هنا يرقُد

من كام يوم جه خبر وفاة ستيف جوبز الرئيس التنفيذي لشركة Apple ولاحظنا اهتمام ناس كتير بالخبر..ناس غيرت صور ال profile  على Facebook  و Twitter لصورته أو صورة حاجة من منتجات Apple! وأخبار كتير ومعلومات بقى عنه زي إنه كان مُتَبَنّى وإن أبوه الأصلي من أصل سوري وأخته كاتبة روايات مشهورة وكتير من معلومات تانية عن أكله المفضل وهكذا..

iPod, iPad, iPhone, iTunes كلها حاجات أثرت وغيرت في حياة ناس كتير وشكلت هوايات وأنشطة وأسلوب حياة لملايين من الناس على مستوى العالم

وعلى الرغم من إن عظماء ومشاهير وفنانين وناس مهمين كتير بيقدروا يتحكموا ويأثروا في العالم بأشكال مختلفة ..ويقدروا يقرروا إيه اللي يقولوه وإيه اللي يخبّوه..دول كمان يقدروا ساعات يتحكموا في إيه اللي يتقال عنهم في الجرايد والبرامج..إلا إن الحاجة اللي يمكن تكون صعبة.. إنهم يختاروا إيه اللي يتكتب على قبرهم!

"هنا يرقد..."

جملة مشتركة...تكملتها هي اللي بتختلف من شاهد قبر للتاني..

"هنا يرقد...أعظم ممثل"؟ "هنا يرقد أفضل مخترع"؟ "أكثر من أثر في البشرية في العصر الحديث"؟

هنا يرقد صاحب أجمل ابتسامة؟

يا ترى ممكن أكون عايش طول حياتي وبعد كل ده يتكتب حاجة مش في بالي خالص؟ حاجة ولا كانت تفرق معايا وأنا عايش؟ حاجة ماكانتش مستاهلة تعبي واجتهادي؟

في Wall Street Journal في مايو 1993 ستيف جوبز قال الكلمات دي:

"إني أكون أغنى واحد في القبر مايفرقش معايا..اللي يفرق معايا إني أنام بالليل وأقول إحنا عملنا حاجة رائعة!"

يمكن وقت كتابة جملة "هنا يرقد.." ماأكونش موجود..لكن عندي فرصة السنين اللي عايشها إني أسيب أثر في اللي حواليا!

هنا يرقد اللي عاش ببساطة وكان مصدر سعادة اللي حواليه..

هنا يرقد اللي شجع وشدد وفرّح ناس..اللي ساعد وحفّز ناس..

هنا يرقد اللي كان صورة حية وشهادة حقيقية عن ربنا سبحانه..

هنا يرقد المجتهد الملتزم الحماسي..

هنا يرقد السياسي المحنّك..

هنا يرقد النصّاب الحرامي..

هنا يرقد الموسيقي الحالم..

يا ترى الناس هتختار تكتب إيه عني؟ في الوقت اللي مش هكون فيه موجود عشان أوضّح أو أشرح أو أعتذر..هيقولوا إيه؟

إيه ال5 أو 6 كلمات اللي هيلخصوا كل الحياة اللي أنا عايشها دلوقت؟

أتمنى مايضطروش يكتبوا "هنا يرقد..واحد كان فاكر إنه عمره ما هيرقد! فضل عايش من غير هدف..زيه زي غيره.."

أنا ما باموتش

فزورة قديمة يمكن يرجع تاريخها لمايو 1932 بتقول: إيه الحاجة اللي تُعتبر بنت المية بس تموت لو نزلت المية؟ والإجابة التلج! (طبعا فكرة مايو 1932 دي مجرد غلاسة باستخدمها مع أصحابي لما حد يقول نكتة أو فزورة قديمة..نروح نقول له: يناير 66 أو مارس 85 دلالة يعني عن قد إيه قديمة).. :)

المهم..موضوع التدوينة دي بيحصل فيه عكس حكاية التلج دي...ليه؟

لأن كل فكرة بتتولد بتتولد معاها قدرة غريبة تخللي الفكرة ماتموتش..خصوصا لو اتوفر للفكرة دي شوية عناصر منطقية عشان الناس تصدق..اللي عمل الفكرة ممكن يموت وتفضل الفكرة باقية طول ما عناصر انتشارها ومنطقيتها ومصداقيتها متوفرة..

