ولا بيفهم في الكهربا

تعامُلنا مع المعلومات أو الشائعات اللي بتخص حد نعرفه غالبًا بيكشف جزء كبير عن الشخص ده، بغض النظر عن مدى صحَّة المعلومة أو إنَّها مجرَّد إشاعة. استبعادنا لصَّحة المعلومة كُوم، وأسباب الاستبعاد دي كوم تاني. يعني مثلًا لو حد قاللي إن حد من أصحابي سرق مليون جنيه وأنا استنكرت واستغربت وقلت إن اللي بيقولوا كده مُغرِضين ووحشين وعايزين يبوَّظوا سمعته بأي طريقة – لحد كده كويس، لكن لو أسبابي هي إن مليون جنيه مبلغ كبير وإن صديقي ده عمره ما يسرق مبلغ كبير كده، يبقى الموضوع مختلف!

من الحاجات المُحزِنة جدًّا إن في بعض المرَّات بيكون استبعادنا لمدى منطقيَّة معلومة أو شائعة عن عمل مليان شر بيكون استبعاد للطريقة! بنستغرب مدى سذاجة تنفيذ الشر ومش بنستبعد فكرته.. يعني يقتل آه، لكن معقولة يقتله بالطريقة دي؟ لأ، هو مش بالعبط ده!

image source

فكرة ’السُمعة‘ فكرة رهيبة ومخيفة جدًا.. شخصيَّة ومواصفات وتوجُّهات وآراء بتتبني وتتلاحظ وتتشاف سنين وسنين وسنين، لغاية ما ييجي يوم وحد يرُد على معلومة دفاعًا عنك ويقول: لأ، فلان مش ممكن يعمل كده.. أو يقولوا: لأ، مش بعيد يكون عمل كده.. وأنا شايف إن ده محك مهم، يمكن يكون أهم شويَّة من صحَّة المعلومة نفسها. 

لكن المصيبة مصيبتين لمَّا تكون السُمعة هي سُمعة الشرِّ الذكي، ويكون ده الدفاع الوحيد عند المدافعين اللي بيقولوا: هو مش عبيط عشان يخونها من غير ما يكون عامل احتياطاته، أو هي مش غبيَّة عشان تسرق من غير ما تشيل البصمات! كما لو إن فكرة الشرّ نفسها وخروجها من الشخص ده مش غريبة، لكن الخناقة على التفاصيل!

زي بالضبط حكاية: اِلحق بسرعة، سيِّد الكهربائي بيعاكس بنت في منطقتكم، فيرد ويقوله: يا عم بس ما تقولش كهربائي! ده لا كهربائي ولا يفهم في الكهربا!

أربع دقايق وتلاتة وتلاتين ثانية

لما أصحابنا بيثقوا فينا لدرجة إنهم بيشاركونا مشاعرهم ومخاوفهم، ساعات كتير بحُسن نيَّة مش بنعرف نرد إزاي. مش بنبقى عايزين نقول معلش ولا عايزين ننصح. بنحاول مانقارنش المشكلة أو التخوُّف أو القلق بحاجات تانية أصعب على اعتبار إن اللي يشوف بلاوي الناس تهون عليه بلوته

 

لكن مرات قليلة قوي اللي بنعرف نساعد، ولما ساعات بنحط نفسنا مكان الصديق اللي بيسمع المشكلة مش بنعرف لو مكانه هانقول إيه

 

اللي بيفضفض ده بيكون عايز يقول حاجات كتير، حاجات عميقة ومهمة وصعبة، لكن يا ترى بيكون عايز يسمع إيه؟ يعني بعد ما قال كل اللي جواه، منتظر يسمع إيه؟

 

listen!

