شايف إيه؟...مش شايف

قررت أعمل نضارة جديدة..سهلة مش كدة؟ مش قوي..شوف يا سيدي..عملت الكشف وطلعت القراية تقريبا هي هي من ساعة آخر نضارة..فده كويس..بس بما إني قررت أعمل نضارة جديدة فقلت مابدهاش..رحت أشوف إيه الاختيارات اللي قدامي...حاجة بصراحة فظيعة..بص يا سيدي..

طبعا العدسات نفسها فيه حوالي 12 أو 13 اختيار كده...يعني بلاستيك وقزاز وضد الانعكاسات ومقاوم للخدش وفيه معمول من البوليكاربونات ومانع للأشعة الفوق بنفسجية وعدسات بتغير لونها مع الإضاءة المختلفة....اختار يا معلم...أختار إيه؟

ساعدني كده..

حسب احتياجك يا فندم..

ما انا فاهم أكيد..دي المشكلة..أنا مش عارف احتياجي قوي..هو إيه الأحسن؟

مش فكرة أحسن أو أوحش..كل حاجة حسب استخدامك..وكل حاجة ليها سعرها..

تيجي بقى للشنبر ...آه طبعا محتاج شنبر..مش هاتمشي بالعدسات في جيبك يعني..الساعة ممكن لكن النضارة؟

رحت أتفرج على الشنابر..مش محتاج طبعا أشرح عدد الاختيارات...طبعا فيه حاجات تقرف الكلب الأعور الحزين..لكن الاختيارات الكويسة كتير قوي قوي...الفريملس والهاف فريم والفول فريم وكل البراندز ...كنت مع أصحابي..المهم..قسنا وشفنا واستظرفنا بحاجات زي: جميلة دي عليك قوي..فؤاد المهندس بالظبط – المهم تبقى مريحاك..واجعة صوابعك؟ - جرب الشمال وامشي بيها شوية – مافيش حاجة لايقة عليك..انت محتاج راس جديدة ...إلى آخره من كل الاستظراف ده اللي أكيد اللي شغالين في المحلات دي سمعوه 100 مرة...

هو أنا ليه محتار؟ ليه صعب إنك يبقى عندك اختيارات كتير؟ ليه المثل بيقول: عايز تحيره خيره؟

بيقال إن ال 100 سنة اللي فاتوا كانوا بيسموهم عصر البلاستيك لأن البلاستيك دخل في مجالات وصناعات كتيرة ودقيقة وحيوية جدا..في الطيارات والكومبيوتر واللعب والتليفونات وتقريبا كل حاجة...

ال100 سنة اللي جايين هم عصر الاختيار...مش هتقدر تقول لابنك الصح والغلط في كل حاجة..لكن هتقدر تديله أدوات تمكنه إنه يختار...مش هتقدر تحميه من مخاطر الإنترنت والتليفون والشارع..لكن تعرف تربيه إزاي يختار...

ماتقلقش لما تلاقي مستقبل بلدك مش واضح قوي ...يمكن الاختيارات الكتيرة صعبة..لكن الشدة..فكر شوية أكتر وهتعرف تختار..قرارات كتير بلدك هتواجهها..ده محير لكنه صحي..صحي جدا..

هاجيبها فريملس والعدسات بوليكاربونات ضد الانعكاسات ومقاومة للخدش والأشعة فوق البنفسجية ...ماحدش يقوللي :مبروك على النضارة..أكيد مش هتتبسط لو قلتلك: مبروك على العكاكيز...وللا إيه؟

خايف أبقى فاسد

الفساد؟ سمعنا وقرينا وحكينا وطلعنا إشاعات وصدقنا ونفينا وعملنا كل حاجة لقصص كتير عن الفساد..حاجات كتيرة لطيفة هتلاقيها موجودة مشتركة عند كتير مننا لما بنسمع قصص عن الفساد...شوف معايا:

--استنكار رهيب..صح؟ جمل زي لا لا لا..إزاي يسمح لنفسه يعمل كده؟ إزاي جالها نوم؟ ضميره ما أنبهوش؟ إزاي؟ استنكار رهيب وإحساس ببشاعة فكرة إن واحد يستغل منصبه أو عيلته أو فلوسه أو أو...

