أحلى عيون

مقاييس جمال الشكل بتختلف من بلد وثقافة للتانية.. في موريتانيا مثلاً البنت ماتُعتبرش جميلة أبداً لو رفيعة.. وكل ما البنت تكون أتخن كل ما تعتبر أحلى..

وعلى اختلاف المقاييس إلا إن حجم وشكل العين بيأثروا قوي على الجمال في كل الثقافات دي.. مواقع كتير من اللي بتتكلم في تفاصيل الحسابات الدقيقة للجمال بتقسم مثلا الوش 5 أجزاء طولية عرض كل جزء هو عرض العين..

أغانينا مليانة غزل ووصف لعيون الحبيب (وفيه بعض التجاهل للمناخير والودان والجبهة!)..

لما نبص على العين كعضو في منتهى الأهمية في الجسم نكتشف مدى شغف العلماء على مر العصور لاكتشاف إزاي بيشتغل وإيه اللي يضره وطرق علاجه..

والنظريات كانت كتير وزمان كان فيه فكرة إن الإنسان بيشوف عن طريق إن العين نفسها بتصدر ضوء ينوّر على الشيء اللي قدامها فيقدر الإنسان يشوف.. جت بعدها نظرية إن الإبصار بيحصل عن طريق حاجة بتمثل الشيء (قالوا بعد كده إن الحاجة دي هي الأشعة) بتدخل العين.. وحاليا المتعارف عليه هو إن الضوء بيتنقل عن طريق الفوتونات من مصدر الضوء (زي الشمس مثلا) للشيء المرئي وبينتهي عند المستقبِل (العين)..

وأنا قادر أتفهم صعوبة الوصول للنظريات دي.. خصوصا إننا ممكن نكون موجودين في نفس المكان لكن كل واحد شايف حاجة مختلفة..

كل مرة حد بيشتري "جزمة جديدة" بيفضل بتاع 3 أيام مش شايف حاجة في الشارع غير محلات الجزم!

اللي مننا ليه أصحابه دكاترة أسنان يلاقيهم بيعملوا حاجة مستفزة: دايما وانت بتكلمهم باصّين على سنانك!! ماهو ده اللي شاغل بالهم طول الوقت!

فواضح إن عينينا بتشوف الحاجة اللي عايزة تشوفها!

استغربت قوي امبارح من حكايات واحد صاحبي معايا.. كان بيحكيلي عن وقت غربة مر بيه.. وقت صعب بعيد عن العيلة والأصحاب.. بعيد عن الأكل اللي بيحبه والسرير اللي بيرتاح فيه.. وقت فيه مجهود ضخم.. نوم قليل.. جو برد قوي.. لكن قاللي جملة رائعة.. "أنا قدرت أشوف جمال الطبيعة.. السما الزرقة وعليها النجوم منتورة زي الماس"!.. ياه! ياه!

انت إزاي قادر "تشوف" الجمال وسط كل الوقت الصعب ده؟ إزاي قادر تتوقع حلاوة وجاذبية في حاجة يمكن بنشوفها يوميا وبنحسها عادية؟.. وقتها فهمت يعني إيه عيون حلوة..

العين الحلوة هي اللي قادرة "تدوّر" على جمال و"تِتلَكِّك" تشوفه في طفل صغير.. في رسمة.. في وردة.. في كرسي فاضي في المترو.. في جو دفا.. في مكان ركنة..

العين الحلوة هي اللي "بتِستَحلَى" تصرفات الناس.. بتشوف كرم ومساعدة وتشجيع من الغير..

العين الحلوة هي اللي مستنية بلدها تبقى أفضل وأرقى.. العيون الحلوة بتِتشَدّ لأي بوادر إيجابية.. أحلى عيون هي اللي بتكمّل الصورة وتتخيلها لوحة رائعة..

أحلى عيون هي اللي ممكن صاحبها يكون فقد عين بالفعل وهو بينادى بالحرية.. وفقد عينه التانية لنفس المطلب.. لكنه لسّة "شايف" بلد تستحق التضحية.. أحلى عيون هي اللي صاحبها يقول "أكمل حياتي مرفوع الراس".. "يشوف" نفسه وبلده مكرّمين ومحترمين..

أحلى عيون مش هي العيون اللي ناس شايفاها جميلة.. أحلى عيون هي اللي شايفة الناس والحياة جميلة..