لو فيه أغنية أو مقطوعة موسيقيَّة ينفع أرد بيها على حد فضفض بمشاعره ليَّ، يا ترى إيه المقطوعة دي؟ موَّال يشكي هموم الناس؟ ولا لحن سريع مُبهِج مشجِّع؟ ولا مزِّيكا هادية تطمِّنه؟

 

مقطوعتي المفضَّلة اللي أحب أسمعها لو شاركت حد من أصحابي بمشاعر صعبة هي مقطوعة اسمها 4 دقايق وتلاتة وتلاتين ثانية، ودي مقطوعة ’كتبها‘ جون كيج سنة 1952، وهي عبارة عن تلات أجزاء من غير ولا أي آله ما تعزف فيها! وكانت فكرته وقتها إن ما فيش حاجة اسمها ’صمت كامل‘، حتى لو ما فيش آلات بتعزف. كان عايز يشجَّع الناس تسمع بإنصات لكل حاجة حواليها حتَّى لو ما فيش كلام بيتقال أو لحن بيتعزف

 

الفكرة في المقطوعة دي كان مصدر جدل كبير، وتساؤلات عن إمكانيَّة إعتبار السكوت مزِّيكا، وسواء اتفقنا أو اختلفنا عن مدي موسيقيَّة المقطوعة دي لكن متهيَّالي كل حد بيفضفض بيكون محتاج حد يسمع، حد يسمع في صمت وتركيز شديد، حد يسمع من غير ما يكون بيجهِّز ردود أو نصايح أو تشجيع أو توبيخ

 

أنا كمان محتاج أطلب من كل حد بأفضفض ليه إنه يكون بيسمع بس، من غير ما يكون تحت حِمل إنه يفكَّر في رد

 

 

ولا إنت شايف إيه؟

تعاملنا مع الحواس (زي البصر والسمع) مش دايما بيراعي إن الحواس مش حيادية، مش مجرد أدوات شفافة بتعكس الحقيقة، لأن الحواس مش آلات استقبال بس لكن فيه مساحة من التفسير والشرح اللي بيحصل وبيأثر على اللي بأشوفه

عشان كده مش بنبالغ لما نقول لحد مُجامِل إن عينه حلوة ومش بنستغرب لما نلاقي ناس بتسمع نفس الخطاب السياسي ويوصلوا لحاجات مختلفة (مش بس مختلفة في تفسير اللي بيحصل لكن حتى بيسمعوا نغمات صوت وطريقة أداء كما لو كانوا بيسمعوا خطابين مختلفين)

 

الحواس ممكن تخدع؟  طبعًا، رغم إننا ساعات بنقول إني شفت الخناقة بعيني، على اعتبار إن البصر ما هو إلا أداة شفافة حيادية بتنقل الواقع وبس

 

في تجربة لطيفة طلبوا من مجموعة من الناس إنهم يقيِّموا جودة مناديل ورق معطرة، وكان نوع من الأنواع معطر بريحة الصنوبر، وده خلَّى ريحة المناديل المُعطَّرة حلوة و"فريش" ، لكن الطريف إن الناس حسُّوا إن ملمس النوع ده خشن (برغم إنه كان معمول من نفس نوع المناديل التانية) وكأن حاسة الشم بتنبههم إن الصنوبر مرتبط بالخشونة فضروري الملمس يكون خشن

 

حتى لو شفت الفيديو بنفسي أو سمعت القصة من مصدرها انا محتاج أراعي إن أمور كتير بتتدخل في اللي حواسي بتستقبله، يمكن عشان كده مهم إني أستشير حد بأثق فيه لما أشوف حاجة وأشعر بأهميتها قبل ما آخد قرار مصيري بشأنها، حتى لو كان من خلال سؤال بسيط زي سؤال: ولا إنت شايف إيه؟ 

وأعوض في الفاينالز

الإرادة مرتبطة بالقوَّة، غالبًا بسبب ربط الكلمتين ببعض (في تعبير ’قوَّة الإرادة‘)، لكن للأسف ده ساعات بيوحي بإن الإرادة القويَّة موجودة عند اللي مش بيقع، اللي مش بيغلط، عند الشخص اللي بيذاكر من أول يوم، اللي مش مستنِّي يعوَّض في الفاينالز..

بس الإرادة القويَّة فعلًا هي إرادة الشخص اللي بيقوم لما بيقع.. بينفَّض هدومه ويكمِّل مشواره الصح، حتَّى لو اتأخَّر شويَّة، حتَّى لو اتعطَّل شويَّة، حتَّى لو بطَّأ شويَّة..