--استبعاد رهيب (برضه) لفكرة إني أنا شخصيا ممكن أبقى فاسد...أنا عارف إنك هنا هتقوللي: بلاش تبتدي تقول كلنا فاسدين وماحدش فينا كامل وصلح من نفسك الأول و كل الكلام اللي شكله حلو ده..لا مش هقول كده..

اللي عايز أسألهولك هو:

انت فاكر اللي بيبقى فاسد ده بيبقى فاسد في يوم وليلة؟

تفتكر الفاسدين دول بيبقى شكلهم وحش وحواجبهم تخينة وصوتهم خشن وبيضحكوا ضحكات شريرة متقطعة (نيا ها هاها)؟؟

الفكرة اللي نفسي إنك تفكر فيها هي إن معظم الفاسدين بيكونوا فاكرين إنهم بيعملوا حاجة عادية..ماحدش فيهم فاكر إنه بياخد حق مش حقه...مش بيبقى الفاسد من دول قاعد يتآمر إزاي يهبش ويضحك على الناس ويروح ضاحك الضحكة إياها ويشبك إيديه ورا راسه ويرجع كده بالكرسي لورا..وتروح الكاميرا تجيب تابلوه مرسوم فوق راسه في مكتبه!

مش هم دول؟؟

طبعا ممكن يكونوا دول وناس تاني..لو بازوغ من دفع تذكرة المترو واوفر جنيه..إيه رأيك؟...قبل ماتكمل قراية..ماتفتكرش إني باوعظك..عارف ليه؟ لأن مش الحل إنك ماتزوغش!

الفساد مش هو إن ناس تعمل حاجة وحشة...الفساد هو إن السياق يسمح بالحاجة دي بسهولة...الدليل؟ مافيش حد بيدخن في المترو..ليه؟ لأن السياق بيفرض غرامة..

عايز بلدك تحارب الفساد؟ شجع البلد إن يكون فيه قوانين ونظم ماتساعدش ممارسات غلط..ماتوعظش الناس..ماتقوللوش التزويغ من دفع تذكرة المترو حرام! ما توعظش سواق التاكسي عشان مايطلبش فلوس أزيد..لكن ركب عدادات!

في دول كتير الشعوب مش محتاجة تناشد رئيسها إنه ما يترشحش تاني...مش لأن رؤساءها ناس كويسين وطيبين ونفسهم يبقى فيه تداول للسلطة..لأ..لأ خالص..لكن لأن فيه نظم بتمنع إن لو حد فاسد (وحش) يمارس فساده...

خايف تبقى فاسد كمان خمس عشر سنين من غير ماتاخد بالك؟؟ حط لنفسك قوانين وسياقات ونظم من دلوقتي وامشي عليها واطلب من آخرين يساعدوك تطبقها...من دلوقت..أيوة..بلاش تستنى لما تكون في موقع مسئولية وبعد كدة تحط لنفسك قوانين تحكمك..مش هاتعرف..

ماتضحكش على نفسك...الحق نفسك من دلوقت...خاف من الفساد يا...يا كل واحد فينا

آه اتكلم

هو بجد الكلام بيفرق؟ مجرد إنك تفضفض ممكن يخليك أحسن؟

الإجابة: تويتر..الإجابة: فيسبوك..الإجابة: شلة أصحاب على قهوة..بنتين بيحكوا في التليفون لمدة ساعة ...عيان بيشرح للدكتور حاسس بإيه..الكلام عمره ما هيبطل يغير وينور ويطهر..ويقرب ويحبب ويشجع ويدي أمل ويوضح ويساعد..اتكلم...

آه اتكلم

..... الست السمرا المسيحية اللي بتعرج

يعني إية تمييز؟ معناه إيه أنك تضطهد حد؟ وإيه ممكن تكون الأسباب؟

من وجهة نظري بأشوف إن التمييز مش هو إني أتعامل مختلف مع الآخر ومش هو إني أكره حد أو ما احبش حد لأنه مختلف عني..التمييز بيبتدي –في وجهة نظري- قبل كده بشويتين تلاتة..

