إرهابي مودرن

 الإرهابي المودرن هو إرهابي برضه بس تخلّى عن الشكل التقليدي للإرهابي القديم..ممكن يكون تخلّى عن إنه يمسك سلاح..أو يلبس لبس مميز..مش شرط يبقى كبير أو صغير..راجل أو ست..الإرهابي المودرن مودرن بجد..عمرك ما تقول عليه إرهابي إلا لو ركّزت شوية..ده ممكن هو شخصيا مايبقاش عارف إنه إرهابي!

وعلى الرغم من إنه ممكن يتخلّي عن الشكل الظاهري اللي ساعات بنتخيله –أو بيرسمهولنا الإعلام- إلا إنه لم يتخلّى عن المبادئ المهمة..وطبعا المبادئ دي هي إنه يرهبك..يخوفك..يهددك..يخلليك طول الوقت قلقان..تحاول بقدر الإمكان إنك ماتختلفش معاه في رأي أو توجه..وإلا!

ولأن الإرهابي المودرن مش تقليدي (مش تراديشينال خالص) هتلاقيه شيك..متحدث لبق..في منصب كويس..مش شرط يكون ماسك بندقية..ومش مغطّي وشه بشراب فيليه بُنّي منسّل من الجنب!

أمال أعرفه إزاي؟

سهلة قوي: أصل ممكن يكون أنا وانت وناس حوالينا..آه طبعا:

المدرس اللي بيهدد الطلبة بتوعه بدل مايشجعهم..

رجل الدين اللي بيخوف الناس من ربنا (تخيل؟ ربنا العطوف المحب الرحيم الكريم!)..

الحاكم الظالم اللي مش عايزك تفتح بقك بنقد عنه بدل ما يسمعك ويناقشك..

المذيع اللي قرر إنه يعمل برنامج مقالب يرعب بيه الضيوف بدل ما المقلب يكون مجرد غلاسة أو زنقة فكرية (حلوة دي) أو لخبطة في معلومات..لأ إزاي؟ وهو ده يبقى برنامج؟ لأ..احنا نجيب أسد نخوف بيه الناس..ونضحك..آه نضحك قوي..ونضحّك المشاهدين..مش قادر بصراحة أشوف الفرق بين الموقف ده والبلاد اللي فيها انتهاك لحقوق المساجين لما بيهددوهم بكلاب!

الراجل اللي على طول راعب مراته ومخوفها..

اللي بيهدد غيره إنه يفضحه أو يذله أو يبوظله عربيته..أو يسلط عليه أصحابه يعملوله Report Spam على تويتر لو علّق على رأيه بطريقة سلبية..

الأب والأم اللي بيرعبوا عيالهم من المستقبل لو ماذاكروش..بدل مايدوهم مساندة عشان يذاكروا أحسن..

أنا رافض على المستوى النظري إني أكون باخوفك..مش عايز أكون إرهابي..مش عايز أرهبك أو أرعبك! وعايز كمان على المستوى العملي إني أراجع مواقفي اللي فيها بأخوّف أو أهدّد غيري..

عايز بدل ما أقمعك...أقنعك!