وأنا صغير كان نفسي يبقى اسمي "رامي"! وكنت
مستغرب جدا: همه جابوا اسم "ماجد" ده منين؟ المفروض رامي! المهم بعد ماكبرت شوية
اكتشفت إن اسم ماجد مش وحش يعني! :)
افتكرت الحكاية دي النهاردة..كنا قاعدين نغيظ
حد من أصحابنا ونقوللها اسم قريب من اسمها..والسؤال اللي جه في بالي: هو ليه
أسماءنا مهمة كده؟
ليه لو قابلت حد بعد فترة طويلة..بتكون علامة
إنك فاكره أو لأ هي إنك فاكر اسمه أو لأ؟
ليه في التدريب على خدمة العملا بيقولولهم
ضروري يقولوا اسم العميل على الأقل كده مرتين في المكالمة؟
ليه أزواج كتير بيقضوا وقت طويل يفكروا في
أسماء لأطفالهم وفي ثقافات مختلفة بيعملوا طقوس كتير عشان يختاروا أحسن اسم.. فيه في بعض الأماكن في مصر بيولعوا شمع بالأسماء اللي هيختاروا منها..والشمعة اللي تقعد أطول
يختاروا الاسم اللي بتمثله..
جينا براينر كتبت في LiveScience إن فيه دراسة اتعملت في إنجلترا
على 3000 أب وأم كانت النتيجة إن واحد من كل 5 آباء بيبقوا ندمانين على الاسم اللي
اختاروه للطفل. هو الموضوع كبير كده؟
في أسر كتير في مصر بيبقى فيه زي اتفاق ضمني
مين يسمي أول مولود..أو مين يسمي الولد ومين يسمي البنت..ساعات الأهل بيتدخلوا
(ويا حرام الطفل هو اللي بيتحمل لو جه حظه في اسم غير رامي أو ماجد أو ما شابه)..
لي واحد صاحبي ماكانش عارف اسمه الحقيقي لغاية ما دخل المدرسة..لأنهم كانوا
بينادوه في البيت باسم تاني!
طبعا بعض العادات بتدخل في الموضوع زي تسمية
الابن الأكبر باسم الجد أو تسمية البنت باسم الجدة..أو تسمية كل الأطفال بأسماء
تبدأ بنفس الحرف (فكرة بتتنافى مع تميّز وتفرّد كل بني آدم وبتُشبع رغبة عند الأب
والأم في استعراض يعرفوا يجيبوا كام اسم بيبدأ بحرف ال "ضاد"..أكاد أجزم
(حلوة أكاد أجزم دي) إن قرار بعض الأسر إنهم مايخلفوش تاني بيبقى بسبب إنهم
اختاروا حرف صعب مش لاقيين أسماء تاني عليه..وطبعا مش معقول يبقى أول 6 عيال بحرف
ال"ضاد" ويسموا السابع رامي!)...:)
الاسم هو أول علامة في حياتي إني مميز..إني
لما اتولدت ما أخدتش "رقم"..أخدت "اسم" وغالبا الاسم بيحمل
صفة أو مدلول إيجابي العيلة نِفسها إنه يتحقق في الطفل المولود..أول علامة إني
مختلف..متفرد!....
في متحف العلوم في بوسطن فيه عداد بيتغير كل كام ثانية وبيحسب
عدد المواليد وعدد الوفيات في الولايات المتحدة..مجرد أرقام....لكن لما اتولدت
بدأت الهوية بتاعتي لما اختارولي اسمي!
ارتباط الشخصية بالاسم ارتباط كبير للدرجة
اللي فيها بنكره أسماء معينة لأنها بتفكرنا بناس مش بنحبهم..وساعات يبقى الاسم
نفسه حلو لكن آباء يرفضوا يسموه لعيالهم لأنه مرتبط بالشخصيات دي.
عشان كده بأحاول على قد ماقدر إني لو نسيت كل
حاجة عن شخص..إني أفتكر اسمه..
إزاي؟
في كتاب اسمه Boost Your Memory بيقول 4 خطوات بيجمعهم في كلمة nameإزاي تفتكر اسم حد
بتتعرف عليه لأول مرة
N:
notice حاول تسمع الاسم كويس وتلاحظ
حاجة مميزة في الشخص (طوله-لون البشرة-شبه حد-شغله-..) حاجة ممكن تفكرك
A: ask
اسأل الشخص عن اسمه لو نسيته أو ماسمعتوش كويس
أو لو الاسم مش معتاد
M:
mention قول اسم الشخص ده أكتر
من مرة لو أمكن..مافيش حد بيتضايق لما يسمع اسمه
E:
envisage ارسم صورة للشخص ده في بالك تفكرك باسمه (ممثل
معين ليه نفس الاسم-حد صاحبك-صفة بيعبر عنها...)
ونصيحة عامة: إوعى تحاول تخمّن اسم! مش بس
هتتكسف لكن كمان ممكن كل مرة تقابله ييجي في بالك الاسم الغلط!
اسم كل واحد غالي عليه..ماتبخلش على حد تقدر
تسعده بإنك على الأقل ماتنساش اسمه..