أزمة فكرة ’أعوَّض في الفاينالز‘ هي إنَّها في الغالب فكرة بتيجي ’قبل‘ امتحانات الميدتيرم مش بعدها.. يعني بتراودنا الفكرة لما بنلاحظ إن مستوانا بالمعدَّل دي مش هايعدِّينا في الميدتيرم، فبيكون لسان حالنا ’ما خلاص بقى‘، وتيجي بعدها حكاية ’نبقى نعوَّض في الفاينالز‘، وهي دي مشكلة مبدأ ’ماهي خسرانة خسرانة‘!.. وجايز ده يكون معيار الإرادة بجد، إنِّي ما أستنَّاش ’أبتدي على نضافة‘، لكن أقوم من اللي أنا فيه النهاردة وأجتهد..

اللي إرادته أقوى هو اللي مع كل إخفاق بيقوم ويكمِّل ويحاول يكون أفضل، مش اللي بيكسِّل لما يلاحظ إن الظروف مش مساعدة حاليًا فيأجِّل كل المجهود، ويبقى ’يعوَّض في الفاينالز‘!

ولا حاجة اتغيرت

في ذكرى الأحداث العظيمة زي ثورة يناير كتير مننا بيسترجعوا أحلام وآمال للتغيير، ذكريات عن تحمُّس ورجاء وحلم بحاجة أفضل، وساعات كتير بيكون مع الذكريات دي وجع أو حسرة أو شعور بإنُّه يا خسارة ’ما فيش حاجة اتغيَّرت‘.. لكن الحكاية ما خلصتش..

الحكاية ماخلصتش لأن ’الحاجات‘ مش بتتغيَّر ومش هاتتغيَّر.. اللي بيتغيَّر ’الناس‘، والمُخلِصين اللي اتحمِّسوا وحِلموا لبلدهم بالتغيير اتغيَّروا للأحسن بسبب الثورة.. واللي مش مصدَّق يسأل.. يسأل حد يمكن يكون أيِّد الثورة لأوَّل مرَّة في حياته يكون بيشارك برأي سياسي، يسأل ويسمع شهادات الناس..

اللي هايسأل، هايسمع جُمل من نوعية ’دي كانت أحسن حاجة حصلتلي في حياتي‘ أو ’الثورة هي الحدث اللي قلَب كياني‘ أو ’الثورة هي اللي خليتني إنسان مختلف‘، والظاهر كده إن محاولاتنا الأمينة والمُخلِصة في التغيير بتزرع فينا إحنا أمل، والأمل ده بيغيَّرنا ويشكِّلنا ويحرَّرنا كأفراد.. يحرَّرنا من خوف، ويحرَّرنا من تعصُّب، ويحرَّرنا من انحصار في النفس.. الأمل في تغيير الفساد كتير بيشاور جوَّانا على مناطق محتاجة مراجعة، والأمين مننا بيتغيَّر وبيراجع مفاهيمه وقناعاته..

كتير بيقولولنا إن عشان بلد تتغير، الناس محتاجة تتغيَّر، وساعات الجُملة دي بتبقى جملة لئيمة وليها كذا معنى: ممكن معنى إن ’الناس محتاجة تتغير‘ هو إننا ’نغيَّر المسؤولين‘ أو ممكن يكون المعنى هو إنَّنا ’محتاجين نجيب شعب تاني بيقدَّر الديمقراطية‘، أو إننا ’محتاجين الشعب نفسه يبطَّل يبقى فاسد عشان المنظومة تكون مش فاسدة‘، لكن أفتكر إن التغيير الحقيقي هو التغيير اللي بيحصل جوَّايا لمَّا ألاقي نفسي بقيت إنسان أفضل بسبب حِلمي بالتغيير.