عارفين بيبتدي امتى؟

بيبتدي من تصنيفي للآخر..فكر كده فيها؟

أنا لما بافترض إني بانتمي للمجموعة الأصلية -أيا كانت المجموعة دي- زي مثلا الرجالة أو الأهلاوية أو الشباب أو القاهريين أو أو أو..بافترض إن اللي برة المجموعة دي هو الآخر..ممكن طبعا بعد الافتراض ده أتعامل كويس مع الناس دي..لكن المشكلة في التصنيف من أساسه..لأني حتى لو اتعاملت كويس مع اللي أنا فاكرهم مختلفين عني باعمل كده من منطلق إني أنا اللي كويس وإني باقبل الآخر –رغم إني عندي اختيار إني ماقبلهومش- لكن لأني إنسان كويس أو معتقداتي بتقوللي أقبل كل الناس فأنا مضطر أقبلهم...

المصيبة في التقسيمة..مش في اللي بعد كده..اللي بعد كده ممكن يكون ممارسات وحشة أو كويسة لكن الفكرة في الدوافع اللي قبل كده...

تعالوا ناخد مثال: هل فيه في بلدك تمييز ضد الستات؟ أو المنتمين لديانة معينة؟ أو اللي ساكنين في أماكن معينة؟ متهيألي ناس كتير ممكن تقول إنه فيه..صح؟

طب هل فيه تمييز ضد الطوال أو القصيرين؟ أو الرجالة اللي بشنب أو من غير؟ ليه مبتسم دلوقتي؟ فهمت الفكرة؟

الفكرة إنك غالبا هتلاقي تمييز لو لقيت تقسيم...لكن لإنك عمرك ما قسمت الناس لقرع وبشعر أو لناس بتحب البني و ناس الأزرق أو لنباتيين أو غيره بتلاقي إن فكرة التمييز على أساس الحاجات دي تكاد تكون ساذجة أو غير واردة...

جايز وانت بتقرا المقال ده تكون هتموت وتعرف الكاتب مسلم وللا مسيحي وللا يهودي وللا لا ديني..ممكن تكون عايز تعرف يا ترى راجل وللا ست.. تمييز؟؟ ها؟ أعتقد كده

يمكن ما يفرقش معاك سنه كام أو بيشجع نادي إيه...

نفسك تعرف لو بتميز ضد ناس معينة وللا لأ؟ فكر في الأسئلة دي:

-لو هتوصف حد لواحد صاحبك هتقوله إيه؟ < الراجل جارنا المسيحي ده > (واخد بالك؟ انت بتوصف بس..انت مارحتش قلتله انت كافر..)

-بتستخدم كلمات زي: بس – حتى – لكن...إزاي؟ < فيه واحد معايا في الشغل مسلم بس متفتح...>

-النكت والهزار رايح لفين...؟

المهم..شكرا على القراية..أحب أوضح إن الفكرة هي في التقسيم..لو بتقسم الناس لعمي ومفتحين أضمنلك إنك عايش في ثقافة فيها تمييز لفئة من الاتنين..وغالبا المشاكل بيحس بيها الأقل عددا أو اللي صوته مش بيوصل...

ستات؟ أطفال؟ رجالة؟ مسلمين؟ مسيحيين؟ شيعة؟ صعايدة؟ دكاترة؟ ذوي احتياجات خاصة؟ فقرا؟ أغنيا؟

مين الآخر؟؟؟؟

لما اتخلقت..انت اتخلقت مميز جدا..ماتسمحش لحد إنه يحدك في مجموعة ويقوللك إن المجموعة دي هي انت وإن اللي مش من المجموعة دي آخر محتاج يا إما تكرهه أو تتعامل معاه كويس..

المرة الجاية لما تحتاج توصف حد جرب تستخدم أوصاف زي: فلان المبتسم..أو فلانة اللي ساعدتنا امبارح...جارنا البشوش..قريبتنا اللي جابتلنا طقم الكوبيات...يمكن ده يكون أحسن شوية من ..... الست السمرا المسيحية اللي بتعرج...