الموضوع دة مش جديد....حد عارف فكرة لبس الأسود على الميت مين اللي بدأها؟ روايات كتير ومافيش قصة أكيدة متفق عليها..لكن حاجة من الحاجات اللي البعض بيتتداولها هي  إن اللي بدأها المصريين القدماء عشان يلخبطوا روح الميت لأنها حسب معتقدهم بتفضل تحوم شوية وممكن تدخل حد من اللي رايحين يعزوا

..ماشي.. لكن مين بقى أول واحد قاللهم كده؟ مين أول مصري قديم قال كده؟ يعني مثلا أشرف رع؟ أو مدحتزوريس؟ مش فارق..وحتى لو عرفنا..الشخص دة مات وكل عيلته واللي كانوا عايشين في المرحلة دي..واللي فضل عايش: الفكرة..وعلى الرغم من معرفتنا لسبب المعتقد إلا إننا لسه بنخضع لقوة الفكرة وبنطبقها..(مش باقترح خالص إنك تروح عزا لابس تيشيرت أخضر وبنطلون جينز وتقوللهم: على فكرة الحزن مش في اللبس..الحزن في القلب! ماقدرش أتوقع رد الفعل ومتهيألي الناس هتراعي بعد كده ماتقولكش على أي وفيات بعدها)...:)

ممثلين ومخرجين ورسامين وكتاب..موسيقيين وقادة ورموز دينية وثوار..مهندسين ومخترعين ومبرمجين وأصحاب شركات بيموتوا..بتنتهي حياتهم بعد 70 أو 80 أو 100 سنة..لكن بتفضل الأفلام واللوحات والكتب..بنلاقي المزيكا والمعتقدات والطقوس الدينية لسة موجودة..بتفضل الثورة عايشة..بنشوف الكباري والاختراعات وبرامج الكومبيوتر والشركات مستمرة..تشهد عن اللي عملوها..حتى لو ماعرفناش أسماءهم...يموت صاحب الفكرة...وتفضل الفكرة مابتموتش..

التقاليد بتستمر واللي بدأوها بيروحوا..

.الإشاعات بتنتشر وأول واحد قالها مش دايما بيتعرف...

الأساطير بتتناقلها شعوب وبيفضل أصلها غامض..الفكرة مابتموتش!

الدول أو الجهات اللي بتقمع وتحبس وتعذب أبرياء أو على الأقل متهمين مش محكوم عليهم قدام قضاء طبيعي عادل بتفتكر إنها بكده بتقضي على أفكارهم..

في مقالته   Civil Disobedience (العصيان المدني) بيتكلم هنري دافيد ثورو وبيقول: "لما ماعرفوش يِوْصَلولي قرروا يعاقبوا جسمي..زي الأولاد الصغيرة..لما مايعرفوش يردّوا على ولد تاني متغاظين منه يروحوا يغيظوا الكلب بتاعه!" وبيكمل يقول: "عشان كده ما يعرفوش يخاطبوا العقل أو الفكر أو الذكاء بتاع شخص لكن يستهدفوا جسمه وحواسه.."

هتقدر تموّت ناس..الفكرة مابتموتش..عذب وهين واحبس..الفكرة مابتموتش..

 

بتمر بلاد كتير بوقت فيه ناس بتبذل حياتها من أجل هدف.. بيتعذب مناضل..والنضال بيستمر..بيتبهدل ويتضرب ويتهان صاحب رأي..ورأيه بيفضل موجود.. بيموت الثائر ..والهدف بيكمل..بيتقتل المسيح..والرسالة بتستمر..

لو قدرنا نكلّم الفكرة ونعمل معاها حديث..تفتكروا هتقول إيه؟

أنا مش حتة تلج مع شوية مية أو سخونة أدوب..أنا فكرة واضحة وحرة..فكرة خرجت من دماغ واحد لكن عجبت ألوف..ماتقدرش تموتني..ماتقدرش تحبسني..ماتقدرش تعتقلني وتضربني وتكهربني..طالما خرجت مكتوبة أو مرسومة أو متقالة..هافضل حرة..

صاحبي يموت؟ اللي عملني يتعذب؟ اللي فكر فيّ  يتحبس؟ وإيه يعني؟ البشر هيموتوا..والملايين في العالم بيتعذبوا..وياما ناس في الحبس..

...لكن أنا ماباموتش!