الدليل على كده هو إن كتير من اللي شاركوا في حِلم التغيير في الثورة بيعتبروا يناير 2011 هو أفضل مرحلة في حياتهم ’الشخصيَّة‘.. مرحلة كوِّنت فيهم وشكِّلت فيهم وخلِّيتهم أفضل.. والظاهر كده إن شويَّة شويَّة لمَّأ يتغيَّر كل واحد فينا من جوَّة، ممكن يكون أمل التغيير الأوسع أقرب .. وساعتها تأييد حِلم تغيير المنظومة يكون بيغيَّر فينا إحنا مش في ’الحاجات‘، وعشان كده الثورة نجحت جدًّا، مع كل بني آدم اتغيَّر من جوَّاه، حتَّى لو الناس شايفة إن ’ولا حاجة اتغيَّرت‘.. 

ألعن الضلمة ولَّا أولَّع شمعة

المقولة المشهورة اللي بتقول ’بدل ما تلعن الظلام، ولَّع شمعة‘ ساعات بتتفهم على إن المقصود منها إننا ’نكون إيجابيين‘ بدل ما ’ننتقد السلبيات‘، وعلى ما قد ما فيه منطق مقبول في الحكاية دي، إلَّا إنِّي بأميل إني أفهم المقولة دي بمفهوم تاني شويَّة.

الفكرة في توليع الشمعة مش بس عشان دي خطوة إيجابيَّة، لكن عشان الضلمة ’مش بتمشي‘.. مش ’بتتزق‘.. مش ’بتتطرد‘.. الضلمة هي غياب النور، الضلمة هي ’عكس‘ النور، وعشان كده مش محتاجين نحارب الضلمة على قد ما محتاجين ننوَّر.

معروف إن كتير من اللي بتعلِّموا سواقة العجل أو بيتعلِّموا حرفة فيها دِقَّة، بيتعلِّموا كثير عن الحاجات اللي محتاجين ’يتفادوها‘.. فبتخاف وإنت دكتور سنان إنك تخبط عصب معيَّن أو لو بتتعلِّم سواقة عجل إنك تدخل في شجرة، وساعات كل التحذيرات دي بتخلِّي الواحد مش مركِّز غير في الحاجة اللي عايز يتفاداها.. خايف من إنه يخبط في الشجرة، وساعات لأن التركيز الطويل على الشجرة ما بيبقاش قدام الواحد غير إنه للأسف يخبط فيها..

مع إن الضلمة كتير، والظلم والعنف والقُبح كتار برضه، إلَّا إن ساعات المفتاح بيكون في نشْر العدل والجمال والمساواة، أكتر من محاربة الفساد والسوء..

كتير مننا جرَّبوا إنهم بدل ما يفضلوا بيحاولوا ’يخسُّوا‘، ويكون تركيزهم على ’الوزن الوحش‘، يكونوا بيركزوا على ’الرياضة‘ أو ’الأكل الصحي‘، والتركيز على الحاجات دي لوحدها ممكن يخلِّي الوزن أفضل، وممكن كمان تكون دي النتيجة من غير إحباط وسلبيَّة التركيز على ’اللي عايز أبطَّله‘.

في كلِّ مرة أنا بأركز على الخير والجمال، وفي كلِّ مرة بأفضَّل أدِّي وقتي للمحبَّة والقبول والتشجيع، وفي كلِّ مرَّة بأشاور على الصح والكويس، أنا بأولَّع شمعة.. والشمعة البسيطة دي تقدر ’تطرد الضلمة‘ من غير ما أحارب الضلمة وأشتم الضلمة وأدِّي الضلمة كل تركيزي وكل طاقتي..

اللي بيقرا واللي بيرسم واللي بيلعب رياضة أو مزيكا، واللي بيدفع ضرايبه كاملة، واللي بيقول الحق، واللي بيساعد الضعيف، واللي بيشجع، واللي بيرحَّب.. اللي بيعمل عمل من أعمال النور دي هو كمان بيطرد ضلمة، وساعات بيطرد الضلمة دي من غير حتَّى ما يحس.. هروب الضلمة مش بالمطاردة، مش بالتركيز عليها، لكن ساعات بيحصل بمجرَّد ما شمع صغير كتير ينوّر..