كفاية مونولوجات

المونولوج من الفنون القديمة اللي ازدهرت زمان..لكنه كمان بيعتبر من الفنون القليلة اللي ماتت في حياة أصحابها..

بدأ فنانين كتير حياتهم الفنية بفن المونولوج زي يوسف وهبي ونجيب الريحاني وحسن فايق..والإذاعة المصرية لسة محتفظة بمونولوج سجله حسن فايق في منتصف التلاتينات في مكافحة الكوكايين اللي كان منتشر في مصر في الفترة دي، وبيقول في مطلعه "شم الكوكايين خلاني مسكين"!

من ضمن الحاجات اللي بعض الشعرا بيذكروها كأسباب لانقراض الفن ده هو طبيعته "الوعظية"..الوعظ والنصايح والكلام المباشر عن الصح والغلط..وعن قد إيه انت وحش لو عملت كذا..والمفروض تعمل كذا..كل ده بيقفل المستمع..وعلى الرغم من إن المستمع عارف إنه ممكن يكون بيعمل حاجة غلط إلا إن المونولوجست لو قالهاله مش هايخليه يبطلها..

ليّ واحد صاحبي لما نخرج مع بعض يقعد يقوللي "افضل اشرب انت بيبسي كتير كده!! انت مش عارف إنه مضر؟"..وطبعا دايما يقوللي كده بعد ماكون خلاص جبت البيبسي! :)

انت متخيل إن اللي بيشرب سجاير مش عارف إنها مضرة؟ تفتكر إن اللي بيسهر ومش بياخد كفايته من النوم فاكر إن ده أسلوب حياة صحي؟ فكرك اللي بيشتم مش عارف إن الشتيمة مش ألطف حاجة في الدنيا؟

مرات أحد الاسباب اللي بتخللي الشباب يحبوا يكونوا مع أصحابهم أكتر من أهاليهم هو إن الأهالي بينصحوا ساعات بزيادة..

ومرات كمان ناس تحرص إنها تعمل عكس النصيحة! مش غلاسة وخلاص..لأ..غالبا بيكون رفض للوصاية من حد..رفض إنك تحسسني إنك أعلى أو بتفهم أحسن أو إنك مثقف أكتر أو أقرب لربنا عني أو عندك خبرة أكتر (حتى لو الحاجات دي صح)

أنا وانت مؤثرين جدا جدا في حياة العشرات والمئات من الناس..مؤثرين سواء اتكلمنا أو لأ..الناس غالبا هتكون "بتسمع" تصرفاتي..تعبيرات وشّي..ضحكتي..تكشيرتي..سلامي..حركة جسمي..اهتمامي بيهم..محبتي واحترامي ليهم. أكتر ماها يسمعوا نصايحي!

طب لما حد يطلب نصيحتي؟؟.. أقوللك..عايز نصيحتي؟ ماتنصحهوش! :)

لما حد يطلب نصيحتك..بدل ماتقطّمه..بدل ماتخش فيه شمال باللي مفروض يعمله..ساعده يفكر..ساعده يبص على جوانب فايتاه من الموضوع..ساعده يحس إنه مهم وإنك بجد مهتم..ساعده يقرر..ساعده يتطمن إنك هتقدمله الدعم والتشجيع اللي محتاجه.....

بدل ماتقوللي مونولوج..غني لي..غني لي شوية شوية..وممكن وقتها أعمل اللي انت عايزه..وأديلك عينيّا! :) :)