أوّل إيميل

أول إيميل كتبته في حياتي كان بالظبط من 13 سنة.. وأفتكر إن الموضوع أخد مني يمكن ساعة عشان أكتب إيميل قصير.. بعت الإيميل  ده لأختي.. وجه الرد بتاعها مبسوطة بإننا قادرين نتواصل عبر القارات في وقت سريع جدا وقالت حاجة بما معناه إني هأكسل بعد كده أكتب جوابات عادية بما إني بأكتب emails !أنا طبعا استغربت الجملة جدا.. حسيت إنه أكيد لأ.. ده أنا كنت باخد وقت طويل قوي عشان ألاقي الحروف على الكيبورد (حاجة تقرف!)..

كان شعوري وقتها إن اللي عمل ترتيب الحروف على الكيبورد بالشكل ده حد رخم!.. قاصد يخللينا نطفش عشان نكتب جملتين على بعض!

اللي يضحّك إني حاليا(و بعد 13 سنة) باكتب البوست ده على كيبورد مافيهوش حروف عربي على الزراير.. أنا عارف أماكنهم وباكتب بسرعة معقولة!

ال Qwerty System هو النظام اللي بيستخدم الحروف بالترتيب اللي موجود في الكيبورد للكومبيوتر اللي بتقرا عليه البوست ده أو حتى تيليفونك لو فيه كيبورد كامل.. qwerty هي كلمة بتجمع أول 6 حروف في أول صف في الكيبورد

كلمة QWERTY هي كلمة بلا معنى لغوي ومعظمنا من اللي بيتكلموا إنجليزي يعرف إن تقريبا كل الكلمات اللي فيها حرف Q بييجي بعده حرف U لكن الكلمة دي ليها علاقة بالكومبيوترات ومن قبلها الآلات الكاتبة..

لو جربت تسأل مجموعة من الناس: هو ليه ترتيب الحروف على الكيبورد موجود بالطريقة دي؟ ممكن الإجابة تكون"أصل دي أحسن طريقة عشان يبقى فيه سرعة في ال typing" أو "أكيد عملوا دراسة على أنهي حروف بتيجي مع بعض كتير وقربوها من بعض" أو "عشان إن لو ترتيب تاني هيبقى صعب أحفظه" أو "ماعرفش".. (لو حد من أصحابك قال الإجابة الأخيرة حاول تتأكد من جنسيته وإذا كان مصري أصيل وللا مخلّط!) :)

المهم.. قعدت أدور على سبب الترتيب بالشكل ده لقيت إن أول واحد عمل أي ترتيب مقترح كان كريستوفر لاثام شولز والترتيب اللي كان مقترحه كان على صفين اتنين بس (شبه البيانو) وكانت الحروف بنفس الترتيب الأبجدي..

مشكلة الترتيب ده كان في إن الtypebars  اللي هي زي الشواكيش بتاعة الآلة الكاتبة كان بيحصل فيها jamming يعني بتخبط في بعض وبتعلق المكنة.. فبدأ نفس الراجل ده في محاولات عشان يغير ترتيب الحروف شوية بحيث يبعد الحروف اللي بتستخدم كتير مع بعض عن بعض..

أحد القصص اللي بتتقال إن كمان كان أحد الأهداف لترتيب الحروف اللي موجود دلوقتي هو إنه "يبطّأ" السرعة بتاعة اللي بيكتب فما يحصلش تداخل بين الشواكيش دي.. المهم إن الراجل توصل للترتيب ده سنة 1878

تخيل؟

يعني إيه علاقة ده باللابتوب؟ وبالكومبيوتر؟ إيه علاقة ده بالتيليفون اللي عليه كيبورد كامل؟ وليه مضطرين النهارده بعد أكتر من 133 سنة لاستخدام نفس الترتيب؟

ولا حاجة!

لكن بسبب انتشار الترتيب صعب قوي إن حد يجرؤ يقدم ترتيب مختلف.. على الرغم إن لا فيه شواكيش ولا حبر ولا أزمة في مساحة ولا أي حاجة..

الوقت كفيل بحاجات كتير.. ساعات ناس بتدي للوقت أهمية العلاج.. الوقت بينسّي والوقت بيعمل حاجات كتير.. لكن كمان ساعات الوقت بيقلب حقايق ويغير مفاهيم..

اعتيادنا على حاجات معينة بيخلينا نفترض إن اللي موجود هو أحسن حاجة.. أفضل طريقة.. أسهل وسيلة.. وإلا أكيد كانوا فكروا في حاجة تانية..

"هي بلدنا كده".. "الشعب ده مايمشيش غير بالطريقة دي".. "لازم اللي يحكم يكون دكتاتور".. "صعب جدا يبقى عندنا وضع مختلف"

عايز أقوللك: مش شرط.. حاجات في حياتنا وفي بلدنا وفي عائلاتنا موجودة لمجرد إنها موجودة.. لأن ماحدش فكر في إن ممكن طريقة تانية تبقى أفضل..

فيه كام qwerty system موجود في حياتي؟ فيه كام حاجة أنا مفترض إنها أكيد الأنسب؟ فيه كام عادة أو تقليد أو فكر أو عُرف أنا متأكد –من غير دليل- إنه هو الصح؟

التغيير بياخد سنين.. وعادة بيبدأ بواحد بيستفسر عن حاجة "مسَلّم" بيها.. حاجة تقريبا "غير قابلة للنقاش"

هل ممكن ابني كمان كام سنة يتريق على جيلنا إننا فضلنا نستخدم ترتيب للحروف على الكيبورد بدون أي سبب؟ أو فضلنا خايفين من ديمقراطية حقيقية؟ أو فضلنا مصدقين إن ماينفعش يبقى عندنا أفضل جامعات ومدارس ومستشفيات؟

يمكن مانغيّرش ال qwerty system   لكن قدامنا كتير نغيّره.. كل حاجة ممكن تتغيّر.. التغيير مش مستحيل..