكلام الفاضي ده هتبقوا زي الأستاذ أشرف ومدام انتصار!)

"إذا ما عملتش كده ربنا هيزعل منك وهيوديك النار" .. "ماحدش هيرضى يتجوزك" .. "مش هتخلف!" ..

ولسّة مستغرب إننا لحد النهاردة واحنا كبار طول الوقت –طول الوقت- خايفين من حاجة؟

"لو السلفيين وصلوا للحكم هيقطعوا ودان ومناخير الناس".. "لو الليبراليين مسكوا الستات هتتمنع تلبس الحجاب" .. "لو الإخوان بقوا في السلطة مش هيبقى فيه سياحة" .. "لو المسيحيين وصلوا للرئاسة هيلغوا المادة 2"... خوف.. خوف..

مع كل جملة تخوّف أنا باقولها لابني أو صديقي أو مراتي..أنا باحتاج ل 9 أو 10 جمل تشجيع وكلام إيجابي عشان تمحي الأثر!

أنا عارف إنه سهل إني أشوف الحاجة الوحشة وأشاور عليها.. أفترض إن الحاجة الكويسة أمر مسلّم بيه.. بس بجد أنا وانت مش بنعرف إمتى الجملة الكويسة اللي باقولها ممكن ترفع واحد من ضيقة..وكلمة تانية تخليه يكرة المذاكرة ويتضايق من ربنا ويخاف من البلد..

أعرف بنوتة صغيرة مامتها قالتلها "العصفورة قالتلي" فراحت ردت "هي العصفورة دي ماتقولش على حاجة كويسة أبدا!"

كومبيوتراتنا مستفزة لأنها دايما بتنبهنا على الغلط.. error – wrong command – failed operation – download interrupted – bad sector – virus detected – file corrupted  طول الوقت مصايب..ليه مافيش كومبيوتر يقول: جدع – برافو عليك – الأمر ده سهل – هايل – من عينيا هجيبلك الفايل  ؟

تعالوا نبدا بحاجات بسيطة..

ربنا بيحبك قوي – شعرك حلو النهاردة – اتبسطت إنك اتصلت بيا – بافرح لما أشوفك – برافو إنك جبت 7 من 10.. أكيد المرة الجاية هتجيب أكتر – لبسك شيك - ماما زمانها جاية وهتلعب معاك وتبوسك وتعمللك أكل حلو..

ابذل مجهود واسعد بني آدم .. عشان ما تتحولش الحياة لـ "ماما مسافرة وهعمل حفلة" بدل "ماما زمانها جايّة" 

صعبان عليّ

يا كل واحد بيعذّب أو بيهين أو بيقتل..انت صعبان عليّ..صعبان عليّ لأنك ضعيف..على الأقل أضعف من اللي بتعذبه..

انت خايف من اللي بيقول رأيه...وخايف من رأيه..انت خايف ويا حرام ماعندكش رد..انت صعبان عليّ

انت قليل الحيلة..مش عارف تتصرف مع المدونات..مش عارف تعمل إيه مع الإعلام..مش عارف تتعامل مع تويتر وفيسبوك..انت صعبان عليّ..

انت مش عارف تبقى عادل..العدل مكلّف..شغلانة كبيرة..وجع دماغ بالنسبة لك...فبتظلم أسهل..انت صعبان عليّ

انت حاسس بقيمة في لِبس بَس..لبس بس..مجرد زي معين..من غيره انت مسلوب القوة.. صعبان عليّ..

بتتعب لو فكرت..بتشتم وتغلط لو حاولت..بتهين وتلقي إتهامات مش محسوبة لو اتزنقت..بتحرّض وتهدّد وتخوّف وتنبّه على أمل إن الناس تسمع كلامك.. صعبان عليّ

لما بتتزنق بتغير كلامك..لما بيقولولك قلت كذا وكذا بتكدب..ماعندكش مانع تروّج إشاعات..للدرجة دي ضعيف؟

على طول متوقع الخيانة..من اللي معاك..من اللي ضدك..من اللي كانوا معاك..من اللي احتمال يبقوا ضدك بعدين..انت صعبان عليّ..

عندك كتير تخسره..ماتقدرش تنام مرتاح..دايما فيه "ربنا يستر" و"يا ترى بكرة مخبيلنا إيه؟"...انت صعبان عليّ

على الرغم إني النهاردة حاسس بخوف..وحزن..وألم..إلا إنك صعبان عليّ أكتر..

لو عايز احترام وأمان وقوة..لو تحب تنام مرتاح حاسس إنك عادل...لو نفسك في ثقة وراحة..اسمعلي..

لكن يا خسارة..انت في الغالب مش عايز تسمع أو تقرا أو تشوف

..صعبان عليّ!