مسعود

وقت ما كنت بأسافر كتير بالقطر من القاهرة لإسكندرية أو الصعيد كان فيه مرات كتير بيبقى نهاية "الموسم" بتاع لم الفلوس عن طريق "معونة الشتا".. وكان فيه كده ورقة صغيرة مع كل تذكرة.. الورقة كانت ب50 قرش... المعتاد إن كان مع كل تذكرة الراجل بيدّيك 4 ورقات (يعني 2 جنيه) زيادة عن تمن التذكرة.. طبعا كل موظف قُدامه دفتر كده محتاج يخلصه وعلى قد ما يقدر يخلص من "ورق التبرعات" كل ما يكون كويس..

الثقة اللي الموظف بيقولك بيها على سعر التذكرة (التمن الفعلي للتذكرة زائد ال 2جنيه تبرع لمعونة الشتا) بتخليك متأكد إنه هو ده النظام.. والراجل أهو بيديك الورق اللي عليه التمن بالظبط ومش مفروض يبقى فيه مشاكل..

لكن مرّة من المرات بصيت كده في ورق معونة الشتا لقيت مكتوب عليه حاجة بمعنى "معونة شتاء- تُحصّل مع كل اشتراك أو فرق تكييف" يعني لو معاك اشتراك في القطر (عادة بيبقى درجة عادية أو لو عايز تدفع فرق التكييف وتركب القطر المكيف).. الشرطين دول ما كانوش بينطبقوا على التذاكر اللي بأشتريها.. وبعدين مش مكتوب أي حاجة تدل على إنهم أكتر من ورقة واحدة (50 قرش) مع كل اشتراك أو فرق تكييف.. الأنيل من كده إن ورق المعونة ده كان مكتوب عليه تاريخ منتهي! فالحقيقة قررت إني أستخدم مهاراتي في القراية وأقول للموظف إني مش عايز "أتبرّع" (غصب عني) خصوصا إني مش اشتراك ولا فرق تكييف وخصوصا إن التاريخ اللي على ورق المعونة ده كان من كام شهر.. حسيت إني مش هأوصل لحاجة فكنت دايما أقاوح مع الموظف بعد ما أكون أخدت تذكرة القطر وأحاول أفهمه إني مش هأدفع ال 2جنيه الزيادة ومش عايز "أتبرع"..

لفتت نظري فكرة عمل الخير "الإجباري" دي.. التبرع اللي غصب عنك.. اللي هو نظام "اعمل يا أخي حاجة كويسة في حياتك وإلا مش هنبيعلك تذكرة القطر"..

والحقيقة الحكاية دي مش بس في "التبرع وإذا كان عاجبك" في القطر.. لكن موجود في المدارس "ياللا ياولاد كلنا هانساهم عشان نزين الفصل" وطبعا يا ويله اللي مش عايز "يساهم".. (إيه ده؟ إنت مش ناوي تساهم؟.. بُص هو مش إجباري.. بس لازم!!)

الموضوع ده واخد أبعاد أكبر في مجتمعنا في حاجات تبعد كل البُعد عن مجالات ينفع فيها التبرع.. لما الميّة تتقطع في البيت من غير إنذار أو لما الطرق تبقى على طول واقفة ما ينفعش لسان حالي يبقى "أهو عشان أحس بالناس اللي ماعندهمش ميّة خالص" أو "كويس إن الواحد عنده عربية" لأن الفكرة ببساطة إن جزء كبير من التضحية والتبرع والمساهمة هو إن يكون عندك "الاختيار"...

إذا بتحب خطيبتك لأن مافيش بنات تاني, مش متهيألي دي نُقطة ليك.. ومش قادر أفهم لغاية دلوقت مطلع أغنية "لو واحد في المليون ومافيش غيرك في الكون... هاأحبك".. وهو إنت عندك اختيارات؟ بيقولّك مافيش غيرك في الكون!

مافيش أي منطق يخليني أشعر بالفخر والسعادة والرضا إني "اتبرعت" لمعونة الشتا طول ما أنا دافع غصب عني.. وإذا إحساسي وأنا بأساهم عشان "نزين" الفصل هو إحساس "شالله ما عنه اتزيّن.. أنا جاي أتعلم مش أزين" يبقى التبرع والمساهمة والمشاركة هم مجرد نوع من الضريبة اللي مضطر إني أدفعها بشكل مختلف عشان أموري تمشي.. بمعنى إن لو في حالة إن عندي اختيار إني ما أدفعش وقررت ما أدفعش إذاً "التبرع" ما كانش حقيقي..

النهاردة وإحنا فاكرين إن قطع المية أو زحمة المواصلات أو حرقة الدم مع بعض موظفين الحكومة هي "تبرعات" و"تضحيات" بنقدمها وإن "المفروض نبوس إيدنا وش وضهر" وإن "فيه ناس مش لاقية كل الخير ده" يبقى إحنا بنضحك على نفسنا..

وأنا بأضحي أنا بأختار.. لازم يكون عندي اختيار إني أعمل أو ما أعملش الخير عشان وقتها يبقى فعلا خير.. الفكرة مش بس في الفعل لكن في الدافع اللي وراه.. "مسعود" في مسرحية "المتزوجون" لما مراته بتشكره إنه أنقذها.. كان رده "أموت وأعرف مين اللي زقّني!" اللي في حالة مسعود ماعندوش اختيار إنه يعمل الخير أو مايعملوش..

الشعب اللي مُجبر على عمل الخير هو شعب "مسعود" بتاع المسرحية.. لكنه أبعد ما يكون عن أي سعادة حقيقية نابعة من اختيار حُر إني أقدم تضحية أو مساعدة في حين إني عندي الحرية إني ما أعملش كده..