Showing posts with label end. Show all posts
Showing posts with label end. Show all posts

Monday, June 25, 2012

النتيجة طلعت

عاشت شعوب النهاردة ساعات من الترقب مستنية النتيجة.. نتيجة انتخابات لاختيار رئيس جمهورية.. أو نتيجة ماتش كورة.. نتيجة امتحانات آخر السنة.. أو نتيجة فحص دوري عند الدكتور..

لحظات إعلان النتايج بما فيها من فرحة أو حسرة.. توزيع شربات أو صويت.. تصقيف أو لطم.. لحظات بنمر بيها وبتشكل في وجداننا (حلوة وجداننا دي) بتشكل فينا علامات وذكريات واضحة..

مش متأكد لو اللي هقوله ده حد فكّر فيه قبل كده.. لكن البعض بيتخيل الحياة "من غير نتايج".. يا سلام على راحة البال.. فمثلا يبقى فيه انتخابات وكل حاجة بس الاتنين المرشحين يفوزوا.. نمتحن ثانوية عامة وكل حاجة بس من غير ما يقولوا مين نجح ومين سقط.. نلعب كورة من غير ما يبقى فيه غالب ومغلوب.. ياااه.. مش كانت الدنيا تبقى ألطف؟

مش كانت الناس لعبت كورة من غير تعصب؟ والدول استمرت واستقرت من غير مشاعر حسرة أو خسارة؟ والطلبة مابقوش مضغوطين وكله تمام؟

يا ترى وجود أجوان ونتيجة في الكورة بيقلل ولّا يزود المتعة؟ بيخللي اللعيبة تلعب وتتبسط أكتر ولّا بتخليهم يكسلوا؟

على الرغم من إن الاهتمام الضخم إعلاميا بيبقى على "كام كام" و"مين بقى الرئيس" و"مين العشرة الأوائل" إلّا إن الهدف من وجود نتايج هو إن اللعبة أو الممارسة السياسية أو التحصيل العلمي يبقوا منطقيين..

في تدريس اللغات مثلا بطلنا نظام "افتح الكتاب صفحة 8 واكتب أربع جمل بالإنجليزي عن نفسك".. طرق التدريس الحالية بتزق ناحية إن يكون فيه تفاعل في الدراسة عشان كده التدريبات المستخدمة لازم تخللي الطالب مضطر إنه يعمل التدريب.. ساعات المدرس بيلجأ للعبة أو مسابقة.. مثلا أول طالب هيحفظ أربع معلومات عن زميله يفوز.. أو ارسم كام رسمة تعبر عنك وخللي صاحبك يخمن تقصد إيه.. في الظروف دي بتلاقي إن الطالب "تلقائيا" بيستخدم على الأقل أربع جمل عشان يعرّف نفسه.. من غير مانقوله افتح الكتاب صفحة 8..

لو فعلا عندي صديق حقيقي في دولة تاني هيبقى أسهل إني أكتبله جواب بلغته.. عن إن السؤال يكون "في 7 أسطر اكتب خطابا إلي صديقك الفرنسي فريديريك تسأله فيه عن جنسيته"!

وجود نتيجة للتدريب هو اللي ممكن يضمن إن التدريب يتم بنشاط وإحساس بالإنجاز..


وعشان كده انتظارنا لنتيجة انتخابات هو في حد ذاته نجاح.. ممارسة الاختيار والبحث في تاريخ المرشحين وسؤالهم عن برامجهم ومعرفتنا عن الآراء المختلفة عنهم كأشخاص هو صميم الممارسة اللي فيها يشعر المواطن إنه يفرق..

المهارات والمتعة اللي بيستمتع بيها لعيب الكورة أهم بكتير من النتيجة.. لكن لو ماكانش فيه فكرة النتيجة ماكانش هيلعب بنفس الاستمتاع..

درجات الامتحانات قد تكون الحافز اللي يخلليني أذاكر.. وخلال المذاكرة أكتسب المعرفة اللي هتفضل معايا العمر كله.. حتى بعد النتيجة ب 30 سنة..

وجود نتيجة للانتخابات بفايز واحد هي علامة على بداية مشوار من ممارسة سياسية ووطنية ممكن نتبسط أو نتضايق من نتايجها.. لكن المهارات والمعرفة والخبرة اللي اكتسبناها كشعب تفوق بمراحل اللحظات الصعبة قبل سماع النتيجة..

مش طول الوقت الرك على "المنتَج".. لكن ممكن تكون القصة كلها في "عملية الإنتاج".. وجود المنتج كنقطة نهاية قد يكون مجرد ضمانة لاستمرار عملية الإنتاج..


افرح بالنتيجة وزقطط لو ده اللي كنت مستنيه.. اتضايق من النتيجة وإدي نفسك فرصة للحزن والإحساس بالإخفاق.. لكن ماننساش إن الخطوات اللي مشيناها عشان نوصل للنتيجة أيا كانت هي خطوات كبرنا واتعلمنا واستفدنا منها..

Tuesday, October 11, 2011

لسّة ما مُتِّش

حزن وألم .. غضب ولخبطة .. وجع فراق .. ندم ...
دموع وصراخ .. زغاريط .. هتافات ..
ناس لابسة إسود .. ناس لابسة أبيض .. ناس شايلة صور ..
تقارير مستشفى .. عربيات رايحة جاية .. ترتيبات واتصالات

مشاهد شفناها وبنشوفها لما "الموت" بيزور عيلة أو شارع أو قرية أو بلد بحالها..
لكن خلاص كده؟
مُوتة زي ما أي حد بيموت؟
فترة وننسى؟

عمر ما كان الموت هو النهاية..عمر ما كان الموت أبشع حاجة تحصل لبني آدم..

الحبّة اللي بتترمي في الأرض بيبان إنها ماتت..لكن نفس الحبّة دي هي اللي بتخرّج حياة..

خَضار وجمال وأمل ممكن يخرج من قلب الموت..
عزيمة ورجاء وشدة ممكن تطلع من وسط الموت..
قوة واتحاد ونظرة أشمل ينفع تخرج من وسط البكا والحزن..

الحبّة اللي مش عايزة تموت جوة الأرض هي الحبّة اللي بتفضل ميّتة..

الفراق مؤلم..إني ماقدرش أشوف اللي باحبهم تاني شيء صعب..لكن..
لكن..
الموت مليان حياة..الأرض الناشفة المشققة هي أكتر أرض مستعدة للمية وعارفة قيمتها..
حياتك لو غرقانة موت..أكيد عطشانة لنور وخَضار وفرح وشِبع وارتوا...
بلدك اللي داقت موت ولادها مستنية "حياة"..مستنية "بداية جديدة"..

يمكن موتُه مش نهاية..غالبا موتُه بداية!
جايز موتها مش معناه إنه "خلاص بقى!"..يمكن موتها هو إعلان صفحة جديدة..حاجة مختلفة..إمكانية رائعة؟

أنا هختار إن الموت اللي حواليا يبقى:
بداية..أمل..حاجة جديدة..رجاء في بكرة..إصرار إني أكمّل..اشتياق لوضع أحلى..

أنا باختار إن الموت اللي حواليا يبقى:
وحدة مع أصحابي..عزيمة وحماس..إحساس بمشاعر غيري..

مش كل موت وحش...أوحش موت هو الموت اللي بيموّت كل أمل!

لو متّ والأمل عاش..أبقى مامتّش..
وعشان كده أنا لو عايش على الأرض النهاردة وهموت بكرة..هبقى برضه لسّة ما مُتّش!

Wednesday, September 21, 2011

النهاية مش يوم 26

خلاص؟ النهاية قَرّبت؟ يوم 26 وللا 27؟ وللا السنة اللي جاية؟ وللا 21 ديسمبر 2012؟ وللا امتى؟

بالمناسبة.. مافيش نهاية!

لما اتخلقنا اتعملنا بطريقة خاصة مختلفة عن باقي الخليقة..اشتركنا مع باقي المخلوقات في المهارة والجمال والتعقيد اللي اتخلقنا بيه...لكن اختلفنا عنهم في إننا مش مجرد أجساد..مش مجرد إيدين ورجلين وراس..مش بس موجودين عشان ناكل ونشرب وننام..نتجوّز ونخلّف ونطلّع عينين عيالنا وبس :) ..نخترع ونفكر ونسافر وبس..

لكن اتخلقنا وجوانا نفس وروح جوة الأجسام..زي الـsoftware بالمقارنة بالـhardware..يمكن جهاز الكومبيوتر يتغير لكن غالبا بتنقل بياناتك والملفات والصور والحاجات المهمة على الجهاز الجديد..

الموت –على الرغم من إنه مخيف لناس كتير- مش هو النهاية..

زي بالظبط لما أنا خرجت من مرحلة الطفولة..ما انتهيتش..ولما انت اتجوزت انت ما انتهيتش [معلش عدّيها :) ]..لكن بدأت مرحلة جديدة..وفي المرحلة الجديدة دي انت مابقيتش إنسان مختلف تماما عن قبل كده..لأنك لازلت بتستخدم كل الأفكار والمهارات والمعلومات والخبرات اللي اكتسبتها في الطفولة وقبل الجواز...

الدخول لمرحلة جديدة مش معناه النهاية...

أنا وانت النهاردة في الوضع اللي احنا فيه بسبب الأكل اللي أكلناه واحنا أطفال..المزيكا اللي سمعناها..الكتب اللي قريناها..اللعب اللي لعبناه..الأماكن اللي رحناها..الأفلام والأغاني والسفر والبكا والمدارس والنوم والهزار وكل حاجة مرينا بيها شكلت فينا...
المراحل اللي عملنا فيها الحاجات دي خلصت..والأوقات اللي اكتسبنا فيها الخبرات دي عدت لكن احنا ما انتهيناش لما بدأنا مراحل تانية..

وصولنا للمرحلة اللي فيها أجسادنا مش هتكون موجودة (المرحلة اللي البعض ممكن يسميها الموت) مش معناه وصولنا للنهاية..أرواحنا مش بتموت..مش معمولة عشان تموت..ولما أجسادنا تكون قامت بالوظيفة وحققت الغرض منها مش هنكون محتاجينها تاني..

لكن..
 لكن كل مهارة وخبرة..كل كتاب أو فيلم..كل حاجة بأسمعها أو أقراها..بتضيف لروحي.. ومافيش حاجة مش بتفرق..
كل حاجة بازرعها النهاردة ليها تأثير..
كل مكان باروحه وكل صاحب باعرفه بيفرق..

كل استثمار باعمله النهاردة وانا بجسمي مش بيرُوح على الفاضي..

عشان كده مش هأقوللك: "ماتخافش"..النهاية مش يوم 26..
ولا هأقوللك: "خاف"..لأن النهاية مش يوم 26..

أنا بس هأفكر نفسي وأفكرك إن موت الجسم مش هو النهاية..والمعلومة دي مخيفة لناس كتير لكنها مبهجة ومشجعة لناس كتير برضه..

اشتغل واجتهد..اتعلم وحاول..ابني في الحاجة اللي هتفضل موجودة..الجسد كده كده مش قاعد..لكن الروح مالهاش نهاية..

النهاية مش يوم 26! :)